Omaukwaneumbo opaKriste, landuleni oshihopaenenwa shaJesus!
‘Kristus okwe mu fiila oshihopaelelwa mu shikule oshikoti shaye.’ — 1 PET. 2:21.
1. (a) Omona waKalunga okwa dana onghandangala ilipi mokushitwa kwoinima? (b) Jesus oha kala e uditile ovanhu ngahelipi?
ESHI Kalunga a shita eulu nedu, Omona waye omudalwa wotete okwa li ta longo pamwe naye e li “omulongi onghulungu.” Omona waKalunga okwa li yo ta longo pamwe naXe eshi a li ta shiti omaludi oinamwenyo ya kula nosho yo oimeno i lili noku lili oyo i li kombada yedu. Okwa li yo ta longo pamwe naXe eshi Oparadisa ya li tai longekidwa opo i ninge onhele yokukala ovanhu ovo va shitwa oshifeka shaKalunga. Omona waKalunga, oo lwanima a ka shiivika nedina Jesus, okwa li e hole ovanhu neenghono. Jesus okwa ti: “Nda nyakukilwa ovana vovanhu.” — Omayel. 8:27-31, yelekanifa NW; Gen. 1:26, 27.
2. (a) Jehova okwa li a ninga po shike opo a kwafele ovanhu inava wanenena? (b) Ombibeli otai yandje ewiliko moshinima shilipi?
2 Konima eshi ovalihomboli votete va nyona, ekulilo ola ninga oshitukulwa sha fimana shi na sha nokuwanifwa kwelalakano laJehova lokumangulula ovanhu moulunde. Jehova okwa yandja Kristus e li ekuliloyambo opo ovanhu va dule okukulilwa moulunde. (Rom. 5:8) Kakele kaasho, Jehova okwa pa ovanhu Eendjovo daye Ombibeli, oyo tai va kwafele opo va dule okupondola monghalamwenyo nonande inava wanenena. (Eps. 119:105) Jehova oha yandje ewiliko okupitila mEendjovo daye opo a kwafele ovanhu va kale ve na omaukwaneumbo a pama nokwa hafa. Embo laGenesis ola popya kombinga yohombo la ti kutya omulumenhu oku na ‘okukanyatela komukainhu waye, ndele tava kala onhumba imwe aike.’ — Gen. 2:24.
3. (a) Jesus okwa li a honga shike kombinga yohombo? (b) Oshike hatu ka konakona moshitukulwa eshi?
3 Pefimbo loukalele waye kombada yedu, Jesus okwa li a divilika kutya ohombo oya dikwa po nelalakano i kalelele, nokwa li a honga ovanhu omafinamhango oo taa dulu okukwafela oilyo yomaukwaneumbo i henuke oikala nelihumbato olo tali dulu okunyona po ohombo ile ehafo loukwaneumbo. (Mat. 5:27-37; 7:12) Oshitukulwa eshi otashi ka kundafana nghee omahongo aJesus nosho yo oshihopaenenwa osho a tula po eshi a li kombada yedu tashi dulu okukwafela ovashamane, ovakulukadi, ovadali nounona va kale nonghalamwenyo ihafifa nova wanenwa.
Nghee ovashamane Ovakriste ve na okufimaneka ovakulukadi vavo
4. Efaafano lilipi li li pokati konghandangala oyo Jesus ta dana naayo yovashamane Ovakriste?
4 Kalunga okwa tula po ovashamane va kale omitwe domaukwaneumbo, ngaashi ashike Jesus e li Omutwe weongalo. Omuyapostoli Paulus okwa ti: “Omulumenhu oye omutwe womukainhu, ngaashi Kristus yo Oye omutwe weongalo, Ye omuxupifi wolutu. Onye ovalumenhu, holeni ovakainhu veni ngaashi Kristus e hole eongalo, nokwe liyandja molwalo.” (Ef. 5:23, 25) Jesus okwa tulila po ovashamane Ovakriste oshihopaenenwa shi na sha nanghee ve na okuungaunga novakulukadi vavo okupitila monghedi omo ha ungaunga novashikuli vaye. Natu ka taleni keenghedi dimwe omo Jesus a li ha longifa eenghonopangelo daye odo a pewa kuKalunga.
