Nghee hatu tu dulu okukondjifa omahalo mai

1. Ovanhu aveshe inava wanenena otava kondjo nashike?

MBELA owa hangelwe ngoo nande onale komadiladilo okulonga oshinima shonhumba osho Jehova ina hokwa? Ngeenge osho, ino fika pexulifodiladilo kutya owa taalela eshongo la kwata moiti u dulife keshe umwe. Ombiibeli oya ti: “Eyeleko keshe tali mu hange oha li hange yo ovanhu aveshe.” (1 Kor. 10:13) Osho osha hala okutya omahalo a puka oo to kondjo nao, vakweni navo oo tava ungaunga nao. Haave auke, nokekwafo laJehova oto dulu oku a finda.

2. Omayeleko elipi tashi dulika Ovakriste novakonakonimbiibeli vamwe tava kondjo nao? (Tala yo omafano.)

² Ombiibeli oya ti yo: “Omunhu keshe oha yelekwa komahalo aye mwene oo hae mu xwaxwameke noku mu hongaula.” (Jak. 1:14) Osho tashi hongaula omunhu umwe, otashi dulu okukala sha yooloka ko kwaasho tashi hongaula mukwao. Pashihopaenenwa, Ovakriste vamwe otashi dulika tava yelekwa va kufe ombinga melihumbato inali koshoka novanhu voukashike kookanhu wa yooloka ko kuwavo; vamwe onovanhu voukashike kookanhu wa fa wavo. Ovo va efa po okutala omafano oipala, otashi dulika ve na omahalo a kwata moiti okushuna konghedindjikilile oyo. Vahapu ovo va efa po okulongifa nai oingangamifi, ile oikolwifa, ova taalela eshongo la faafana. Oo omahalo ashike manini oo Ovakriste novakonakonimbiibeli vamwe tava kondjo nao. Pomhito imwe, atusheni otashi dulika twa li tu udite ngaashi omuyapostoli Paulus, oo a ti: “Ngeenge nda hala okulonga ouwa, ope na sha tashi kondjifa nge ndi longe owii.” — Rom. 7:21.

3. Omahalo mai taa twikile otaa dulu okukuma ngahelipi omunhu pauhandimwe?

³ Ngeenge oto ungaunga nomahalo mai taa twikile, otashi dulika u kale u udite uhe na eenghono, wa fa ngeno ito dulu okukondjifa eyeleko. Otashi dulika yo u kale u udite uhe na eteelelo, sha fa ngeno Jehova e ku tokola omolwomahalo mai oo u na. Kala wa shilipalekwa kutya omaliudo a tya ngaho kae li mondjila! Opo tu yelife kutya omolwashike, oshitukulwa eshi otashi ka kundafana omapulo avali: (1) Omaliudo okukala u udite uhe na eenghono neteelelo ohaa di peni? (2) Ongahelipi to dulu okupondola okukondjifa omahalo mai?

“OMUNAWII” OKWA HALA TU KALE TU UDITE NGAHELIPI?

4. (a) Omolwashike Satana a hala tu kale tu udite tuhe na eenghono? (b) Omolwashike hatu dulu okukala noushili kutya ohatu dulu okukondjifa eyeleko?

⁴ Satana okwa hala tu kale tu udite tuhe na eenghono, eshi hatu yelekwa. Jesus okwe shi yelifa, eshi a honga ovashikuli vaye va ilikane tava ti: “Ino efa tu ye momayeleko, ndele tu xupifa komunawii.” (Mat. 6:13) Satana okwa ti kutya ovanhu itava ka dulika kuJehova, ngeenge tava yelekwa. (Job 2:​4, 5) Omolwashike Satana ta diladila ngaho? Satana okwa hongaulwa komahalo aye mwene noka li a hala okukala omudiinini kuJehova. Osha yela kutya okwa itavela kutya nafye otwe mu fa, kutya ohatu dulu okweefa po Jehova, ngeenge hatu yelekwa. Satana okwa li ta diladila nokuli kutya nOmona waKalunga a wanenena, ota dulu okuliyandja komayeleko! (Mat. 4:​8, 9) Ndele diladila kwaashi: Mbela katu na ngoo shili eenghono dokukondjifa omahalo mai? Hasho nandenande! Ohatu tu kumwe nomuyapostoli Paulus oo a ti: “Ohandi dulu okufinda onghalo keshe omolwaau ta pe nge eenghono.” — Fil. 4:13.

