Hopaenena ouladi waJesus wokuudifa

1. Oukwatya umwe ulipi wa yoolola ko oshiwana shaJehova kounyuni?

OVAPIYA vaJehova ova yooloka ko kwaavo have liti kutya Ovakriste, molwaashi ohava longo nouladi moukalele. (Tit. 2:14) Ashike omafimbo amwe, otashi dulika u mone shidjuu okuudifa nouladi. Otashi dulika u kale u udite ngaashi omumwatate oo ha longo noudiinini e li omukulunhuongalo. Okwa ti: “Omafimbo amwe ihandi kala ndi na ehalo lokuudifa.”

2. Oshike tashi dulu oku tu ningifa omafimbo amwe tuha kale hatu longo nouladi moukalele?

² Otashi dulika tu hafele unene okulongela Jehova meenghedi dimwe shi dulife ngeenge hatu udifa. Omolwashike? Omolwaashi otashi dulika tu mone oidjemo diva, ile tu kale tu udite twa pondola sha, ngeenge twa kufa ombinga mokutunga nokukaleka monghalo iwa omatungo ehangano, twa kwafela ovamwatate ovo va dengwa koiponga yopaushitwe, ile twe va twa omukumo. Ngeenge hatu longo pamwe novamwatate, ohatu longo nombili nohatu ulikilafana ohole, notu shii kutya ohava kala va pandula osho twe va ningila. Mepingafano naasho, otashi dulika twa udifa oule womido moshitukulwa sha faafana noina tu mona mo oidjemo iwa. Ile otashi dulika ovanhu inava tambula ko etumwalaka letu. Otu shii yo kutya eshi exulilo tali ende tali ehene popepi, ohatu ka patanekwa. (Mat. 10:22) Oshike tashi dulu oku tu kwafela tu kale hatu longo nouladi moukalele?

3. Oshike hatu lihongo kombinga yaJesus mefaneko olo tali hangwa muLukas 13:​6-9?

³ Ohatu dulu okulihonga koshihopaenenwa shaJesus shi na sha nanghee hatu dulu okulonga nouladi moilonga yokuudifa. Eshi Jesus a li kombada yedu, ka li a efa po okukala omuladi. Okwa li nokuli a longa noudiinini, opo a tamunune mo oukalele waye. (Lesha Lukas 13:​6-9.) Jesus okwa li a yelekanifa oilonga yaye naayo yomulongi woshikunino, oo a li a longa noudiinini oule womido nhatu, opo a file oshisho omukwiyu waye, ashike kawa li wa ima sha. Sha faafana, Jesus okwa kala ta udifile Ovajuda oule womido nhatu, ashike vahapu vomuvo kava li va ninga ovahongwa vaye. Ndele nande ongaho, ngaashi ashike omulongi woshikunino ka li a efa po okufila oshisho omukwiyu waye, Jesus ka li a efa po okuudifila ovanhu, ile a kale ehe na vali ouladi. Ponhele yaasho, Jesus okwa li a longa noudiinini, opo a udifile Ovajuda, e va kwafele va tambule ko onghundana iwa.

4. Ohatu ka kundafana oinima ine ilipi oyo hatu lihongo kuJesus?

⁴ Moshitukulwa eshi, ohatu ka konakona nghee Jesus a li a ulika ouladi, unene tuu meemwedi hamano daxuuninwa doukalele waye. Ngeenge otwe lihongo osho Jesus a li a honga noku mu hopaenena, otashi ke tu kwafela tu kale ovaladi kunena. Paife ohatu ka konakona oinima ine oyo hatu lihongo kuJesus: (1) Okwa li ha yandje elitulemo kokulonga ehalo laJehova, (2) okwa li e udite ko omaxunganeko Ombiibeli nokwa katuka metwokumwe nao, (3) okwa li e na elineekelo kutya Jehova ote ke mu kwafela nosho yo (4) okwa kala e na etaleko liwa kutya ovanhu otava ka pwilikina kuye.

