OSHITUKULWA SHOKUKONAKONWA 26
EIMBILO 123 Natu kaleni ovadiinini kuKalunga
Kala omulininipiki, ngeenge pe na oinima imwe oyo uhe udite ko
“Itatu dulu naanaa okuuda ko Omunaenghono adishe.” — JOB 37:23.
ENENEDILADILO
Nokuli nonande katu shii ashishe osho tashi ka ningwa, ohatu dulu okulididimikila omashongo oo twa taalela, ngeenge otwa kala hatu yandje elitulemo kwaashi tu shii, nokukala twe lineekela muJehova.
1. Jehova okwe tu shita hatu dulu okuninga shike, nomolwashike?
JEHOVA okwe tu shita monghedi ikumwifi. Ohatu dulu okudiladila, okulihonga oinima ipe nokutula moilonga osho twe lihonga. Omolwashike e tu shita monghedi ya tya ngaho? Okwa hala tu mone “eshiivo lokushiiva Kalunga,” notu ninge omatokolo e li pandunge eshi hatu mu longele. — Omayel. 2:1-5; Rom. 12:1.
2. (a) Oshike twa pumbwa okukala tu shii kombinga yetu? (Job 37:23, 24) (Tala yo efano.) (b) Omolwashike sha fimana okukala tu shii kutya inatu pumbwa okukala tu shii keshe shimwe?
2 Nonande Jehova okwe tu shita hatu dulu okulihonga oinima ihapu ipe, ope na ihapu oyo tuhe shii. (Lesha Job 37:23, 24.) Diladila koshihopaenenwa shaJob. Jehova okwa li a pula Job omapulo mahapu, naasho osha li sha kwafela Job a ude ko kutya ope na oinima ihapu oyo ehe shii. Eenghundafana odo Jehova a li e na naJob, oda li da kwafela Job a mone kutya okwa pumbwa okukala omulininipiki, nokwa pumbwa okulundulula onghedi yaye yokudiladila. (Job 42:3-6) Nafye otwa pumbwa okukaleka momadiladilo kutya katu shii keshe shimwe. Ngeenge otwa kaleke momadiladilo oshinima osho, otashi ke tu kwafela tu kale ovalininipiki, nokukala tu na elineekelo kutya Jehova ote ke tu hololela ashike osho twa pumbwa okukala tu shii, opo tu dule okuninga omatokolo e li pandunge. — Omayel. 2:6.
Ngaashi Job, okukala tu shii kutya ope na oinima imwe oyo tuhe shii otashi dulu oku tu etela ouwa (Tala okatendo 2)
3. Oshike hatu ka kundafana moshitukulwa eshi?
3 Moshitukulwa eshi, ohatu ka kundafana kombinga yoinima imwe oyo tuhe shii nosho yo kombinga yomashongo oo tashi dulika tu shakeneke, molwaashi tuhe shii oinima oyo. Ohatu ke lihonga yo kutya omolwashike sha fimana okukala tuhe shii oinima yonhumba. Osho hatu ke lihonga, otashi ke tu kwafela tu kale twe lineekela kutya Jehova, “oo a wanenena meshiivo,” ote ke tu lombwela ashike osho twa pumbwa okukala tu shii. — Job 37:16.
KATU SHII KUTYA EXULILO OTALI UYA NAINI
4. She likolelela kuMateus 24:36, oshike tuhe shii?
4 Lesha Mateus 24:36. Katu shii kutya exulilo otali uya naini. Nokuli naashi Jesus a li kombada yedu ka li e shii ‘efiku novili.’a Lwanima, okwa ka lombwela ovayapostoli kutya Jehova, oo ha kwata nawa efimbo, oye “aeke e na oufemba wokuufa” kutya oiningwanima yonhumba otai ka ningwa naini. (Oil. 1:6, 7) Jehova okwa tokola kutya exulilo otali uya naini, ashike fye itatu dulu okukala tu shii kondadalunde kutya otali uya naini.