5. Jesus okwa li ha longifa ngahelipi eenghonopangelo daye ngeenge ta ungaunga novahongwa vaye?
5 Jesus okwa li ‘omunambili momutima nokwe lininipika.’ (Mat. 11:29) Okwa li yo omulumenhu ha katuka eenghatu ngeenge sha pumbiwa. Ka li ha dopa okuwanifa po oinakuwanifwa yaye. (Mark. 6:34; Joh. 2:14-17) Okwa li ha yandje omayele opahole kovahongwa vaye, nokwa li nokuli he shi ningi lwoikando ngeenge sha pumbiwa. (Mat. 20:21-28; Mark. 9:33-37; Luk. 22:24-27) Ndele nande ongaho, Jesus ka li he va tangunine ile e va fife ohoni, noka li he va ningifa va kale ve udite va fa vehe holike ile itava dulu okuwanifa po osho e va honga. Ponhele yaasho, okwa li ha pandula ovahongwa vaye noku va twa omukumo. (Luk. 10:17-21) Onghee hano, Jesus okwa li a fimanekwa kovahongwa vaye, molwaashi okwa li ha ungaunga navo nohole nonolukeno.
6. (a) Ovashamane otava dulu okulihonga shike monghedi omo Jesus a li ha ungaunga novahongwa vaye? (b) Petrus okwa yandja ekumaido lilipi kovashamane?
6 Oshihopaenenwa shaJesus otashi hongo ovashamane Ovakriste kutya kave na okukala ovakwanyanya omolwoukwamutwe wavo. Ponhele yaasho, ove na okukala hava fimaneke ovakulukadi vavo nokukala ve va hole nohole yokuhelihola mwene. Omuyapostoli Petrus okwa kumaida ovashamane va hopaenene Jesus mokukala hava ungaunga novakulukadi vavo pahole ‘nokukala’ have va “fimaneke.” (Lesha 1 Petrus 3:7.) Ndele mbela ongahelipi omushamane ta dulu okulongifa eenghonopangelo daye, ndele pefimbo opo tuu opo ota ungaunga nomukulukadi waye nefimaneko?
7. Omonghedi ilipi omushamane ta dulu okufimaneka omukulukadi waye? Yandja oshihopaenenwa.
7 Onghedi imwe omo omushamane ta dulu okuulika kutya okwa fimaneka omukulukadi waye omokukala ha tambula ko omaetepo aye nokuyavelela omaliudo aye fimbo ina ninga omatokolo oo a kuma oukwaneumbo. Pashihopaenenwa, otashi dulika mu ninge etokolo li na sha nokutembukila konhele imwe ile okukonga oilonga imwe ile li na sha noinima yakeshe efiku, ngaashi okukufa efudo ile nghee tamu dulu okuninipika oilandomwa yeni opo mu dule okuungaunga nonghalo youpyakadi wopamaxupilo yokunena. Molwaashi oukwaneumbo otau ka kumwa ketokolo olo, otashi ka kala shiwa komushamane okutambula ko omaetepo omukulukadi waye, naasho otashi ke mu kwafela a fike pexulifodiladilo liwa, nokuninga etokolo la diladilwa nawa. Kungaho, omukulukadi ota ka yambidida etokolo olo noupu. (Omayel. 15:22) Ovashamane Ovakriste ovo hava fimaneke ovakulukadi vavo ohava kala ve holike nova fimanekwa kovakulukadi vavo, nokomesho yaaishe, ohava kala va hokiwa kuJehova. — Ef. 5:28, 29.
Nghee ovakulukadi ve na okuulika kutya ova fimaneka shili ovashamane vavo
8. Omolwashike ovanhu ve na okuhenuka oshihopaenenwa shaEva?
8 Jesus okwa tulila po ovakulukadi Ovakriste oshihopaenenwa sha wanenena shokudulika kwaavo ve na eenghonopangelo. Jesus ka li tuu e na etaleko li na sha neenghonopangelo la yooloka ko kwaalo lomukulukadi wotete meshito! Eva okwa dopa okutulila po ovakulukadi oshihopaenenwa shiwa. Ka li a fimaneka elongekido loukwamutwe noka li a tambula ko omalombwelo oo a li a pewa komushamane waye Adam, nonande omushamane waye okwa li a tulwa po kuJehova e li omutwe woukwaneumbo noye a li ha pewa omalombwelo kuJehova. (Gen. 2:16, 17; 3:3; 1 Kor. 11:3) Oshoshili kutya Eva okwa li a hekwa, ndele okwa li e na okupula tete omushamane waye ngeenge osha yuka ngoo okupwilikina keendjovo domunhu oo a li ta ti kutya ote mu lombwele osho ‘Kalunga e shii.’ Ponhele yaasho, Eva okwa li a kwatwa kounhwa, ndele ta lombwele omushamane waye osho e na okuninga. — Gen. 3:5, 6; 1 Tim. 2:14.
