Natu kale hatu pandula ngeenge twa pewa sha nokukala hatu yandje nomutima aushe
TATE yetu womeulu omunahole, Jehova, oku na ko nasha nafye pauhandimwe. Eendjovo daye otadi tu shilipaleke kutya oha file oshisho filufilu ovapiya vaye aveshe. (1 Pet. 5:7) Onghedi imwe omo Jehova ha ulike kutya ohe tu file oshisho omoku tu kwafela meenghedi di lili noku lili opo tu mu longele noudiinini. (Jes. 48:17) Jehova okwa hala tu kale hatu longifa ekwafo olo he tu pe, unene tuu ngeenge twa hangwa komaupyakadi oo tae tu yahameke pamaliudo. Omhango yaMoses otai koleke oushili oo.
Koshi yOmhango yaMoses, Jehova okwa li a ninga elongekido lopahole opo ku kwafelwe “ovakwanaluhepo,” ngaashi eefiye, ovafiyekadi nosho yo ovanailongo. (Lev. 19:9, 10; Deut. 14:29) Jehova oku shii kutya ovapiya vaye vamwe otashi dulika va kale va pumbwa okupewa ekwafo kovalongelikalunga vakwao. (Jak. 1:27) Onghee hano, inapa kala nande oumwe womovapiya vaJehova ta anye okutambula ko ekwafo olo ta pewa komunhu oo e linyengifwa kuJehova. Ndele nande ongaho, ngeenge hatu tambula ko ekwafo olo hatu pewa otu na oku shi ninga noikala ya yuka.
Kakele kaasho, Eendjovo daKalunga otadi divilike kutya ovapiya vaye ove na yo oufembanghenda wokuyandja. Dimbuluka ehokololo li na sha ‘nomufiyekadi ohepele’ oo Jesus a li a mona motembeli muJerusalem. (Luk. 21:1-4) Omufiyekadi oo naye otashi dulika a li a mona ouwa melongekido laJehova lopahole lokufila oshisho ovafiyekadi olo la popiwa mOmhango. Ndele nande omufiyekadi oo okwa li ohepele, ota dimbulukiwa omolwoikala yaye yokuyandja, ndele hamolwaashi a li ha pewa omakwafo. Oikala yaye yokuyandja oya li ye mu etela ehafo, molwaashi Jesus okwa ti: “Okuyandja oku nelao komesho yokutambula.” (Oil. 20:35) Tu na oushili weendjovo odo momadiladilo, mbela ongahelipi hatu dulu okukala hatu ‘yandje’ nokumona ehafo olo hali di mokuyandja? — Luk. 6:38.
“Omwene ohandi mu ningile shike, ndi mu alulile”?
Omupsalme umwe okwa li a pula a ti: “Omwene ohandi mu ningile shike, ndi mu alulile ouwa aushe, ou a longela nge?” (Eps. 116:12) Mbela omupsalme oo okwa li a ningilwa ouwa ulipi? Jehova okwa li e mu kwafela pefimbo olo a li a hangwa ‘koupyakadi nokwa nyika oluhodi.’ Kakele kaasho, Jehova okwa li a “xupifa omwenyo [waye] mefyo.” Onghee hano, okwa li a hala a “alulile” sha Jehova. Mbela omupsalme oo okwa li a ninga po shike? Okwa ti: “Omaudaneko ange onda hala ndi a wanifile Omwene.” (Eps. 116:3, 4, 8, 10-14) Okwa li a tokola toko okuwanifa po omaudaneko aeshe oo a li a udanekela Jehova nosho yo okuwanifa po oiteelelwa yaYe aishe.
Naave oto dulu okuninga ngaashi omupsalme oo. Ngahelipi mbela? Omokukala alushe nonghalamwenyo i li metwokumwe neemhango daKalunga nosho yo omafinamhango aye. Onghee hano, kala wa lenga neenghono okulongela Jehova monghalamwenyo yoye nokweefa omhepo yaye i ku wilike mukeshe osho to ningi. (Omuud. 12:13; Gal. 5:16-18) Paushili wovene, itatu dulu nandenande okwaalulila Jehova ouwa aushe oo he tu ningile. Ndele nande ongaho, oto ka ‘hafifa omutima waJehova’ eshi e wete to mu longele nomutima aushe. (Omayel. 27:11) Kashi fi tuu oufembanghenda mukumwifi okuhafifa Jehova monghedi ya tya ngaho!
