Nghee Jehova he tu kwafele tu lididimike

1. Omolwashike twa pumbwa elididimiko, nekwafo lilipi tu na? (1 Petrus 5:10)

MOMAFIKU aa axuuninwa, oshiwana shaJehova osha pumbwa elididimiko. Vamwe ova kala nokulididimikila ouyahame oule wefimbo. Vamwe ova filwa ovaholike vavo. Natango, vamwe otava hepekwa kovapambele vavo, ile komapangelo. (Mat. 10:​18, 36, 37) Shilipalekwa kutya Jehova ota dulu oku ku kwafela u lididimikile onghalo keshe idjuu oyo to ungaunga nayo. — Lesha 1 Petrus 5:10.

2. Oshike hashi tu kwafele tu lididimike tu li Ovakriste?

² Okulididimika osha hala okutya okukala omudiinini kuJehova nokutwikila okukala neteelelo, nonande owa taalela omaupyakadi, omapataneko, omashongo, ile omayeleko. Ovakriste ihave lididimike keenghono davo vene, ndele ohava kwafelwa kuJehova oo he va pe “eenghono di dule dopaushitwe.” (2 Kor. 4:7) Moshitukulwa eshi, ohatu ka kundafana omafiloshisho ane oo Jehova e tu pa, opo e tu kwafele tu lididimike. Ohatu ka tala yo nghee hatu dulu okumona ouwa mefiloshisho keshe.

EILIKANO

3. Omolwashike hatu dulu okutya eilikano oli li onghedi ya denga mbada yokupopya naJehova?

³ Jehova okwe tu pa oshinima sha denga mbada osho tashi dulu oku tu kwafela tu lididimike. Okwe shi ningifa tashi shiiva tu kale hatu popi naye, nonande otu li ovalunde. (Heb. 4:16) Diladila kwaashi: Ohatu dulu okwiilikana kuJehova efimbo keshe nokwiilikana kombinga yakeshe shimwe. Ota dulu oku tu uda, kashi na nee mbudi kutya ohatu popi elaka lilipi notu li peni, nokuli nonande otu li ofye atuke, ile tu li modolongo. (Jona 2:​1, 2; Oil. 16:​25, 26) Jehova oha kala e udite ko kutya otwa hala okutya shike, ngeenge twa kwatwa koshisho nokatu shii kutya natu mu lombwele shike. (Rom. 8:​26, 27) Oshoshili kutya eilikano oli li onghedi ya denga mbada yokupopya naJehova!

4. Omolwashike hatu dulu okutya oshi li metwokumwe nehalo laJehova, ngeenge hatu mu pula e tu kwafele tu lididimike?

⁴ Jehova okwe tu shilipaleka mEendjovo daye kutya “keshe osho hatu mu indile pahalo laye ote tu udu.” (1 Joh. 5:14) Mbela ohatu dulu okupula Jehova e tu kwafele tu lididimike? Heeno! Osho oshi li metwokumwe nehalo laye. Omolwashike hatu tile ngaho? Ngeenge hatu lididimikile omayeleko, kungaho ohatu pe Jehova omhito a nyamukule omulundili waye, Satana Ondiaboli. (Omayel. 27:11) Kakele kaasho, Ombiibeli oya popya kutya Jehova okwa halelela okuulika “eenghono daye mokukwafela ovo ovadiinini kuye.” (2 Omaf. 16:9) Onghee ohatu dulu okukala noushili kutya Jehova oku na eenghono nokwa halelela oku tu kwafela tu lididimike. — Jes. 30:18; 41:10; Luk. 11:13.

