‘Indeni ka ningeni ovanhu ovahongwa’

1-2. (a) She likolelela koshipango shaJesus osho tashi hangwa muMateus 28:18-20, elalakano la fimanenena leongalo lopaKriste ola shike? (b) Omapulo elipi hatu ka kundafana moshitukulwa eshi?

KONIMA eshi Jesus a nyumuka, okwa li a lombwela ovayapostoli vaye va shakene komhunda. Otashi dulika va li va tunhukwa eshi va li va ongala konhele oyo. (Mat. 28:16) Otashi dulika pomhito oyo opo a li a “holokela palumwe [ovalumenhu] ve dule omafele atano.” (1 Kor. 15:6) Omolwashike Jesus a li a pula ovahongwa vaye va shakene konhele oyo? Opo a dule oku va pa oshipango osho tashi ti: “Indeni hano ka ningeni ovanhu aveshe ovalongwa vange.” — Lesha Mateus 28:18-20.

² Ovahongwa ovo va li va uda eendjovo odo daJesus, ova ka ninga oshitukulwa sheongalo lopaKriste lomefelemudo lotete. Elalakano la fimanenena leongalo olo ola li okuninga ovanhu ovahongwa vaKristus.b Omaongalo oshili opaKriste oo e li ko kunena nao oku na elalakano la faafana. Moshitukulwa eshi, ohatu ka kundafana omapulo ane: Omolwashike oshilonga shokuninga ovanhu ovahongwa sha fimanenena? Osha kwatela mo shike? Mbela Ovakriste aveshe ove na okukufa ombinga moshilonga shokuninga ovanhu ovahongwa? Nomolwashike twa pumbwa elididimiko eshi hatu wanifa po oshilonga osho?

OMOLWASHIKE OSHILONGA SHOKUNINGA OVANHU OVAHONGWA SHA FIMANENENA?

3. She likolelela kuJohannes 14:6 nosho yo 17:3, omolwashike oshilonga shokuninga ovanhu ovahongwa sha fimanenena?

³ Omolwashike oshilonga shokuninga ovanhu ovahongwa sha fimanenena? Omolwaashi ovahongwa vaKristus ovo ashike tava dulu okukala ookaume kaKalunga. Shikwao vali, ovashikuli vaKristus ove na onghalamwenyo i li xwepo paife nove na eteelelo loku ka mona omwenyo waalushe monakwiiwa. (Lesha Johannes 14:6; 17:3.) Jesus okwe tu lineekelela oshinakuwanifwa sha fimanenena, ashike ihatu shi wanifa po kufye vene. Omuyapostoli Paulus okwa shanga kombinga yaye mwene noyookaume kaye a ti: “Ofye ovalongi pamwe naKalunga.” (1 Kor. 3:9) Oshi li oufembanghenda eshi Jehova naKristus va yandja oshinakuwanifwa osho kovanhu ovalunde.

4. Oshike hatu dulu okulihonga koshimoniwa shaIvan naMatilde?

⁴ Oshilonga shokuninga ovanhu ovahongwa otashi dulu oku tu etela ehafo lashili. Diladila koshihopaenenwa shaIvan nomukulukadi waye, Matilde, vokoColombia. Ova li va udifila omulumenhu wedina Davier oo e va lombwela a ti: “Onda hala okuninga omalunduluko, ashike onda nyengwa.” Davier okwa li omudengingonyo oo ha longifa oingangamifi, ha nu omalodu shimwe to nyengwa nokwa li ha kala pamwe nohonda yaye, Erika. Ivan okwa ti: “Otwa hovela okukonakona naye Ombiibeli, ndele molwaashi omukunda wavo owa li kokule naapo hatu di, otwa li hatu shingi eembashikela oule weevili. Mokweendela ko kwefimbo eshi Erika a didilika kutya Davier okwa ninga omalunduluko, okwe mu waimina mekonakonombiibeli.” Lwanima Davier okwa ka efa po okulongifa oingangamifi, okunwa nokudenga eengonyo, nova ka hombola yo naErika. Matilde okwa ti: “Eshi Davier naErika va li tava ninginifwa mo 2016, otwa li twa dimbuluka eshi Davier a tile, ‘Onda hala okuninga omalunduluko, ashike onda nyengwa.’ Otwa li twa lila kehafo.” Ohashi tu etele ehafo ngeenge hatu kwafele vamwe va ninge ovahongwa vaKristus.

