Mounyuni aushe, ovanhu ove na omataleko a yoolokafana e na sha noikunwa yoalkoholi. Vamwe ohava hafele okunwa omafimbo amwe pamwe nookaume kavo. Vamwe ova hoolola vaha nwe nandenande. Ofimbo vamwe hava nu, fiyo osheshi va kolwa. Ndele mbela Ombiibeli oya popya shike shi na sha noikunwa yoalkoholi?

1. Mbela osha puka okunwa oikunwa yoalkoholi?

Ombiibeli inai tokola okunwa oikunwa yoalkoholi. Mepingafano naasho, eshi ya tumbula mepsalme limwe eeshali dihapu, odo Kalunga e tu pa, omwa kwatelwa yo ‘omaviinyu, oo taa hafifa omutima womunhu.’ (Epsalme 104:14, 15) Ovalumenhu novakainhu vamwe ovadiinini, ovo va popiwa mOmbiibeli, ova li hava nu oikunwa yoalkoholi.— 1 Timoteus 5:23.

2. Ombiibeli oya yandja omayele elipi kwaavo va hoolola okunwa oikunwa yoalkoholi?

Jehova ita popile okunwa sha pitilila nosho yo oukolwe. (Ovagalati 5:21) Eendjovo daye oda ti: “Ino kala mokati kaava hava finyuna omaviinyu.” (Omayeletumbulo 23:20) Onghee hano, ngeenge otwa hoolola okunwa, kutya nee otu li ofye atuke, katu na okunwa sha pitilila. Ngeenge otwa nu sha pitilila, otashi ka kala shidjuu okupangela omadiladilo, okupopya nosho yo eenghatu detu, notashi nyono po oukolele wetu. Ngeenge ihatu dulu okulipangela, otu na okweefa po okunwa filufilu.

3. Ongahelipi hatu dulu okuulika kutya otwa fimaneka omatokolo avamwe, ngeenge tashi uya pokunwa oikunwa yoalkoholi?

Omunhu keshe oku na okuninga etokolo kutya ota nu oikunwa yoalkoholi, ile hasho. Katu na okutokola oo a hoolola okunwa oikunwa yoalkoholi pandjele, nokatu na yo okufininika oo ina hala okunwa. (Ovaroma 14:10) Ohatu dulu yo okuhoolola tuha nwe, ngeenge otashi pundukifa vamwe. (Lesha Ovaroma 14:21.) Ihatu ‘lalakanene ouwa wetu vene, ndele ohatu lalakanene ouwa wavamwe.’— Lesha 1 Ovakorinto 10:23, 24..

KONAKONA MOULE

4. Tokola ngeenge owa pumbwa okunwa oikunwa yoalkoholi, ile hasho

Jesus okwa li a tala ko ngahelipi okunwa oikunwa yoalkoholi? Opo tu mone enyamukulo, natu ka taleni koshikumwifilonga shaye shotete. Lesha Johannes 2:1-11, ndele tamu kundafana omapulo taa shikula:

• Oshike hatu lihongo moshikumwifilonga osho shi na sha netaleko laJesus li na sha noikunwa yoalkoholi nosho yo ovo have i nu?

• Molwaashi Jesus ka li e li omhinge nokunwa oikunwa yoalkoholi, mbela Omukriste oku na okutala ko ngahelipi oo a hoolola okunwa oikunwa yoalkoholi?

Ashike inashi hala okutya molwaashi Omukriste oku na emanguluko lokunwa oikunwa yoalkoholi, oshi li pandunge alushe okunwa. Lesha Omayeletumbulo 22:3, ndele tamu konakona oinima tai landula, mu tale nghee tai dulu okunwefa mo etokolo lomunhu, ngeenge oku na okunwa, ile hasho:

• Ngeenge oto ka shinga, ile to ka longa noikwamashina.

• Ngeenge ou li meteelelo.

• Ngenge ndokotola okwe ku lombwela uha nwe oikunwa yoalkoholi.

• Ngeenge oho mono shidjuu okulipangela.

• Ngeenge ino pitikwa paveta u nwe.

• Ngeenge ou li naumwe, oo a hoolola okuhanwa vali, molwaashi e na ounghundi wokuhelipangela.

Mbela ou na okuyandja oikunwa yoalkoholi pohango, ile poivilo imwe vali? Opo u mone osho tashi dulu oku ku kwafela, dana OKAVIDIO.

OKAVIDIO: Mbela ondi na okuyandja oikunwa yoalkoholi? (2:41)

Lesha Ovaroma 13:13 nosho yo 1 Ovakorinto 10:31, 32. Konima eshi mwa lesha omushangwa keshe, kundafaneni epulo tali shikula:

• Ongahelipi okutula moilonga efinamhango olo taku ku kwafele u ninge etokolo olo tali hafifa Jehova?

5. Tokola kutya oto nu shi fike peni

Ngeenge owa hoolola okunwa oikunwa yoalkoholi, kaleka oshinima eshi momadiladilo: Nonande Jehova ina tokola okunwa oikunwa yoalkoholi, okwa tokola oukolwe. Omolwashike mbela? Lesha Hosea 4:11, 18, ndele tamu kundafana epulo tali shikula:

• Oshike tashi dulu okuningwa po, ngeenge omunhu okwa nu sha pitilila?

