Nghee eongalo tali dulu okuhopaenena onghedi omo Jehova ha tale ko ovo va nyona

1. Jehova okwa hala ovanhu aveshe va ninge shike?

JEHOVA okwe tu shita tu na emanguluko lokuninga omatokolo. Ohatu ningi omatokolo efiku keshe. Etokolo la fimanenena, olo twa ninga monghalamwenyo yetu, osheshi twa tokola okuliyapulila Jehova nokuninga oshitukulwa shoukwaneumbo waye. Jehova okwa hala keshe umwe a ninge sha faafana. Omolwashike? Omolwaashi Jehova oku hole ovanhu nokwa hala va kale va hafa. Okwa hala va kale ve na ekwatafano lopofingo naye nova kale nomwenyo fiyo alushe. — Deut. 30:​19, 20; Gal. 6:​7, 8.

2. Mbela Jehova oha kala e uditile ngahelipi ovanyoni ovo inave lidilulula? (1 Johannes 2:1)

² Jehova iha fininike ovanhu ve mu longele. Okwa efa keshe umwe a hoolole osho ta ka ninga po. Ongahelipi ngeenge Omukriste, oo a ninginifwa, okwa nyono sha kwata moiti? Oku na okukufwa mo meongalo, ngeenge ine lidilulula. (1 Kor. 5:13) Ashike nonande omunhu oo okwa kufwa mo meongalo, Jehova okwa halelela omunhu oo e lidilulule noku kale vali e na ekwatafano lopofingo naye. Etomheno la fimana kutya omolwashike Jehova a yandja ekulilo ololo kutya okwa hala okudimina po aveshe ovo ve lidilulula. (Lesha 1 Johannes 2:1.) Kalunga ketu omunahole okwa hala ovanyoni aveshe ve lidilulule. — Sak. 1:3; Rom. 2:4; Jak. 4:8.

3. Oshike hatu ka kundafana moshitukulwa eshi?

³ Jehova okwa hala tu kale tu na etaleko la fa laye, li na sha nokunyona nosho yo ovo va nyona. Moshitukulwa eshi, ohatu ka kundafana nghee hatu dulu okuninga ngaho. Eshi to lesha oshitukulwa eshi, didilika (1) nghee enyono la kwata moiti la li la ungaungiwa nalo meongalo pefimbo lovayapostoli, (2) osho omuyapostoli Paulus a li a lombwela eongalo li ninge, ngeenge omunyoni e lidilulula nosho yo (3) nghee Jehova ha kala e uditile ovo va nyona enyono la kwata moiti.

NGHEE ENYONO LA KWATA MOITI LA LI LA UNGAUNGIWA NALO MEONGALO PEFIMBO LOVAYAPOSTOLI

4. Oshike sha li sha ningwa po meongalo lomuKorinto, pefimbo lovayapostoli? (1 Ovakorinto 5:​1, 2)

⁴ Lesha 1 Ovakorinto 5:​1, 2. Eshi Paulus a li molweendo laye olutitatu loutumwa, okwa li a uda oshinima shinyanyalifa osho sha li tashi ningwa meongalo olo opo la li la totwa po muKorinto. Omumwatate umwe meongalo olo, okwa li ha i moluhaelo nomukulukadi waxe. Oshinima osho osha li shitilifa neenghono ‘noina shi ningwa nokuli nokovanhu vomoiwana.’ Ashike eongalo ola li le lipwililikila oshinima osho, nola pitika omumwatate a twikile okukala e li meongalo. Otashi dulika vamwe meongalo va li tava diladila kutya otava ulike onghenda ngaashi Jehova. Ashike, Jehova ina pitika elihumbato inali koshoka li kale moshiwana shaye. Omulumenhu oo okwa li ta nyono po edina liwa leongalo omolwelihumbato laye lii. Otashi dulika a li a nwefwa mo nai Ovakriste ovo va li tava endafana naye. Mbela Paulus okwa li a lombwela eongalo li ninge po shike?

5. Paulus okwa li a lombwela eongalo li ninge shike, nokwa li a hala okutya shike? (1 Ovakorinto 5:13) (Tala yo efano.)

⁵ Lesha 1 Ovakorinto 5:13. Jehova okwa li a nwefa mo Paulus a shangele eongalo olo onhumwafo, kutya omunyoni oo ine livela ombedi oku na okukufwa mo meongalo. Ovakriste ova li ve na okuungaunga naye ngahelipi? Paulus okwa li e va lombwela va “efe po okweendafana” naye. Osho osha hala okutya shike? Paulus okwa li a yelifa kutya, osho osha kwatela mo ‘okuhalya naye nandenande.’ (1 Kor. 5:11) Ngeenge to li pamwe nomunhu, ohashi kala shipu okuya meenghundafana naye. Osho osha yela kutya, Paulus okwa li a hala okutya eongalo kala li li na okweendafana nomulumenhu oo. Osho osha li tashi ka amena eongalo liha nwefwe mo koikala yaye ii. (1 Kor. 5:​5-7) Shikwao vali, ngeenge ova kala itava endafana nomulumenhu oo, otashi dulu oku mu kwafela a didilike kutya osho a ninga osha puka, notashi dulika shi ke mu linyengife e lidilulule.

