Natu kaleni oupafi ngaashi Jesus
“Kaleni oupafi, nye mu indile.” — MAT. 26:41.
OTO NYAMUKULA NGAHELIPI?
․․․․․
Ongahelipi omailikano etu taa dulu okuulika kutya otu li oupafi?
․․․․․
Omeenghedi dilipi hatu dulu okuulika kutya otu li oupafi ngeenge tu li moukalele?
․․․․․
Omolwashike sha fimana okukala oupafi ngeenge hatu yelekwa, nongahelipi hatu dulu okuninga ngaho?
1, 2. (a) Omapulo elipi taa dulu okuholoka po e na sha nokushikula oshihopaenenwa shaJesus shokukala oupafi? (b) Oshihopaenenwa shaJesus sha wanenena otashi dulu ngoo shili okukwafela ovanhu ovalunde? Shi yelifa.
OTASHI dulika u lipule to ti: ‘Ohatu dulu ngoo shili okuhopaenena oshihopaenenwa shaJesus shokukala oupafi? Fye inatu wanenena ngaashi ye! Kakele kaasho, Jesus okwa li ha dulu okushiiva kombinga yonakwiiwa, ta dulu nokuli okushiiva oinima oyo tai ka ningwa omido omayovi di li komesho. Mbela Jesus naye okwa li ngoo shili a pumbwa okukala oupafi?’ (Mat. 24:37-39; Heb. 4:15) Natu ka kundafaneni tete kombinga yomapulo oo, naasho otashi ke tu kwafela tu mone nghee oshikundafanwa osho sha fimana nosha endelela.
2 Mbela oshihopaenenwa shaJesus sha wanenena otashi dulu ngoo okukwafela ovanhu ovalunde? Heeno, molwaashi omunhu oha dulu okulihonga sha komuhongi waye muwa nosho yo koshihopaenenwa shaye. Pashihopaenenwa, diladila ashike kombinga yomulumenhu oo opo ta hetekele okuumba outa wanangongo oshikando shaye shotete. Nopehe na omalimbililo, omunhu oo ita dulu okuyasha oshishonekwa shaye oshikando osho, ndele okwa pumbwa okutwikila okulihonga okuumba nopehe na okusholola. Ashike opo a xwepopale, okwa pumbwa okuhopaenena omuhongi waye oo e na owino wokuumba. Omuhongwa oku na okutala nghee omuhongi waye ha fikama, nghee ha kwata outa nosho yo nghee ominwe daye hadi kwata mofipa. Mokweendelako kwefimbo, omuhongwa ota ka shiiva kutya ofipa okwa pumbwa oku i nana shi fike peni nosho yo kutya omhepo otai pepe ya finda peni. Ndele ke na okusholola nandenande nonande oku shekune lwoikando. Ngeenge okwa kala ta hopaenene osho omuhongi waye ta ningi, xuuninwa oikuti yaye otai ka yasha oshishonekwa shaye. Sha faafana, nafye ohatu ka xwepopala tu li Ovakriste ngeenge otwa pwilikine kehongo laJesus nokushikula oshihopaenenwa shaye sha wanenena.
3. (a) Jesus okwa li a ulika ngahelipi kutya naye okwa pumbwa okukala oupafi? (b) Oshike hatu ka kundafana moshitukulwa eshi?
3 Mbela ohatu dulu ngoo shili okukala oupafi ngaashi Jesus? Mbela Jesus naye okwa li ngoo shili a pumbwa okukala oupafi? Heeno! Pashihopaenenwa, Jesus okwa li a ladipika ovayapostoli vaye ovadiinini moufiku waye waxuuninwa kombada yedu, a ti: ‘Kaleni apa mu kale oupafi pamwe naame.’ Opo nee, okwa li a twikila ko vali a ti: “Kaleni oupafi, nye mu indile, mu ha hangike komahongaulo.” (Mat. 26:38, 41) Nonande Jesus okwa li ha kala alushe oupafi, okwa li a pumbwa okukala oupafi unene tuu pefimbo olo la li lidjuu kuye nosho yo okweehena popepi elela naXe womeulu shi dulife nale. Jesus okwa li e shii kutya ovashikuli vaye navo ova li va pumbwa okutwikila okukala oupafi, ndele hapomhito ashike oyo. Paife natu ka taleni kutya omolwashike Jesus a hala tu twikile okukala oupafi. Konima yaasho, ohatu ka kundafana kombinga yoinima itatu omo twa pumbwa okukala oupafi keshe efiku ngaashi Jesus.
