Omapulo a dja kovaleshi

Okukala “nomwenyo muye mwene” osha hala okutya ngahelipi?

Ombibeli otai popi Jesus Kristus kutya oku “nomwenyo muye mwene” nosho yo kutya ovahongwa vaye ove na ‘omwenyo muvo vene.’ (Johannes 5:26; 6:53) Ndelenee omishangwa odo mbali kadi na eityo la faafana.

Jesus okwa ti: “Ngaashi Xe e nomwenyo muye mwene, osho tuu okwe u pa Omona, Ye a kale yo e nomwenyo muye mwene.” Fimbo ina tumbula etumbulo olo, Jesus okwa ti: “Oshilishili handi mu lombwele: Ou ta udu eendjovo dange, nota itavele ou a tuma nge, oku nomwenyo waalushe . . . Efimbo tali uya, ndele opo li li paife, ovafi tava udu ondaka yOmona waKalunga, naava tave i udu, otava kala ve nomwenyo.” Apa Jesus okwa li ta popi shi na sha neenghono dinene odo a pewa kuXe—okudula kwaye okuninga ovanhu va kale nomufika muwa koshipala shaKalunga. Kakele kaasho, Jesus ota dulu okunyumuna ovo va kofa mefyo noku va pa omwenyo. KuJesus, okukala “nomwenyo muye mwene” otashi ti kutya okwa pewa eenghono da tya ngaho. Ngaashi Xe, Omona naye oku na “muye mwene oshali yomwenyo,” ngaashi tashi dulu okutolokwa yo noitya imwe. (Johannes 5:24-26) Ongahelipi shi na sha novashikuli vaye?

Omudo umwe lwaapo konima yaasho, Jesus okwa lombwela ovapwilikini vaye ta ti: “Oshilishili handi mu lombwele, ngenge itamu li ombelela yOmona wOmunhu nye itamu nu ohonde yaye, nye kamu na omwenyo munye vene. Ou ta li ombelela yange ye ta nu ohonde yange, oye e nomwenyo waalushe, ndele handi mu nyumuna efiku laxuuninwa.” (Johannes 6:53, 54) Jesus okwa faafanifa okukala ‘nomwenyo munye vene’ nokumona ‘omwenyo waalushe.’ Outumbulilo u li melandulafano la faafana lopamhango yelaka ngaashi okukala ‘nomwenyo munye vene’ otau hangika pamwe pe lili mOmishangwa dOshigreka. Oihopaenenwa ivali oyo: “Kaleni mu nomongwa munye vene” nosho yo “va mona muvo vene ondjabi ye va yeleka.” (Markus 9:50; Ovaroma 1:27) Peemhito edi, omatumbulo oo itaa ulike keenghono dokuyandja omongwa kuvamwe ile dokuyandja ondjabi ya yeleka kuvamwe. Ponhele yaasho, otaa ulike kouyadi womeni. Onghee hano, outumbulilo “omwenyo munye vene” oo wa longifwa muJohannes 6:53 otau ulike ashike kokumona omwenyo pauyadi.

Eshi a popya novashikuli vaye shi na sha nokukala nomwenyo muvo vene, Jesus okwa tumbula ombelela yaye nohonde yaye. Konima yefimbo, eshi a li ta diki po Ouvalelo wOmwene, Jesus okwa popya natango kombinga yombelela nohonde yaye ta lombwele ovashikuli vaye ovo kwa li tava ka ya mehangano lipe va kufe ombinga mokulya nokunwa omadidiliko omungome inau ya onhafi nomaviinyu. Mbela osho osha hala okutya Ovakriste ovavaekwa ovo ve li mehangano lipe naJehova Kalunga ovo ashike tava mono omwenyo pauyadi? Ahowe. Opa pita omudo pokati keemhito odo mbali. Ovo kwa li va uda eendjovo daJesus odo da shangwa muJohannes 6:53, 54 kava li ve na eshiivo ledano lokomudo nomadidiliko oo taa faneke ombelela nohonde yaKristus.

PaJohannes etukulwa eti-6, Jesus okwa yelekanifa tete ombelela yaye nomanna, ta ti: “Ooxo va lile omanna mombuwa, ndele vo va fya. Owo omungome ou tau di meulu, opo keshe omunhu e u lye, ye a ha fye. Aame omungome ou u nomwenyo wa dja meulu. Ngenge umwe ta li omungome ou, oye ta kala e nomwenyo fiyo alushe.” Ombelela yaJesus nohonde yaye oya li i na ongushu inene i dule omanna ovene vene. Ongahelipi mbela? Omolwaashi ombelela yaye oya yandjwa opo “ounyuni u mone omwenyo,” sha hala okutya omwenyo waalushe.a Onghee hano, etumbulo li na sha nokukala ‘nomwenyo munye vene’ olo tali hangika muJohannes 6:53 otali yukifwa kwaaveshe ovo tava ka mona omwenyo waalushe meulu ile kombada yedu.—Johannes 6:48-51.

Onaini ovashikuli vaKristus hava mono omwenyo muvo vene ile omwenyo pauyadi? Kwaavo ve li ovafyuululi vOuhamba ovavaekwa, osho ohashi ningwa penyumuko lavo okunyumukila okukalamwenyo kwomeulu ve li oishitwa yopamhepo ihai fi. (1 Ovakorinto 15:52, 53; 1 Johannes 3:2) “Eedi dimwe” daJesus otadi ka mona omwenyo pauyadi konima yEpangelo laye lOmido Eyovi. Pefimbo opo otadi ka kala da yelekwa noda monika kutya odidiinini notadi ka yukipalifwa di mone omwenyo waalushe mEduparadisa.—Johannes 10:16, OB-1954; Ehololo 20:5, 7-10.

[Omashangelo opedu]

[Efano pepandja 9]

Ovakriste aveshe vashili otava dulu okukala ‘nomwenyo muvo vene’