Kala nombinga mehafo lokuyandja!
“Okuyandja oku nelao komesho yokutambula.”—OILONGA 20:35.
EHAFO lokushiiva oshili nosho yo omanangeko noupuna oo e li oshidjemo shoku i shiiva oo omaano e na ondilo a dja kuKalunga. Ovo va shiiva Jehova ove na omatomheno mahapu okuhafa. Ndelenee, fimbo pe na ehafo mokutambula omaano, ope na yo elao moku a yandja. Jehova oye Omuyandji ‘wakeshe oshipewa shiwa, nokeshe oshali sha wanenena,’ noye ‘Kalunga omunelao.’ (Jakob 1:17; 1 Timoteus 1:11, OB-1954) Ota yandje omahongo e na ouwa kwaaveshe ovo tava pwilikine nota hafele eduliko laavo ta hongo, ngaashi ovadali hava hafe ngeenge ounona vavo tava tambula ko ehongo lavo lopahole.—Omayeletumbulo 27:11.
2. (a) Jesus okwa ti ngahelipi shi na sha nokuyandja? (b) Ehafo lashike hatu mono ngeenge hatu hongo vamwe oshili yOmbibeli?
2 Sha faafana, eshi Jesus a li kombada yedu okwa li a hafa mokumona ovanhu tava tambula ko ehongo laye. Omuyapostoli Paulus okwa tofa mo eendjovo daJesus ta ti: “Okuyandja oku nelao komesho yokutambula.” (Oilonga 20:35) Ehafo olo hatu mono ngeenge hatu hongo vamwe oshili yOmbibeli kali fi ashike ehafo lokukala tu na umwe ta tu kumwe nomalongo etu opalongelokalunga. Shi dulife unene pwaasho, oshi li ehafo okushiiva kutya ohatu yandje sha shoshili noshi na ongushu tai kalelele. Mokuyandja pamhepo, ohatu dulu okukwafela ovanhu ve limonene ouwa paife nosho yo fiyo alushe.—1 Timoteus 4:8.
Okuyandja ohaku eta elao
3. (a) Ongahelipi ovayapostoli Paulus naJohannes va ulika ehafo lavo mokukwafela vamwe pamhepo? (b) Omolwashike okuhonga oshili yOmbibeli kounona vetu shi li euliko lohole?
3 Heeno, ngaashi Jehova naJesus va hafa mokuyandja eeshali dopamhepo, Ovakriste navo osho hava ningi. Omuyapostoli Paulus okwa mona ehafo mokushiiva kutya okwa kwafela vamwe ve lihonge oshili yEendjovo daKalunga. Okwa shangela keongalo lokuTessaloniki ta ti: “Olyelye vali eteelelo letu nehafo noshishani shelitango letu, ngenge hanye yo koshipala shOmwene wetu Jesus mokuuya kwaye? Osheshi nye efimano letu nehafo letu.” (1 Ovatessaloniki 2:19, 20) Monghedi ya faafana, omuyapostoli Johannes ota ulike kounona vaye vopamhepo mokushanga ta ti: “Ame kandi nehafo limwe, li dule eli, eshi handi udu ovamwange hava ende moshili.” (3 Johannes 4) Diladila yo kehafo olo li li mokukwafela ounona vetu va ninge ounona vetu vopamhepo! Okutekula ounona “meduliko nomekumaido lOmwene,” osho euliko lohole kombinga yovakulunhu. (Ovaefeso 6:4) Mokuninga ngaha, ovadali otava ulike kutya ove na ko nasha nonghalonawa yaalushe younona vavo. Ngeenge ova tambula ko outeku wa tya ngaha, ovadali ohava mono ehafo nelao linene.
4. Oshimoniwa shilipi tashi ulike ehafo lokuyandja pamhepo?
4 Dell oku li omukokolindjila wefimbo liyadi noku li ina younona vatano. Ota ti: “Ohandi dulu okuuda ko nawa eendjovo domuyapostoli Johannes omolwaashi onda pandula unene eshi vane vomounona vange tava ‘ende moshili.’ Ondi shi shii kutya otashi fimanekifa nokutumbalekifa Jehova ngeenge omaukwaneumbo a hangana melongelokalunga lashili, omolwaashi ondi udite ehafo linene mokutala omanangeko noupuna aye meenghendabala dange dokufindila oshili mounona vange. Etimaumbwile liwa lomwenyo u he na exulilo mOparadisa pamwe noukwaneumbo wange otali yadifa nge eteelelo notali linyengifa nge ndi lididimike nande pe na omaupyakadi nomandangalati.” Mupya munene, kamwe komovanakadona vaDell oka kondwa mo meongalo omolwokushikula ondjila i he fi yopaKriste. Nande ongaho, Dell ota longo noudiinini a kaleke po oikala iwa. Ota ti: “Onde lineekela kutya efiku limwe okamwangekadona otake ke lininipika nokwaalukila shili kuJehova. Ndelenee ohai pandula Kalunga eshi ounona vange vahapu tava twikile oku mu longela noudiinini. Ehafo olo ndi udite ola kala li li odjo yokupameka nge.”—Nehemia 8:10.