OMOLWASHIKE JESUS A HALA TU KALE OUPAFI?
4. Okuhashiiva sha kwetu kombinga yonakwiiwa oku na okukuma ngahelipi omhumbwe yetu yokukala oupafi?
4 Pauxupi, Jesus okwa hala tu kale oupafi molwaashi katu shii naanaa oinima aishe oyo tai ka ningwa po monakwiiwa. Mbela Jesus naye okwa li ngoo e shii oinima aishe i na sha nonakwiiwa pefimbo opo a li omunhu wokombada yedu? Ahowe, nomolwaasho a li a dimina oushili oo nelininipiko, a ti: “Efiku olo notundi oyo kaku na ou e i shii, nande ovaengeli vomeulu, ile Omona, oTate Oye aeke.” (Mat. 24:36) Pefimbo opo, “Omona” waKalunga ka li a shiiva kutya exulilo lounyuni ou woukolokoshi ola li tali ke uya naini kondadalunde. Ndele mbela ongahelipi shi na sha nafye kunena? Mbela eshiivo letu li na sha nonakwiiwa ola ngabekwa? Heeno! Nafye katu shi shii kutya Jehova ota ka tuma naini Omona waye a xulife po ounyuni ou woukolokoshi. Ndele nonande ngeno otwa li tu shi shii, mbela ngeno otwa pumbwa ngoo shili okukala oupafi? Otwa pumbwa okukala oupafi filufilu shi dulife nale, molwaashi Jesus okwa yelifa kutya efiku olo otali ke uya ombadilila! — Lesha Mateus 24:43.
5, 6. (a) Omolwashike eshiivo letu li na sha nonakwiiwa nosho yo omalalakano aKalunga li na oku tu linyengifa tu kale oupafi? (b) Omolwashike tu na okukala twa tokola toko okukala oupafi eshi twe lihonga kombinga yaSatana?
5 Jesus okwa li e shii shihapu kombinga yonakwiiwa nokwa li nokuli e shii oinima ikumwifi oyo vahapu ovo va li ve mu dingilila inave i shiiva nandenande. Eshiivo letu lonakwiiwa itali xumbile nandenande mwaali laJesus, nomolwaasho tu na oku mu pandula eshi e tu honga shihapu kombinga yOuhamba waKalunga nosho yo osho tau ka wanifa po monakwiiwa i li popepi. Ndele ngeenge hatu tale momudingonoko wetu, kutya nee okofikola, okoilonga ile omoshitukulwa shetu omo hatu udifile, mbela inatu didilika kutya ovanhu vahapu kave shii sha kombinga yoinima ikumwifi oyo Jesus a honga? Hano olo etomheno vali limwe olo tu na lokukala oupafi. Nafye otwa pumbwa okukala alushe oupafi ngaashi Jesus nokukonga eemhito tu udifile ovanhu vakwetu kombinga yOuhamba waKalunga. Omhito keshe hatu mono oi na ondilo nokatu na nande oku i hepifa, molwaashi eemwenyo dovanhu odi li monghuwo i nonghambe. — 1 Tim. 4:16.
6 Ope na natango oshinima shimwe osho sha li she linyengifa Jesus a kale oupafi. Jesus okwa li e shii kutya Satana okwa li ta kendabala oku mu yeleka, oku mu hepeka nokuteya po oudiinini waye. Omutondi oo omukwanyanya okwa kala alushe ha kongo ‘eemhito tadi wapalele’ opo a yeleke oudiinini waJesus. (Luke 4:13, yelekanifa no-NW.) Ndele Jesus okwa li ha kala alushe oupafi nokwe lilongekida okukondjifa omayeleko oludi keshe, omapataneko ile omahepeko. Mbela nafye katu na okuninga sha faafana? Otu shii kutya Satana ohe tu dingilile natango “ngaashi onghoshi hai kumbu, nota kongo ou te mu xwake po.” Onghee hano, Eendjovo daKalunga otadi ladipike Ovakriste aveshe tadi ti: “Kaleni mu nelidiliko nomwa pashuka.” (1 Pet. 5:8) Ndele mbela osho ongahelipi hatu dulu oku shi ninga?
