‘Ifana ovakulunhuongalo’

1. Jehova okwa ulika ngahelipi kutya eedi daye odi na ondilo kuye?

EEDI daJehova odi na ondilo kuye. Okwe di landa nohonde yaJesus, nokwa nangeka po ovakulunhuongalo momaongalo, opo va life oufita waYe. (Oil. 20:28) Kalunga okwa hala eedi daye di ungaungiwe nado nonghenda. Koshi yewiliko laKristus, ovakulunhuongalo ohava tu omukumo eedi noku di amena, opo di kale di diinini kuJehova. — Jes. 32:​1, 2.

2. Jehova oha yandje unene elitulemo koolyelye? (Hesekiel 34:​15, 16)

² Jehova oku na ko nasha needi daye adishe, ashike oha yandje unene elitulemo kwaado da nghundipala pamhepo. Ovo va nghundipala pamhepo, Jehova ohe va kwafele okupitila movakulunhuongalo. (Lesha Hesekiel 34:​15, 16.) Ashike okwa hala tu konge ekwafo ngeenge twe li pumbwa. Peemhito da tya ngaho, Jehova ina hala ashike tu kale hatu kongo ekwafo kuye okupitila meilikano, ndele okwa hala yo tu konge ekwafo “kovafita ovahongi” meongalo. — Ef. 4:​11, 12.

3. Ongahelipi atusheni hatu dulu okumona ouwa mokukonakona onghandangala oyo ovakulunhuongalo tava dana?

³ Moshitukulwa eshi, ohatu ka konakona elongekido olo Kalunga e tu pa li na sha nokukonga ekwafo lopamhepo kovakulunhuongalo. Ohatu ka nyamukula omapulo aa taa shikula: Onaini tu na okukonga ekwafo kovakulunhuongalo? Omolwashike twa pumbwa okukonga ekwafo? Nongahelipi tava dulu oku tu kwafela? Nokuli nonande inatu pumbwa ekwafo pefimbo opo, omanyamukulo omapulo oo otae ke tu kwafela tu ulike olupandu lelongekido olo Jehova e tu pa, notashi dulika li ka xupife eemwenyo detu efiku limwe.

ONAINI TU NA OKUKONGA EKWAFO KOVAKULUNHUONGALO?

4. Omolwashike hatu tile kutya Jakob 5:​14-16, 19, 20 ota popi kombinga youyehame wopamhepo? (Tala yo omafano.)

⁴ Omuhongwa Jakob okwa popya shi na sha nanghee Kalunga ha longifa ovakulunhuongalo, opo ve tu kwafele pamhepo, a ti: “Mbela ope na umwe mokati keni ta vele? Na ifane ovakulunhuongalo.” (Lesha Jakob 5:​14-16, 19, 20.) Movelise oyo, Jakob ota popi shi na sha nouyehame wopamhepo. Pashihopaenenwa, omunhu oo ta vele pamhepo ota lombwelwa a ifane ovakulunhuongalo, ndele handokotola. Omunhu oo ta vele pamhepo ota ka veluka ashike ngeenge okwa diminwa po omanyono aye. Eenghatu odo hadi katukwa, opo omunhu oo ta ehama pamhepo a velulwe, oda faafana naado hadi katukwa ngeenge omunhu ta vele palutu. Ngeenge hatu vele palutu, ohatu kongo ekwafo kundokotola, hatu mu lombwele apa tu udite, nokushikula omalombwelo aye. Sha faafana, ngeenge hatu vele pamhepo, otu na oku ka konga ekwafo kovakulunhuongalo, hatu va lombwele onghalo yetu, nokukatuka metwokumwe nomayele opaMbiibeli oo twa pewa.

5. Ongahelipi hatu dulu okumona ngeenge oupamhepo wetu otau ende tau nghundipala?

⁵ Elongekido olo la popiwa muJakob etukulwa 5 otali tu ladipike tu konge ekwafo kovakulunhuongalo, ngeenge tu wete kutya oupamhepo wetu ou li moshiponga. Itashi ka kala tuu pandunge, ngeenge otwa kongo ekwafo ofimbo inatu nyona po ekwatafano letu naKalunga! Otwa pumbwa okukala ovanashili. Ngeenge tashi uya pekwatafano letu naJehova, Omishangwa ode tu londwela tuhe lipukife. (Jak. 1:22) Ovakriste vamwe vopefimbo lovayapostoli muSarde ova li va ninga epuko la tya ngaho, na Jesus okwa li e va londwela shi na sha noupamhepo wavo. (Eh. 3:​1, 2) Onghedi imwe omo hatu dulu okumona kutya oupamhepo wetu otau nghundipala, omokuyelekanifa ouladi oo tu na eshi hatu longele Jehova paife nosho yo nouladi oo twa li tu na nale. (Eh. 2:​4, 5) Ohatu dulu okulipula kutya: ‘Mbela ohandi hafele ngoo natango okulesha nokudilonga kOmbiibeli? Mbela ohandi lilongekidile ngoo natango okwoongala nokukala puko? Mbela ondi na ngoo vali ouladi wokuya moukalele? Mbela ohandi kala ashike handi diladila koinima yopamaliko?’ Ngeenge enyamukulo komapulo oo oheeno, otashi ulike kutya ekwatafano letu naJehova otali ende tali nghundipala. Ngeenge itatu dulu okupameka ekwatafano letu naJehova kufye vene, ile twa nyona nale omifikamhango daKalunga, otwa pumbwa okukonga ekwafo kovakulunhuongalo.