Ninga ookaume vaalushe
5. Eshi hatu kufa ombinga moilonga yokuninga ovanhu ovahongwa, eshiivo lashike tali tu hafifa?
5 Jesus okwa lombwela ovashikuli vaye va ninge ovanhu ovahongwa vaye noku va honga kombinga yaJehova nosho yo oiteelelwa yaye. (Mateus 28:19, 20) Jehova nosho yo Jesus ova kwafela ovanhu nokuhelihola mwene ve lihonge ondjila yoshili. Eshi hatu longo ngaashi hatu dulu moilonga yokuninga ovanhu ovahongwa, otu na ehafo lokushiiva kutya ohatu hopaenene oshihopaenenwa shaJehova nosho yo shaJesus, ngaashi Ovakriste votete va ninga. (1 Ovakorinto 11:1) Ngeenge hatu longele kumwe naKalunga Omunaenghono nosho yo Omona waye omuholike panghedi ya tya ngaha, okukalamwenyo kwetu otaku ka kala taku ti sha shili. Kali fi tuu enangeko noupuna okukala twa talwa ko tu li “ovalongi pamwe” naKalunga! (1 Ovakorinto 3:9) Mbela itashi kumwifa nokuli okushiiva kutya novaengeli ove na mo ombinga moilonga ei yokuudifa onghundana iwa?—Ehololo 14:6, 7.
6. Eshi tu na ombinga mokuyandja kwopamhepo, oolyelye tava ningi ookaume ketu?
6 Doshili, mokukala nombinga moilonga ei yokuyandja pamhepo, ohatu dulu okuninga shi dulife shi he fi ashike okukala ovalongi pamwe naKalunga—ohatu dulu okuya moukaume waalushe naye. Omolweitavelo laye, Abraham okwa ifanwa kaume kaJehova. (Jakob 2:23) Eshi hatu kendabala tu longe ehalo laKalunga, nafye ohatu dulu okuninga ookaume kaKalunga. Ngeenge ohatu shi ningi, ohatu ningi yo ookaume kaJesus. Okwa lombwela ovahongwa vaye ta ti: “Onde mu ifana ookaume, osheshi ashishe eshi nde shi uda muTate, onde shi mu shiivifila.” (Johannes 15:15) Ovanhu vahapu ohava hafe okutalwa ko ve li ookaume kovanhu va tumbala ile kovanambelewa vopombada, ndelenee ohatu dulu okutalwa ko tu li ookaume kovanhu vavali vanene meshito alishe!
7. (a) Ongahelipi omukainhu umwe e limonena kaume kashili? (b) Ou na mbela oshihopaenenwa sha faafana?
7 Natango, ngeenge hatu kwafele ovanhu va shiive Kalunga, otava ningi yo ookaume ketu notashi tu etele ehafo le likalekelwa. Joan, oo a kala mOilongo yaHangana, okwa tameka okukonakona Ombibeli nomukainhu wedina Thelma. Nonande Thelma a shakeneka omafininiko oukwaneumbo mekonakono laye, okwa diinina nokwa ninginifwa odula ya dja ko. Joan okwa shanga ta ti: “Eendafano letu inali xulila opo; ponhele yaasho, ola xuma komesho moukaume oo wa xulila lwopeedula paife 35. Luhapu otwa ya pamwe moukalele nokoyoongalele. Hauxuuninwa, onda tembukila keumbo lipe li li kokule oule weemaila 500 [eekilometa 800]. Ndelenee Thelma ota twikile okutumina nge eembapila dopahole notadi hafifa omutima, ta lombwele nge kutya ota diladila nge nohole nokupandula nge omolwokukala kaume kaye nomuhopaenenwa waye nomolwaashi nde mu honga oshili okudja mOmbibeli. Okukala nakaume kopofingo noku holike a tya ngaha oshi li ondjabi ikumwifi omolweenghendabala odo nda ninga oku mu kwafela e lihonge kombinga yaJehova.”