NGHEE EILIKANO TALI DULU OKU TU KWAFELA TU KALE OUPAFI
7, 8. Jesus okwa li a yandja omayele elipi e na sha nokwiilikana, nokwa tula po oshihopaenenwa shilipi?
7 Ombibeli otai tu omufindo efimano lokukala hatu ilikana opo tu dule okukala oupafi pamhepo. (Kol. 4:2; 1 Pet. 4:7) Pashihopaenenwa, diva konima eshi Jesus a li a ladipika ovahongwa vaye va kale oupafi pamwe naye, okwa li e va lombwela a ti: “Kaleni oupafi, nye mu indile, mu ha hangike komahongaulo.” (Mat. 26:41) Mbela osho osha hala okutya omayele oo okwa li ashike a pumbiwa pefimbo olo lidjuu? Hasho nandenande! Omayele oo okwa fimana notwa pumbwa oku a tula moilonga efiku keshe.
8 Jesus okwe tu tulila po oshihopaenenwa sha denga mbada shokwiilikana. Otashi dulika to dimbuluka nokuli kutya pomhito imwe okwa li a ilikana kuXe oufiku aushe. Natu fanekeni oshiningwanima osho momadiladilo. (Lesha Lukas 6:12, 13.) Osha li sha ningwa pefimbo loitemadula, tashi dulika popepi nodoolopa yedina Kapernaum yomoshitukulwa omo mwa li hamu di Jesus. Etango eshi la ningina, Jesus okwa li a londa kuimwe yomeendudu odo da li popepi nEfuta laGalilea. Eshi kwa enda taku laula, Jesus otashi dulika a li e wete oumundilo veelamba domahooli domuKapernaum nosho yo domomikunda dikwao dopopepi. Ndele eshi a li ta ilikana kuJehova, okwa li ashike a pwila mo fiyo kwa toka filufilu. Otashi dulika a ka mona ashike eshi oumundilo ovo va li kokule va enda tava dimi kookamwe nookamwe ile eshi omwedi tau tavakana mevalelwa ile eshi oufitukuti tava nyange eendja davo moixwa. Otashi dulika a li ta ilikana unene tuu kombinga yoku ka hoolola ovayapostoli vaye 12. Diladila ashike nghee Jesus a li a pwila meilikano ta hololele Xe omadiladilo nomalipulo aye kombinga yomuhongwa keshe nota kongo ewiliko nomayele kuXe.
9. Oshike hatu dulu okulihonga moshihopaenenwa shaJesus eshi a li a ilikana oufiku aushe?
9 Mbela oshike hatu lihongo moshihopaenenwa shaJesus? Mbela ohatu lihongo mo kutya nafye otu na okukala hatu ilikana efimbo lilelile? Hasho, molwaashi okwa li a popya pahole shi na sha nokudula kwovashikuli vaye, a ti: “Omhepo oya hala, ndele ombelela i noungone.” (Mat. 26:41) Ndele nande ongaho, ohatu dulu okuhopaenena Jesus moinima yonhumba. Pashihopaenenwa, mbela katu na okukonga ekwafo kuTate yetu womeulu ngeenge hatu ningi omatokolo oo e tu kuma pauhandimwe ile omaukwaneumbo etu ile a kuma oupamhepo wovaitaveli vakwetu? Mbela ohatu kwatele mo ngoo ovaitaveli vakwetu momailikano etu? Mbela ohatu ilikana ngoo tashi di komutima ile ohatu endulula ashike oinima ya faafana lwoikando? Natu dimbulukweni yo kutya Jesus okwa li a lenga neenghono ekwatafano laye naXe nokwa li ha popi naye shihe fi ashike moipafi. Molwaashi ounyuni ou tu li muo owe lipyakidila neenghono, oshi na oupu tu kwatwe omboko kuo nokudimbwa okuninga oinima oyo ya fimanenena. Ndele ohatu ka kala ashike oupafi ngeenge otwa kala hatu kongo eemhito dokwiilikana paumwene, hatu shi ningi twa mana mo. (Mat. 6:6, 7) Ngeenge otwa ningi ngaho, ohatu ka kala twa halelela okupameka ekwatafano letu naJehova, ohatu ka ehena popepi elela naye nohatu ka henuka okuninga keshe osho tashi dulu okunyona po ekwatafano letu naye. — Eps. 25:14.