9. Jesus okwa tula po oshihopaenenwa shokudulika shilipi?
9 Mepingafano naEva, Jesus okwa tula po oshihopaenenwa sha wanenena shokudulika kOmutwe waye. Oikala yaye nosho yo onghedi yaye yokukalamwenyo otai ulike kutya “ina hakana a kale a fa Kalunga.” Ndele ponhele yaasho, “okwe lidula Ye mwene nokwa djala olupe lomupika.” (Fil. 2:5-7) Nonande Jesus oku li Ohamba kunena, oikala yaye inai lunduluka, molwaashi oha dulika kuXe nelininipiko moinima aishe noha yambidida oukwamutwe waYe. — Mat. 20:23; Joh. 5:30; 1 Kor. 15:28.
10. Ongahelipi omukulukadi ta dulu okuyambidida oukwamutwe womushamane waye?
10 Ovakulukadi Ovakriste ove na okuhopaenena oshihopaenenwa shaJesus mokukala hava yambidida oukwamutwe wovashamane vavo. (Lesha 1 Petrus 2:21; 3:1, 2.) Natu tale konghalo imwe omo omukulukadi ta dulu okuninga ngaho. Natu tye nee omonamati wavo okwe uya okupula epitikilo kuina opo a ka ninge oshinima shonhumba osho a pumbwa okupewa epitikilo kovadali. Ngeenge oshinima osho ovadali inave shi kundafana nale aveshe, oshi li pandunge komudalakadi okupula omona wavo ta ti: “Owa pula ngoo xo?” Ngeenge omona ina lombwela xe, omukulukadi oku na tete okukundafana oshinima osho nomushamane waye ofimbo ina ninga etokolo lasha. Kakele kaasho, omukulukadi Omukriste oku na okuhenuka okukondjifa omaetepo ile okupataneka omushamane waye moipafi younona. Ngeenge omukulukadi itatu kumwe nediladilo lomushamane waye moshinima shonhumba, oku na oku ke shi kundafana ngeenge ve li ovo aveke. — Ef. 6:4.
Jesus okwa tulila po ovadali oshihopaenenwa
11. Jesus okwa tulila po ovadali oshihopaenenwa shilipi?
11 Jesus okwa tulila po ovadali Ovakriste oshihopaenenwa sha denga mbada, nokuli nonande ka li a hombola nandenande noke na ounona. Ndele mbela ongahelipi Jesus a dula okutulila po ovadali oshihopaenenwa? Jesus okwa li a honga ovahongwa vaye pahole nonelidiiniko okupitila meendjovo nomoshihopaenenwa shaye. Okwa li e va ulikila nghee ve na okuwanifa po oilonga oyo e va pa. (Luk. 8:1) Onghedi omo Jesus a li ha ungaunga novahongwa vaye oye va honga nghee ve na okuungaunga novahongwa vakwao. — Lesha Johannes 13:14-17.
12, 13. Ovadali ove na okuninga shike opo va tekule ovana vavo metilokalunga?
12 Ounona luhapu ohava hopaenene oshihopaenenwa shovadali vavo, kutya nee oshiwa ile oshii. Onghee hano, ovadali ove na okulipula kutya: ‘Mbela oshihopaenenwa shilipi hatu tulile po ounona vetu shi na sha nefimbo olo hatu longifa mokutala o-TV nosho yo momalihafifo, mokuyelekanifa nefimbo olo hatu longifa okukonakona Ombibeli nokukufa ombinga moukalele womomapya? Oinima ilipi twa pitifa komesho unene moukwaneumbo wetu? Mbela ohatu tula po ngoo oshihopaenenwa shiwa mokupitifa komesho elongelokalunga lashili nongeenge hatu ningi omatokolo monghalamwenyo yetu?’ Ovadali ove na tete okukala ve shii eemhango daKalunga, ngeenge ova hala okutekula ovana vavo metilokalunga. — Deut. 6:6.