5. Molwaashi katu shii kutya exulilo otali uya naini, ongahelipi osho tashi dulu oku tu kuma?
5 She likolelela kwaasho Jesus a popya, katu shii kutya otwa pumbwa okuteelela efimbo li fike peni, opo exulilo li uye. Onghee otashi dulika tu kanife elididimiko, ile tu teke omukumo, unene tuu ngeenge otwa kala twa teelela efiku laJehova oule wefimbo lile. Ile otashi dulika yo tu teke omukumo, ngeenge ovapambele vetu, ile ovanhu vamwe tave tu sheke molwaashi exulilo inali uya natango. (2 Pet. 3:3, 4) Otashi dulika yo tu diladile kutya, ngeenge otwa kala tu shii kondadalunde kutya exulilo otali uya naini, otashi ke tu kwafela tu kale ovalididimiki, noitatu ka teka unene omukumo ngeenge vamwe tave tu sheke.
6. Omolwashike shiwa okukala tuhe shii kutya exulilo otali uya naini?
6 Molwaashi Jehova ine tu lombwela kondadalunde kutya exulilo otali uya naini, otu na omhito yokuulika kutya ohatu mu longele, molwaashi tu mu hole notwe mu lineekela. Otwa hala okulongela Jehova fiyo alushe, ndele inatu hala ashike oku mu longela fiyo osheshi exulilo le uya. Ponhele yokukala hatu diladila unene kutya efiku laJehova otali uya naini, otwa pumbwa okukala hatu diladila koinima iwa oyo tai ka ningwa, ngeenge “efiku laJehova” ole uya. Osho otashi ke tu kwafela opo tu ehene popepi elela naJehova, tu mu lineekele notu ninge ngaashi hatu dulu opo tu mu hafife. — 2 Pet. 3:11, 12.
7. Oshike tu shii?
7 Osha fimana okukala hatu diladila kwaasho tu shii. Otu shii kutya omafiku axuuninwa okwa hovela mo 1914. Jehova okwe tu pa omaxunganeko opaMbiibeli oo taa yandje oumbangi kutya mo 1914 omo tamu ka hovela omafiku axuuninwa. Okwe tu pa yo ouyelele muhapu u na sha nanghee ounyuni tau ka kala u li konima yodula oyo. Oshidjemo, otwa tomhwa kutya “efiku laJehova oli li popepi.” (Sef. 1:14) Otu shii yo oilonga oyo Jehova a hala tu longe; okwa hala tu lombwele vahapu ngaashi tashi shiiva kombinga ‘yonghundana iwa yOuhamba.’ (Mat. 24:14) Onghundana oyo otai udifilwa moilando 240 lwaapo, momalaka e dulife 1 000. Inatu pumbwa okukala tu shii ‘efiku novili’ opo tu dule okukufa ombinga nouladi moilonga oyo ya fimana.
KATU SHII NGHEE JEHOVA TA KA KATUKA
8. “Oilonga yaKalunga kashili” otai ulike kushike? (Omuudifi 11:5)
8 Haalushe tu shii “oilonga yaKalunga kashili.” (Lesha Omuudifi 11:5.) Outumbulilo oo otau ulike kwaasho Jehova ha ningifa, ile ha pitike shi ningwe, opo a wanife po ehalo laye. Itatu dulu okukala tu shii filufilu kutya omolwashike tashi dulika Jehova a pitika oshinima shonhumba shi ningwe, ile kutya oshike ta ka ninga po opo e tu kwafele. (Eps. 37:5) Ombiibeli oya yelekanifa okukala tuhe shii oilonga yaKalunga kashili nokukala tuhe shii nghee okaana haka kulu moshidalelo shaina. Nokuli novanongononi kave udite ko filufilu kutya okaana ohaka kulu ngahelipi moshidalelo shaina. Sha faafana, katu shii filufilu nghee Jehova ta ka katuka.
