Jehova ota wapeke oshiwana shaye nouyelele
“[Omukainhu,] fikama, [yandja ouyelele], osheshi ouyelele woye tau uya
noshinge shOmwene tashi ku tendele.”—JESAJA 60:1, yelekanifa NW.
“AKUTU, inatu pumbwa tuu umwe a fa Jesaja ile Omuyapuki Paulus!” Osho omupresidente wOilongo yaHangana Harry Truman a ulika olukeno laye ngaho mo 1940 nasha. Mbela omolwashike a popila eendjovo odo? Omolwaashi okwa li e udite kutya opwa pumbiwa pa kale ovawiliki ovo ve na eenghedi da denga mbada mounyuni wopefimbo laye. Ovanhu ova hangika ashike kwa li va pita mefimbo lomilaulu dinene domefelemudo eti-20, oita itivali younyuni. Ndelenee nokuli nande oita oya li ya xula, ounyuni kawa li u na ombili. Omilaulu oda twikila. Doshili, omido 57 konima yexulilo loita oyo, ounyuni ou li natango momilaulu. Ngeno omupresidente Truman oko a li nena, pe he na omalimbililo ngeno ota kala natango e wete pwa pumbiwa ovawiliki ovo ve na eenghedi da denga mbada da fa daJesaja ile domuyapostoli Paulus.
1, 2. (a) Onghalo yovanhu oi li ngahelipi? (b) Oolyelye va etela ovanhu omilaulu?
2 Kutya nee omupresidente Truman okwa li e shi shii ile hasho, omuyapostoli Paulus okwa popya shi na sha nomilaulu odo tadi hepeke ovanhu, nokwa londwela kombinga yado momishangwa daye. Pashihopaenenwa, okwa londwela ovaitaveli vakwao ta ti: ‘Ekondjo letu kali fi okukondjifa ombelela nohonde, ndelenee otu nokulwifa oovene novanaenghono, novapangeli vounyuni ou womilaulu, neemhepo dowii mevalelwa.’ (Ovaefeso 6:12) Paulus ina ulika ashike neendjovo odo kutya okwa li e shii kutya omilaulu dopamhepo oda tuvikila ounyuni, ndelenee okwa ulika yo kutya okwa li e shii odjo yado yashili—eenghono dopaundemoni da hokololwa di li ‘ovapangeli vounyuni.’ Molwaashi oishitwa inaenghono yopamhepo oyo ya etela ounyuni omilaulu, mbela ovanhu vongaho otava dulu okuninga po shike ve di kufe po?
3. Ndelenee nande ovanhu ove li monghalo yomilaulu, Jesaja okwa xunganeka shike shi na sha novadiinini?
3 Jesaja naye okwa popya kombinga yomilaulu odo tadi hepeke ovanhu. (Jesaja 8:22; 59:9) Ndelenee mokutala kefimbo letu, okwa nwefwa mo a xunganeke kutya nokuli nomefimbo eli lomilaulu, Jehova ota ka yelifa etaleko laavo ve hole ouyelele. Heeno, nonande Paulus naJesaja kave po kunena, otu na omishangwa davo da nwefwa mo oku tu wilika. Okumona kutya eshi oshi li enangeko noupuna li fike peni kwaavo ve hole Jehova, natu konakone eendjovo dopaxunganeko daJesaja odo di li metukulwa eti-60 lembo laye.
Omukainhu wopaxunganeko ta yandje ouyelele
4, 5. (a) Jehova okwa lombwela omukainhu a ninge shike, nokwa ninga eudaneko lilipi? (b) Ouyelele utunhula ulipi u li muJesaja etukulwa eti-60?
