Osho tashi kwafele oukwaneumbo u kale wa hafa shili

Ovalihomboli, kaleni mu na oupamhepo muwa

Fredericka okwa ti: “Eshi opo twa li twa hombola, onda li nda ladipika omukulukadi wange tu kale hatu konakona Ombibeli pamwe. Onda li nda hala omukulukadi wange a kale e litula mo eshi hatu konakona. Ndele Leanne ka li ha kala a ngungumana, nongeenge nda li handi pula omapulo, okwa li ashike ha nyamukula heeno ile ahowe. Ka li ha yandje omanyamukulo monghedi omo nda li ndi wete kutya oyo e na okunyamukula mekonakonombibeli.”

Leanne okwa ti: “Onda li ndi na omido 18 eshi nda hombolwa kuFrederick. Otwa li hatu konakona Ombibeli pandjikilile, ndele Frederick okwa li ha longifa eemhito da tya ngaho opo a popye kombinga yomapuko ange aeshe nokulombwela nge kutya openi nda pumbwa okuxwepopala ndi li omuhombolwa. Onda li nda teka omukumo nonda nyemata neenghono.”

MBELA oto diladila kutya oshike sha li sha etifa oupyakadi pokati kaFrederick naLeanne? Aveshe ova li ve na omalinyengotomheno mawa nove hole Kalunga. Ova li yo ve wete kutya ova pumbwa okukonakona Ombibeli pamwe. Ndele ekonakonombibeli olo li na ngeno oku va hanganifa ola li tali monika la fa tali va tukaula. Otashi dulika va kala tava konakona Ombibeli pamwe, ndele inashi va kwafela va kale ve na oupamhepo muwa ve li ovalihomboli.

Okukala u na oupamhepo otashi ti shike? Omolwashike ovalihomboli ve na okuninga eenghendabala opo va kale ve na oupamhepo muwa? Omashongo elipi tashi dulika va shakeneke, nongahelipi tava dulu oku a finda?

Okukala u na oupamhepo otashi ti shike?

Outumbulilo “oupamhepo” oo wa longifwa mOmbibeli otau ulike koikala ile ketaleko lomunhu li na sha nonghalamwenyo. (Judas 18, 19, NW) Pashihopaenenwa, omushangi wOmbibeli Paulus okwa divilika eyooloko olo li pokati koikala yomunhu oo e na oupamhepo muwa nosho yo oo ha tale ko oinima pambelela. Paulus okwa ti kutya ovo ve na oikala yopambelela ohava yandje elitulemo lihapu kuvo vene ponhele yavamwe. Ohava ningi osho ve wete she va wapalela, ponhele yokukendabala okudulika komifikamhango daKalunga. — 1 Ovakorinto 2:14; Ovagalati 5:19, 20.

Mepingafano naasho, ovo ve na oupamhepo muwa ova lenga omifikamhango daKalunga. Ova panga oukaume naJehova Kalunga nohava kendabala okuhopaenena omaukwatya aye. (Ovaefeso 5:1) Onghee hano, ohava ungaunga navamwe pahole, nolune nonombili. (Exodus 34:6) Ohava dulika kuKalunga nokuli nopeemhito opo ihashi kala shipu okuninga ngaho. (Epsalme 15:1, 4) Darren wokoKanada, oo a kala a hombola oule womido 35, okwa ti: “Ondi wete kutya omunhu oo e na oupamhepo muwa oha diladila alushe kutya okupopya nosho yo eenghatu daye otadi ka kuma ngahelipi oukaume waye naKalunga.” Omukulukadi waye Jane okwa weda ko a ti: “Ondi wete kutya omukainhu oo e na oupamhepo muwa oyoo ha ningi eenghendabala da mana mo efiku keshe opo a kulike oiimati yomhepo yaKalunga.” — Ovagalati 5:22.

Ashike omunhu ina pumbwa okukala a hombola ile a hombolwa opo ngeno a kale e na oupamhepo muwa. Ombibeli otai hongo kutya omunhu keshe pauhandimwe oku na oshinakuwanifwa shokulihonga kombinga yaKalunga noku mu hopaenena. — Oilonga 17:26, 27.

Omolwashike sha fimana kovalihomboli okukala ve na oupamhepo muwa?