6. Ovo va nyona enyono la kwata moiti ova pumbwa okuninga shike?

⁶ Oshoshili kutya ovo va nyona enyono la kwata moiti, enyono olo tali dulu oku va ningifa va kufwe mo meongalo, ova pumbwa okukonga ekwafo kovakulunhuongalo. (1 Kor. 5:​11-13) Keshe oo a nyona enyono la kwata moiti okwa pumbwa okukwafelwa, opo a dule vali okukala e na ekwatafano naJehova. Opo Jehova e tu dimine po okupitila mekuliloyambo, otwa pumbwa okulonga “oilonga oyo tai ulike elidilululo.” (Oil. 26:20) Oilonga oyo oya kwatela mo okuya kovakulunhuongalo ngeenge twa nyona enyono la kwata moiti.

7. Oolyelye va pumbwa ekwafo lovakulunhuongalo?

⁷ Ovakulunhuongalo ihava kwafele ashike ovo va nyona enyono la kwata moiti, ndele ohava kwafele yo ovo ve na oupamhepo wa nghundipala. (Oil. 20:35) Pashihopaenenwa, otashi dulika u wete to nyengwa okukondjifa omahalo a puka. Eshongo olo otali dulu okukala lidjuu, ngeenge owa li wa pikwa koingangamwifi, ho tale omafano oipala, ile wa li u na onghalamwenyo inai koshoka ofimbo ino shiiva oshili. Ino pumbwa okukondjifa omashongo oo oove auke. Oto dulu okuhoolola okupopya nomukulunhuongalo oo wa mangulukila nokukala u na elineekelo kutya ota ka pwilikina kwoove, te ke ku pa omayele, note ke ku shilipaleka kutya oto dulu okuhafifa Jehova mokukondjifa omahalo a puka. (Omuud. 4:12) Ngeenge owa teka omukumo, eshi to kondjo nomashongo oo, ovakulunhuongalo otave ke ku dimbulukifa kutya eshi wa konga ekwafo otashi ulike kutya ino hala okunyona po ekwatafano loye naJehova, noto henuka okukala we lineekela mwoove mwene. — 1 Kor. 10:12.

8. Mbela otu na okupopya novakulunhuongalo kombinga yoshinima keshe? Shi yelifa

⁸ Inatu pumbwa oku ka popya novakulunhuongalo kombinga yoshinima keshe. Pashihopaenenwa, natu tye nee ngeno owa ninga oshinima sha udifa nai omumwatate, ile omumwameme, tashi dulika wa li wa handuka neenghono. Ponhele u ye komukulunhuongalo, oto dulu okushikula omayele aJesus e na sha nokupanga ombili nomumwatate, ile omumwameme. (Mat. 5:​23, 24) Oto dulu okuninga omapekapeko e na sha nomaukwatya ngaashi omwenyo muwa, elididimiko nelipangelo, opo u ka dule oku a ulika filufilu monakwiiwa. Oshoshili kutya ngeenge inamu dula natango okupongolola po oupyakadi, oto dulu okupula omukulunhuongalo e mu kwafele. Monhumwafo oyo omuyapostoli Paulus a li a shangela Ovafilippi okwa li a pula omumwatate, oo ina tumbulwa kedina, a kwafele Euodia naSintike, opo va pongolole po oupyakadi wavo; omukulunhuongalo womeongalo leni ota dulu okuninga sha faafana. — Fil. 4:​2, 3.

OMOLWASHIKE TWA PUMBWA OKUKONGA EKWAFO KOVAKULUNHUONGALO?

9. Omolwashike tuhe na okukala twa fya ohoni okukonga ekwafo kovakulunhuongalo? (Omayeletumbulo 28:13)

⁹ Otwa pumbwa eitavelo nouladi, opo tu pule ekwafo ngeenge twa nyona enyono la kwata moiti, ile ngeenge tu wete kutya ohatu nyengwa okukondjifa omahalo a puka. Inatu fya ohoni okukonga ekwafo kovakulunhuongalo. Omolwashike? Omolwaashi ngeenge otwa shikula elongekido laJehova, ohatu ka ulika kutya otwe lineekela muye nosho yo momayele aye oo hae tu kwafele tu kale tu na eitavelo la kola. Otu shii kutya otwa pumbwa ekwafo, opo tu longe osho sha yuka. (Eps. 94:18) Nongeenge otwa nyono, Kalunga ote ke tu fila onghenda ngeenge otwe lidilulula noku efa po okulonga osho shii. — Lesha Omayeletumbulo 28:13.