5. Ongahelipi eilikano hali tu kwafele tu kale tu na ombili yopamadiladilo? (Jesaja 26:3)

⁵ Ombiibeli oya popya kutya ngeenge hatu ilikana twa mana mo kombinga yaasho hatu lipula nasho, ‘ombili yaKalunga oyo i dule eendunge adishe otai ka amena omitima nomadiladilo etu.’ (Fil. 4:7) Natu ka tale kutya osho osha hala okutya shike. Ovanhu ovo ihava longele Jehova ohava taalele omaupyakadi, notashi dulika va kendabale eenghedi da yoolokafana, opo va mone ombili yopamadiladilo. Pashihopaenenwa, vamwe ohava longifa onghedi yokudilonga, opo va kale itava diladila sha nandenande. Onghedi oyo yokukala ito diladila sha nandenande otai tula oupamhepo woye moshiponga. (Yelekanifa Mateus 12:​43-45.) Ashike ombili oyo Jehova he tu pe, ngeenge hatu ilikana, oi dule kokule ombili oyo umwe ta dulu okumona okupitila mokudilonga kwa tya ngaho. Ngeenge hatu ilikana kuJehova, ohatu ulike filufilu kutya otwe lineekela muye nohe tu pe “ombili tai kalelele.” (Lesha Jesaja 26:3.) Onghedi imwe omo Jehova ha ningi ngaho, omoku tu kwafela tu dimbuluke oshili oyo twe lihonga mEendjovo daye. Oshili oyo ohai ngungumaneke omadiladilo nomutima wetu, molwaashi otu shii kutya Jehova oku na ko nasha nafye nokwa hala tu pondole. — Eps. 62:​1, 2.

6. Ongahelipi to dulu okulongifa pauyadi oshali yeilikano? (Tala yo efano.)

⁶ Osho to dulu okuninga. Ngeenge to lididimike, eshi eitavelo loye tali yelekwa, “omutengi woye u yandja kuJehova,” nokwiilikana kuye e ku pe ombili yopamadiladilo. (Eps. 55:22) Ilikana yo u pewe ounongo oo wa pumbwa, opo u dule okuungaunga neshongo olo wa taalela. (Omayel. 2:​10, 11) Ngeenge to ilikana u kwafelwe u lididimike, ino dimbwa okupandula Jehova meilikano. (Fil. 4:6) Kala to didilike kutya Jehova okwe ku kwafela ngahelipi u lididimikile eshongo olo wa taalela, ndele to mu pandula. Ino efa eshongo olo u li mulo li ku pofipaleke uha kale u wete omanangeko noupuna oo u na nale. — Eps. 16:​5, 6.

EENDJOVO DAKALUNGA

7. Ongahelipi okukonakona Ombiibeli taku tu kwafele tu lididimike?

⁷ Jehova okwe tu pa eendjovo daye, opo e tu kwafele tu lididimike. MOmbiibeli omu na eevelise dihapu odo tadi tu shilipaleke kutya Jehova ote ke tu yambidida shili. Natu ka taleni koshihopaenenwa shimwe. Mateus 6:8 okwa ti: “Xo yeni oku shii osho mwa pumbwa ofimbo nokuli inamu mu indila.” Jesus oye a popya eendjovo odo, noku shii nawanawa Jehova e dule keshe umwe womufye. Onghee inatu pumbwa okukala twa limbililwa ngeenge Jehova ota dulu ngoo oku tu yambidida, eshi twa taalela omashongo. MOmbiibeli omu na omaudaneko mahapu, a faafana naao twa kundafana, oo taa dulu oku tu pameka, opo tu lididimike. — Eps. 94:19.

8. (a) Yandja oshihopaenenwa shefinamhango lopaMbiibeli osho tashi dulu oku tu kwafela tu lididimike. (b) Oshike tashi dulu oku tu kwafela tu dimbuluke omafinamhango Ombiibeli, ngeenge twe a pumbwa?

⁸ Omafinamhango Ombiibeli otaa dulu oku tu kwafela tu lididimike. Oku na omayele taa longo, oo taa dulu oku tu kwafela tu ninge omatokolo e li pandunge. (Omayel. 2:​6, 7) Pashihopaenenwa, Ombiibeli otai tu ladipike tu ungaunge noisho yefiku olo tu li mulo, ponhele yokukala hatu lipula naasho tashi ka ningwa mefiku lomongula. (Mat. 6:34) Ngeenge otwa kala hatu lesha Omishangwa pandjikilile nokudilonga kudo, otashi ke tu kwafela tu dimbuluke noupu omafinamhango onhumba, ngeenge twe a pumbwa.

9. Ongahelipi omahokololo Ombiibeli hae tu kwafele tu kale twe lineekela mekwafo laJehova?

⁹ MOmbiibeli omu na omahokololo oshili ovanhu ovo va li ve lineekela muJehova, nokwa li e va yambidida. (Heb. 11:​32-34; Jak. 5:17) Ngeenge hatu diladila komahokololo a tya ngaho, ohashi pameke elineekelo letu kutya Jehova “oye eameno neenghono detu, ekwafo olo hali monika pomafimbo oudjuu.” (Eps. 46:1) Eshi hatu tale kunghee ovapiya vaJehova vomonakudiwa va li ovadiinini, ohashi tu kwafele tu hopaenene eitavelo nelididimiko lavo. — Jak. 5:​10, 11.