13 Ngeenge ovadali ohava kendabala okutula moilonga omafinamhango Ombibeli monghalamwenyo yavo yakeshe efiku, ounona vavo otave ke shi didilika. Ovadali ohava nwefa mo noupu ounona vavo okupitila meendjovo nomehongo lavo. Ndele ngeenge ovadali ihava kala metwokumwe nomifikamhango odo va tulila po ovana vavo, ounona otashi dulika va fike pexulifodiladilo kutya omafinamhango Ombibeli inaa fimana lela noitaa kwafa sha. Oshidjemo, ounona otashi dulika ve liyandje noupu komafininiko omounyuni.
14, 15. Ovadali ove na okukwafela ovana vavo va kale ve na ehalo lokuninga shike, nomonghedi imwe ilipi tava dulu oku shi ninga?
14 Ovadali Ovakriste ove shii kutya okutekula ounona osha kwatela mo shihapu shihe fi ashike oku va wanifila po eemhumbwe davo dopalutu. Onghee hano, ovadali kave na okuladipika ovana vavo va lalakanene oinima oyo tai va etele ashike ouwa wopalutu. (Omuud. 7:12) Jesus okwa li a honga ovahongwa vaye kutya nava konge tete Ouhamba waKalunga nouyuki waye. (Mat. 6:33) Onghee hano, ovadali Ovakriste ove na okuhopaenena Jesus mokuninga eenghendabala va kwafele ovana vavo va kale ve na ehalo lokulalakanena oinima yopamhepo.
15 Onghedi imwe omo ovadali tava dulu okukwafela ovana vavo va lalakanene oinima yopamhepo, omokuninga omalongekido opo ounona vavo va kale hava endafana naavo ve li moilonga yefimbo li yadi. Ounona vomido omulongo nasha otava ka tuwa omukumo ngeenge ova kala hava endafana novakokolindjila ile nomupashukilishikandjo nomukulukadi waye. Ngeenge omaukwaneumbo okwa kala haa talelwa po kovatumwa, kOvabetel nosho yo kwaavo hava longo moilonga yokutunga yopaiwana, ounona otava ka ladipikwa koimoniwa yovamwatate ovo i na sha nanghee va mona ehafo mokulongela Jehova. Ovatalelipo va tya ngaho ohava kala alushe ve na oimoniwa ihokwifa. Oihopaenenwa yavo yokulonga oilonga yeliyambo otai ka kwafela ounona neenghono va ninge omatokolo opandunge, va lalakanene oinima yopamhepo nova mone edeulohongo la yeleka olo tali dulu oku va kwafela va dule oku ke lifila oshisho ngeenge ova i moilonga yefimbo li yadi.
Ounona, oshike tashi ke mu kwafela mu landule oshihopaenenwa shaJesus?
16. Jesus okwa li ha fimaneke ngahelipi ovadali vaye vokombada yedu nosho yo Xe womeulu?
16 Jesus okwa tulila po yo ounona oshihopaenenwa shiwa. Okwa li ha dulika kuJosef naMaria ovo va li va pewa oshinakuwanifwa shoku mu tekula. (Lesha Lukas 2:51.) Jesus okwa li e shii kutya nonande ovadali vaye ovo inava wanenena, ove lineekelelwa kuKalunga oshinakuwanifwa shoku mu tekula. Omolwetomheno olo, Jesus okwa li e na okukala e va fimaneka. (Deut. 5:16; Mat. 15:4) Eshi a kula, Jesus okwa li ha ningi alushe oinima oyo tai hafifa Xe womeulu. Osho osha hala okutya Jesus okwa li e na okukondjifa omayeleko. (Mat. 4:1-10) Omafimbo amwe, ovanyasha nanye otashi dulika mu hangwe keenghalo odo tadi mu yeleke muha dulike kovadali veni. Ndele mbela oshike tashi dulu oku mu kwafela mu hopaenene Jesus?
17, 18. (a) Ovanyasha ohava shakeneke omafininiko elipi kofikola? (b) Ovanyasha ove na okudimbuluka shike opo va dule okukondjifa omayeleko?