OKWA LI A YANDJA ELITULEMO KOKULONGA EHALO LAJEHOVA

5. Jesus okwa li a ulika ngahelipi kutya okwa li ha yandje elitulemo kokulonga ehalo laKalunga?

⁵ Jesus okwa li ha udifa nouladi “onghundana iwa yOuhamba,” molwaashi okwa li e shii kutya Kalunga okwa hala a longe oshilonga osho. (Luk. 4:43) Jesus okwa li a pitifa komesho oukalele monghalamwenyo yaye. Nokuli nomeemwedi daxuuninwa doukalele waye, okwa li ha udifile ovanhu “moilando noilando nosho yo momikunda nomikunda.” (Luk. 13:22) Okwa li yo a deula ovahongwa vahapu va kale hava udifa onghundana iwa ngaashi ye. — Luk. 10:1.

6. Ongahelipi oilonga yokuudifa ya pambafana noilonga vali imwe oyo tashi dulika tu longele Jehova? (Tala yo efano.)

⁶ Kunena, okuudifa onghundana iwa nako oku li yo oshilonga sha fimana osho Jehova naJesus va hala tu longe. (Mat. 24:14; 28:​19, 20) Oilonga yokuudifa oya pambafana noilonga vali imwe oyo hatu longele Jehova. Pashihopaenenwa, ohatu tungu omatungo ehangano, ile hatu longo koBetel, opo tu yambidide oilonga yokuudifa. Ohatu kufa yo ombinga mokuyandja oikwafa, opo tu kwafele ovamwatate novamwameme va kufe vali ombinga momalipyakidilo avo opamhepo, oo a kwatela mo oilonga yokuudifa. Ngeenge otu shii kutya oilonga yokuudifa oya fimana, nokudimbuluka kutya oyo unene oilonga Jehova a hala tu longe, otashi ke tu linyengifa tu kale hatu kufa ombinga pandjikilile moilonga yokuudifa. János, omukulunhuongalo wokuHungary, okwa ti: “Ohandi lidimbulukifa kutya kape na oshilonga mehangano laJehova tashi dulu okupingena po oshilonga shokuudifa; osho oshinakuwanifwa shetu sha fimanenena.

7. Omolwashike Jehova a hala tu twikile noilonga yokuudifa? (1 Timoteus 2:​3, 4)

⁷ Ohatu dulu okulonga nouladi moukalele, ngeenge otwa kala hatu tale ko ovanhu ngaashi Jehova he va tale ko. Okwa hala ovanhu vahapu va udifilwe onghundana iwa nova tambule ko oshili. (Lesha 1 Timoteus 2:​3, 4.) Molwaashi onghundana iwa otai dulu okuxupifa ovanhu, Jehova okwe tu kwafela nghee hatu dulu okuxwepopaleka ounghulungu wetu wokupopya novanhu, ngeenge hatu va udifile etumwalaka lOuhamba. Pashihopaenenwa, okambo Ulika kutya ou hole ovanhu — Moku va ninga ovahongwa oke na omaetepo oo taa dulu oku tu kwafela tu hovele eenghundafana nelalakano lokuninga ovanhu ovahongwa. Nokuli nonande ovanhu inava hovela okulongela Jehova paife, otashi dulika va ka kale ve na omhito yoku mu longela, ofimbo oudjuu munene inau xula. Osho hatu va udifile paife, otashi dulika osho shi ke ve linyengife va hovele okulongela Jehova monakwiiwa. Ndele osho otashi dulu ashike okuningwa, ngeenge otwa twikile nokuudifa.

