OSHILESHWA 48

Hoolola ookaume pandunge

Molupe la fa la pilindwa

Ookaume kopofingo ohava weda ko kehafo letu momafimbo mawa, nohave tu pameke pefimbo loudjuu. Ashike Ombiibeli oye tu londwela kutya hakeshe umwe e li kaume muwa. Ongahelipi to dulu okuhoolola ookaume pandunge? Konakona omapulo taa shikula.

1. Ookaume ovo wa hoolola otava dulu oku ku nwefa mo ngahelipi?

Ohatu kendabala okuhopaenena ovanhu ovo hatu kala navo efimbo. Otava dulu oku tu nwefa mo nawa, ile nai, kashi na nee mbudi kutya ohatu kala navo efimbo lihapu komudidi, ile okointaneta. Ombiibeli oya ti: “Kala nokweenda novanongo, opo nee naave yo u ninge omunongo. Ndelenee ou ha endafana novashima [ovo vehe hole Jehova], ota ka laipala.” (Omayeletumbulo 13:20) Ookaume, ovo ve hole Jehova nohave mu longele, otava dulu oku ku kwafela u kale popepi naye nou ninge omatokolo e li pandunge. Ashike ookaume, ovo vehe hole Jehova, otava dulu oku ku ningifa u ehene kokule naye. Nomolwaasho Ombiibeli oye tu ladipika tu hoolole ookaume ketu pandunge. Ngeenge ookaume ketu ove hole Jehova, otave ke tu nwefa mo nawa, nohatu ke va nwefa mo yo nawa. Nokungaho, ohatu ka ‘twikila okutwaafana omukumo nokutungafana.’— 1 Ovatessalonika 5:11.

2. Jehova oha kala e tu uditile ngahelipi, she likolelela kookaume ovo twa hoolola?

Jehova oha hoolola ookaume kaye pandunge. Ombiibeli oya ti: “Ye omushiiviki wovayuki,” ile tu tye oha pange oukaume novayuki. (Omayeletumbulo 3:32) Jehova ota ka kala e udite ngahelipi, ngeenge otwa hoolola ookaume ovo vehe mu hole? Ota ka uda nai neenghono. (Lesha Jakob 4:4.) Kakele kaasho, Jehova ota ka kala a hafa nota ka ninga kaume ketu, ngeenge otwa henuka eendafano lii nokweehena popepi naye nosho yo ovo ve mu hole.— Epsalme 15:1-4.

KONAKONA MOULE

Konakona kutya omolwashike sha fimanenena okuhoolola ookaume pandunge, nanghee to dulu okupanga oukaume, oo tau dulu oku ku etela ouwa.

3. Lungama uha hoolole ookaume vai

Ovanhu, ovo vehe hole Kalunga nomifikamhango daye, ove li ookaume vai. Dana OKAVIDIO, ndele tamu kundafana epulo tali shikula.

OKAVIDIO: Henuka eendafano lii (6:17)

Ongahelipi hatu dulu okupanga oukaume novanhu vai inatu shi didilika mo?

Lesha 1 Ovakorinto 15:33, ndele tamu kundafana omapulo taa shikula:

Ovanhu velipi tava dulu okukala ookaume vai kwoove? Omolwashike to tile ngaho?

Lesha Epsalme 119:63, ndele tamu kundafana epulo tali shikula:

Oshike tashi dulu oku ku kwafela u mone kutya omunhu oku li kaume muwa, ile hasho?

Okayaxa komaapula. Eapula limwe la nyonauka tali li ingaanwa keedi notali nyonauna omaapula a kwao. — Eapula limwe la nyonauka otali dulu okunyonauna makwao aeshe. Ongahelipi okweendafana nomunhu ehe na eenghedi taku dulu oku ku nwefa mo nai?

4. Ohatu dulu okupanga oukaume muwa novanhu vomido, ile omaputuko e lili

Ombiibeli oya popya kombinga yaDavid naJonatan, ovalumenhu vavali vopefimbo laIsrael shonale. Ova li ve na omido neenghalo da yoolokafana, ashike ova li ve na oukaume wa twa kekipa. Lesha 1 Samuel 18:1, ndele tamu kundafana epulo tali shikula:

Omolwashike tuhe na ashike okupanga oukaume novanhu vepupi letu, ile ovo ve na eendodo da faafana nodetu?