5. Otu shi shii ngahelipi kutya Jehova oku na elineekelo kutya ohatu dulu okukondjifa omahalo mai?

⁵ Mepingafano naSatana, Jehova oku na elineekelo kutya ohatu dulu okukondjifa omahalo mai. Mbela otu shi shii ngahelipi? Omolwaashi Jehova okwa xunganeka kutya ongudu inene yovanhu ovadiinini otai ka xupa poudjuu munene. Diladila kutya osho osha hala okutya shike. Jehova, oo iha fufya, okwa ti kutya omuvalu munene, ndele kau fi ashike munini, otau ka ya mounyuni mupe u na eliudo la yela, “nova kosha oikutu yavo mohonde yOdjona i kale itoka.” (Eh. 7:​9, 13, 14) Osha yela kutya Jehova okwe tu tala ko kutya ohatu dulu okukondjifa omahalo mai.

6-7. Omolwashike Satana a hala tu kale tu udite tuhe na eteelelo, eshi hatu kondjifa omayeleko?

⁶ Satana ina hala ashike tu kale tu udite tuhe na eenghono, ndele okwa hala yo tu kale tuhe na eteelelo sha fa ngeno Jehova e tu tokola, molwaashi ashike tu na omahalo mai. Natango, diladila kwaashi. Satana oye ehe na eteelelo, a tokolwa kuJehova kutya ina wana oku ka mona omwenyo waalushe. (Gen. 3:15; Eh. 20:10) Nopehe na omalimbililo, Satana okwa hala nafye tu kale tu udite tuhe na eteelelo, unene tuu eshi hatu ka mona omanangeko noupuna oo ita ka mona. Ashike fye otu na eteelelo. Ombiibeli oye tu shilipaleka kutya Jehova okwa hala oku tu kwafela, ndele haku tu tokola. “Ina hala nande oumwe a hanaunwe po, ndele okwa hala ovanhu aveshe ve lidilulule.” — 2 Pet. 3:9.

⁷ Ashike ngeenge otwa itavele kutya katu na eenghono, ile eteelelo eshi hatu kondjifa omahalo mai, ohatu ka diladila monghedi oyo Satana a hala tu diladile. Ngeenge otu udite ko oshinima eshi, otashi ke tu kwafela tu kale twa tokola toko oku mu kondjifa. — 1 Pet. 5:​8, 9.

NGHEE HATU KALA TU UDITE OMOLWOKUHAWANENENA

8. Kakele ashike kokulonga owii, oulunde owa kwatela mo shike? (Epsalme 51:5) (Tala yo “Outumbulilo wa yelifwa.”)

⁸ Kakele ashike kuSatana, ope na vali oshinima shimwe osho hashi tu ningifa tu kale tuhe na eenghono nokatu na eteelelo, eshi hatu kondjifa omahalo mai. Oshinima osho oshike? Okuhawanenena oko twa fyuulula kovadali vetu votete.a — Job 14:4; lesha Epsalme 51:5.

9-10. (a) Ongahelipi oulunde wa kuma Adam naEva? (Tala yo efano.) (b) Oulunde owe tu kuma ngahelipi?

⁹ Tala nghee okuhawanenena kwa li kwa kuma Adam naEva. Konima eshi inava dulika kuJehova, ova ka hondama nokukendabala okuuvika omalutu avo. Embo lo-Insight on the Scriptures ola popya shi na sha naasho la ti: “Oulunde owe va ningifa va kale ve udite ondjo, ve na oshisho, vehe li meameno nova fya ohoni.” Adam naEva ova fa va li va patelwa meumbo olo li na ashike eenduda odo nhee. Adam naEva ova li tava dulu okudja monduda imwe nokuya konduda ikwao, ashike kava li tava dulu okudja mo meumbo. Kava li tava dulu okuya onhapo okuhawanenena kwavo.