4 Eendjovo dotete daJesaja 60 oda lombwelwa omukainhu e li monghalo inyikifa oluhodi unene—a nangala e lifidimika medu momilaulu. Ombadilila, ouyelele owa twa omilaulu, opo nee Jehova okwa ingida ta ti: “[Omukainhu,] fikama, [yandja ouyelele], osheshi ouyelele woye tau uya noshinge shOmwene tashi ku tendele.” (Jesaja 60:1, yelekanifa NW.) Efimbo lomukainhu ola fika a fikame noku ulike ouyelele waKalunga, oshinge shaye. Omolwashike? Ohatu hange enyamukulo movelishe tai shikula: “Tala, omilaulu otadi tuvikile edu, nomulaulu woilemo oiwana, ndelenee kombada yoye Omwene ota ka vilimina ko, noshinge shaye tashi ka monika kombada yoye.” (Jesaja 60:2) Omukainhu okwa shilipalekwa kutya ota ka mona oshidjemo shiwa unene ngeenge okwa dulika kelombwelo laJehova. Jehova ota ti: “Oiwana otai ka ya kouyelele woye neehamba okeenhevilimo doye.”—Jesaja 60:3.
5 Eendjovo odo ditunhula di li meevelishe odo nhatu odi li etwalemo nosho yo ekwatelokumwe laasho shi li metukulwa laJesaja eti-60. Otali xunganeke oimoniwa yomukainhu wopaxunganeko notali yelifa nghee hatu dulu okukala mouyelele waJehova nonande ope na omilaulu odo da tuvikila ovanhu. Ndelenee, mbela omadidiliko oo e li meevelishe odo nhatu dopetameko letukulwa eli otaa faneke shike?
6. Omukainhu olyelye oo a tumbulwa muJesaja etukulwa eti-60, noolyelye ve mu lile po kombada yedu?
6 Omukainhu oo a tumbulwa muJesaja 60:1-3, oSion, ehangano laJehova lomeulu loishitwa yopamhepo. Kunena, Sion kombada yedu oku lilwe po koixupe “yaIsrael yaKalunga,” eongalo lopaiwana lOvakriste va vaekwa nomhepo, ovo ve na eteelelo loku ka pangela pamwe naKristus meulu. (Ovagalati 6:16) Xuuninwa oshiwana eshi shopamhepo otashi kala shi na oilyo 144 000, ndelenee kunena ewanifo laJesaja etukulwa eti-60 otali yukifwa kwaavo ve li kombada yedu pefimbo ‘lomafiku axuuninwa.’ (2 Timoteus 3:1; Ehololo 14:1) Exunganeko otali popi yo shihapu kombinga yoovakwao vOvakriste ava ovavaekwa, “ongudu inene” ‘yeedi dimwe.’—Ehololo 7:9; Johannes 10:16, OB-1986.
7. Onghalo yaSion oya li ngahelipi mo 1918, naashi osha xunganekwa ngahelipi?
7 Mbela opa li efimbo olo “Israel yaKalunga” a li a nangala momilaulu, ngaashi sha fanekwa komukainhu oo wopaxunganeko? Heeno, eshi osha ningwa omido di dule po 80 da pita. Pefimbo loita yotete younyuni, Ovakriste ovavaekwa ova kondja noudiinini opo oilonga yokuyandja oundombwedi i kale tai twikile. Ndelenee mo 1918, omudo waxuuninwa woita oyo, oilonga yokuudifa ya unganekwa konyala hanga i xulifwe po. Joseph F. Rutherford, oo a li ta pashukile oilonga yokuudifa mounyuni aushe nosho yo Ovakriste ovakwatelikomesho vakwao ova li va tokolelwa okukala modolongo efimbo lile omolwokulundilwa. Membo lEhololo, Ovakriste ovavaekwa kombada yedu pefimbo olo ova li va hokololwa paxunganeko ve li oimhu, ya nangala “momapandavanda oshilando shinene sha ifanwa pamhepo Sodom naEgipti.” (Ehololo 11:8) Eli ola li shili efimbo lomilaulu kuSion, oo e lilwe po kovana vaye ovavaekwa kombada yedu!
8. Elunduluko linene lilipi la ningwa mo 1919, noshidjemo osha li shike?
8 Ndelenee, momudo 1919 omwa ningwa elunduluko linene. Jehova okwa minikila Sion. Ovaxupipo vaIsrael yaKalunga ova fikama opo va ulike ouyelele waKalunga nova twikila vali okuudifa onghundana iwa youhamba ve he na oumbada. (Mateus 5:14-16) Omolwouladi vali mupe wOvakriste ava, ovanhu vamwe ova li va nanenwa kouyelele waJehova. Shotete, ovo vape ova li va vaekwa va kale oilyo ya wedwa po yaIsrael yaKalunga. Ova ifanwa eehamba muJesaja 60:3, molwaashi otava ka ninga ovafyuululi pamwe naKristus mOuhamba waKalunga womeulu. (Ehololo 20:6) Konima yefimbo, ongudu inene yeedi dimwe oya tameka okunanenwa kouyelele waJehova. Ava ovo “oiwana” oyo ya tumbulwa mexunganeko.