8. Oikala iwa ilipi tai ke tu kwafela moukalele?
8 Etimaumbwile lokumona umwe oo a hala okulihonga oshili, otali dulu oku tu kwafela tu lididimike, nokuli nongeenge ovanhu vahapu ovo hatu shakeneke kave na ohokwe ihapu mEendjovo daJehova ile kave na nande ohokwe. Okuhenakonasha oku otaku dulu okukala eshongo keitavelo letu nosho yo elididimiko letu. Ndelenee oikala iwa otai tu kwafele. Fausto, oo a dja kuGuatemala okwa ti: “Ngeenge hai yandje oundombwedi kovanhu, ohandi diladila kombinga yanghee tashi ka kala shiwa unene ngeenge omunhu oo handi popi naye ta ka ninga omumwatate ile omumwameme wopamhepo. Onda diladila kutya nokuli omunhu umwe oo hai shakeneke xuuninwa ota ka tambula ko oshili yEendjovo daKalunga. Ediladilo olo otali kwafele nge ndi xume komesho notali etele nge ehafo lashili.”
Liongeleleni omamona meulu
9. Jesus okwa ti ngahelipi shi na sha nomamona meulu, noshike hatu dulu okulihonga mwaashi?
9 Okuninga ovanhu ovahongwa, kutya nee ounona vetu ile ovanhu vamwe, luhapu kashi fi shipu. Otashi dulu okupula efimbo, onheni nosho yo oudiinini. Ndelenee dimbuluka kutya vahapu ova hala okulonga noudiinini ve liongelele oinima ihapu yopamaliko, oinima oyo luhapu ihai va etele ehafo noihai kalelele. Jesus okwa lombwela ovapwilikini vaye kutya oshi li nawa okulonga omolwoinima yopamhepo. Okwa ti: “Inamu liongelela omamona kombada yedu, oko eenhwishi noilemo hai nyonauna, naku novalunga hava fe, ndee tava vake. Ndelenee liongeleleni omamona meulu, omo eenhwishi ile oilemo ihai nyonauna namu ovalunga ihava fe ndee itava vake.” (Mateus 6:19, 20) Mokulalakanena omalalakano opamhepo—oo a kwatela mo okukala nombinga moilonga ya fimana yokuninga ovalongwa—ohatu dulu okukala nehafo lokushiiva kutya ohatu longo ehalo laKalunga note ke tu pa ondjabi. Omuyapostoli Paulus okwa shanga ta ti: “Kalunga ke fi omuhenouyuki a dimbwe ngeno oilonga yeni nohole yeni mokufimaneka edina laye.”—Ovaheberi 6:10.
10. (a) Omolwashike Jesus e na omamona opamhepo? (b) Ongahelipi Jesus e liyandja ye mwene, noshi na ouwa washike kovanhu?
10 Ngeenge ohatu longo noudiinini tu ninge ovanhu ovahongwa, ohatu liongelele “omamona meulu,” metwokumwe naasho sha tongwa kuJesus. Eshi otashi tu etele ehafo lokutambula. Ngeenge ohatu yandje nokuhelihola mwene, kexulilo ohatu ke lipunapaleka. Jesus okwa ti okwa longela Jehova noudiinini oule weedula omamiliyona eyovi. Diladila omamona oo e liongelela meulu! Nande ongaho, Jesus ina konga ouwa waye mwene. Omuyapostoli Paulus okwa shanga ta ti: ‘Jesus e liyandja omolwomatimba etu, opo e tu xupife mefimbo lii lounyuni wopaife opahalo laKalunga, Tate yetu.’ (Ovagalati 1:4) Jesus ine liyandja ashike nokuhelihola mwene moukalele waye, ndelenee okwa yandja nokuli nomwenyo waye u li ekulilo opo vamwe va dule okumona omhito yokuliongelela omamona meulu.
11. Omolwashike eeshali dopamhepo di dule dopamaliko?
11 Mokuhonga ovanhu kombinga yaKalunga, ohatu va kwafele va mone nghee navo tava dulu okuliongelela omamona opamhepo ihaa nyonauka. Oshali inene yashike to dulu okuyandja? Ngeenge owa pe kaume ovili i na ondilo, ohauto i na ondilo ile nokuli eumbo, kaume oo ota ka kala a pandula nokwa hafa, noto ka kala u na ehafo lokuyandja. Ndelenee oshike tashi ka kala onghalo yoshali oyo konima yeedula 20? Konima yeedula 200? Konima yeedula 2 000? Mepingafano naasho, ngeenge owe liyandje ove mwene okukwafela omunhu a longele Jehova, ota dulu okumona ouwa moshali oyo fiyo alushe.