9. Molwaashi katu shii filufilu kutya Jehova ota ka katuka ngahelipi, omashongo amwe elipi tashi dulika tu shakeneke?
9 Ngeenge katu shii filufilu kutya Jehova ote ke tu kwafela ngahelipi, otashi dulika tu ongaonge okuninga omatokolo onhumba. Otashi dulika tu ongaonge okuninga omaliyambo opo tu tamunune mo oukalele wetu, ngaashi okukaleka onghalamwenyo yetu paunafangwa, ile okutembukila oko ku na omhumbwe inene yovaudifi vOuhamba. Ile otashi dulika tu lipule ngeenge Kalunga okwe tu hokwa ngoo, eshi inatu hanga omalalakano etu e na sha noilonga yaye, inatu mona oidjemo iwa eshi twa longa noudiinini moukalele, ile twa taalela omashongo moprojeka yonhumba yehangano.
10. Molwaashi katu shii filufilu kutya Jehova ota ka katuka ngahelipi, omaukwatya elipi a fimana hatu dulu okukulika?
10 Okukala tuhe shii filufilu kutya Jehova ota ka ninga po shike otashi ke tu kwafela tu kulike omaukwatya a fimana, ngaashi elininipiko. Ohashi tu kwafele tu ude ko kutya Jehova oye alushe e shii osho sha denga mbada. (Jes. 55:8, 9) Ohashi tu kwafele yo tu kale twe lineekela muJehova filufilu kutya ota ka ungaunga noinima monghedi ya denga mbada. Ohatu tange Jehova, ngeenge twa mona oidjemo iwa moukalele, ile moprojeka yonhumba yehangano. (Eps. 127:1; 1 Kor. 3:7) Nongeenge otwa mono oidjemo oyo twa li inatu teelela, otwa pumbwa okudimbuluka kutya Jehova oku shii keshe shimwe. Ngeenge otwa ningi ngaho, otashi ke tu kwafela tu kaleke po ombili yetu. (Jes. 26:12) Ohatu ningi ngaashi hatu dulu, notwe lineekela kutya Jehova ote ke tu kwafela. Otwa tomhwa kutya ota dulu oku tu pa ewiliko olo twa pumbwa, nokuli nonande ite shi ningi pashikumwifilonga, ngaashi a li a ninga monakudiwa. — Oil. 16:6-10.
11. Oinima ya fimana ilipi tu shii?
11 Otu shii kutya Jehova omunahole alushe, omuyuki noku na ounongo. Otu shii kutya okwa lenga neenghono osho hatu mu ningile nosho yo osho hatu ningile ovaitaveli vakwetu. Notu shii kutya Jehova ota ka pa alushe ondjambi ovo ve li ovadiinini kuye. — Heb. 11:6.
KATU SHII OSHO TASHI KA NINGWA PO MEFIKU LOMONGULA
12. She likolelela kuJakob 4:13, 14, oshike tuhe shii?
12 Lesha Jakob 4:13, 14. Katu shii kutya oshike tashi ke tu ningilwa mefiku lomongula. Monghalelo ei yoinima, otwa teelela okuhangika ‘komafimbo madjuu nokoiningwanima yombadilila.’ (Omuud. 9:11) Oshidjemo, ihatu kala tu shii ngeenge osho twa hala oku ka ninga otashi shiiva ngoo, ile ngeenge ohatu ka kala ngoo tu na omwenyo opo tu dule oku shi ninga.
13. Okukala tuhe shii osho tashi ka ningwa monakwiiwa otashi dulu oku tu kuma ngahelipi?
13 Otashi dulika shi kale shidjuu okulididimikila eyeleko lonhumba, ngeenge katu shii osho tashi ka ningwa monakwiiwa. Ngahelipi mbela? Otashi dulika tu hovele okukala hatu diladila kombinga yaasho tashi dulu okuningwa po, naasho otashi dulu okukufa po ehafo letu. Oiningwanima yombaadilila otai dulu oku tu ningifa tu kale twa nyika oluhodi, ile twa handuka. Nongeenge osho twa li twa teelela shi ningwe inashi ningwa, otashi dulika tu kale tu udite nai notwa teka omukumo. — Omayel. 13:12.