Ovana vomukainhu tava alukile keumbo!
9, 10. (a) Oshike osho shikonekwedi sha monika komukainhu, naashi otashi faneke shike? (b) Sion okwa kala e na etomheno lilipi lokuhafa?
9 Paife, Jehova ota tameke okuyandja ouyelele muhapu kwaasho sha yandjwa muJesaja 60:1-3. Ota yandje elombwelo likwao komukainhu. Pwilikina kwaasho ta ti: “Yelula omesho oye keembinga neembinga, u tale.” Omukainhu okwa dulika, noina mona tuu osho sha hafifa omutima waye! Ovana vaye tava alukile keumbo! Omushangwa otau twikile tau ti: “Aveshe ova ongala, ovamwoye ovamati tava di kokule novamwoye oukadona tava humbatwa.” (Jesaja 60:4) Eudifo lOuhamba mounyuni aushe olo la tameka mo 1919 ola shilila omayovi ovanhu vape koilonga yaJehova. Naava ova ninga yo ‘ovanamati novanakadona’ vaSion, oilyo ya vaekwa yaIsrael yaKalunga. Kungaha, Jehova okwa wapeka Sion mokweeta oilyo yaxuuninwa yo 144 000 kouyelele.
10 Mbela oto dulu okudiladila kehafo laSion mokukala e li novana vaye? Ndelenee Jehova okwa pa Sion omatomheno makwao okuhafa. Ohatu lesha taku ti: “Opo nee oto ke shi mona nokuyela moshipala molwehafo nomutima woye otau nuka pombada wa mbwalangadja, osheshi oupuna wefuta otau uya kuove nomamona oiwana taa amekwa kuove.” (Jesaja 60:5) Metwokumwe neendjovo odo dopaxunganeko, okudja mo 1930 nasha, eemhunga dOvakriste ovo ve na eteelelo lokukala fiyo alushe kombada yedu oda mbobolokela kuSion. Ova dja ‘mefuta’ lovanhu ve liteeka Kalunga nove lile po omamona oiwana. Ove li “omamona oiwana aishe.” (Haggai 2:7; Jesaja 57:20) Didilika yo kutya “omamona” aa ihaa longele Jehova meenghedi davo odo va hala. Ahowe, ohaa weda kewapalo laSion mokulongela Kalunga moukumwe novamwaxe ovavaekwa, nokuninga “oshiunda shimwe” navo koshi ‘yomufita umwe.’—Johannes 10:16.
Ovashingifi novafita voimuna tave uya kuSion
11, 12. Hokolola eemhunga odo da monika da yuka kuSion.
11 Oshidjemo shexunganeko eli leongelo osho ehapupalo la tongomana lomuvalu wovahambeleli Jehova. Eshi osha xunganekwa meendjovo dexunganeko tadi shikula. Natu tye nee ngeno owa fikama pamwe nomukainhu wopaxunganeko komhunda yaSion. Eshi to tale koushilo, oshike u wete? “[Oyeendo] yeengamelo otai ku tuvikile, eengamelo deenyasha domuMidian nodomuEfa, adishe otadi uya po, tadi di kuSaba, ndele vo otava eta oshingoldo noitwimino, ndee tava hepaulula nehafo oilonga yOmwene yetumbalo.” (Jesaja 60:6) Eemhunga dovashingifi otadi yukifa oyeendo yado yeengamelo meendjila odo da yuka kuJerusalem. Doshili, eengamelo oda fa omeva eyelu a tuvikila edu! Ovashingifi otava eta omaano e na ondilo, “oshingoldo noitwimino.” Novashingifi ava ove uya kouyelele waKalunga opo ve mu tange moipafi, ‘va hepaulule oilonga yOmwene yetumbalo.’