Konga ovo va hala oshili
12. Ongahelipi vahapu ve liyandja vo vene okukwafela vamwe pamhepo?
12 Okukala nombinga mehafo lokuyandja pamhepo, oshiwana shaJehova osha fika fiyo okominghulo dedu. Omayovi okwa fiya po omaumbo novakwanedimo va kufe oilonga youtumwa koilongo oko ve na okukala va ikilila omalaka mape nosho yo omaputuko. Vamwe ova tembukila komikunda domoilongo yavo odo di na omhumbwe ya kula yovaudifi vOuhamba. Natango vamwe ove lihonga elaka loshinailongo, nokungaha otava yeulula eemhito dipe dokuudifa moitukulwa yavo vene kovanhu ovatembukilimo. Pashihopaenenwa, konima yokutekula ounona ovo paife tava longo kombelewa ya kula yEendombwedi daJehova, ovalihomboli muNew Jersey, mOilongohangano yaAmerika, ova tameka okukokola ondjila nove lihonga Oshichina. Oule wefimbo leedula nhatu, ova ninga omakonakonombibeli novapopi vOshichina 74 ovo va li hava fikola pokolidji i li popepi. Mbela oto dulu okutamununa mo oukalele woye monghedi yonhumba opo u mone ehafo lihapu moilonga yokuninga ovanhu ovahongwa?
13. Oshike to dulu okuninga ngeenge owa hala okukala noukalele tau imi oiimati ihapu?
13 Otashi dulika wa halelela okuninga ekonakonombibeli ndelenee ino dula oku shi ninga. Moilongo imwe, oshidjuu okumona ovo ve na ohokwe. Otashi dulika ovanhu ovo to shakeneke itava ulike ohokwe mOmbibeli. Ngeenge osho shi li ngaho, otashi dulika u na okutumbula ehalo loye luhapu meilikano, nokushiiva kutya Jehova naJesus Kristus ove na ohokwe moilonga oyo notave ke ku twala fiyo okomunhu oo a fa odi. Pula omaetepo kwaavo vomeongalo leni ovo ve na oimoniwa ihapu ile ovo oukalele wavo u na oiimati ihapu. Mona ouwa medeulo nosho yo momaetepo oo haa yandjwa pokwoongala kwopaKriste. Mona ouwa okudja momayele ovapashukili ovaendi novakainhu vavo. Komesho yaaishe, ino teka omukumo. Omulumenhu omunaendunge okwa shanga ta ti: “Ombuto yoye i kuna ongula, ndele ino tulumukifa eke loye komatango. Osheshi ku shi shii, ilipi po tai ka mena.” (Omuudifi 11:6) Lwopokati opo, dimbuluka ovalumenhu ovadiinini ngaashi Noa naJeremia. Nonande ovanini ve linyenga nawa keudifo lavo, oukalele wavo owa li we shi pondola. Komesho yaaishe, owa hafifa Jehova.
Longa osho to dulu
14. Jehova oha tale ko ngahelipi ovo va kulupila moilonga yaye?
14 Otashi dulika eenghalo doye itadi ku pitike u longe shihapu ngaashi wa hala moukalele. Pashihopaenenwa, oukulupe otau dulu oku ku ngabeka mwaasho to dulu okulonga moilonga yaJehova. Nande ongaho, dimbuluka osho omulumenhu omunaendunge a shanga: “Eenghwakutoka odo oshikoroni shefimano. Otashi monika mondjila youyuki.” (Omayeletumbulo 16:31) KuJehova, onghalamwenyo tai longifwa moilonga yaye oshinima shiwa unene. Natango, Omishangwa otadi ti: “Ndele fiyo omoukulupe weni, Aame [Jehova] tuu ou, ndi li ngaashi nda kala, fiyo otamu kulu, tamu mene eenghwakutoka onda hala oku mu kuminina, Ame nde shi ninga nonatango ohandi ka humbata, handi ka kuminina ndele handi ka xupifa.” (Jesaja 46:4) Tate yetu omunahole womeulu okwa udaneka okuyambidida nokukwafela ovadiinini vaye.
15. Mbela owa itavela kutya Jehova oku udite ko eenghalo doye? Omolwashike?
15 Otashi dulika to ungaunga noudu, epataneko okudja kukaume komohombo e he fi omwiitaveli, oinakuwanifwa idjuu youkwaneumbo ile oupyakadi umwe mudjuu. Jehova okwa dimina omangabeko neenghalo detu, noku tu hole omolweenghendabala detu da mana mo doku mu longela. Eshi oshoshili nonande osho hatu ningi otashi dulika shinini kwaasho vamwe tava ningi. (Ovagalati 6:4) Jehova oku shi shii kutya inatu wanenena, noku na oushili mwaasho a teelela kufye. (Epsalme 147:11) Ngeenge ohatu longo osho hatu dulu, ohatu dulu okukala noushili kutya otu na ondilo momesho aKalunga, noita ka dimbwa oilonga yetu yeitavelo.—Lukas 21:1-4.