Xumifa komesho onghalonawa yeongalo
Nopehe na omalimbililo, oto dimine kutya owa mona ouwa meenghedi dihapu okupitila meongalo lopaKriste. Jehova oha yandje eendja dopamhepo dihapu okupitila meongalo. Owa shiiva oshili oyo ye ku mangulula komahongo oipupulu omalongelokalunga nowa dja mo momilaulu dopamhepo. (Joh. 8:32) Okwoongala kweongalo, oyoongalele inini naai ya kula oyo hai unganekwa ‘komupiya omudiinini nomunaendunge,’ oye ku kwafela u mone eshiivo olo tali twala komwenyo waalushe moparadisa kombada yedu, oko itaku ka kala vali ouyahame nokumona oixuna. (Mat. 24:45-47) Mbela ohatu dulu ngoo okuvalula omauwa aeshe oo twa mona okupitila meongalo lopaKriste nosho yo oo hatu ka mona monakwiiwa? Mbela oshike osho to dulu okwaalulila eongalo?
Omuyapostoli Paulus okwa shanga a ti: “Olutu alishe ngaashi la tulwa kumwe notali kwatelwa kumwe komufipa keshe, otali kulu li tungikike mohole, keshe tuu oshinhimbu shi fike pashiyelekifo shasho.” (Ef. 4:15, 16) Nonande omushangwa oo owa yukifwa unene kolutu lOvakriste ovavaekwa, efinamhango olo otali dulu yo okulonga kOvakriste aveshe kunena. Oilyo aishe yeongalo otai dulu shili okuxumifa komesho onghalonawa nosho yo ekulo leongalo. Mbela otai dulu oku shi ninga meenghedi dilipi?
Ohatu dulu okuninga ngaho mokukala hatu ningi alushe eenghendabala tu kale hatu tu vamwe omukumo pamhepo noku va hekeleka. (Rom. 14:19) Ngeenge otwa kala hatu ulike omaukwatya oshiimati shomhepo yaKalunga eshi hatu ungaunga novalongelikalunga vakwetu, ohatu ka xumifa komesho ‘ekulo lolutu.’ (Gal. 5:22) Kakele kaasho, ohatu dulu yo okukonga eemhito tu ‘ningile aveshe ouwa, ndele unene tuu oovakwetu vomeitavelo.’ (Gal. 6:10; Heb. 13:16) Ovamwatate novamwameme aveshe meongalo, kutya nee ovanyasha ile ovanamido, otava dulu okuxumifa komesho ‘ekulo lolutu litungikike mohole.’
Ohatu dulu yo okulongifa ounghulungu wetu, eenghono detu noiniwe yetu mokukufa ombinga moilonga yokuxupifa eemwenyo oyo tai longwa keongalo. Jesus Kristus okwa ti: “[Omwa] tambula oshali.” Mbela osho oshi na oku tu linyengifa tu ninge shike? Jesus okwa ti: “Yandjeni yo oshali.” (Mat. 10:8) Onghee hano, natu kaleni hatu kufa ombinga pauyadi moilonga ya fimanenena yokuudifa Ouhamba nokuninga ovanhu ovahongwa. (Mat. 24:14; 28:19, 20) Mbela ou na omangabeko onhumba? Dimbuluka omufiyekadi ohepele oo a hokololwa kuJesus. Omufiyekadi oo ka li a yandja shihapu, ndele Jesus okwa ti kutya oye a li a yandja shihapu e dule vakwao aveshe. Okwa li a yandja ashishe ngaashi eenghalo daye tadi shi pitike. — 2 Kor. 8:1-5, 12.
Natu tambule ko ekwafo olo hatu pewa tu na oikala ya yuka
Otashi dulika omafimbo amwe tu kale twa pumbwa okupewa ekwafo lonhumba keongalo. Inatu anya nande okutambula ko ekwafo keshe olo hatu pewa keongalo eshi hatu ungaunga nomafininiko onghalelo ei. Jehova okwa nangeka po ovalumenhu va wana nove na ko nasha va ‘pashukile oshiunda ashishe,’ opo ve tu kwafele ngeenge twa hangwa komayeleko nokomaudjuu. (Oil. 20:28) Ovakulunhuongalo nosho yo oilyo ikwao yeongalo oi na ehalo oku tu hekeleka, oku tu yambidida noku tu amena ngeenge tu li meenghalo didjuu. — Gal. 6:2; 1 Tes. 5:14.