6. Onhumwafo yaPaulus oya li ya kuma ngahelipi eongalo nosho yo omunyoni?

⁶ Konima eshi Paulus a tumina Ovakriste vomuKorinto onhumwafo, okwa li te lipula nghee eongalo la li tali ke linyenga. Diva konima yaasho, Titus okwa li a lombwela Paulus onghundana iwa. Eongalo ola li la shikula omayele aye, nola kufa mo omunyoni meongalo. (2 Kor. 7:​6, 7) Konima yeemwedi donhumba, eshi eongalo la tula moilonga omayele aPaulus, omunyoni okwa li e lidilulula. Okwa li a lundulula elihumbato laye nokwa li a hovela okudulika komifikamhango daJehova douyuki. (2 Kor. 7:​8-11) Mbela Paulus okwa li ta ka lombwela eongalo li ninge po shike?

NGHEE EONGALO LA LI LI NA OKUUNGAUNGA NOMUNYONI OO E LIDILULULA

7. Eshi omunyoni a kufwa mo meongalo, osha eta oidjemo iwa ilipi? (2 Ovakorinto 2:​5-8)

⁷ Lesha 2 Ovakorinto 2:​5-8. Paulus okwa ti: ‘Epukululo olo a li a pewa kuvahapu ola wana.’ Osho osha hala okutya, eshi omulumenhu oo a kufwa mo meongalo, oshe mu linyengifa a mone kutya okwa pumbwa okulidilulula. — Heb. 12:11.

8. Paulus okwa li vali a lombwela eongalo li ninge shike?

⁸ Paulus okwa li vali a lombwela eongalo li ‘dimine po nehalo liwa nokuhekeleka’ omumwaxe oo a nyona. Ove na yo ‘oku mu shilipaleka kutya ove mu hole.’ Paulus okwa li a hala eongalo li ninge shihapu shihe fi ashike oku mu tambula ko meongalo. Okwa li a hala va ulikile omulumenhu oo kutya ove mu dimina po nove mu hole, okupitila meendjovo, melihumbato nomeenghatu davo. Osho osha li tashi ka ulikila omumwatate oo kutya ova hafa, eshi a alukila keongalo.

9. Mbela omolwashike tashi dulika vamwe va li tava ongaonga okudimina po omunyoni oo a li e lidilulula?

⁹ Mbela vamwe meongalo ova li tava ongaonga okutambula ko omunyoni oo e lidilulula? Ehokololo inali popya kombinga yaasho, ashike otashi dulika sha li ngaho. Vamwe otashi dulika va li va handuka natango, omolweenghatu dii odo a li a katuka. Ovo va li meongalo ova li va longa noudiinini, opo va dulike keemhango daJehova. Onghee ova li ve udite shihe li pauyuki, eshi omulumenhu oo e lidilulula a alukila keongalo. (Yelekanifa Lukas 15:​28-30.) Omolwashike sha li sha fimana eongalo li ulikile ohole omumwaxe oo a li e lidilulula?

10-11. Oshike tashi dulu okuningwa po, ngeenge ovakulunhuongalo ova kala inava dimina po omunyoni oo e lidilulula?

¹⁰ Diladila ashike kwaasho sha li tashi dulu okuningwa po ngeno ovakulunhuongalo kava li va efa omulumenhu oo e lidilulula a alukile meongalo. Okwa li ta dulu okukala a ‘wililwa po neenghono koluhodi.’ Okwa li ta dulu okukala e udite kutya ke na fiku a alukile keongalo. Osha li yo nokuli tashi dulu oku mu ningifa a efe po okuninga eenghendabala dokweehena popepi naKalunga.

¹¹ Naasho shinyikifa oluhodi, ngeenge ovamwatate novamwameme ova kala inava dimina po omunyoni oo e lidilulula, ova li tava ka tula ekwatafano lavo naJehova moshiponga. Omolwashike? Omolwaashi kungaho, itava ka hopaenena Jehova, oo ha dimine po ovanyoni ovo ve lidilulula, ndele ponhele yaasho, otava ka hopaenena Satana, oo ehe na onghenda. Kungaho, Satana ote ke va longifa, va teye omukumo omumwatate, opo a efe po okulongela Jehova. — 2 Kor. 2:​10, 11; Ef. 4:27.