OTWA PUMBWA OKUKALA OUPAFI NGEENGE TU LI MOILONGA YOMOMAPYA
10. Oshihopaenenwa shilipi tashi ulike kutya Jesus okwa li ha kongo eemhito alushe opo a yandje oundombwedi?
10 Jesus okwa li ha kala oupafi ngeenge ta longo oilonga oyo a li a pewa kuJehova. Otashi dulika pe na oilonga imwe omo ngeenge omadiladilo omunailonga okwa twalwaatwalwa itashi ke mu etela oilanduliko ya nyika oshiponga. Ndele oilonga ihapu omunhu okwa pumbwa okuyandja elitulemo nokukala oupafi. Oukalele wetu wopaKriste nao oumwe womoilonga ya tya ngaho. Jesus okwa li ha kala oupafi ngeenge e li moukalele nokwa li ha kongo alushe eemhito opo a udifile vamwe onghundana iwa. Pashihopaenenwa, efiku limwe Jesus novahongwa vaye ova li ve uya poshilando shedina Sikar, va dja molweendo lile omo va shilwa tava ende. Opo nee, ovahongwa vaye ova li ve mu fiya ta fuda po pondungu imwe i li popepi noshilando osho, ofimbo vo va li va ka landa oikulya moshilando. Ndele fimbo Jesus a li a teelela ovahongwa vaye, okwa li a twikila okukala oupafi nokwa li a mona omhito imwe yokuyandja oundombwedi. Okwa li a mona omukainhu umwe Omusamaria oo a li e uya okuteka omeva pondungu oyo. Ponhele yokufuwa po ile okukonga omalipopilo onhumba opo a henuke okukundafana nomukainhu oo, Jesus okwa li e mu pa oundombwedi wa kola, navahapu moshilando shaSikar ova li va uda yo osho va kundafana naye. (Joh. 4:4-26, 39-42) Mbela nafye itatu dulu okuninga eenghendabala tu kale oupafi ngaashi Jesus mokukala hatu kongo eemhito opo tu udifile ovanhu onghundana iwa ovo hatu shakeneke efiku nefiku?
11, 12. (a) Jesus okwa li a ungaunga ngahelipi novanhu ovo va li va hala okuya moshipala oilonga yaye yokuudifa? (b) Ongahelipi Jesus a li a ulika kutya oku na ondjele ngeenge tashi uya poilonga yaye yokuudifa?
11 Omafimbo amwe, ovanhu vamwe ovo va li tava monika va fa ve na omalinyengotomheno mawa ova li hava kendabala okuya moshipala oilonga yaJesus. Pashihopaenenwa, eengudu dovanhu vomuKapernaum oda li da hala Jesus a kale ashike moshilando shavo, molwaashi da li da hokwa oinenelonga yaye yokuvelula ovanaudu. Ovanhu ovo ova li va ninga oshinima shi shii okuudiwa ko. Ashike Jesus okwa li a tumwa a udifile “[eedi] odo da kana domeumbo laIsrael,” ndele hado edi ashike da li moshilando osho. (Mat. 15:24) Onghee hano, okwa li a lombwela ovanhu ovo a ti: “Ondi na okuudifila oilando imwe yo evangeli louhamba waKalunga, osheshi olo tuu eli nde li tuminwa.” (Luk. 4:40-44) Osho otashi yandje oumbangi wa yela kutya Jesus okwa li a lenga filufilu oukalele waye. Ka li ha pitike nande osha shi mu imbe a wanife po oshilonga osho.