10. Oshike tashi dulu oku tu ningilwa ngeenge otwa kendabala okuholeka omanyono etu?

¹⁰ Mepingafano nomanangeko noupuna oo hatu mono ngeenge otwa kongo ekwafo kovakulunhuongalo, ohatu ka naipika onghalo, ngeenge otwa kendabala okuholeka omanyono etu. Eshi ohamba David ya li ya kendabala okuholeka omanyono ayo, oya li ya nyona po ekwatafano layo naJehova, ya kumwa pamaliudo nopalutu. (Eps. 32:​3-5) Ngaashi ashike ouyehame wopalutu, ile omunhu a mona oshiponga, ouyehame wopamhepo luhapu ohau naipala ngeenge otwa kala inatu konga ekwafo kovakulunhuongalo. Jehova ina hala osho shi tu ningilwe, onghee ote tu shivi ‘tu yukife oinima’ okupitila movakulunhuongalo ovo ta longifa. — Jes. 1:​5, 6, 18.

11. Ngeenge otwa holeke omanyono etu, otashi ka kuma ngahelipi vamwe?

¹¹ Ngeenge otwa holeke omanyono etu a kwata moiti, otashi ka kuma vamwe. Ohatu ka imba omhepo yaKalunga i kunguluke nawa meongalo alishe nokukufa po ombili yovamwatate novamwameme. (Ef. 4:30) Ngeenge otwa didilike kutya umwe okwa nyona enyono la kwata moiti meongalo, otwa pumbwa oku mu lombwela a ka konge ekwafo kovakulunhuongalo.a Okuholeka enyono laumwe otaku dulu oku tu ningifa nafye tu kale tu udite ondjo. (Lev. 5:1) Molwaashi otu hole Jehova, otashi ke tu linyengifa tu popye oshili. Ohatu ka kwafela eongalo li kale la koshoka nokukwafela omunyoni a kale vali e na ekwatafano liwa naJehova.

OVAKULUNHUONGALO OHAVE TU KWAFELE NGAHELIPI?

12. Ovakulunhuongalo ohava kwafele ngahelipi ovo va nghundipala pamhepo?

¹² Ovakulunhuongalo ova lombwelwa va yambidide ovo va nghundipala pamhepo. (1 Tes. 5:14) Ngeenge owa nyona, otashi dulika ve ku pule omapulo, opo va ude ko omadiladilo nomaliudo oye. (Omayel. 20:5) Oto dulu oku va kwafela moku va lombwela oshili, nokuli nonande oshidjuu oku shi ninga omolweputuko loye, omaukwatya oye, ile wa fya ohoni omolwonghalo oyo ya holoka po. Ino kala wa tila, to lipula kutya eendjovo doye otashi dulika di kale da fa “eendjovo dongaho.” (Job 6:3) Ponhele ovakulunhuongalo va fike diva pexulifodiladilo, otava ka kendabala okupwilikina noukeka nokumona ashishe osho sha kwatelwa mo, ofimbo inave ku pa omayele. (Omayel. 18:13) Ove shii kutya ohashi pula efimbo okufila oshisho oufita, onghee itava ka kendabala okupongolola po oupyakadi peenghundafana deni dotete.

13. Ongahelipi ovakulunhuongalo tava dulu oku tu kwafela okupitila momailikano avo nomomayele opaMbiibeli? (Tala yo omafano.)

¹³ Ngeenge owa popi novakulunhuongalo, otava ka kendabala okuhenuka okuweda ko komutengi woye. Ponhele yaasho, otave ke ku ilikanena. Otashi dulika shi ke ku kumwife eshi to ka mona kutya omailikano avo oku na ‘eenghono notaa dulu okukwafela.’ Ekwafo lavo ola kwatelwa mo yo oku ku “vaeka omaadi medina laJehova.” (Jak. 5:​14-16) “Omaadi” oo otaa ulike kEendjovo daKalunga. Ovakulunhuongalo otava ka longifa Ombiibeli, opo ve ku hekeleke, noku ku kwafela u kale vali u na ekwatafano liwa naJehova. (Jes. 57:18) Omayele oo tave ku pe okudja mOmbiibeli otaa dulu oku ku pameka u kale vali wa tokola toko okulonga osho shi li mondjila. Oto dulu okuuda ondaka yaJehova okupitila movakulunhuongalo, tai ku lombwele tai ti: “Ei ondjila, enda muyo.” — Jes. 30:21.