12 Ovashingifi havo aveke ve li molweendo. Ovafita voimuna navo otava mbobolokele kuSion. Exunganeko otali twikile tali ti: “Oiunda aishe yOvakedari otai ongala puove, eemhedi deedi daNebajot tadi [ke ku longela, NW].” (Jesaja 60:7a) Omihoko dovafita voimuna otadi uya koshilando shiyapuki di yandje kuJehova osho sha denga mbada shomomaufita ado. Ode liyandja nokuli do vene di longele Sion. Jehova okwa tambula ngahelipi ovanailongo ava? Kalunga ota nyamukula ta ti: “Tadi londo koaltari yange tadi ningi omayambo a wapala, ndele Ame handi ka vilimifa ongulu yange yoshinge.” (Jesaja 60:7b) Jehova okwa tambula ko nehafo omayambo nosho yo oilonga yovanailongo ava. Okukala po kwavo otaku wapeke otembeli yaye.
13, 14. Oshike sha monika tashi di kouninginino?
13 Paife keuka ndele to tale nawa kombinga yokouninginino aushe. Oshike u wete ko? Kokule lela oku na osho tashi monika sha fa oilemo itoka ye lihanena kombada yefuta. Jehova ota pula epulo olo li li momadiladilo oye ta ti: “Oolyelye ovo tave uya, tava tuka ngaashi oshilemo nongaashi eenghuti [tadi uya koihadi yado, OB-1986]?” (Jesaja 60:8) Jehova ota nyamukula epulo laye ta ti: “Eenhunhu domefuta tadi teelele nge nomawato aTarsis a kwatela komesho a ete ovamwoye vokokule; tave uya noshisilveri noshingoldo shavo tave shi etele edina lOmwene Kalunga koye nomolwOmuyapuki waIsrael, osheshi Oye e ku [wapeka, NW].”—Jesaja 60:9.
14 Mbela oto dulu okukala wa fa u wete oinima oyo pafaneko? Oilemo oyo itoka oya ehena popepi nopaife otai monika ya fa oipandi yeenhongo i li kokule kouninginino. Otai monika ya fa ouyangwa woudila tava kaulula komakufikufi. Ndelenee eshi tai ehene natango popepi, oto mono kutya mboli eeshikepa neefaila dado da xwatununwa mo opo di kwate omhepo. Eeshikepa odo da finda kuJerusalem odihapu neenghono nomolwaasho otadi monika da fa ouyangwa weenghuti. Oyeendo yeeshikepa oyo tai di komatulilo eeshikepa okokule notai tondokele konhapo yopombada, tai twala ovaitaveli kuJerusalem va ka longele Jehova.
Ehangano laJehova tali tamunuka mo
15. (a) Eendjovo daJesaja 60:4-9, oda xunganeka ehapupalo lilipi? (b) Ovakriste vashili ohava ulike oukwatya ulipi?
15 Efaneko lopaxunganeko olo li li movelishe 4 fiyo 9 inali twa tuu, olo li na sha netamunukemo lomounyuni aushe olo la ningwa okudja 1919! Omolwashike Jehova a nangeka noupuna Sion nehapupalo li fike opo? Omolwaashi okudja mo 1919, Israel yaKalunga okwa dulika noudiinini mokuyandja ouyelele waJehova. Ndele mbela owa didilika tuu kutya pavelishe 7, ovauyemo vape “ova londa koaltari” yaKalunga? Koaltari ohaku yambelwa omayambo, onghee hano oshitukulwa eshi shexunganeko otashi tu dimbulukifa kutya oilonga yaJehova oya kwatela mo omayambo. Omuyapostoli Paulus okwa shanga ta ti: “Ohandi mu [kumaida], yandjeni omalutu eni eyambo liyapuki li nomwenyo, la wapalela Kalunga; olo [oilonga iyapuki neenghono deni dokudiladila, NW].” (Ovaroma 12:1) Metwokumwe neendjovo daPaulus, Ovakriste vashili inava wanenwa ashike kokukala hava i kelongelokalunga lumwe moshivike. Ohava longifa efimbo lavo, eenghono davo nosho yo oiniwe yavo okuxumifa komesho elongelokalunga la koshoka. Mbela okukala po kwovalongeli vaJehova ava ve liyandja itaku wapeke ongulu yaye? Exunganeko laJesaja ola ti kutya osho taku ka ninga. Nohatu dulu okukala noushili kutya ovalongelikalunga ava ovaladi ova wapala yo momesho aJehova.
