Owe shi shiiva tuu?

‘Olukalwatokolo’ oko omuyapostoli Paulus a twalelwe oshike?

▪ Oilonga 18:12, 13 oya ti kutya Ovajuda vomuKorinto ova li tava tamaneke Paulus kutya okwa li ta udifa shihe li paveta nove mu twala “kolukalwatokolo” ile bema (oshitya shOshigreka osho tashi ti “ondodo”). MuKorinto shonale omwa li mu na omutune umwe wa yeluka wa li poluhaela lwopondingandinga ya-agora, sha hala okutya, onhele yomalandifilo, oyo ya li ashike okanano kanini okudja poshinagoga. Omutune oo owa li hau longifwa ngeenge omunhu ta popi novakwashiwana. Owa li wa tungwa po moumanya vanini vomaluvala mambulau namatoka nowa fewekwa noihongwanima yondilo. Okwa li yo ku na eenduda mbali di na oipundi yeembanga ya longwa moumanya vomaluvala nomukolongo wado owa li wa longwa moumanya vanini hava vema.

Omutune oko kwa li kwa twalwa omuyapostoli Paulus a ka fikame koshipala shondjai Galio, omupangeli waRoma woshitukulwa shaAkia, owa li wa talwa ko u li onga oshipundi shetokolo. Ovanambelewa oko kwa li hava kala omutumba oko tava pwilikine nokutokola oikoya komesho yeengudu dovanhu.

Osha li onghedindjikilile moilando yomuGreka okwoongalela komesho yoipundi yetokolo ya tya ngaho, opo pa li hapa ningilwa oyoongalele aishe yopamhangu. Omahokololo oo taa hangwa momishangwa dOshigreka, oo taa popi kombinga yokutokolwa kwaJesus, ngaashi Mateus 27:19 naJohannes 19:13, okwa tumbula Pontius Pilatus ta popifa eemhunga e li kolukalwatokolo laye (ile bema). — Oilonga 12:21.

Omolwashike Ovajuda vamwe va li va pundukifwa konghedi omo Jesus a fya?

▪ Omuyapostoli Paulus okwa li a popya shi na sha nOvakriste vopefimbo laye a ti: ‘Ohatu udifa Kristus, omuvalelwa, ou kOvajuda epundukifo, noulai kovapaani.’ (1 Ovakorinto 1:23) Ndele mbela omolwashike onghedi omo Jesus a fya ya li epundukifo kOvajuda vamwe?

Omukonakoni umwe wOmbibeli wedina Ben Witherington okwa popya shi na sha nomifyuululwakalo dovanhu vokOushilo woPokati vomefelemudo lotete nosho yo onghedi omo Jesus a fya, a ti: “Okwa dipawa monghedi ififa ohoni neenghono pataleko lovanhu vopefimbo olo. Kapa li omunhu umwe a dipawa nale omolwelongelokalunga monghedi ififa ohoni ngaashi ye.” Okwa weda ko vali a ti: “Ovanhu vopefimbo opo ova li va itavela kutya onghedi omo omunhu a fya oyo hai ulike kutya okwa li a tya ngahelipi. Omolwetomheno olo, Jesus okwa li a talwa ko e li omudinwa, omutwindubo nepangelo nokwa wana okupewa ehandukilo olo kwa li hali pewa ovapika ovanashibofa.” Ndele mokutala konakudiwa nomifyuululwakalo odo, itashi ka kala pandunge okufika pexulifodiladilo kutya Ovakriste vonale ova li va wedela omahokololo avo e na sha nefyo nenyumuko laJesus.