14. Ehafo letu lashili ole likolelela kushike? (Tala yo omafano.)
14 Kashi na nee mbudi kutya oshike tashi ningwa monghalamwenyo yetu, ohatu dulu okuulika kutya ohatu longele Jehova molwaashi tu mu hole. Omahokololo Ombiibeli otaa ulike kutya inatu pumbwa okukala twa teelela Jehova e tu amene komaupyakadi etu aeshe nosho yo kutya iha unganeke komesho yefimbo oiningwanima oyo tai ka ningwa monghalamwenyo yetu. Oku shii kutya ehafo letu inali likolelela kokukala tu shii osho she tu tuvikililwa monakwiiwa. Ndele ponhele yaasho, ole likolelela kokukonga ewiliko kuye nosho yo kokudulika kuye. (Jer. 10:23) Ngeenge hatu kongo ewiliko kuye, eshi hatu ningi omatokolo, otwa fa hatu ti: “Ngeenge Jehova e shi hala, ohatu kala nomwenyo, ndele hatu ningi eshi naashinya.” — Jak. 4:15.
Okukonga ewiliko kuJehova nokudulika kuye otashi ke tu amena (Tala okatendo 14-15)b
15. Otu shii shike kombinga yonakwiiwa?
15 Katu shii kutya efiku keshe otali ka kala la tya ngahelipi, ashike otu shii kutya Jehova okwe tu udanekela omwenyo waalushe, kutya nee omeulu, ile okombada yedu. Otu shii kutya ita dulu okupopya oipupulu nosho yo kutya kape na osho tashi mu imbi a wanife po omaudaneko aye. (Tit. 1:2) Oye ashike ta dulu ‘okuholola kehovelo inya tai ke uya, oikulu ei yonale fimbo inai ningwa.’ Oinima aishe oyo a li a xunganeka pefimbo lOmbiibeli oya li ya ningwa shili nosho yo aishe oyo a xunganeka tai ka ningwa monakwiiwa, otai ka ningwa shili. (Jes. 46:10, KB-13) Otu shii kutya kape na osho tashi dulu okwiimba Jehova a kale e tu hole. (Rom. 8:35-39) Ote ke tu pa ounongo, ehekeleko nosho yo eenghono odo twa pumbwa opo tu lididimikile keshe osho hatu ka taalela. Ohatu dulu okukala noushili kutya Jehova ote ke tu kwafela note ke tu nangeka noupuna. — Jer. 17:7, 8.
ITATU DULU OKUUDA KO FILUFILU KUTYA JEHOVA OKU TU SHII SHI FIKE PENI
16. Ngaashi tashi popiwa mEpsalme 139:1-6, Jehova oku na eshiivo lilipi likumwifi olo itatu dulu okuuda ko filufilu?
16 Lesha Epsalme 139:1-6. Omushiti wetu oku tu shii nawanawa. Oku shii kutya omolwashike hatu diladila monghedi yonhumba nosho yo kutya omolwashike tu na omaliudo onhumba. Oku shii osho hatu popi naasho shi li momitima detu. Oku shii yo keshe shimwe osho hatu ningi nosho yo kutya omolwashike hatu shi ningile. Ngaashi ohamba David ya popya, Jehova okwe lilongekida alushe oku tu kwafela nota dulu oku tu kwafela. Kashitunhula tuu eshi Omwene Omunamapangelo wEshito alishe, oo e li Omushiti weulu nedu omunaenghono, ha kala e na ko nasha nafye! David okwa ti: “Eshiivo la tya ngaho olikumwifi neenghono kwaame. Olihapu unene kwaame okuuda ko.” — Eps. 139:6, esh.