12 Mbela Jesus okwa li ngoo ha kala e na ondjele noha hafele pamwe novanhu vakwao ile okwa li ashike ha kala e lipyakidila nokuudifa? Mbela oilonga yaye yokuudifa oya li hai mu imbi a wanife po eemhumbwe davamwe? Hasho nandenande! Jesus okwe tu tulila po oshihopaenenwa sha wanenena shokukala tu na ondjele. Okwa li ha hafele pamwe nookaume kaye. Okwa li ha ungaunga novanhu nawa nokwa li he va kenukile omolwomaupyakadi neemhumbwe davo. Okwa li yo ha ulikile ounona ohole. — Lesha Markus 10:13-16.
13. Ngeenge tashi uya poilonga yetu yokuudifa Ouhamba, ongahelipi hatu dulu okuhopaenena oshihopaenenwa shaJesus shokukala oupafi nokukala nondjele?
13 Ongahelipi nafye hatu dulu okukala tu na ondjele eshi hatu hopaenene oshihopaenenwa shaJesus shokukala oupafi? Katu na okweefa ounyuni ou u tu imbe tu wanife po oilonga yetu yokuudifa. Otashi dulika ookaume ketu ile ovapambele vetu ovo tava monika va fa ve tulile po ve tu ladipike tu longe shinini moukalele ile tu kale nonghedi yokukalamwenyo oyo tai lalakanenwa kukeshe umwe. Ndele ngeenge ohatu hopaenene Jesus, ohatu ka kala twa tala ko oukalele u li ngaashi oikulya. (Joh. 4:34) Oilonga yetu yokuudifa ohai tu pameke pamhepo nohai tu etele yo ehafo. Ndele nande ongaho, inatu hala okukala tu lishii ouyuki notuhe na ondjele. Onghee hano, tu li ovapiya ‘vaKalunga kehafo,’ otwa hala okukala twa hafa ngaashi Jesus notu na ondjele. — 1 Tim. 1:11, NW.
OTWA PUMBWA OKUKALA OUPAFI NGEENGE TU LI MOMAYELEKO
14. Otu na okuhenuka eamo lokuninga shike ngeenge tu li meenghalo didjuu, nomolwashike?
14 Ngaashi twe shi mona metetekelo, Jesus okwa li a twa omufindo efimano lokukala oupafi unene tuu pefimbo opo a li a taalela eyeleko linene. (Lesha Markus 14:37.) Onghee hano, nafye otwa pumbwa oku mu hopaenena shi dulife nale, ngeenge tu li meenghalo didjuu. Luhapu ngeenge twa taalela omayeleko, vahapu vomufye ohatu dimbwa oshinima sha fimanenena osho sha endululwa lwoikando ivali membo lOmayeletumbulo, osho kutya: “Oku nondjila ya yuka momesho omunhu, ndelenee exulilo layo eendjila defyo.” (Omayel. 14:12; 16:25) Okukala twe lineekela meendunge detu vene, unene tuu pefimbo opo tu li momaupyakadi a kwata moiti, otashi dulika shi tu etele oshiponga nosho yo ovaholike vetu.
15. Omutwe woukwaneumbo otashi dulika u yelekwe u ninge shike ngeenge eenghalo dopamaxupilo da naipala?
15 Omushamane oo e li omutwe woukwaneumbo otashi dulika a kale e wete eenghalo dopamaxupilo tadi mu fininike opo a file oshisho “ava vambulaye.” (1 Tim. 5:8) Opo nee, otashi dulika a yelekwe a konge oilonga yonhumba nonande otai ke mu ningifa a kale ta faula okwoongala kwopaKriste lwoikando, aha wanife po oshinakuwanifwa shaye shokukwatela komesho Elongelokalunga lOukwaneumbo ile aha kufe vali ombinga moukalele. Ngeenge okwa kala ashike e likolelela komadiladilo opanhu, ita ka mona kutya osha nyika oshiponga okuya moilonga ya tya ngaho noita ka kala e wete sha puka nokuli. Ndelenee osho otashi dulika shi ka etife oidjemo ii, ngaashi okunghundipala ile okufya pamhepo. Onghee hano, oshi li pandunge okudulika komayele oo twa pewa membo lOmayeletumbulo 3:5, 6. Salomo okwa ti: “Nomutima woye aushe lineekela Omwene, ino liameka keendunge doye mwene. Mu shiiva meendjila doye adishe, opo nee Ye ota ka lalakanifa omalila oye.”