OSHILONGA SHOKUNINGA OVANHU OVAHONGWA OSHA KWATELA MO SHIKE?

5. Oshike tu na okuninga tete opo tu ninge ovanhu ovahongwa?

⁵ Onghatu yotete oyo tu na okukatuka opo tu ninge ovanhu ovahongwa, oyo ‘okukonga’ ovo va hala okushiiva Jehova. (Mat. 10:11) Ohatu ulike shili kutya fye Eendombwedi daJehova ngeenge hatu udifile ovanhu ovo hatu shakeneke. Ohatu ulike yo kutya fye Ovakriste vashili ngeenge hatu shikula oshipango shaKristus shokuudifa.

6. Oshike tashi ke tu kwafela tu pondole moukalele?

⁶ Ovanhu vahapu ovo hatu shakeneke, ohava kala va halelela okulihonga oshili yOmbiibeli, ashike vamwe otashi dulika vaha ulike ohokwe potete. Ofye tu na okukendabala okupendula ohokwe muvo opo ve lihonge shihapu. Opo tu pondole moukalele, otwa pumbwa okulilongekida nawanawa. Hoolola oikundafanwa yonhumba oyo tashi dulika i pendule ohokwe muvo. Ndele to lilongekida nghee to dulu okuninga etwalemo loshikundafanwa keshe.

7. Ongahelipi to dulu okuhovela eenghundafana naumwe, nomolwashike sha fimana okupwilikina nokuulika efimaneko?

⁷ Pashihopaenenwa, oto dulu okupula omuneumbo kutya: “Mbela oto ti ngahelipi koshinima eshi? Omaupyakadi mahapu oo hatu shakeneke, okwa kuma ovanhu vahapu mounyuni aushe. Mbela oto diladila kutya opa pumbiwa epangelo lomounyuni ou olo li kandule po omaupyakadi?” Opo nee tamu kundafana Daniel 2:44. Ile oto dulu okupula omunhu kutya: “Oshike tashi dulu oku ku kwafela opo u tekule ounona va kale ve na eenghedi? Onda hala okuuda kutya ove oto ti ngahelipi.” Opo nee tamu kundafana Deuteronomion 6:6, 7. Diladila nghee oshikundafanwa keshe osho to hoolola tashi ka kuma ovanhu ovo tave ku pwilikine. Diladila yo nghee tashi ke va etela ouwa eshi tave lihongo osho Ombiibeli tai hongo. Eshi to popi navo, osha fimana okupwilikina kuvo nokukala wa fimaneka etaleko lavo. Kungaho, oto ke va uda ko nawa notava ka pwilikina yo noupu kwoove.

8. Omolwashike twa pumbwa okutwikila okuninga omalishuneko?

⁸ Ofimbo omunhu ina hovela okukonakona Ombiibeli, otashi dulika wa pumbwa okukonga efimbo nokukala ho ningi omalishuneko. Omolwashike? Omolwaashi otashi dulika ovanhu uhe va hange mo eshi to ka shuna ko. Natango, otashi dulika wa pumbwa okushuna ko lwoikando fiyo osheshi omuneumbo e ku ikilila nokutambula ko ekonakonombiibeli. Dimbuluka kutya oshimeno ohashi kulu ashike ngeenge osha kala hashi tekelwa pandjikilile. Sha faafana, omunhu oo e na ohokwe ota ka kala ashike e hole Jehova naKristus ngeenge otwa kala hatu kundafana naye pandjikilile Eendjovo daKalunga.

MBELA OVAKRISTE AVESHE OVE NA OKUKUFA OMBINGA MOSHILONGA SHOKUNINGA OVANHU OVAHONGWA?

9-10. Omolwashike hatu dulu okutya Omukriste keshe oha kwafele mokukonga ovanamitima diwa?

