Ovaleshi tava pula . . .

Omolwashike Eendombwedi daJehova hadi udifa eumbo neumbo?

▪ Jesus okwa li a lombwela ovahongwa vaye a ti: “Indeni hano ka ningeni ovanhu aveshe ovalongwa vange, . . . noku va longa.” (Mateus 28:19, 20) Mbela osho oshi na okuningwa kOvakriste aveshe? Ovahongwa vaJesus vonale ova li ve shii kutya Ovakriste aveshe ove na okuudifa. Pashihopaenenwa, omuyapostoli Petrus okwa popya a ti: “Ye [Jesus] okwe tu lombwela, tu udifile ovanhu noku va [pa oundombwedi nawanawa, NW].” (Oilonga 10:42) Omuyapostoli Paulus naye okwa shanga ta ti: ‘Muame ndi nefininiko, woo aame, ngenge itandi udifa evangeli!’ — 1 Ovakorinto 9:16.

Kakele kaPaulus naPetrus, Ovakriste vahapu vomefelemudo lotete ova li va dulika koshipango shaJesus shi na sha nokuudifa. Oilonga yokuudifa oya li oshinima sha fimanenena monghalamwenyo yavo. (Oilonga 5:28-32, 41, 42) Kunena, Eendombwedi daJehova nado ohadi ningi eenghendabala opo di ninge sha faafana. Ngaashi Jesus, nado ohadi udifile ovanhu kombinga ‘youhamba weulu.’ — Mateus 10:7.

Ndele mbela etumwalaka lOuhamba oli na okuudifilwa oolyelye? Jesus okwa ti kutya oli na okuudifilwa ovanhu aveshe, keshe pamwe. Okwa li a lombwela ovahongwa vaye a ti: ‘Otamu ka ninga eendombwedi dange fiyo okominghulo dounyuni.’ (Oilonga 1:8) Okwa li yo a xunganeka kutya fimbo exulilo lounyuni ou inali uya, “evangeli eli louhamba otali udifilwa ounyuni aushe li ningile oiwana aishe ondombwedi.” (Mateus 24:14) Onghee hano, Ovakriste vomefelemudo lotete ova li hava ningi eenghendabala opo va udifile ovanhu aveshe, shihe fi ashike ovashiivikile ile ovo vehe li momalongelokalunga. (Ovakolossi 1:23; 1 Timoteus 2:3, 4) Sha faafana, Eendombwedi daJehova kunena nado ohadi ningi eenghendabala dokuudifila ovanhu aveshe.a

Ndele mbela onghedi yokuudifa Ouhamba ilipi ya li hai pondola unene? Jesus oo a li e shii nawa kutya openi tapa dulu okuhangwa ovanhu vahapu, okwa li a tuma ovahongwa vaye va ka udifile moilando, komikunda nomomaumbo. (Mateus 10:7, 11, 12) Konima yefyo nenyumuko laye, ovahongwa vaye inava efa po okuudifila ‘momaumbo.’ (Oilonga 5:42) Ngaashi Jesus, navo okwa li hava udifile keshe opo tapa hangwa ovanhu, nopeenhele daaveshe. (Johannes 4:7-26; 18:20; Oilonga 17:17) Kunena, Eendombwedi daJehova ohadi longifa eenghedi da faafana opo di dule okuudifila ovanhu aveshe.

Ndele nande ongaho, Jesus okwa li a popya kutya havanhu aveshe tava ka pwilikina. (Mateus 10:14; 24:37-39) Mbela osho oshi na okwiimba Ovakriste va udife? Natu shi faneke: Natu tye nee ngeno ou li umwe womwaavo ve uya okukwafela moshitukulwa osho sha dengwa kekakamo ledu lidjuu, mbela oto ka sholola okukonga ooluxupe molwaashi ashike mwa mona po vanini? Hasho nandenande! Oto ka twikila okukonga noudiinini nokuli fiyo oposhitwa opo mu na ashike omhito yokuxupifa omunhu nande umwe. Jesus okwa li a ladipika ovahongwa vaye va twikile okuudifila ovanhu shimha ashike pe na natango omhito yokumona ovo tava ka tambula ko etumwalaka lOuhamba waKalunga. (Mateus 10:23; 1 Timoteus 4:16) Ngeenge Eendombwedi daJehova tadi kongo oohandimwe va tya ngaho momaumbo avo, kungaho otadi ulike kutya odi hole Kalunga nosho yo ovashiinda shado ovo tashi dulika va ka xupifwe ngeenge ova pwilikine nokutambula ko etumwalaka lOuhamba. — Mateus 22:37-39; 2 Ovatessaloniki 1:8.

Etumwalaka olo lOmbibeli otali hangwa moshifo eshi to lesha paife. Ndele opo u mone ouyelele muhapu, alikana tambula ko nokupula Eendombwedi daJehova moshikando tashi uya ile u shangele komunyanyangidi woshifo eshi.

[Eshangelo lopedu]