Ehena popepi naKalunga

Oto dulu okumona “eshiivo lokushiiva Kalunga”

JEHOVA KALUNGA okwe tu pa omhito yokumona emona li na ondilo nokwa hala tu li mone. Emona la tya ngaho ihali eta oupuna wopamaliko, ndele otali eta ombili yokomutima, okukala twa wanenwa nosho yo onghalamwenyo ihafifa, oinima oyo itai dulu okulandwa noimaliwa aishe oyo i li mounyuni. Emona olo olo shike? Ohamba inaendunge Salomo oya yelifa shi na sha naasho mOmayeletumbulo 2:1-6.

Salomo okwa popya kutya emona olo olo “eshiivo lokushiiva Kalunga,” sha hala kutya, oshili kombinga yaKalunga nomalalakano aye ngaashi ya hololwa mOmbibeli. (Ovelishe 5) Ope na oinima i lili noku lili i na sha nemona olo.

Omahongo ashili. Ombibeli otai nyamukula omapulo ngaashi: Edina laKalunga olyelye? (Epsalme 83:18, NW) Oshike hashi ningwa po pefyo? (Epsalme 146:3, 4) Omolwashike tu li kombada yedu? (Genesis 1:26-28; Epsalme 115:16) Mbela okumona omanyamukulo omapulo a fimana a tya ngaho kashi fi oshinima shi na ondilo?

Omayele e li pandunge. Ombibeli otai tu hongo onghedi yokukalamwenyo ya denga mbada. Oshike tashi dulu oku mu kwafela opo ohombo yeni i kalelele? (Ovaefeso 5:28, 29, 33) Oshike tashi dulu oku ku kwafela u tekule ounona voye va kale va lungama? (Deuteronomion 6:5-7; Ovaefeso 6:4) Ongahelipi to dulu okumona ehafo monghalamwenyo? (Mateus 5:3; Lukas 11:28) Mbela oto diladila kutya omayele e shii okulineekelwa a tya ngaho oku na ondilo i fike peni?

Eudeko lomoule li na sha nomaukwatya aKalunga. Ombibeli oyo odjo ya shiya ko youyelele u li paushili kombinga yaKalunga. Mbela Kalunga omunhu a tya ngahelipi? (Johannes 1:18; 4:24) Mbela oku na ko ngoo nasha nafye? (1 Petrus 5:6, 7) Amwe omomaukwatya aye a tongomana oelipi? (Exodus 34:6, 7; 1 Johannes 4:8) Mbela oto diladila kutya ouyelele washili wa tya ngaho kombinga yOmushiti ou na ondilo i fike peni?

“Eshiivo lokushiiva Kalunga” olo lela emona lopamhepo, oku shi popya pafaneko. Ongahelipi to dulu oku li limonena? Omayeletumbulo 2:4 omo Salomo a faafanifa eshiivo olo ‘nemona la holekwa’ otae ku kwafele u mone enyamukulo. Diladila kwaashi: Omunhu oku na okulonga noudiinini opo a dule okumona emona la holekwa. Sha faafana, omunhu oku na okuninga eenghendabala da mana mo opo a mone eshiivo lokushiiva Kalunga. Eshiivo la tya ngaho otali hangwa mOmbibeli.

Salomo okwa popya kutya oshike twa pumbwa okuninga opo tu mone “eshiivo lokushiiva Kalunga.” Omautumbulilo ngaashi “tambula eendjovo dange” nosho yo ‘lemena omutima woye’ otaa ulike kutya otwa pumbwa okukala nomutima u na ehalo okupwilikina. (Ovelishe 1, 2) Outumbulilo “ifana,” ‘konga’ nosho yo ‘shitilila’ otau ulike kutya otwa pumbwa okuninga eenghendabala da mana mo. (Ovelishe 3, 4) Opo tu mone emona la tya ngaho, otwa pumbwa okukonakona Ombibeli noukeka, hatu shi ningi tashi di komutima. — Lukas 8:15.

Ngeenge otwa katuka eenghatu da tya ngaho, Jehova ote ke tu kwafela tu mone emona. Ovelishe 6 oya ti: “Omwene ta yandje ounongo.” Ohatu dulu ashike okuuda ko filufilu oshili oyo tai hangwa mOmbibeli kekwafo laKalunga. (Johannes 6:44; Oilonga 16:14) Oto dulu okukala noushili ou kutya: Ngeenge owa konakona Eendjovo daKalunga nomutima aushe, oto ka mona “eshiivo lokushiiva Kalunga,” emona olo tali ka yambapaleka onghalamwenyo yoye kuhe na vali. — Omayeletumbulo 2:10-21.a

[Eshangelo lopedu]