10. Ongahelipi to dulu okulongifa Eendjovo daKalunga pauyadi?

¹⁰ Osho to dulu okuninga. Lesha Ombiibeli efiku keshe nokudidilika eevelise odo tadi dulu oku ku kwafela. Vahapu ova mona yo kutya ohashi va tu omukumo, ngeenge va lesha omushangwa wefiku efimbo longula. Omumwameme wedina Mariea okwa li a mona oushili oo, eshi ovadali vaye aveshe va li va monika okankela. Mbela oshike sha li she mu kwafela, eshi a li te va file oshisho peemwedi davo dopexulilo? Okwa ti: “Ongula keshe onda li handi lesha omushangwa mokambo Konakona Omishangwa keshe efiku, nokudilonga kuo. Osho osha kwafela nge ndi kale handi diladila kombinga yomushangwa oo nda lesha, ponhele yokuyandja elitulemo kwaame mwene nokonghalo idjuu oyo nda li handi piti muyo.” — Eps. 61:2.

OVAITAVELI VAKWETU

11. Omolwashike tashi tu omukumo okushiiva kutya hafye atuke hatu lididimikile omashongo?

¹¹ Jehova okwe tu pa ovamwatate novamwameme, opo e tu kwafele tu lididimike. Okukala tu shii kutya “ovamwatate aveshe navo otave lididimikile omaudjuu a faafana” oshe tu shilipaleka kutya katu li ofye atuke. (1 Pet. 5:9) Oshoshili kutya, kashi na nee mbudi kutya ohatu piti monghalo ya tya ngahelipi, vamwe navo ova pita monghalo ya tya ngaho nove lididimika. Osho osha hala okutya nafye ohatu dulu okulididimika! — Oil. 14:22.

12. Ongahelipi ovaitaveli vakwetu tava dulu oku tu kwafela, noshike hatu dulu oku va ningila? (2 Ovakorinto 1:​3, 4)

¹² Ovaitaveli vakwetu otava dulu oku tu twa omukumo tu lididimike. Omuyapostoli Paulus okwa mona oushili waasho. Okwa li a pandula lwoikando ovo va li ve mu kwafela ofimbo a li modolongo yomeumbo, nokwa li e va tumbula komadina avo. Ova li va hekeleka Paulus, ve mu twa omukumo noku mu pa ekwafo olo a li a pumbwa. (Fil. 2:​25, 29, 30; Kol. 4:​10, 11) Nokunena, otashi dulika tu pite monghalo ya faafana. Ngeenge twa pumbwa ekwafo tu lididimike, ovamwatate novamwameme otave ke tu kwafela, nongeenge ova pumbwa ekwafo, ohatu ke va kwafela. — Lesha 2 Ovakorinto 1:​3, 4.

13. Oshike sha li sha kwafela omumwameme Maya e lididimike?

¹³ Ovamwatate novamwameme ova li va twa omukumo omumwameme womoRussia wedina Maya. Mo 2020, eumbo laye ola li la hadwa, nolwanima okwa li a pangulwa, molwaashi a lombwela vamwe kombinga yeitavelo laye. Maya okwa ti: “Pefimbo opo eshi nda li nda wililwa po komadiladilo, ovamwatate novamwameme ova li va dengela nge nova shangela nge omatumwalaka neenhumwafo, va shilipaleke nge kutya ove hole nge. Onda kala alushe ndi shii kutya ondi na oukwaneumbo wa kula unahole. Ndele mo 2020, Onda li nda tomhwa filufilu.”

14. Oshike hatu dulu okuninga opo tu mone ouwa meyambidido olo hali di kovaitaveli vakwetu, eshi hatu lididimike? (Tala yo efano.)

¹⁴ Osho to dulu okuninga. Eshi to lididimike, kala popepi novamwatate novamwameme. Ino ongaonga okupula ovakulunhuongalo ekwafo. Otava dulu okukala va fa “onhele yokuyaama omhepo, ouhondameno woshikungulu shodula.” (Jes. 32:​2, esh.) Dimbuluka kutya Ovakriste vakweni navo otave lididimikile eenghalo didjuu. Ngeenge owa ningile umwe ouwa oo e li momhumbwe, otashi ke ku kwafela u kale u na etaleko liwa noli li pandjele, eshi to lididimikile eshongo olo to piti mulo. — Oil. 20:35.