¹⁰ Oshoshili kutya katu li monghalo ya faafana naayo Adam naEva va li. Ekuliloyambo, olo itali longo kovalihomboli votete, ole tu koshola koulunde nole tu kwafela tu kale neliudo la koshoka. (1 Kor. 6:11) Natango, otwa fyuulula oulunde. Itashi tu kumwifa eshi nafye hatu kala tu udite ondjo, tu na oshisho, tuhe li meameno notwa fya ohoni. Ombiibeli oya popya kutya oulunde owe tu dingatela. Ohau dingatele yo naavo “inava nyona monghedi ya faafana naai yaAdam.” (Rom. 5:14) Nonande otashi monika tashi teya omukumo, inatu pumbwa okukala tu udite tuhe na eenghono nosho yo eteelelo. Ohatu dulu okufinda omaliudo mai. Ngahelipi mbela?

11. Otu na okulinyenga ngahelipi, ngeenge tu udite tuhe na eenghono, nomolwashike? (Ovaroma 6:12)

¹¹ Ngeenge tu udite tuhe na eenghono, twa fa itatu dulu okukondjifa omahalo mai, ohatu dulu oku shi tala ko sha fa oulunde “tau popi,” ndele katu na okupwilikina kuo. Omolwashike mbela? Omolwaashi Ombiibeli otai hongo kutya, inatu efa oulunde u twikile oku tu pangela ngaashi “ohamba.” (Lesha Ovaroma 6:12.) Osho osha hala kutya ohatu dulu okuhoolola okuhawanifa po omahalo mai. (Gal. 5:16) Jehova oku na elineekelo kutya ohatu dulu okukondjifa eyeleko; ngeno okwa li hasho ngeno ina teelela tu ninge ngaho. (Deut. 30:​11-14; Rom. 6:6; 1 Tes. 4:3) Osha yela kutya otu na eenghono dokukondjifa omahalo mai.

12. Otu na okulinyenga ngahelipi, ngeenge tu udite tuhe na eteelelo, nomolwashike?

¹² Sha faafana, ngeenge otwa kala tu udite tuhe na eteelelo, sha fa ngeno Jehova te tu tokola molwaashi ashike tu na omahalo mai, otu na oku shi tala ko ngaashi oulunde “tau popi” nafye, ashike katu na okupwilikina kuo. Omolwashike mbela? Omolwaashi Ombiibeli otai hongo kutya Jehova oku udite ko okuhawanenena kwetu. (Eps. 103:​13, 14) “Oku shii oinima aishe” kombinga yetu, mwa kwatelwa eenghedi da yoolokafana, omo oulunde oo twa fyuulula hau weda ko komahalo etu mai. (1 Joh. 3:​19, 20) Shimha ashike itatu liyandje komahalo oulunde mokuwanifa po omahalo mai, Jehova ote ke tu tala ko twa koshoka. Omolwashike hatu dulu okukala tu na oushili waasho?

13-14. Mbela okukala u na omahalo mai, osha hala okutya owa dopa? Shi yelifa.

¹³ Ombiibeli oya ulika eyooloko lokulonga osho shii (osho hatu dulu okupangela) nosho yo omahalo okulonga osho shii (oo itatu dulu okupangela omafimbo amwe). Pashihopaenenwa, Ovakriste vamwe, vopefimbo lovayapostoli, vomuKorinto ova li hava kufa ombinga moushenge. Paulus okwa ti: “Vamwe vomunye osho mwa li ngaho.” Mbela osho osha hala okutya ihava kala vali ve na omahalo okukufa ombinga moushenge? Kashi li pandunge okudiladila ngaho, molwaashi omafimbo amwe ohashi kala shidjuu okweefa po omahalo a tya ngaho. Ashike Ovakriste ovo va li ve na elipangelo nohava henuka okukala metwokumwe nomahalo avo, ova li va hokiwa kuJehova. Okwe va tala ko “va kosholwa.” (1 Kor. 6:​9-11) Naasho otashi dulu oku ku ningilwa.