16. Omonghedi ilipi eongalo alishe li na ombinga mokuninga ovanhu ovahongwa?
16 Dimbuluka yo kutya oilonga yokuninga ovanhu ovahongwa oilonga hai longwa kosipana. Kape na umwe pauhandimwe ta ningi omunhu omuhongwa ngaashi naanaa oshimeno itashi palulwa keta limwe lodula. Doshili, Ondombwedi imwe otai dulu okumona omunhu e na ohokwe nokutameka ekonakonombibeli. Ndelenee ngeenge oo mupe okwe uya kOlupale lOuhamba, eongalo alishe otali mu kwafele a mone kutya ei oyo oshili. Ohamu youmwainafana otai ulike enwefemo lomhepo yaKalunga. (1 Ovakorinto 14:24, 25) Ngeenge ounona novanyasha tava yandje eekomenda ditunhula, otashi ulikile omunhu oo mupe kutya ovanyasha vetu ova yooloka ko kovanyasha vomounyuni. Ovanaudu naavo va nghundipala palutu nosho yo ovanamido meongalo otava hongo ovo vape kutya elididimiko ola kwatela mo shike. Kashi na nee mbudi kutya eedula detu ile omangabeko etu oku fike peni, atusheni otu neni ombinga ya fimana mokukwafela ovo vape opo ohole yavo yokuhola oshili yOmbibeli i ye moule nova xume komesho fiyo okeninginifo. Ovili keshe hatu longo moukalele, elishuneko keshe, eenghundafana keshe nomunhu oo e na ohokwe pOlupale lOuhamba otadi dulu okumonika da fa inadi fimana kudo vene, ndelenee odi li oshitukulwa shoilonga ya kula oyo Jehova ta longo.
17, 18. (a) Kakele kokukala nombinga moilonga yokuninga ovanhu ovahongwa, ongahelipi hatu dulu okukala nombinga mehafo lokuyandja? (b) Mokukala nombinga mehafo lokuyandja, ohatu hopaenene lyelye?
17 Doshili, kakele kokukala nombinga moilonga ya fimana yokuninga ovanhu ovahongwa, tu li Ovakriste otu na yo ombinga mehafo lokuyandja meenghedi dimwe. Ohatu dulu okwoongela oimaliwa tu yambidide okukaleka po elongelokalunga la koshoka nokukwafela ovo ve na omhumbwe. (Lukas 16:9; 1 Ovakorinto 16:1, 2) Otu na okukonga eemhito tu yakule vamwe. (Ovaroma 12:13) Otu na okukondja “tu ningileni aveshe ouwa, ndelenee unene tuu ovo oovakwetu vomeitavelo.” (Ovagalati 6:10) Nomeenghedi dimwe danafangwa ndele oda fimana, ohatu dulu okuyandja kuvamwe—moku va shangela eembapila, oku va dengela ongodi, oku va pa omaano, oku va kwafela apa va pumbwa ekwafo, nosho yo oku va twa omukumo.
18 Mokuyandja, ohatu ulike kutya ohatu hopaenene Tate yetu womeulu. Ohatu ulike yo ohole yetu youmwainafana, edidilikokonekifo lOvakriste vashili. (Johannes 13:35) Okudimbuluka oinima ei otashi dulu oku tu kwafela tu kale nombinga mehafo lokuyandja.
Oto dulu okuyelifa?
• Ongahelipi Jehova naJesus va tula po oshihopaenenwa shokuyandja pamhepo?
• Ongahelipi hatu dulu okulimonena ookaume vaalushe?
• Eenghatu dilipi hatu dulu okukatuka tu ninge oukalele wetu tau shi pondola?
• Ongahelipi aveshe meongalo tava dulu okukala nombinga mehafo lokuyandja?
1. Ongahelipi Jehova ta ulike elao lokuyandja?
[Efano pepandja 27]
Ngeenge ounona tava tambula ko okudeulwa, ovadali ohava mono ehafo linene nembilipalelo
[Efano pepandja 29]
Mokuninga ovanhu ovahongwa, ohatu dulu okuninga ookaume kashili
[Efano pepandja 30]
Jehova ote tu yambidida moukulupe wetu
[Efano pepandja 31]
Meenghedi danafangwa ndelenee oda fimana ohatu mono ehafo mokuyandja