16. (a) Jesus okwa tula po oshihopaenenwa shiwa shilipi ponhele yokukala e lineekela meendunge daye mwene? (b) Ongahelipi omitwe dihapu domaukwaneumbo hadi lineekele muJehova ngaashi Jesus ngeenge di li meenghalo didjuu?
16 Jesus ka li he liameke keendunge daye mwene ngeenge e li momayeleko. Diladila ashike kwaashi: Omulumenhu omunaendunge oo e dule ovanhu aveshe kombada yedu ka li ha nyamukula she likolelela kounongo waye mwene. Pashihopaenenwa, pomhito imwe eshi Jesus a li ta yelekwa kuSatana okwa li e mu nyamukula lwoikando a ti: “Opa shangwa.” (Mat. 4:4, 7, 10) Jesus okwa li ha kala e lineekela mounongo waXe ngeenge ta yelekwa nokwa li ha ulike kutya okwe lininipika nonande Satana omulinenepeki noku tonde oukwatya oo welininipiko. Mbela nafye ohatu hopaenene ngoo Jesus? Omutwe woukwaneumbo oo hau kala oupafi ngaashi Jesus ohau kongo ewiliko mEendjovo daKalunga, unene tuu ngeenge tau yelekwa. Omitwe dihapu domaukwaneumbo mounyuni aushe osho naanaa hadi ningi ngaho. Ohadi pitifa komesho elongelokalunga la koshoka nosho yo oinima yOuhamba waKalunga mokukalamwenyo kwado, nokuli nongeenge tashi uya pokuungaunga noupyakadi u na sha noinima yopamaliko. Ndele nande ongaho, ohadi ningi eenghendabala ngaashi tadi dulu opo di file oshisho omaukwaneumbo ado. Jehova oha nangeke noupuna eenghendabala dado dokufila oshisho omaukwaneumbo ado palutu ngaashi naanaa e shi udaneka mEendjovo daye. — Mat. 6:33.
17. Oshike she ku linyengifa u kale oupafi ngaashi Jesus?
17 Nopehe na omalimbililo, Jesus okwe tu tulila po oshihopaenenwa sha denga mbada shi na sha nokukala oupafi. Oshihopaenenwa shaye otashi ti sha nokunena, otashi tu etele ouwa notashi ke tu pefa nokuli omwenyo waalushe. Ndele natu dimbuluke kutya Satana okwa hala tu kofe pamhepo, tu kale twa nghundipala meitavelo, tu kanife ondjungu yokulongela Kalunga notu efe po oudiinini wetu. (1 Tes. 5:6) Inatu efa nandenande Satana e tu finde! Ponhele yaasho, natu kaleni oupafi ngaashi Jesus, ngeenge hatu ilikana, hatu longo moukalele nosho yo ngeenge hatu ungaunga nomayeleko. Ngeenge otwa ningi ngaho, ohatu ka hafela onghalamwenyo i na elao nohatu ka kala twa wanenwa nokuli nopaife eshi tu li pexulilo lounyuni ou u li momilaulu dopamhepo. Kakele kaasho, oto dulu yo okukala noushili kutya oto ka hangwa kOmwene woye u li oupafi nowe lipyakidila eshi te ke uya a wanife po ehalo laXe. Jehova ote ke ku pa ondjabi iwa nehafo omolwoudiinini woye. — Eh. 16:15.
[Efano pepandja 6]
Jesus ta udifile omukainhu pondungu. Mbela oho kongo ngoo eemhito dokuudifila vamwe efiku keshe?
[Efano pepandja 7]
Okukala ho file oshisho eemhumbwe dopamhepo doukwaneumbo woye otaku ulike kutya ou li oupafi