Mbela omolwashike ovalihomboli ve na okulongela kumwe opo va kale ve na oupamhepo muwa? Diladila kefaneko eli: Natu tye nee ngeno ope na ovanamapya vavali ve limanga oukuni kumwe opo va ninge epya. Umwe okwa tokola va kune eembuto doikunomwa yavo pefimbo lonhumba kuyele momudo, ofimbo mukwao a diladila va ka kune kohainga. Umwe okwa hala okulongifa oushosho wonhumba, ndele mukwao okwa anya filufilu noku udite kutya oimeno inai pumbwa oushosho. Umwe okwa hala okulonga mepya noudiinini efiku keshe, ofimbo mukwao a hala okukala a mwena nokuteelela oku ka teya nonande ina longa sha. Moshinima sha tya ngaho, otashi dulika ngoo mepya mu dje sha, ndele ngeno ovanamapya aveshe ova udafanene osho ve na okuninga nokulongela kumwe opo va hange omalalakano avo, ngeno ova teya shihapu.

Omushamane nomukulukadi ova fa ovanamapya ovo. Ngeenge umwe womuvo okwa kala e na oupamhepo muwa, ekwatafano lavo otashi dulika li xwepopale. (1 Petrus 3:1, 2) Ndele otashi ka kala shiwa neenghono ngeenge ovalihomboli aveshe va dimine okudulika komifikamhango daKalunga nokuninga eenghendabala da mana mo opo va yambididafane eshi tava longele Kalunga. Ohamba inaendunge Salomo oya ti: “Vavali ve dule umwe.” Omolwashike mbela? “Osheshi vo otava mono ondjabi iwa yoshilonga shavo shidjuu. Osheshi vo ngenge tava punduka, umwe ta dulu okuyambula omukwao.” — Omuudifi 4:9, 10.

Nopehe na omalimbililo, owa hala ove nakaume koye kopahombo mu kale mu na oupamhepo muwa. Ndele ngaashi ashike okulonga epya, okukala oove auke u na ehalo itashi eta oidjemo iwa. Natu ka tale komashongo opavali oo tashi dulika u shakeneke nosho yo nghee to dulu oku a finda.

ESHONGO 1: Katu na efimbo. Sue, oo opo a hombolwa, okwa ti: “Omushamane wange oha ile nge koilonga po 7:00 yokomatango. Shimha twa fiki keumbo, ohatu hange oilonga yomeumbo ye tu teelela. Nonande otu shii kutya otwa pumbwa okukonakona pamwe opo tu lihonge kombinga yaKalunga, ohatu kala twa loloka palutu nohatu kala twa hala okufuwa po.”

Osho tashi dulu oku mu kwafela mu pondole: Kaleni hamu tifuka nohamu longele kumwe. Sue, okwa ti: “Ame nomushamane wange otwa tokola okukala hatu penduka ongula inene opo tu leshe Ombibeli noku i kundafana pamwe fimbo inatu ya koilonga. Omushamane wange oha kwafele nge yo shi na sha noilonga imwe opo tu dule okukala tu na efimbo lokuhafela pamwe.” Omauwa elipi haa di mokuninga eenghendabala da wedwa po da tya ngaho? Ed, omushamane waSue okwa ti: “Onda mona kutya ngeenge ame naSue hatu kundafana pandjikilile oinima yopamhepo pamwe, ohatu ungaunga nomaupyakadi nomupondo nohashi ninipike oisho yetu.”

Kakele kokukundafana, osha fimanenena yo okulongifa ominute dinini efiku keshe opo mu ilikane pamwe. Osho otashi dulu okukwafela ovalihomboli ngahelipi? Ryan, oo a kala a hombola oule womido 16, okwa ti: “Efimbo opo la di ko, ame nomukulukadi wange otwa li tu na okuhaudafana kwa kwata moiti mohombo yetu. Ndele otwa li twa ninga eenghendabala tu kale hatu ilikana konguloshi keshe, hatu lombwele Kalunga oisho yetu. Ondi wete kutya okwiilikana pamwe oshe tu kwafela tu kandule po omaupyakadi etu notu kale vali twa hafa mohombo yetu.”

KENDABALENI OKUNINGA NGAHA: Litulilei po efimbo linini pexulilo lefiku keshe opo mu dule okukundafana kombinga yoinima iwa keshe oyo ye mu ningilwa mu li ovalihomboli, oyo tamu dulu okupandula Kalunga shi na sha nayo. Kundafaneni yo kombinga yomashongo oo hamu shakeneke, unene tuu oo mwa pumbwa ekwafo laKalunga opo mu dule okuungaunga nao. Elondwelo: Ino longifa omhito oyo opo u lombwele kaume koye kopahombo omapuko aye. Ponhele yaasho, ngeenge tamu ilikana pamwe, tumbula ashike oinima oyo mwa pumbwa okuninga omalunduluko muyo amushe. Mefiku la landula ko, kendabaleni okukatuka metwokumwe neilikano leni.

