OSHO ELISA A LI A MONA

Kalunga okwa li a tala ko ngahelipi eindilo laElisa lokupewa oitukulwa ivali yomhepo yaElia? Ombibeli oya ti: ‘Eshi tava ende tava kundafana, tala, divadiva omatemba omundilo neenghambe domundilo da holoka ndele de va tukaula kumwe. Ndele Elia okwa ya keulu momhepo inene. Elisa okwa li e shi mona.’a Kungaho, Jehova okwa li a nyamukula eindilo laElisa. Elisa okwa li a mona Elia eshi ta kufwa po puye, a li a pewa oitukulwa ivali yomhepo yaElia nokwa li a ninga omuprofeti ponhele yaElia. — 2 Eeh. 2:11-14.

Nopehe na omalimbililo, Elisa ka li a dimbwa nandenande osho a li a mona eshi Elia a yelulwa po komhepo. Kakele kaasho, osha li shikumwifi okumona etemba loita lomundilo neenghambe domundilo. Oinima ya tya ngaho oya li euliko kutya Jehova okwa pa Elisa osho a li a indila. Ngeenge Jehova ta nyamukula omailikano etu, ihatu mono emoniko letemba loita la tema omundilo neenghambe domundilo. Ndele ope na oumbangi wa yela oo tau ulike kutya Kalunga ote tu kwafele neenghono daye dinene opo tu dule okulonga ehalo laye. Ngeenge otu wete kutya Jehova ota nangeke noupuna oshitukulwa shehangano laye shokombada yedu, kungaho otwa fa ashike tu wete etemba linenenene tali ende. — Hes. 10:9-13.