17 Ovanafikola vakweni vahapu otashi dulika ihava wilikwa komifikamhango dOmbibeli ile inave di fimaneka lela. Otashi dulika ve ku kondjife u kufe ombinga moinima ya puka noku ku sheka ngeenge owa anye oku kufa ombinga muyo. Mbela ope na efimbo limwe ovanafikola vakweni va li ve ku luka omadina molwaashi wa anya okukufa ombinga moinima yonhumba? Ngeenge osho, owa li we linyenga ngahelipi kwaasho? Ou shii kutya oto ka nyemateka ovadali voye nosho yo Jehova ngeenge owa efa oumbada u ku ningife u landule eemhunga dovanhu. Ngeenge owa ningi ngaashi ovanafikola vakweni tava ningi, mbela oshike tashi ke ku ningilwa? Otashi dulika nokuli we litulila po omalalakano ngaashi okuninga omukokolindjila ile omuyakuliongalo ile oku ka longa koitukulwa oko ku na omhumbwe inene yovaudifi vOuhamba ile okuya kObetel. Ndele mbela okweendafana novanafikola vakweni otaku ke ku kwafela ngoo u hange omalalakano oye?
18 Ovanyasha Ovakriste, mbela ope na ngoo efiku limwe mwa li mwa hangwa keenghalo odo tadi yeleke eitavelo leni? Mbela omwa li mwe linyenga ngahelipi? Diladileni kombinga yomuhopaenenwa weni Jesus. Jesus ka li e liyandja komayeleko, ndele ponhele yaasho okwa li a ninga osho e shii kutya osha yuka. Okudimbuluka oshihopaenenwa shaJesus otaku ke mu kwafela mu kale mu na ouladi okulombwela ovanafikola vakweni sha yukilila kutya inamu hala okulimbwanga mumwe navo opo mu ka ninge oinima oyo mu shii kutya oya puka. Ngaashi Jesus, kaleni nokudilonga ketimaumbwile loku ka kala nomwenyo waalushe tamu longele Jehova nehafo nokudulika kuYe. — Heb. 12:2.
Oshinima sha fimana osho tashi kwafele oukwaneumbo u kale wa hafa
19. Onghedi yokukalamwenyo ilipi hai eta ehafo lashili?
19 Jehova Kalunga nosho yo Jesus Kristus ova halela ovanhu ouwa. Ohatu dulu okukala twa hafa paife nokuli nonande inatu wanenena. (Jes. 48:17, 18; Mat. 5:3) Jesus okwa li a honga ovahongwa vaye oinima ihapu, mwa kwatelwa eeshili dopalongelokalunga odo tadi dulu okweetela ovanhu ehafo. Okwa li yo e va honga kombinga yonghedi yokukalamwenyo ya denga mbada. Kakele kaasho, okwe tu tulila po oshihopaenenwa shiwa shi na sha nanghee hatu dulu okukala nonghalamwenyo i li paunafangwa nosho yo okukala netaleko li li pandjele. Atusheni ohatu dulu okumona ouwa ngeenge otwa shikula oshihopaenenwa shaJesus, kashi na nee mbudi kutya ohatu dana onghandangala ilipi moukwaneumbo. Onghee hano, ovashamane, ovakulukadi, ovadali nosho yo ounona, shikuleni oshihopaenenwa shaJesus. Okukala twa lenga omahongo aJesus nokulandula oshihopaenenwa shaye, otashi ke tu etela ehafo lashili moukwaneumbo nokukala twa wanenwa monghalamwenyo.
Oto nyamukula ngahelipi?
• Ovashamane ove na okulongifa ngahelipi eenghonopangelo odo va pewa kuKalunga?
• Ongahelipi ovakulukadi tava dulu okuhopaenena oshihopaenenwa shaJesus?
• Ovadali otava dulu okulihonga shike monghedi omo Jesus a li ha ungaunga novahongwa vaye?
• Ovanyasha otava dulu okulihonga shike moshihopaenenwa shaJesus?
[Efano pepandja 13]
Omushamane omunahole ota ka ninga po shike tete fimbo ina ninga etokolo olo tali kumu oukwaneumbo waye?
[Efano pepandja 14]
Omonghalo ilipi omukulukadi ta dulu okuyambidida oukwamutwe womushamane waye?
[Efano pepandja 15]
Ounona ohava hopaenene eenghedi diwa dovadali vavo