OKWA LI E UDITE KO OMAXUNGANEKO OMBIIBELI NOKWA KATUKA METWOKUMWE NAO

8. Omaxunganeko Ombiibeli elipi a li a kwafela Jesus a longife efimbo laye nawa?

⁸ Jesus okwa li e udite ko nghee omaxunganeko Ombiibeli a li taa ka wanifwa po. Okwa li e shii kutya oukalele waye otau ka kwata ashike omido nhatu netata. (Dan. 9:​26, 27) Okwa li yo e shii exunganeko olo tali popi kutya ota ka fya naini nongahelipi. (Luk. 18:​31-34) Molwaashi Jesus okwa li e shii osho sha xunganekwa, okwa li a longifa nawa efimbo laye. Noshidjemo, okwa li a udifa nouladi, opo a manife oshilonga osho a li a pewa.

9. Omolwashike omaxunganeko Ombiibeli hae tu linyengifa tu udife nouladi?

⁹ Ngeenge otwa kala tu na eudeko lomaxunganeko Ombiibeli, otashi ke tu linyengifa tu udife nouladi. Otu shii kutya exulilo lounyuni oli li poduka. Ombiibeli oya xunganeka nghee ovanhu tave ke lihumbata momafiku axuuninwa nosho yo oiningwanima oyo tai ka ningwa pefimbo opo, nomaxunganeko oo otu a wete nghee taa wanifwa. Otu wete nghee Epangelo loPamuhanga Enaenghono mOunyuni (Anglo-America) tali lwifafana naRussia nosho yo ovayambididi vaye, naasho otashi wanifa po exunganeko li na sha nohamba yokoumbuwanhu nosho yo ohamba yokoumbangalanhu ‘momafiku axuuninwa.’ (Dan. 11:40) Natango, otu shii kutya eemhadi doshihongwafano osho sha popiwa muDaniel 2:​43-45 odi lile po Epangelo loPamuhanga Enaenghono mOunyuni (Anglo-America). Otwa tomhwa kutya ngaashi exunganeko tali ulike, mafiku Ouhamba waKalunga otau ka hanauna po omapangelo aeshe opanhu. Omaxunganeko aeshe oo otaa ulike kutya otu li momafiku axuuninwa, onghee natu longife nawa efimbo letu ngaashi hatu dulu tu udife onghundana iwa.

10. Omeenghedi dimwe dilipi omaxunganeko Ombiibeli taa dulu oku tu linyengifa tu udife nouladi?

¹⁰ Omaxunganeko Ombiibeli ohae tu kwafele yo tu kale twa halelela okuudifila vamwe etumwalaka lOuhamba. Carrie, omumwameme oo ta longele koDominican Republic, okwa ti: “Omaudaneko aJehova e na sha nonakwiiwa itunhula ohae linyengifa nge ndi lombwele vamwe oshili.” Okwa weda ko vali, a ti: “Ngeenge ndi wete ovanhu tava piti momaupyakadi kunena, ohashi ningifa nge ndi mone kutya ova pumbwa okushiiva kutya Jehova okwe va udanekela oinima iwa.” Omaxunganeko Ombiibeli otaa ulike kutya Jehova ote tu kwafele tu wanife po oshilonga shokuudifa, naasho otashi tu tu omukumo tu twikile okuudifa. Leila, oo ha di koHungary, okwa ti: “Jesaja 11:​6-9 okwe linyengifa nge ndi udifile ovanhu onghundana iwa, nokuli naavo ndi wete va fa itave i tambula ko. Ondi shii kutya keshe umwe ota dulu okulunduluka kekwafo laJehova.” Christopher, omumwatate wokoZambia, okwa ti: “Ngaashi sha xunganekwa muMarkus 13:​10, onghundana iwa otai tandavele mounyuni aushe, noshi li oufembanghenda kwaame eshi handi kwafele mokuwanifa po exunganeko olo.” Omaxunganeko opaMbiibeli elipi tae ku linyengifa u twikile okuudifa?