⁹ Omukriste keshe oha kwafele mokukonga ovanamitima diwa. Ohatu dulu okufaafanifa oshilonga osho naasho shokukonga okaana oko ka kana. Ngahelipi mbela? Diladila koshimoniwa shoshili shokamati komido nhatu oko ka li ka kana. Ovanhu ve dulife 500 ova li tave ka kongo. Xuuninwa, omunhu umwe okwa li e litwa okaana oko moshikunino shomapungu konima yeevili 20. Omunhu oo ka li a hala ovanhu ve mu pandule eshi e litwa okamati oko ka li ka kana. Okwa ti: “Osha pula ovanhu vahapu okukonga okamati oko.”

¹⁰ Ovanhu vahapu ova fa okaana oko ka li ka kana. Kave na eteelelo, ashike ova hala okukwafelwa. (Ef. 2:12) Vahapu vomufye ohatu kufa ombinga mokukonga ovo va halelela oku ka mona omwenyo waalushe. Otashi dulika uha mone omunhu oo a hala okukonakona Ombiibeli. Ashike ovaudifi vamwe ovo tamu longo pamwe navo otashi dulika va mone omunhu oo a hala okulihonga oshili yEendjovo daKalunga. Ngeenge omumwatate ile omumwameme okwa konakona nomunhu ndele ta ningi omuhongwa waKristus, aveshe ovo va kufa ombinga otava dulu okukala va hafa.

11. Omeenghedi dilipi vali to dulu okukwafela moshilonga shokuninga ovanhu ovahongwa nonande ku na omukonakoni?

¹¹ Nonande ku na omukonakoni paife, oto dulu okukwafela moshilonga shokuninga ovanhu ovahongwa meenghedi dimwe vali. Pashihopaenenwa, oto dulu okutambula ko ovo vape nokupanga oukaume navo ngeenge tave uya kOlupale lOuhamba. Kungaho, oto dulu oku va kwafela va mone kutya ohole ohai tu holola kutya otu li Ovakriste vashili. (Joh. 13:34, 35) Omanyamukulo oo ho yandje pokwoongala, nonande omaxupi, otaa dulu okukwafela ovo vape nghee tava dulu okuholola eitavelo lavo va manguluka nomonghedi yefimaneko. Oto dulu yo oku ka longa pamwe moukalele nomuudifi oo mupe noku mu kwafela nghee e na okulongifa Omishangwa opo a honge ovanhu. Eshi to ningi ngaho, oto mu hongo nghee e na okuhopaenena Kristus. — Luk. 10:25-28.

12. Mbela otwa pumbwa ounongo wa wedwa po opo tu ninge ovanhu ovahongwa? Shi yelifa.

¹² Katu na okudiladila kutya otwa pumbwa ounongo wa wedwa po opo tu honge ovanhu va ninge ovahongwa vaJesus. Omolwashike mbela? Diladila koshihopaenenwa shomumwameme Faustina, oo ha di koBolivia. Eshi opo a shakene nEendombwedi daJehova ka li e shii okulesha. Okudja opo, okwe ke lihonga okulesha kanini. Paife okwa ninginifwa nokuhole okuhonga vamwe. Oshivike keshe, oha konakona novakonakoni vatano. Nonande Faustina ke shii nawa okulesha nosho yo ovakonakoni vaye vamwe, okwa kwafela ovanhu vahamano va ninginifwe. — Luk. 10:21.

13. Nonande ohatu kala twe lipyakidila unene, omanangekonoupuna amwe elipi hatu mono mokuninga ovanhu ovahongwa?

¹³ Ovakriste vahapu ohava kala ve lipyakidila unene omolwoinakuwanifwa imwe vali ya fimana. Ashike nande ongaho, ohava kongo efimbo lokuya kovakonakoni vavo nohava mono ehafo linene mokuninga ngaho. Natu tale koshihopaenenwa shaMelanie. Okwa tekula okamonakadona kaye komido hetatu oye aeke muAlaska. Okwa li yo ha i koilonga yefimbo liyadi noha kwafele omudali waye oo a li e na okankela. Melanie oye ashike a li Ondombwedi modoolopa yavo oyo ye likalela. Okwa li ha ilikana a pewe eenghono opo a dule okulididimikila outalala ngeenge ta ka udifa molwaashi okwa li a halelela okumona oo ta dulu okukonakona naye Ombiibeli. Okwa li a shakena naSara oo a li a halelela okushiiva edina laKalunga. Mokweendela ko kwefimbo, Sara okwa li a tambula ko ekonakonombiibeli. Melanie okwa ti: “Momatitano komatango ohandi kala nda loloka, ashike ame nokamonakadona kange ohatu kala twa hafa ngeenge twa ya komukonakoni. Otwa li hatu hafele okuninga omapekapeko komapulo aSara notwa li twa hafa unene eshi a ninga kaume kaJehova.” Sara okwa li e lididimikila omapataneko, a fiya po ongeleka yavo nokwa ninginifwa.