¹⁴ Kashi na nee mbudi kutya oto kondjo nomahalo a puka elipi, oto dulu oku a finda. Nokuli nonande ito dulu oku a xulifa po, oto dulu okuhenuka ‘okuwanifa po omahalo opambelela nomadiladilo oye mwene.’ (Ef. 2:3) Ongahelipi to dulu okuninga ngaho nokukondjifa omahalo mai?

OSHO TO DULU OKUNINGA, OPO U KONDJIFE OMAHALO MAI

15. Opo tu dule okukondjifa omahalo mai, omolwashike twa pumbwa okukala tu shii omaunghundi etu?

¹⁵ Opo u dule okukondjifa omahalo mai, owa pumbwa okukala u shii omaunghundi oye. Kala wa lungama uhe lifufye ove mwene “nomatomhafano ongaho.” (Jak. 1:22) Ino kendabala okukandula po omukundu, mokukala to ningi omalipopilo ngaashi, ‘Vamwe ohava nu ve dulife nge,’ ile u va vele ombedi. Henuka yo okutomhafana kutya, ‘Ngeno omukulukadi wange okwa li ha ulikile nge ohole, ngeno ihandi kala nda hala okutala omafano oipala.’ Ngeenge otwa kala hatu tomhafana monghedi ya tya ngaho, otashi ka kala shipu kufye okuliyandja komayeleko. Onghee inatu kendabala okukala hatu ningi omalipopilo, ngeenge twa nyona. — Gal. 6:7.

16. Oshike tashi dulu oku ku kwafela, opo u kale wa tokola toko okulonga osho sha yuka?

¹⁶ Kakele kokukala u shii omaunghundi oo u na, owa pumbwa yo okukala wa tokola toko okuheliyandja komaunghundi a tya ngaho. (1 Kor. 9:​26, 27; 1 Tes. 4:4; 1 Pet. 1:​15, 16) Didilika kutya oshike hashi ku yeleke unene nosho yo kutya opefimbo lilipi. Otashi dulika pe na eyeleko lokondadalunde, ile pe na efimbo lokondadalunde opo hashi kala shipu kwoove okuliyandja keyeleko la tya ngaho. Pashihopaenenwa, mbela ohashi kala shidjuu kwoove okukondjifa eyeleko olo ngeenge wa loloka, ile konguloshi? Diladila kombinga yeyeleko la tya ngaho, ndele to lilongekida nghee to ke li kondjifa. Otashi ka kala pandunge okuninga ngaho ofimbo eyeleko olo inali holoka. — Omayel. 22:3.

17. Oshike hatu dulu okulihonga koshihopaenenwa shaJosef? (Genesis 39: 7-9) (Tala yo omafano.)

¹⁷ Diladila kunghee Josef e linyenga eshi omukulukadi waPotifar a li ta kendabala oku mu heka, opo va ye momilele. Okwa li a anya nopehe na okwoongaonga. (Lesha Genesis 39: 7-9.) Osho otashi tu ulikile shike? Josef okwa li nale a tokola okulonga osho sha yuka, ofimbo nokuli omukulukadi waPotifar ina kendabala oku mu heka vaye momilele. Sha faafana, oto dulu okukala wa tokola toko okulonga osho sha yuka, ofimbo nokuli eyeleko inali holoka. Ngeenge owa ningi ngaho, eshi to ka yelekwa, otashi ka kala shipu kwoove okulonga osho shi li mondjila, molwaashi owa hangika nale wa tokola okuninga ngaho.