Ongahelipi hatu dulu okuhenuka okunwa sha pitilila? Otwa pumbwa okukala tu na ondjele, ile tu shii omangabeko etu. Lesha Omayeletumbulo 11:2, ndele tamu kundafana epulo tali shikula:

• Omolwashike shiwa okulitulila po omangabeko okondadalunde e na sha nokutya oto nu shi fike peni?

6. Efa po okunwa sha pitilila

OKAVIDIO: ‘Kanda li nda hafela onghedi yange yokukalamwenyo’ (6:32)

• Ngaashi sha ulikwa mokavidio, oikunwa yoalkoholi oya li ya kuma ngahelipi eenghatu daDmitry?

• Mbela okwa li a efa po diva okunwa oikunwa yoalkoholi?

• Ongahelipi a li a efa po xuuninwa okukala a pikwa kokunwa oikunwa yoalkoholi?

Lesha 1 Ovakorinto 6:10, 11, ndele tamu kundafana omapulo taa shikula:

• Oukolwe owa kwata moiti shi fike peni?

• Oshike tashi ulike kutya ongholwe otai dulu okuninga omalunduluko?

Lesha Mateus 5:30, ndele tamu kundafana epulo tali shikula:

• Eshi Jesus a longifa efaneko li na sha nokuteta ko eke, okwa hala okutya otwa pumbwa okuninga omaliyambo, opo tu hafife Jehova. Oshike to dulu okuninga po, ngeenge oto kondjo nounghundi wokunwa sha pitilila?a

Lesha 1 Ovakorinto 15:33, ndele tamu kundafana epulo tali shikula:

• Ngeenge ookaume koye ohava nu sha pitilila, otashi ke ku kuma ngahelipi?

ENGONGO

Jehova okwe tu pa oikunwa yoalkoholi, opo tu i hafele, ashike okwa tokola okunwa sha pitilila nosho yo oukolwe.

Eendululo

• Ombiibeli oya popya shike shi na sha noikunwa yoalkoholi?

• Okunwa sha pitilila ohaku etifa omaupyakadi elipi?

• Ongahelipi hatu dulu okuulika kutya otwa fimaneka omatokolo avamwe e na sha noikunwa yoalkoholi?

TALA OUYELELE WA WEDWA PO

Ongahelipi ovanyasha tava dulu okuninga omahoololo e li pandunge shi na sha noikunwa yoalkoholi?

Diladila koilanduliko fimbo ino nwa oalkoholi (2:31)

Tala eenghatu odo to dulu okukatuka, opo u efe po okunwa sha pitilila.

“Kala u na etaleko la yuka li na sha noikunwa yoalkoholi” (Oshungonangelo, 1 Februali 2010)

Mbela Omukriste oku na okukufa ombinga mokudenga ouhalasha kumwe poivilo?

“Omapulo a dja kovaleshi” (Oshungonangelo, 15 Februali 2007)

Mehokololo “Onda li nda ninga ombuvi yomalodu,” tala nghee omulumenhu umwe a efa po okunwa sha pitilila.

“Ombiibeli ohai lundulula onghalamwenyo yovanhu” (Oshungonangelo, 1 Mei 2012)

Atusheni otu na ehoololo kutya otwa hala okudjala nokuliwapeka monghedi ya tya ngahelipi. Ngeenge otwa wilikwa komafinamhango onhumba Ombiibeli, itashi ke tu kwafela ashike tu hoolole nawa omidjalo detu, ndele ohatu ka hafifa yo Jehova. Natu ka kundafane amwe omomafinamhango oo.

1. Omafinamhango elipi e na oku tu wilika, eshi hatu hoolola kutya otu na okudjala nokuliwapeka ngahelipi?

Otu na “okudjala monghedi yefimaneko, oikutu tai wapalele noi li pandjele,” notu na okukala twa koshoka, opo ovanhu va mone kutya otu li “ovatilikalunga.” (1 Timoteus 2:9, 10) Natu ka kundafane omafinamhango ane taa shikula: (1) Otu na okudjala “monghedi yefimaneko.” Otashi dulika wa mona pokwoongala kutya oshiwana shaJehova ohashi djala meenghedi da yoolokafana, ndele onghedi yetu yokudjala nokuliwapeka momitwe otai ulike kutya otwa fimaneka Kalunga, oo hatu longele. (2) Otu na okudjala “oikutu tai wapalele,” sha hala kutya eholokepo letu kali na okupendula omahalo opamilele, ile li ningife vamwe va kale tava yandje elitulemo la pitilila kufye. (3) Ohatu ulike kutya otu na ‘ondjele’ mokuhenuka okulandula omoode keshe oyo tai kondo. (4) Eholokepo letu oli na alushe okuulika kutya otu li “ovatilikalunga,” opo vamwe va mone kutya ohatu longele Kalunga kashili.— 1 Ovakorinto 10:31.