OKWA LI E NA ELINEEKELO KUTYA JEHOVA OTE KE MU KWAFELA

11. Omolwashike Jesus a li e na okukala e lineekela muJehova, opo a twikile okuudifa nouladi? (Lukas 12:​49, 53)

¹¹ Jesus okwa li e na elineekelo kutya Jehova ote ke mu kwafela a twikile okuudifa nouladi. Nonande Jesus okwa li ha popi nelungi, okwa li e shi kutya onghundana iwa yOuhamba otai ka handula vamwe, navahapu itave ke i tambula ko. (Lesha Lukas 12:​49, 53.) Ovawiliki vomalongelokalunga kava li ve hole osho Jesus a li ta udifa, onghee ova li va kendabala oku mu dipaa. (Joh. 8:59; 10:​31, 39) Ashike Jesus okwa twikila okuudifa, molwaashi oku shii kutya Jehova oku li pamwe naye. Okwa ti: “Ihandi tokola aame andike, ndele ohandi tokola naTate ou a tuma nge. . . .Ina efa nge, molwaashi ohandi longo alushe osho tashi mu hafifa.” — Joh. 8:​16, 29.

12. Jesus okwa li a longekida ngahelipi ovahongwa vaye va twikile okuudifa, nokuli nonande otava patanekwa?

¹² Jesus okwa li a dimbulukifa ovahongwa vaye kutya nava kale ve na elineekelo kutya Jehova ote ke va yambidida. Okwe va lombwela kutya Jehova ote ke va kwafela, nokuli nongeenge va taalela omapataneko. (Mat. 10:​18-20; Luk. 12:​11, 12) Okwa li yo e va londwela va kale va lungama. (Mat. 10:16; Luk. 10:3) Okwe va lombwela kutya ngeenge ovanhu itava pwilikine ketumwalaka lavo, inave va fininika. (Luk. 10:​10, 11) Okwe va lombwela va ye onhapo, ngeenge tava patanekwa. (Mat. 10:23) Nonande Jesus okwa li e na ouladi nokwe lineekela muJehova, okwa li ha henuka eenghalo odo da nyika oshiponga. — Joh. 11:​53, 54.

13. Omolwashike to dulu okukala noushili kutya Jehova ote ke ku kwafela?

¹³ Otwa pumbwa ekwafo laJehova, opo tu twikile okuudifa, nokuli nonande otwa taalela omapataneko kunena. (Eh. 12:17) Omolwashike to dulu okukala noushili kutya Jehova ote ke ku kwafela? Natu ka taleni keilikano laJesus olo li li muJohannes etukulwa 17. Okwa li a pula Jehova a amene ovayapostoli, na Jehova okwa li a nyamukula eilikano laye. Embo lOilonga ola popya nghee Jehova a li a kwafela ovayapostoli va udife nouladi, nonande ova li tava hepekwa. Jesus okwa li yo a pula Jehova a amene ovo va li tava ka pwilikina kwaasho ovayapostoli va li tave va lombwele. Jehova natango ota twikile okunyamukula eilikano laJesus, ote ke ku kwafela ngaashi ashike a li a kwafela ovayapostoli. — Joh. 17:​11, 15, 20.

14. Otu shii ngahelipi kutya ohatu ka dula okutwikila okuudifa nouladi? (Tala yo efano.)

¹⁴ Eshi exulilo lounyuni tali ende tali ehene popepi, otashi dulika shi kale shidjuu okuudifa onghundana iwa nouladi, ashike Jesus okwe tu lombwela kutya ohatu ka kwafelwa. (Luk. 21:​12-15) Ngaashi Jesus novahongwa vaye, natu efe ovanhu va tokole kuvo vene ngeenge otava ka pwilikina, ile hasho, nokuhenuka eenhamanana. Nokuli nomoilongo omo oilonga yetu ya shilikwa, ovamwatate ova kala tava twikile okuudifa onghundana iwa, molwaashi ove lineekela muJehova ndele hameendunge davo vene. Ngaashi ashike Jehova a li a pa ovapiya vaye eenghono pefimbo lovayapostoli, nokunena ote ke tu pa eenghono, opo “etumwalaka li udifwe nawanawa” pahalo laye. (2 Tim. 4:17) Oto dulu okukala noushili kutya ngeenge owe lineekela muJehova, oto ka dula okutwikila okuudifa nouladi.