“KALENI NOKULIKONAKONA”

18. Ongahelipi to dulu okukondjifa omahalo mai? (2 Ovakorinto 13:5)

¹⁸ Opo u dule okukondjifa omahalo mai, owa pumbwa ‘okukala nokulikonakona’ pandjikilile, opo u mone nghee to shi endifa. (Lesha 2 Ovakorinto 13:5.) Efimbo nefimbo, konakona onghedi yoye yokudiladila nosho yo eenghatu doye, ndele to ningi omalunduluko apa sha pumbiwa. Pashihopaenenwa, nokuli nonande owa pondola okukondjifa eyeleko lonhumba, oto dulu okulipula kutya: ‘Mbela osha kwata efimbo li fike peni, opo ndi tye ahawe?’ Ngeenge owa didilike kutya opa pita efimbo lonhumba, ino kala to livele ombedi. Ponhele yaasho, diladila kombinga yaasho to ka ninga po moshikando tashi uya. Lipula omapulo ngaashi: ‘Mbela ngeenge nda hangika komadiladilo inaa koshoka, ohandi efa po ngoo omadiladilo a tya ngaho meendelelo? Mbela omalihafifo oo nda hoolola okukufa ombinga muo, ohae shi ningifa shidjuu kwaame okukondjifa omayeleko? Ngeenge nda mona sha inashi koshoka, mbela ohandi endelele ngoo okwaalula ko omesho ange kusho? Mbela ondi udite ko ngoo kutya omolwashike omifikamhango daJehova da denga mbada alushe, nokuli nonande otadi pula ndi kale ndi na elipangelo?’ — Eps. 101:3.

19. Ongahelipi omatokolo oo taa monika inaa kwata moiti ehe li pandunge, taa dulu oku shi ningifa shidjuu kufye okukondjifa omahalo mai?

¹⁹ Owa pumbwa okuhenuka okuninga omalipopilo. Ombiibeli oya ti: “Omutima woovene ou nomakoto u dule ashishe nowa nyonauka.” (Jer. 17:9) Jesus okwa ti kutya ohau etifa “omadiladilo mai.” (Mat. 15:19) Pashihopaenenwa, omunhu oo a efa po okutala omafano oipala otashi dulika konima yefimbo lonhumba a diladile kutya “inashi nyika” oshiponga okutala omafano oo taa pendula omahalo opamilele, molwaashi omafano a tya ngaho kae na ovanhu ve li hamunghele. Ile otashi dulika a tomhafane kutya, ‘Inashi puka okufaneka momadiladilo to ningi sha osho inashi koshoka, shimha ashike ito shi ningi paulelalela.’ Noitya imwe, omutima u na omakoto womunhu a tya ngaho owe “liyandja komahalo opambelela.” (Rom. 13:14) Ongahelipi to dulu okuhenuka okuninga ngaho? Kala wa lungama, nokuhenuka okuninga omatokolo inaa kwata moiti ehe li pandunge, oo tae ku ningifa u ninge omatokolo a kwata moiti ehe li pandunge, ngaashi okulonga osho sha puka.b Henuka yo omadiladilo keshe, ile “omadiladilo mai,” oo tae ku ningifa u ninge omalipopilo konima eshi wa ninga sha sha puka.

20. Oshike twa teelela nodjuulufi monakwiiwa, noshike tashi dulu oku tu kwafela paife?

²⁰ Ngaashi twe lihonga, ohatu dulu okukala tu na eenghono dokukondjifa omayeleko kekwafo laJehova. Shikwao vali, omolwefilonghenda laye, otu na eteelelo loku ka kala nomwenyo waalushe mounyuni mupe. Kashi hafifa tuu eshi hatu ka dula okulongela Jehova tu na omadiladilo nosho yo omutima wa koshoka! Ofimbo twa teelela efimbo olo, ohatu dulu okukala tu na oushili kutya otu na eenghono nosho yo eteelelo, eshi hatu kondjifa omahalo oo mai. Jehova ota ka nangeka noupuna eenghendabala detu, nohatu ka pondola!