17. Omolwashike tashi dulika shi kale shidjuu kufye okukala twe lineekela kutya Jehova oku tu shii nawa?
17 Oinima ngaashi onakudiwa yetu, eputuko, ile elongelokalunga olo twa li tu li nale otai dulu oku shi ningifa shidjuu kufye okutala ko Jehova e li Tate omunahole, oo e na ko nasha nafye. Ile otashi dulika tu kale tu udite kutya omapuko oo twa ninga monakudiwa omai neenghono, na Jehova ita ka kala a hala okukala e tu shii, nota ka kala e li kokule nafye. Nokuli na David okwa li ha kala e udite ngaho omafimbo amwe. (Eps. 38:18, 21) Ile otashi dulika omunhu, oo ta kendabala okulundulula onghedi yaye yokukalamwenyo nokukala metwokumwe nomifikamhango daKalunga, e lipule kutya, ‘Ngeenge Kalunga oku shii nge nawa, omolwashike a teelela ndi efe po okulonga oshinima shonhumba osho shidjuu kwaame oku efa po?’
18. Ouwa ulipi hatu mono ngeenge otwa kala twa itavela kutya Jehova oku tu shii nawa e tu dule? (Tala yo omafano.)
18 Ohatu dulu okukala tu na elineekelo kutya Jehova oku tu shii nawa e tu dule nosho yo kutya ota dulu okumona omaukwatya etu mawa oo tuhe wete. Jehova oha mono omapuko oo hatu ningi, ashike oku shii kutya otwa hala okukala ovanhu va tya ngahelipi; oku tu hole. (Rom. 7:15) Ngeenge otwe lihongo kutya Jehova oku shii kutya ohatu dulu okukala ovanhu va tya ngahelipi, otashi ke tu pa eenghono, opo tu mu longele noudiinini notu kale twa hafa.
Jehova ohe tu kwafele tu pameke eitavelo letu momaudaneko atunhula oo a undaneka. Kungaho ohe tu kwafele tu lididimikile omaupyakadi oo taa dulu okuholoka po ombadilila (Tala okatendo 18-19)c
19. Oshike tu shii filufilu kombinga yaJehova?
19 Otu shii kutya Jehova oye ohole. Katu na omalimbililo moshinima osho. (1 Joh. 4:8) Otu shii kutya omifikamhango daye douyuki otadi ulike kutya oku tu hole nokwa hala tu kale tu na onghalamwenyo ya denga mbada. Otu shii kutya Jehova okwa hala tu ka mone omwenyo waalushe. Okwa yandja ekuliloyambo opo osho shi ka dule okuningwa. Oshali yekuliloyambo otai tu shilipaleke kutya ohatu dulu okupondola nonande inatu wanenena. (Rom. 7:24, 25) Notu shii kutya “Kalunga oku dule omitima detu noku shii oinima aishe.” (1 Joh. 3:19, 20) Jehova oku wete ashishe osho tashi tu ningilwa, noku shii kutya ohatu dulu okulonga ehalo laye.
20. Oshike tashi dulu oku tu kwafela opo tuha kale hatu lipula unene kombinga yoinima oyo tuhe shii?
20 Jehova ohe tu lombwele ashishe osho twa pumbwa okukala tu shii. Onghee inatu pumbwa okukala hatu lipula kombinga yaasho tuhe shii, ponhele yaasho, otwa pumbwa okuyandja elitulemo kwaasho sha fimana. Ngeenge otwa ningi ngaho, ohatu ka ulika kutya otwe lineekela filufilu muJehova, “oo e na eshiivo la wanenena.” (Job 36:4) Nonande ope na oinima imwe oyo tuhe udite ko paife, otu shii kutya Jehova ota ka twikila oku tu honga fiyo alushe osho tuhe shii. Otwa teelela nodjuulufi oku ka twikila okulihonga oinima ipe kombinga yaKalunga ketu Munenenene. — Omuud. 3:11.
EIMBILO 104 Oshali yaKalunga yomhepo iyapuki
b OMASHANGELO OMAFANO: Xe omudali nomonamati waye tava pakele okandjato kopaulumomhumbwe, opo oukwaneumbo wavo u kale we lilongekida, ngeenge opa holoka onghalo yopaulumomhumbwe.
c OMASHANGELO OMAFANO: Omumwatate, oo ta piti momashongo, ta diladila kombinga yonghalamwenyo itunhula oyo ta ka kala e na mounyuni mupe.