Mbela okukala u na omaukwatya mawa osho tashi ufa kutya oto ka kala nonakwiiwa iwa kuhe na vali?
Oule womido omayovi, vahapu ova kala ve udite kutya, okukala u na omaukwatya mawa nosho yo eenghedi diwa, ohashi kwafele omunhu a ka kale nonakwiiwa iwa. Pashihopaenenwa, ovanhu vokoilongo yokoushilo, ova fimaneka osho omuhongi umwe woufilosofi, wedina Confucius (551-479 K.O.P.), a popya, a ti: “Osho ino hala oku shi ningilwa, ino shi ningila vakweni.”a
OSHINIMA OSHO VAHAPU HAVA NINGI
Vahapu natango onghee ngoo va itavela kutya, ngeenge ova kala ve na eenghedi, otava ka kala nonakwiiwa iwa. Ohava kendabala okukala nefimaneko, eenghedi diwa, okutambula ko oinakuwanifwa yavo monghalamwenyo nokukaleka eliudo lavo la yela. Omukainhu umwe wedina Linh, wokoVietnam, okwa ti: “Onda kala alushe nda itavela kutya, ngeenge onda kala omunashili, ohandi kala nonghalamwenyo iwa.”
Vamwe ohava kendabala okulonga ouwa omolwomaitavelo omalongelokalunga omo ve li. Omulumenhu umwe wedina Hsu-Yun, wokoTaiwan, okwa ti: “Onda li nda hongwa kutya, oilonga yomunhu fimbo e na omwenyo, oyo tai ka ufa kutya ota ka kala a hafa konima eshi a fya, ile ota ka mona oixuna.”
MBELA OSHO OSHOSHILI?
Oshoshili kutya ngeenge hatu ningile ovanhu ouwa vakwetu, ohatu mono omauwa mahapu. Ashike, vahapu ovo hava kendabala okuningila ovanhu vakwao ouwa, ohave ke shi mona mo kutya ihava alulilwa lela ouwa ngaashi ve u longa. Omukainhu umwe wedina Shiu Ping, wokoHong Kong, okwa ti: “Ame onde shi limonena kwaame mwene kutya, ovanhu ovo hava longele vakwao ouwa, ihava alulilwa naanaa ouwa oo va longa. Onda kala handi kendabala okuninga ngaashi handi dulu opo ndi file oshisho oukwaneumbo wetu nokulonga ouwa. Ashike ohombo yange inai enda nawa, nomushamane wange okwe ke tu fiya po nokamonamati kange.”
Vahapu ove shi didilika kutya havanhu aveshe vomomalongelokalunga hava longo ouwa. Omukainhu umwe wedina Etsuko, wokoJapan, okwa ti: “Onda li melongelokalunga limwe, nonda li omuwiliki wovanyasha. Onda li nda kumwa eshi nda mona ovanhu vomelongelokalunga olo ve na elihumbato inali koshoka, tava kondjele eenghonopangelo nokulongifa nai oimaliwa yongeleka.”
“Onda kala handi kendabala okuninga ngaashi handi dulu opo ndi file oshisho oukwaneumbo wetu nokulonga ouwa. Ashike ohombo yange inai enda nawa, nomushamane wange okwe ke tu fiya po nokamonamati kange.” — SHIU PING, HONG KONG
Vamwe ovo tava longo ouwa, ohava ka nyemata eshi have ke lihanga tava ningilwa natango oinima ii. Omukainhu umwe wedina Van, wokoVietnam, osho a li e udite ngaho. Okwa ti: “Efiku keshe onda li handi lande oiimati, eengala noikulya, ndele handi i yambe koaltari omolwootatekulululwa noomeekulululwa ovo va fya nale, nelineekelo kutya ohandi ka mona omanangekonoupuna monakwiiwa. Ndele nonande onda longa oilonga iwa aishe oyo, nonda longa oilonga ihapu yopalongelokalunga oule womido dihapu, omushamane wange okwa li a hovela okuvela neenghono. Opo nee, ofimbo okamonakadona kange ka li take lihongo kondje yoilongo, oka fya, ke li ashike pomido 20.”
Ngeenge hano okukala u na omaukwatya mawa inaku wana okuufa kutya omunhu ota ka kala nonakwiiwa iwa kuhe na vali, oshike hano tashi ufa? Opo tu mone enyamukulo kepulo olo, otwa pumbwa odjo i shii okulineekelwa, sha hala okutya, odjo yomauyelele oyo tai dulu okunyamukula omapulo etu, noku tu ulikila ondjila oyo tai twala konakwiiwa iwa. Openi hatu dulu okuhanga ouyelele oo?
a Opo u mone ouyelele muhapu u na sha naasho Confucian a honga, tala etukulwa 7, okatendo 31-35, membo Mankind’s Search for God, la nyanyangidwa kEendombwedi daJehova, notali monika kepandja letu lokointaneta, ko www.pr2711.com.