2. Eholokepo letu otali dulu okukuma ngahelipi ovaitaveli vakwetu?

Nonande otu na emanguluko lokuhoolola osho twa hala okudjala, otu na okudiladila kutya eholokepo letu otali ka kuma ngahelipi vamwe. Inatu hala okupundukifa nande oumwe, ndele ponhele yaasho, otwa hala ‘okuningila vakwetu ouwa, opo tu va pameke.’— Lesha Ovaroma 15:1, 2.

3. Ongahelipi eholokepo letu tali dulu okunanena vamwe kelongelokalunga lashili?

Ohatu kendabala okudjala monghedi yefimaneko pomhito keshe, ndele ohatu yandje elitulemo le likalekelwa koidjalomwa yetu, unene tuu ngeenge hatu i kokwoongala, ile hatu i moilonga yokuudifa. Inatu hala ovanhu va kale va yemba etumwalaka letu la fimana. Ndele ponhele yaasho, otwa hala eholokepo letu li ningife ovanhu va kale va hala okulihonga oshili, notu “fimanekife omahongo aKalunga Omuxupifi wetu.”— Titus 2:10.

KONAKONA MOULE

4. Eholokepo letu liwa otali ulike kutya otwa fimaneka Jehova

Omolwashike sha fimanenena okushilipaleka kutya eholokepo letu oliwa? Lesha Epsalme 47:2, ndele tamu kundafana omapulo taa shikula:

• Okukala tu shii kutya onghedi yetu yokudjala otai dulu okukuma nghee vamwe va tala ko Jehova oshi na okukuma ngahelipi okudjala kwetu?

• Mbela osha pumbiwa ngoo okukala hatu lipula shi na sha neholokepo letu, ngeenge tu li pokwoongala, ile hatu kufa ombinga moilonga yokuudifa? Omolwashike to tile ngaho?

5. Nghee to dulu okuhoolola pandunge onghedi yoye yokudjala nokuliwapeka

Dana OKAVIDIO.

OKAVIDIO: “Aishe i ningeni okufimanekifa Kalunga” (10:18)

Kutya nee oikutu yetu oyondilo, ile oyombilixa, oi na okukala ya yela notai wapalele onghalo omo tu li. Lesha 1 Ovakorinto 10:24 nosho yo 1 Timoteus 2:9, 10. Opo nee tamu kundafana kutya omolwashike tu na okuhenuka okudjala oikutu . . .

• oyo tai ulike kutya katu na ko nasha.

• oyo ya ponda, hai limonikila, ile tai pendula omahalo omilele.

Nonande Ovakriste kave li koshi yOmhango yaMoses, Omhango oyo otai tu hongo nghee Jehova ha tale ko oinima. Lesha Deuteronomion 22:5, ndele tamu kundafana epulo tali shikula:

• Omolwashike ovalumenhu ve na okuhenuka okuliwapeka nokudjala va fa ovakainhu nonokutya ovakainhu kave na okudjala va fa ovalumenhu?

Lesha 1 Ovakorinto 10:32, 33 nosho yo 1 Johannes 2:15, 16, ndele tamu kundafana omapulo taa shikula:

• Omolwashike tu na okushilipaleka kutya eholokepo letu itali pundukifa vamwe momudingonoko, ile meongalo letu?

• Eenghedi dokudjala nokuliwapeka dilipi di li apeshe moshitukulwa sheni?

• Mbela oto diladila kutya eenghedi dimwe domwaado otadi wapalele ngoo Omukriste? Omolwashike to tile ngaho?

ENGONGO

Ngeenge otwa hoolola pandunge oidjalomwa yetu, ohatu ka ulika kutya otwa fimaneka Jehova nosho yo ovanhu vakwetu.

Eendululo

• Omolwashike onghedi yetu yokudjala nokuliwapeka ya fimana kuJehova?

• Omafinamhango amwe elipi taa dulu oku tu wilika, eshi hatu ningi omatokolo e na sha neholokepo letu?

• Omolwashike eholokepo letu tali dulu okukuma onghedi omo vamwe va tala ko elongelokalunga lashili?

TALA OUYELELE WA WEDWA PO

Tala kutya onghedi yoye yokudjala otai ka kuma ngahelipi etaleko lavamwe li na sha naave.

“Omidjalo dange ohadi monika ngahelipi?” (Oshitukulwa shi li ko jw.org)

Lihonga kutya omolwashike shi li pandunge okudiladila koilanduliko, ofimbo ino shangwa otattoo.

“Ombiibeli oya popya shike kombinga yeetattoo?” (Oshitukulwa shi li ko jw.org)

Konakona omafinamhango a wedwa po, oo taa dulu oku ku wilika, eshi to ningi omatokolo.

“Mbela onghedi yoye yokudjala otai fimanekifa ngoo Kalunga?” (Oshungonangelo, Septemba 2016)

Ongahelipi omukainhu umwe, oo a li a hala okuhafifa Kalunga, e lihonga okutambula ko onghedi yavamwe yokudjala?

“Onda li handi pundukifwa konghedi yavamwe yokudjala nokuliwapeka” (Kala oupafi!, 22 Desemba 2003)