OKWA KALA E NA ETALEKO LIWA KUTYA OVANHU OTAVA KA PWILIKINA KUYE

15. Oshike tashi ulike kutya Jesus okwa li e na etaleko liwa li na sha noukalele waye?

¹⁵ Jesus okwa li e na elineekelo kutya ovanhu vamwe otava ka pwilikina konghundana iwa. Osho osha li she mu kwafela, opo a kale a hafa nokulonga noudiinini moukalele waye. Pashihopaenenwa, mo 30 O.P., Jesus okwa li a mona kutya ovanhu vahapu ova halelela okupwilikina konghundana iwa nokwa li e va faafanifa nepya olo la pya okuteywa. (Joh. 4:35) Lwanima konima yomudo, okwa li a lombwela ovahongwa vaye, a ti: “Oilonga yokuteya oihapu.” (Mat. 9:​37, 38) Opo nee lwanima, okwa popya ta divilike ta ti: “Oilonga yokuteya oihapu . . . Indileni Mwene weteyo a tume ovateyi keteyo laye.” (Luk. 10:2) Jesus okwa kala e na elineekelo kutya ovanhu otava ka pwilikina konghundana iwa, nokwa li ha kala a hafa, ngeenge tava pwilikine. — Luk. 10:21.

16. Ongahelipi omafaneko aJesus tae tu kwafele tu kale tu na etaleko liwa li na sha noukalele? (Lukas 13:​18-21) (Tala yo efano.)

¹⁶ Jesus okwa li a honga ovahongwa vaye va kale ve na etaleko liwa li na sha netumwalaka lavo, osho osha li tashi ke va kwafela va udife nouladi. Pashihopaenenwa, diladila komafaneko aye avali. (Lesha Lukas 13:​18-21.) Jesus okwa li a longifa ombuto yoshinapi, opo a honge kutya etumwalaka lOuhamba otali ka tamunuka mo monghedi ikumwifi, nokape na osho tashi li i moshipala. Okwa li yo a longifa efulika, opo a yelife nghee etumwalaka lOuhamba tali ka tandavela mounyuni aushe notali ka ningifa ovanhu va ninge omalunduluko oo itaa ka didilikwa mo diva. Jesus okwa li a kwafela ovahongwa vaye va mone kutya etumwalaka olo tava udifa otali ka kwafela ovanhu vahapu.

17. Omolwashike tu na okukala tu na etaleko liwa li na sha noukalele wetu?

¹⁷ Ngeenge hatu diladila kunghee oilonga yokuudifa tai kwafele ovanhu vahapu mounyuni aushe, ohashi tu linyengifa tu udife nouladi. Omudo keshe, ovanhu omamiliyona ovo ve na ohokwe ohava kala pEdimbuluko nohava konakona Ombiibeli nafye. Ovanhu omayovi omafele ohava ninginifwa nohave tu waimine moilonga yokuudifa. Katu shii kutya ovanhu ve fike peni tashi dulika va ka pwilikine ketumwalaka letu, ashike otu shii kutya Jehova ota ka ongela ongudu inene oyo tai ka xupa poudjuu munene. (Eh. 7:​9, 14) Jehova oye Mwene weteyo noku shii kutya ovanhu vahapu otava ka tambula ko onghundana iwa, onghee natu twikile okuudifa.

18. Oshike twa hala ovanhu va didilike mufye?

¹⁸ Ovahongwa vaJesus ova kala alushe hava udifa onghundana iwa nouladi. Eshi ovanhu va mona ouladi wovayapostoli, “ova li va didilika kutya ova li hava kala naJesus.” (Oil. 4:13) Ngeenge ovanhu tave tu tale moukalele, nava mone kutya nafye ohatu shikula oshihopaenenwa shaJesus shouladi.