Kala ho ulike oikala ya yuka ngeenge to pewa ekwafo lonhumba. Kala alushe ho pandula ngeenge wa pewa ekwafo. Kala yo wa tala ko ekwafo olo to pewa kovalongelikalunga vakweni li li euliko longhenda yaKalunga inai longelwa. (1 Pet. 4:10) Mbela omolwashike osho sha fimana? Osha fimana molwaashi inatu hala okukala ngaashi ovanhu vahapu mounyuni ovo ihava pandula.
Natu kale tu na ondjele
Paulus okwa popya kombinga yaTimoteus monhumwafo oyo a li a shangela eongalo lokuFilippi, a ti: “Ame nghi na umwe ta diladila ngaashi [ame], e mu file oshisho shili.” Opo nee okwa twikila ko a ti: “Osheshi ovo hava kongo oinima yavo vene, haai yaKristus Jesus.” (Fil. 2:20, 21) Tu na eendjovo daPaulus da kwata moiti momadiladilo, ongahelipi hatu dulu okuhenuka okukala twe lipaka unene ‘moinima yetu vene’ kunena?
Ngeenge hatu pula vamwe meongalo ve tu kwafele tu ungaunge nomaupyakadi etu, katu na oku va fininika ve shi ninge. Mbela omolwashike tuhe na okuninga ngaho? Diladila kwaashi: Nopehe na omalimbililo, ohatu ka pandula neenghono ngeenge omumwatate wonhumba okwe tu pe ekwafo lopainiwe opo tu ungaunge nonghalo yopaulumomumbwe. Ndele mbela ohatu ka fininika ngoo omumwatate oo e tu pe ekwafo lopainiwe la tya ngaho? Hasho nandenande. Sha faafana, molwaashi ovamwatate ovaholike ohava kala alushe va hafa oku tu kwafela, otwa pumbwa okukala tu na ondjele shi na sha nekwafo olo tave tu pe. Kakele kaasho, keshe osho ovaitaveli vakwetu tava ningi opo ve tu kwafele tu ungaunge neenghalo didjuu, otwa hala ve shi ninge nehalo liwa.
Ohatu dulu okukala noushili kutya ovamwatate novamwameme meongalo otava ka kala alushe ve lilongekida oku tu kwafela, tave shi ningi nehalo liwa. Ndele nande ongaho, omafimbo amwe otashi dulika va kale itava dulu okuwanifa po eemhumbwe detu adishe. Ngeenge osho ngaho, kala wa shilipalekwa kutya Jehova ote ke ku kwafela u ungaunge neyeleko keshe olo tashi dulika u shakeneke, ngaashi ashike a li a kwafela omupsalme oo a popiwa metetekelo. — Eps. 116:1, 2; Fil. 4:10-13.
Onghee hano, ino anya nande okutambula ko nolupandu efiloshisho keshe olo Jehova te ku pe, unene tuu ngeenge u li meenghalo didjuu. (Eps. 55:23) Jehova okwa hala u tambule ko ekwafo la tya ngaho. Kakele kaasho, okwa hala yo u kale ho “yandje nehafo.” Onghee hano, kala wa tokola toko ‘momutima woye’ okukala ho yandje ngaashi eenghalo doye tadi shi pitike, mokuyambidida elongelokalunga lashili. (2 Kor. 9:6, 7) Kungaho, oto ka dula okukala ho pandula ngeenge wa pewa sha nokukala ho yandje nomutima aushe.
[Oshimhungu/Efano pepandja 32]
“Omwene ohandi mu ningile shike, ndi mu alulile ouwa aushe, ou a longela nge?” — Eps. 116:12
▪ Konga eemhito u ‘ningile aveshe ouwa’
▪ Kala ho tu vamwe omukumo pamhepo noku va hekeleka
▪ Kala ho kufa ombinga pauyadi moilonga yokuninga ovanhu ovahongwa ngaashi eenghalo doye tadi shi pitike