12. Ongahelipi eongalo la li tali ka hopaenena Jehova?

¹² Ongahelipi eongalo lomuKorinto la li tali ka hopaenena Jehova, ponhele yokuhopaenena Satana? Omokudimina po ovo ve lidilulula, ngaashi Jehova ha ningi. Didilika osho ovashangi vamwe vOmbiibeli va popya kombinga yaJehova. David okwa ti: ‘Oku nonghedi iwa, noku yadi ekufilo.’ (Eps. 86:​5, KB-13) Mika okwa shanga a ti: “Olyelye ou e ku fa, Kalunga, ho dimi po owii, ndele to koya po omatauluko?” (Mika 7:​18, KB-13) Jesaja okwa shanga ta ti: “Omudinikalunga na efe ondjila yaye nomukolokoshi omadiladilo aye, ye a alukile Omwene, opo nee Ye ote mu file onghenda; ye na ehene kuKalunga ketu, osheshi puye ope nedimepo lomatimba mahapu.” — Jes. 55:​7, KB-13.

13. Omolwashike sha li sha yuka, opo omulumenhu oo e lidilulula a alulilwe meongalo, nopehe na okwoongaonga? (Tala oshimhungu “Omulumenhu womuKorinto okwa li a alulilwa naini meongalo?”)

¹³ Opo eongalo lomuKorinto li hopaenene Jehova, ola li li na okutambula ko omulumenhu oo a li e lidilulula noku mu ulikila kutya ove mu hole. Paulus okwa li e va lombwela kutya, ngeenge ova dimine po omulumenhu oo e lidilulula, otava ka ulika kutya ohava “dulika moinima aishe.” (2 Kor. 2:9) Nonande okwa li ashike a kufwa mo meongalo oule weemwedi dinini, outekuduliko oo a li a pewa, owa li we mu linyengifa e lidilulule. Onghee ovakulunhuongalo kava li ve na okwoongaonga oku mu alulila meongalo.

NGHEE HATU DULU OKUHOPAENENA OUYUKI NOSHO YO ONGHENDA YAJEHOVA

14-15. Oshike twe lihonga shi na sha nanghee omunyoni a li a ungaungiwa naye muKorinto? (2 Petrus 3:9) (Tala yo efano.)

¹⁴ Ehokololo li na sha nanghee omunyoni a li a ungaungiwa naye muKorinto, ola shangwa “omolwehongo letu.” (Rom. 15:4) Mehokololo olo, ohatu lihongo mo kutya Jehova iha pitike moshiwana shaye mu kale ovo tava nyono sha kwata moiti. Vamwe otashi dulika va diladile kutya, molwaashi Jehova ‘omunanghenda’ ota ka pitika ovanyoni ovo inave lidilulula va kale meongalo, ashike Jehova hasho ha ulike onghenda ngaho. Nonande Jehova omunanghenda, iha tambula ko elihumbato keshe, nomifikamhango daye di na sha naasho sha puka nosho yo osho shi li mondjila, ihadi lunduluka. (Jud. 4) Ngeenge Jehova okwa pitike ovo inave lidilulula va kale meongalo, osho otashi ka kuma aveshe, ovo ve li meongalo. — Omayel. 13:20; 1 Kor. 15:33.

¹⁵ Otwe lihonga kutya Jehova ina hala nande oumwe a hanaunwe po. Okwa hala okuxupifa ovanhu. Oha file onghenda ovo va lundulula elihumbato lavo nova hala okupanga oukaume naye. (Hes. 33:11; lesha 2 Petrus 3:9.) Eshi omulumenhu womuKorinto e lidilulula nokulundulula oikala yaye ii, Jehova okwa li a longifa Paulus a lombwele eongalo kutya oli na oku mu dimina po noku mu tambula ko.

16. Mbela ou uditile ngahelipi Jehova, konima eshi we lihonga kombinga yaasho sha li sha ningwa po muKorinto?

¹⁶ Onghedi omo omunyoni a li a ungaungiwa naye muKorinto, oye tu kwafela tu mone kutya Jehova omunahole noha katuka pauyuki. (Eps. 33:5) Mbela osho itashi ku linyengifa u kale wa hala okuhambelela Kalunga? Atushe ovalunde, notwa pumbwa ediminepo laye. Ohatu pandula Jehova omolwekuliloyambo olo a yandja, opo a dule oku tu dimina po. Mbela osho itashi hekeleke tuu okushiiva kutya Jehova oku tu hole nokwa hala tu kale twa hafa fiyo alushe!

17. Oshike hatu ka kundafana moitukulwa tai shikula ko?

¹⁷ Ndele mbela ovo va nyona ove na okuungaungiwa navo ngahelipi kunena? Ongahelipi ovakulunhuongalo tava dulu okuhopaenena ohole yaJehova, eshi tave va kwafele ve lidilulule? Eongalo oli na okulinyenga ngahelipi, ngeenge ovakulunhuongalo ova tokola okukufa mo, ile okwaalulila umwe meongalo? Omapulo oo ohatu ke a kundafana moitukulwa tai shikula ko.