ESHONGO 2: Otu na okudula kwa yoolokafana. Tony okwa ti: “Nghi na efiku nda kalele omutumba ndele handi lesha embo.” Omukulukadi waye Natalie okwa ti: “Ondi hole okulesha nondi hole okupopya kombinga yaasho nde lihonga. Omafimbo amwe ohandi diladila kutya ohandi tilifa Tony kanini ngeenge hatu kundafana kombinga yoinima yopamhepo.”

Osho tashi dulu oku mu kwafela mu pondole: Kaleni hamu yambididafana nokuhenuka okuninga efiyafanepo ile okutokolafana. Pandula kaume koye kopahombo noku mu twa omukumo omolwomaukwatya aye mawa. Tony okwa ti: “Omafimbo amwe ohandi kala nda kenyanana molwaashi omukulukadi wange oku na exwamo lokukundafana kombinga yOmbibeli, nokanda li nda manguluka okukundafana naye kombinga yoinima yopamhepo. Ndele Natalie oha yambidida nge neenghono. Paife ohatu kundafana pamwe oinima yopamhepo pandjikilile nonda mona kutya mboli kashi fi oshinima shitilifa. Ohandi hafele okukundafana naye oikundafanwa ya tya ngaho, naasho oshe tu kwafela neenghono tu kale tu na ombili notuhe na oshisho tu li ovalihomboli.”

Ovalihomboli vahapu ova mona kutya eehombo davo ohadi xwepopala ngeenge ve litulila po efimbo pandjikilile oshivike keshe opo va leshe nokukonakona Ombibeli pamwe. Ndele ope na elondwelo kutya: Ngeenge tamu konakona, popya kutya ongahelipi to dulu okutula moilonga omayele oo pauhandimwe, ndele hanghee kaume koye kopahombo ta dulu oku a tula moilonga. (Ovagalati 6:4) Kundafaneni oinima oyo tai dulu okweetifa okuhaudafana pomhito imwe i lili ndele hapefimbo lekonakono leni. Omolwashike mbela?

Diladila kwaashi: Natu tye nee ngeno otamu li pamwe noukwaneumbo weni, mbela oto ka wapaleka nokumanga oshipute sha mbwengela pefimbo opo? Hasho nandenande. Ngeenge owa ningi ngaho, oto ka tondifa ovanhu. Jesus okwa faafanifa okulihonga nokulonga ehalo laKalunga nokulya oikulya. (Mateus 4:4; Johannes 4:34) Ngeenge oho popi kombinga yoipute yopamaliudo efimbo keshe tamu konakona Ombibeli, oto dulu okuningifa kaume koye kopahombo a kale ina hala vali okulya oikulya yopamhepo. Oshoshili kutya omwa pumbwa okukundafana kombinga yomaupyakadi, ndele kundafaneni kombinga yao pefimbo limwe vali. — Omayeletumbulo 10:19; 15:23.

KENDABALA OKUNINGA NGAHA: Shanga omaukwatya avali ile atatu akaume koye kopahombo oo wa lenga neenghono. Eshi tamu ka kundafana oinima yopamhepo ya pamba omaukwatya oo moshikando tashi landula, lombwela kaume koye kopahombo kutya owa pandula shi fike peni onghedi omo ha ulike omaukwatya oo.

Oto ka teya osho wa kuna

Ngeenge omwa kala mu na oupamhepo muwa mu li ovalihomboli, hauxuuninwa otamu ka kala mu na ombili inene nosho yo ohombo ihafifa. Eendjovo daKalunga otadi tu shilipaleke kutya “eshi omunhu te shi kunu, osho tuu te shi teya yo.” — Ovagalati 6:7.

Frederick naLeanne ovo va tumbulwa pehovelo loshitukulwa eshi ova mona oushili u na sha nefinamhango lOmbibeli olo. Paife ova kala va hombola oule womido 45 nova mona ouwa omolwokukala tava xwepopaleke oupamhepo wavo. Frederick okwa ti: “Onda li handi pe omukulukadi wange oushima molwaashi ke hole okukundafana. Ndele konima yefimbo onda ka mona kutya ondi na okuninga eenghendabala.” Leanne okwa ti: “Molwaashi atushe otu hole Jehova Kalunga, oshe tu kwafela neenghono momafimbo madjuu. Momukokomoko womido, otwa kala hatu konakona nokwiilikana pamwe pandjikilile. Eshi nda mona Frederick ta ningi eenghendabala opo a xwepopale mokuulika omaukwatya opaKriste, oshe shi ninga shipu kwaame okukala ndi mu hole.”

[Eshangelo lopedu]

LIPULA KUTYA . . . 

▪ Otwe lixula naini okwiilikana pamwe tu li ovalihomboli?

▪ Oshike handi dulu okuninga po opo ndi twe omukumo kaume kange kopahombo opo a kale a manguluka okukundafana naame oinima yopamhepo?