OKUNINGA OVANHU OVAHONGWA OHASHI PULA ELIDIDIMIKO

14. (a) Ovo hava ningi ovanhu ovahongwa ova faafana ngahelipi novakwati veeshi? (b) Eendjovo daPaulus odo di li mu 2 Timoteus 4:1, 2 ode ku kuma ngahelipi?

¹⁴ Ngeenge ino mona oo a hala okuninga omuhongwa, ino fya ounye okukonga. Jesus okwa ti kutya ovo hava ningi ovanhu ovahongwa ova fa ovakwati veeshi. Ovakwati veeshi otashi dulika va longe eevili dihapu inava kwata nande oshi imwe. Luhapu ohava longo oufiku ile ongula, nomafimbo amwe ove na okweenda oinano ile. (Luk. 5:5) Sha faafana, Ovakriste vamwe ohava longo eevili dihapu “mokuudifa” nelididimiko pomafimbo nosho yo moitukulwa ya yoolokafana. Omolwashike? Opo va dule okuhanga ovanhu vahapu. Ovo hava longo noudiinini luhapu ohava nangekwa noupuna mokushakena novanhu ovo ve na ohokwe metumwalaka letu. Mbela ito dulu okuudifa efimbo lomutenya opo u dule okushakeneka ovanhu ile okuudifila moshitukulwa omo to dulu oku va hanga? — Lesha 2 Timoteus 4:1, 2.

15. Omolwashike okukonakona Ombiibeli naumwe tashi pula elididimiko?

¹⁵ Omolwashike okukonakona Ombiibeli naumwe tashi pula elididimiko? Otwa pumbwa okukwafela omukonakoni e lihonge noku kale e hole osho Ombiibeli tai hongo. Otwa pumbwa yo okukwafela omukonakoni a shiive noku kale e hole Omushangi wOmbiibeli, Jehova. Shikwao vali, opo tu honge ovakonakoni osho Jesus a hala ovahongwa vaye va ninge, otwa pumbwa oku va kwafela va shiive nghee tava dulu okukala Ovakriste vashili. Natu va kwafele nelididimiko eshi tava kendabala okutula moilonga omafinamhango Ombiibeli. Vamwe ohava dulu okulundulula diva etaleko nosho yo eenghedi davo, ofimbo vamwe ohava kwata efimbo lile.

16. Oshike we lihonga moshihopaenenwa shaRaul?

¹⁶ Omutumwa umwe moPeru okwa li a mona oidjemo iwa eshi a ulika elididimiko. Okwa ti: “Onda konakona omambo avali nomukonakonimbiibeli umwe, Raul. Ashike okwa li natango a taalela omashongo monghalamwenyo yaye. Ova kala ve na oupyakadi mohombo, ha longifa elaka la honga, novana vaye kava li have mu fimaneke omolwelihumbato laye lii. Ashike okwa kala he uya kokwoongala pandjikilile, onghee onda kala handi i ndi ke va kwafele pamwe noukwaneumbo waye. Okwa li a ninginifwa konima yomido nhatu eshi nda shakena naye.”

17. Oshike hatu ka kundafana moshitukulwa tashi landula?

¹⁷ Jesus okwe tu lombwela tu ye tu “ka ningeni ovanhu aveshe ovalongwa.” Opo tu wanife po eudaneko olo, luhapu otwa pumbwa okupopya novanhu ovo ve na etaleko la yooloka ko ku letu, mwa kwatelwa ovo vehe na elongelokalunga ile ovo tashi dulika inava itavela kutya Kalunga oko e li. Moshitukulwa tashi landula, ohatu ke lihonga nghee hatu dulu okuudifila ovanhu ovo onghundana iwa.