ETEELELO LETU

15. Eteelelo ola li la kwafela ngahelipi Jesus, notali tu kwafele ngahelipi? (Ovaheberi 12:2)

¹⁵ Jehova okwe tu pa eteelelo la twa li tu kwafele, opo tu lididimike. (Rom. 15:13) Diladila kunghee eteelelo la li la kwafela Jesus e lididimikile efiku lidjuu monghalamwenyo yaye yokombada yedu. (Lesha Ovaheberi 12:2.) Jesus okwa li e shii kutya oudiinini waye otau ka yapulifa edina laJehova. Okwa li yo a teelela nodjuulufi oku ka shakena vali naXe, noku ka longa pamwe novamwaxe mOuhamba womeulu. Sha faafana, eteelelo letu loku ka kala mounyuni mupe waKalunga fiyo alushe otali tu kwafele tu lididimikile oudjuu keshe hatu shakeneke mounyuni ou waSatana.

16. Eteelelo ola li la kwafela ngahelipi omumwameme umwe e lididimike, noshike hatu dulu okulihonga kwaasho a popya?

¹⁶ Didilika nghee eteelelo li na sha nOuhamba la li la kwafela omumwameme womoRussia wedina Alla, oo omushamane waye a li a mangwa po nokutulwa modolongo a teelela okupangulwa. Eshi osho sha ningwa, Alla okwa ti: “Onda kala handi ilikana kombinga yeteelelo letu li na sha nonakwiiwa nokudilonga kulo, naasho osha kwafela nge ndiha kale unene nda teka omukumo. Ondi shii kutya e li halo exulilo. Jehova ota ka finda ovatondi vaye note ke tu nangeka noupuna.”

17. Ongahelipi hatu dulu okuulika olupandu li na sha neteelelo olo twe lihonga mOmbiibeli? (Tala yo efano.)

¹⁷ Osho to dulu okuninga. Konga efimbo u diladile kombinga yonakwiiwa itunhula oyo Jehova e tu udanekela. Kala u liwete wa fa u li mounyuni mupe waKalunga, nokufaneka momadiladilo omanangeko noupuna oo to ka mona. Ngeenge otwa ningi ngaho, eyeleko keshe hatu ka shakeneka otali ka kala ‘lopakafimbo noinali kwata moiti.’ (2 Kor. 4:17) Natango, ninga ngaashi to dulu opo u lombwele vamwe kombinga yeitavelo loye. Diladila ashike kutya ohava ungaunga ngahelipi neenghalo didjuu mounyuni ou waSatana nopehe na okushiiva elalakano laKalunga li na sha nonakwiiwa. Oto dulu oku va kwafela va kale ve na ohokwe meteelelo lOuhamba, nonande eenghundafana odi li pauxupi.

18. Omolwashike hatu dulu okukala tu na elineekelo momaudaneko aJehova?

¹⁸ Konima eshi Job a li e lididimikila omayeleko, okwa lombwela Jehova a ti: “Paife ondi shi shii kutya oto dulu okuninga oinima aishe, nonokutya kape na osho to diladila okuninga tashi ku nyenge.” (Job 42:2) Job okwa li e lihonga kutya kape na osho tashi dulu okwiimba Jehova a wanife po elalakano laye. Naasho ohashi tu pameke eshi hatu lididimike. Natu shi faneke ngaha, diladila ashike komukainhu oo a kala ta ehama nokwa teka omukumo, molwaashi eendokotola dihapu kada li tadi dulu oku mu kwafela. Ashike eshi ndokotola oo e na owino noku shii okulineekelwa a li a mona kutya oupyakadi ou li peni nokwe mu yelifila nghee te ke mu yakula, okwa li a pepelelwa, nokuli nonande osha li tashi pula efimbo opo a veluke. Paife ota dulu okulididimika, e na eteelelo la twa kutya ota ka tya po xwepo. Monghedi ya faafana, eteelelo letu li na sha nOparadisa otali tu kwafele tu lididimike.

19. Oshike twa pumbwa, opo tu lididimike?

¹⁹ Ngaashi twe shi mona, Jehova ohe tu kwafele tu lididimikile omaupyakadi okupitila meilikano, mEendjovo daye, movaitaveli vakwetu nometeelelo letu. Ngeenge otwa kala hatu longifa pauyadi omafiloshisho aeshe oo, Jehova ote ke tu kwafela tu pite moudjuu keshe oo hatu ka taalela, fiyo okefiku olo omaupyakadi ounyuni ou waSatana a xula po. — Fil. 4:13.