Okaana oko ka li ka udanekwa

Josef naMaria ova kala muBetlehem, ponhele yokushuna kuNasaret. Eshi Jesus a wanifa omafiku ahetatu, ove mu pitifa etanda, ngaashi Omhango yaKalunga oyo a li a pa Ovaisrael ya ti. (Levitikus 12:2, 3) Osha li yo onghedindjikilile okuluka okaana mefiku olo. Ove ka luka Jesus, ngaashi omweengeli Gabriel e va lombwela.

Eshi Jesus a wanifa omafiku 40, ovadali vaye ova li ve na oku mu twala peni? Ova li ve na oku mu twala kotembeli oyo ya li popepi noshitukulwa omo ve li, muJerusalem. PaMhango, konima yomafiku 40 eshi okaana kokamati ka dalwa, ina okwa li e na okutwala omayambo okuliyelifa kotembeli. — Levitikus 12:4-8.

Maria osho a li a ninga. Okwa twala ounghutyona vavali ve li eyambo laye. Osho otashi ulike kutya ouxupilo waJosef naMaria owa li wa tya ngahelipi. PaMhango, okwa li ku na okuyandjwa okadjona nokanghutyona. Ashike ngeenge ina ke na odi, ota dulu okuyandja ounghutyona vavali ile eenghuti mbali di li eyambo. Na Maria ovo a li a yandja.

Ofimbo Josef naMaria va li kotembeli, puvo opa li pe uya omulumenhu omunamido. Edina laye oSimeon. Kalunga okwa li e mu hololela kutya ita ka fya fimbo ina mona omuudanekwa waYe, Kristus ile Messias. Simeon okwa li a wilikwa komhepo iyapuki a ye kotembeli oko a hanga Josef naMaria ve li nokahanana kavo. Simeon okwe va kufa okahanana ndele te ka ukata.

Ofimbo a li a ukata Jesus, okwa tanga Kalunga ta ti: “Omwene Omunamapangelo aeshe, paife oto dulu okweefa omupiya woye a fye nombili ngaashi wa popya. Osheshi omesho ange okwa mona exupifo olo wa longekida opo li monike kovanhu aveshe. Oli li ouyelele oo tau minikile oiwana oyo i li momulaulu notali ka etela oshiwana shoye shaIsrael efimano.” — Lukas 2:29-32.

Josef naMaria ova li va kuminwa eendjovo odo. Simeon okwe va nangeka noupuna ndele ta lombwele Maria kutya okaana “oka nangekwa po ka pundukife nokupendula po yo Ovaisrael vahapu” nonokutya eendjovo da fa eongamukonda ota di mu tyuula. — Lukas 2:34.

Puvo opa li pe uya vali omunhu umwe mefiku olo, Anna, omuprofeti omukainhu oo a li e na omido 84. Okwa kala alushe ha i kotembeli. Eshi opo e uya, okwa li a ya kuJosef naMaria nosho yo kokahanana Jesus. Anna okwa li a hovela okupandula Kalunga nokulombwela aveshe ovo va li po kombinga yaJesus.

Nopehe na omalimbililo, Josef naMaria ove na okukala va li va tunhukwa omolwoiningwanima oyo ya ningwa efiku olo kotembeli. Naasho osha li oumbangi kuvo oo tau ulike kutya omona wavo oye Omuudanekwa waKalunga.