OSHILESHWA 36
Kala omunashili moinima aishe
Atushe otwa hala okukala nookaume ovo hava popi oshili. Jehova naye okwa teelela ookaume kaye va kale hava popi oshili. Ashike kashipu okukala ovanashili, molwaashi ovanhu vahapu mounyuni kave fi ovanashili. Ndele mbela ouwa ulipi hau di mokukala ovanashili moinima aishe?
1. Omolwashike sha fimanenena okukala ovanashili?
Ngeenge ohatu lombwele vamwe oshili, kungaho ohatu ulike kutya otu hole Jehova notwe mu fimaneka. Didilika kutya Jehova oku shii ashishe osho hatu diladila naasho hatu ningi. (Ovaheberi 4:13) Ohe shi didilike ngeenge hatu popi oshili, nohashi mu hafifa. Eendjovo daye oda ti: “Omupukifi oye oixuna kOmwene, ndelenee Ye omushiiviki wovayuki.”— Omayeletumbulo 3:32.
2. Omeenghedi dilipi hatu dulu okuulika kutya otu li ovanashili mokukalamwenyo kwetu kwakeshe efiku?
Jehova okwa hala tu kale ‘hatu popi oshili.’ (Sakaria 8:16, 17) Mbela osho osha hala okutya ngahelipi? Kutya nee ohatu popi novapambele, ovanailonga pamwe nafye, ovamwatate novamwameme, ile ovakwanepangelo, katu na okupopya oipupulu, ile tu va pe omauyelele ehe li paushili. Ovanhu ovo ve li ovanashili ihava vake, ile va kengelele vamwe. (Lesha Omayeletumbulo 24:28; Ovaefeso 4:28.) Ohava futu yo oifendela yavo ye lixwa po. (Ovaroma 13:5-7) Nokungaho ohatu ulike kutya ‘otwa hala okukala ovanashili moinima aishe.’— Ovaheberi 13:18.
3. Ouwa ulipi hau di mokukala ovanashili?
Ngeenge otwa kala ovanashili, vamwe otava ka kala ve tu lineekela. Ohatu ka kwafela vamwe va kale ve udite va amenwa meongalo, ngaashi ashike moukwaneumbo omo ovanhu aveshe ve holafane. Ngeenge otwa kala ovanashili, ohatu ka kala neliudo la koshoka. Ohatu ka fimanekifa yo “omahongo aKalunga Omuxupifi wetu,” naasho otashi ke linyengifa yo vamwe ve lihonge kombinga yaJehova nove mu longele.— Titus 2:10.
KONAKONA MOULE
Tala nghee okukala omunashili hashi kumu Jehova nosho yo ove mwene. Lihonga yo nghee to dulu okukala omunashili meenghalo da yoolokafana monghalamwenyo.
4. Okukala ovanashili ohashi hafifa Jehova
Lesha Epsalme 44:21 nosho yo Malakia 3:16, ndele tamu kundafana omapulo taa shikula:
Mbela oto diladila kutya oshi li ngoo pandunge okupopya oipupulu hatu diladila kutya oshili itai ka monika mo?
Mbela oto diladila kutya Jehova oha kala e udite ngahelipi, ngeenge ohatu popi oshili, nonande ihashi kala shipu okuninga ngaho?
Ngeenge ounona ohava popi oshili, ohava hafifa ovadali vavo. Sha faafana, ngeenge ohatu popi oshili, ohatu hafifa Jehova
5. Kala alushe ho popi oshili
Ovanhu vahapu ova itavela kutya haalushe hashi kala shipu okukala ovanashili. Lihonga kutya omolwashike twa pumbwa okukala ovanashili efimbo keshe. Dana OKAVIDIO.
Lesha Ovaheberi 13:18, ndele tamu kundafana kutya ongahelipi hatu dulu okukala ovanashili . . .
moukwaneumbo.
koilonga, ile kofikola.
nosho yo meenghalo dimwe vali.
6. Okukala ovanashili ohashi tu etele ouwa
Potete, okukala ovanashili otashi dulika shi monike sha fa tashi tu etele omaupyakadi. Ashike mokweendela ko kwefimbo, ohatu ka didilika kutya osho oshinima sha fimana okuninga alushe. Lesha Epsalme 34:12-16, ndele tamu kundafana epulo tali shikula:
Ongahelipi okukala omunashili taku dulu okuxwepopaleka onghalamwenyo yoye?
Ngeenge ovashamane novakulukadi ove li ovanashili, ohashi pameke ohombo yavo
Ngeenge ovanailonga ove li ovanashili, ohava kala ve lineekelwa kovayandji vavo voilonga
Ngeenge ovakwashiwana ove li ovanashili, ohava kala ve lineekelwa kovakwanepangelo
VAMWE OHAVA TI: “Oipupulu imwe oinini noinai kwata moiti.”
Omolwashike wa tomhwa kutya Jehova oku tonde oipupulu yoludi keshe?
ENGONGO
Jehova okwa hala ookaume kaye va kale ovanashili mwaashishe osho hava popi naasho hava ningi.
Eendululo
Omeenghedi dilipi hatu dulu okukala ovanashili?
Omolwashike shihe li pandunge okudiladila kutya ohatu dulu okupopya oipupulu hatu diladila kutya oshili itashi ka monika mo?
Omolwashike wa pumbwa okukala omunashili efimbo alishe?
TALA OUYELELE WA WEDWA PO
Ongahelipi ovadali tava dulu okuhonga ovana va kale ovanashili?
Ongahelipi hatu dulu okumona ouwa, ngeenge otwa kala hatu wanifa po omaudaneko etu?
Kala ho wanifa po omaudaneko, opo u mone omanangeko noupuna (9:09)
Konakona u tale ngeenge otwa pumbwa ngoo okukala hatu futu oifendela, nonande ihai longifwa nawa.
“Otu na ngoo okufuta oifendela?” (Oshungonangelo, 1 Oktoba 2011)
Oshike she linyengifa omulumenhu umwe, oo a li ehe fi omunashili, a lundulule onghalamwenyo yaye noku kale ha longo osho sha yuka?
“Onde lihonga kutya Jehova omunanghenda noha dimine po” (Oshungonangelo, Juli-Auguste 2015)