14. She likolela kOvagalati 6:​1, ovakulunhuongalo ohava kwafele ngahelipi oo a “katuka shihe li pandunge”? (Tala yo omafano.)

¹⁴ Lesha Ovagalati 6:1. Omukriste oo ha “katuka shihe li pandunge” iha kala metwokumwe nomifikamhango daKalunga douyuki. Okukatuka shihe li pandunge otaku dulu yo okuyukifwa kokuhatokola pauyuki, ile kokunyona enyono la kwata moiti. Omolwohole, ovakulunhuongalo Ovakriste ohava kendabala oku mu ‘pukulula nombili.’ Oshitya shOshigreka osho sha tolokwa ‘okupukulula’ otashi dulu yo okuyukifwa kokutula ponhele ekipa lombuda, opo ku henukwe ouyehame tau kalelele. Ngaashi ashike ndokotola oo e na ounghulungu ha kendabala okutula ponhele ekipa lombuda, te shi ningi pehe na ouyehame muhapu, ovakulunhuongalo navo ohava yandje elitulemo kokuvelula pamhepo nopehe na oku tu ehameka. Ova lombwelwa yo va kale va “lungama.” Eshi tave tu kwafele tu yukife eendjila detu, navo ove shii kutya inava wanenena notava dulu okukatuka shihe li pandunge. Ponhele yokukala ve liwete ve dule vamwe, ve lishii ouyuki, ile va kale ve na omhepo yokutokola, ohava kala ovananghenda. — 1 Pet. 3:8.

15. Oshike hatu dulu okuninga ngeenge otu na oupyakadi?

¹⁵ Ohatu dulu okulineekela ovakulunhuongalo ovo ve li momaongalo etu. Ova deulwa okuhapopya oiholekwa yetu, okuyandja omayele e likolelela kOmbiibeli ponhele yomayele avo vene noku tu kwafela tu ungaunge nomaupyakadi etu. (Omayel. 11:13; Gal. 6:2) Ovakulunhuongalo ove na omaukwatya nowino wa yoolokafana, ashike ohatu dulu okuya kuvo tu va lombwele omaupyakadi etu. Oshoshili kutya inatu pumbwa okuya komukulunhuongalo keshe, hatu kongo omayele oo twa hala okuuda. Ngeenge otwa ningi ngaho, ohatu ka kala twa fa ovanhu ovo va hala okuuda osho tashi “nyuwifa omatwi avo,” ponhele ‘yomahongo a yuka’ omEendjovo daKalunga. (2 Tim. 4:3) Ngeenge otwa i komukulunhuongalo, hatu mu lombwele oupyakadi wetu, otashi dulika e tu pule ngeenge otwe shi lombwela ovakulunhuongalo vamwe nosho yo kutya omayele elipi ve tu pa. Elininipiko otali ke linyengifa omukulunhuongalo oo a ka konge omayele komukulunhuongalo mukwao. — Omayel. 13:10.

OSHINAKUWANIFWA OSHO TU NA

16. Otu na oshinakuwanifwa shilipi?

¹⁶ Nonande ovakulunhuongalo ohave tu pashukile tu li eedi daKalunga, ihave tu lombwele osho tu na okuninga. Otu na oshinakuwanifwa shokukala netilokalunga monghalamwenyo yetu. Ohatu ke lihokolola komesho yaKalunga omolweendjovo neenghatu detu. (Rom. 14:12) Kekwafo laJehova, ohatu dulu okufinda eshongo lokukaleka po oudiinini wetu. Ponhele ovakulunhuongalo ve tu lombwele osho tu na okuninga, otave ke tu lombwela etaleko laKalunga olo tali hangika meendjovo daye. Ngeenge otwa shikula omayele avo a kanghamena kOmbiibeli, ohatu ka dula okudeula “eendunge detu dokuyoolola,” opo tu ninge omatokolo e li pandunge. — Heb. 5:14.

17. Otwa pumbwa okukala twa tokola toko okuninga shike?

¹⁷ Kashi fi tuu oufembanghenda okukala eedi daJehova! Jehova okwa tuma “omufita muwa,” Jesus, a yandje ekulilo, opo tu dule oku ka mona omwenyo waalushe. (Joh. 10:11) Jehova okwe tu pa yo ovakulunhuongalo, opo ve tu file oshisho momaongalo, ngaashi a udaneka a ti: “Ohandi ke mu pa ovafita she likolelela komutima wange mwene, notave ke mu palula neshiivo nosho yo nounongo.” (Jer. 3:15) Ngeenge twa nghundipala, ile hatu vele pamhepo, inatu ongaonga okukonga ekwafo kovakulunhuongalo. Natu kale twa tokola toko okumona ouwa pauyadi mefiloshisho olo Jehova e tu pa lovakulunhuongalo.