16. Oolyelye va yambidida oilonga yokutungulula mefimbo lonale, noolyelye ve shi ninga mefimbo lonena?
16 Ovauyemo vape ova hala okulonga. Exunganeko otali twikile tali ti: “Novanailongo otava tungulula omakumahote oye, neehamba davo otadi ke ku longela.” (Jesaja 60:10) Mewanifo lotete leendjovo edi momafiku enya eshi ovaaluki va aluka moukwatwa wOvababilon, eehamba nosho yo vamwe va dja koiwana ova kwafela shili mokutungulula otembeli nosho yo oshilando shaJerusalem. (Esra 3:7; Nehemia 3:26) Mewanifo lopefimbo lonena, ongudu inene oya yambidida oshixupe shovavaekwa mokutunga eilikano lashili. Ova kwafela okutunga omaongalo opaKriste, nokungaha ova pameka “omakumahote” ehangano laJehova la fa oshilando. Ova kufa yo ombinga moilonga yokutunga kwolelalela—okutunga Omalupale Ouhamba, Omalupale Oyoongalele nosho yo omatungo aBetel. Meenghedi adishe edi, ohava yambidida ovamwaxe ovavaekwa mokufiloshisho eemhumbwe dehangano laJehova tali tamunuka mo.
17. Onghedi imwe oilipi oyo Jehova ta wapeke nayo oshiwana shaye?
17 Eendjovo daxuuninwa daJesaja 60:10 kadi fi tuu etwomukumo! Jehova okwa ti: “Nomokuhanduka kwange onde ku denga, ndele mokuhokwa kwange onde ku fila onghenda.” Heeno, mo 1918 fiyo omo 1919, Jehova okwa yandja outekuduliko koshiwana shaye. Ndele osho osha pita. Paife olo efimbo laJehova lokuulikila ovapiya vaye ovavaekwa nosho yo oovakwao veedi dimwe onghenda. Euliko kutya eshi osho shi li ngaho olo ehapupalo likumwifa olo e va nangeka nalo noupuna, sha fa e ‘va wapeka.’
18, 19. (a) Jehova okwa ninga eudaneko lilipi li na sha naavo vape tave uya mehangano laye? (b) Eevelishe odo da xupa ko daJesaja etukulwa eti-60 otadi tu lombwele shike?
18 Omudo keshe, omayovi omafele ‘ovanailongo’ otaa endafana nehangano laJehova, nomhito opo i li natango kwaavo va hala oku va landula. Jehova ota lombwele Sion ta ti: “Oivelo yoye otai kala alushe ya yeululwa, omutenya noufiku itai idilwa po, opo u etelwe oupuna woiwana, neehamba davo tadi uya kuove tadi findikilwa.” (Jesaja 60:11) Ovapataneki vamwe otava kendabala okwiidila “oivelo” oyo ndele otu shi shii kutya itava dulu okupondola. Jehova okwa popya ta ti kutya nee otashi pula shike, oivelo oyo otai ka kala ya yeuluka. Ehapupalo otali ka twikila.
19 Ope na natango eenghedi dimwe omo Jehova a nangeka noupuna oshiwana shaye, te shi ningi shi kale sha wapala momafiku aa axuuninwa. Eevelishe odo da xupa ko dexunganeko laJesaja 60 otadi holola kutya eenghedi odo odilipi.
[Efano pepandja 20]
“Omukainhu” waJehova okwa lombwelwa a fikame
[Efano pepandja 22]
Oyeendo yeeshikepa otai monika ya fa eenghuti di li komungenge weulu
[Efano pepandja 23]
Oto dulu okuyelifa?
• Olyelye “omukainhu” waKalunga, noolyelye ve mu lile po kombada yedu?
• Onaini ovana vaSion va li va nangala ve lifidimika, nonaini nongahelipi va “fikama” po?
• Mokulongifa omadidiliko e lili noku lili, ongahelipi Jehova a xunganeka ehapupalo lonena lovaudifi vOuhamba?
• Omeenghedi dilipi Jehova a ningifa ouyelele waye u minikile oshiwana shaye?