Lesha Ovaroma 1:11, 12, ndele tamu kundafana epulo tali shikula:

Ongahelipi ookaume, ovo ve hole Jehova, tava dulu okutwaafana omukumo?

Mokavidio taka shikula, tala nghee omumwatate umwe omunyasha a mona ookaume ponhele oyo a li ina teelela. Dana OKAVIDIO, ndele tamu kundafana omapulo taa shikula.

OKAVIDIO: Nghee hatu dulu okumona ookaume (5:06)

Ngaashi sha ulikwa mokavidio, omolwashike ovadali vaAkil va li tave lipula unene shi na sha nookaume kaye vokofikola?
Oinima imwe ilipi ya li ye mu ningifa a kale a hokwa ookaume ovo?
Oshike sha li she mu kwafela aha kale vali e udite oudja?

5. Nghee to dulu okupanga oukaume muwa

Konakona nghee to dulu okumona ookaume vawa nanghee to dulu okukala kaume muwa. Dana OKAVIDIO.

OKAVIDIO: Kaume kashili olyelye? (4:14)

Omafano a dja mokavidio ‘Kaume kashili olyelye?’ Omunyasha e li nookaume kaye vomido, vomihoko nokudula kwa yoolokafana.

Lesha Omayeletumbulo 18:24 nosho yo 27:17, ndele tamu kundafana omapulo taa shikula:

Ookaume kashili ohava kwafelafana ngahelipi?
Mbela ou na oukaume muwa wa tya ngaho? Ngeenge hasho, ongahelipi to dulu okupanga oukaume wa tya ngaho?

Lesha Ovafilippi 2:4, ndele tamu kundafana epulo tali shikula:

Opo u mone ookaume vawa, owa pumbwa okukala kaume muwa. Ongahelipi to dulu okuninga ngaho?

Omafano: Omukainhu omunyasha ta talele po ookaume kaye vatatu vopofingo. 1. Ta popi naumwe mongodi. 2. Ta popi nomunamido umwe pOlupale lOuhamba. 3. A ka talela po umwe oo a nyika ouluhodi. — Opo u kale nookaume vawa, naave owa pumbwa **okukala** kaume muwa

VAMWE OHAVA TI: “Okupanga oukaume nakeshe umwe, pehe na ondjoolola, oshi li xwepo shi dulife okukala uhe na kaume.”

Ove oto ti ngahelipi?

ENGONGO

Ngeenge otwa hoolola ookaume ketu pandunge, ohatu ka hafifa Jehova nohatu ka mona ouwa.

Eendululo

Omolwashike Jehova a hala tu hoolole ookaume pandunge?
Otwa pumbwa okuhenuka okupanga oukaume novanhu va tya ngahelipi?
Ongahelipi to dulu okukala u na oukaume wa twa kekipa novanhu ovo tave ku nwefa mo nawa?

Efiku nda mana ko oshileshwa:

Omalalakano

Shiiva ovanhu vahapu meongalo.

Amwe vali:

Your other goal

TALA OUYELELE WA WEDWA PO

Tala nghee ookaume vawa tava dulu oku tu kwafela, ngeenge twa taalela omashongo.

“Natu pange oukaume wopofingo paife, ofimbo exulilo inali uya” (Oshungonangelo, Novemba 2019)

Diladila kwaasho to dulu okuninga, opo u pange oukaume novanhu vawa.

“Ongahelipi handi dulu okupanga oukaume muwa?” (Omapulo oo ovanyasha hava pula— Omanyamukulo oo taa kwafele, Embo 1, etukulwa 8)

Oshike wa pumbwa okushiiva shi na sha nokupanga oukaume novanhu kointaneta?

Lungamena omakwatafano opaintaneta (4:12)

Mehokololo “Onda li nda djuulukwa tate,” tala kutya oshike sha li she linyengifa omulumenhu umwe a talulule ookaume kaye.

“Ombibeli ohai lundulula onghalamwenyo yovanhu” (Oshungonangelo, 1 Aprili 2012)