Etukulwa etihetatu
‘Ekondjo okukondjifa eemhepo dowii’
1. Omolwashike tu na ohokwe okushiiva shihapu shi na sha noilonga yeemhepo dowii?
OVANHU vahapu ohava dini ediladilo olo kutya oku na eemhepo dowii. Ndele osho kashi fi oshinima shokudinika. Kutya nee ovanhu ove shi itavela ile hasho, eemhepo dowii oko di li, notadi kendabala okufininika keshe umwe. Ovalongeli vaJehova navo ohava fininikwa kudo. Doshili, ovo unene tuu ve li oishonekwa. Omuyapostoli Paulus okwe tu londwela shi na sha noushili oo, a ti: “Ekondjo letu kali fi okukondjifa ombelela nohonde, ndelenee otu nokulwifa oovene novanaenghono, novapangeli vounyuni ou womilaulu [ihava monika], neemhepo dowii [mevalelwa].” (Ovaefeso 6:12) Momafiku etu omafininiko oo taa etwa keemhepo dowii okwa hanga oshitwa shopombada inashi monika nande onale molwaashi Satana okwa umbwa mo meulu nokwa handuka, e shi shii kutya oku na ko efimbo lixupi.—Ehololo 12:12.
2. Otashi shiiva ngahelipi kufye okupondola mokulwifa eemhepo di na eenghono di dule dovanhu?
2 Mbela otashi shiiva ngoo okupondola mokulwifa eemhepo di na eenghono di dule dovanhu? Heeno, ndele omokulineekela ashike filufilu muJehova. Otu na okupwilikina kuye nokudulika kEendjovo daye. Mokuninga ngaho, ohatu dulu okuhenuka enyonauko linene lopalutu, lopaenghedi nolopamaliudo olo hali hange ovo ve li koshi yepangelo laSatana.—Jakob 4:7.
Ovapangeli vounyuni ve li mevalelwa
3. Satana ota pataneke nonyanya oolyelye, nongahelipi?
3 Jehova ote tu hokololele sha yela nawa shi na sha nonghalo younyuni ngaashi e i wete pataleko laye okudja meulu. Okwa pa omuyapostoli Johannes emoniko omo Satana ta hokololwa e li “ongadu inene [itilyana] ya fa omundilo.” Okwa li e lilongekida okuxwaka po ngeno okwa li ta shiva Ouhamba waKalunga wopaMessias diva eshi wa dikwa po meulu mo 1914. Molwaashi okwa dopa oku shi ninga, Satana okwa etifa omapataneko onyanya mahapu okukondjifa ovakalelipo vOuhamba oo vokombada yedu. (Ehololo 12:3, 4, 13, 17) Mbela Satana ota lu ngahelipi oita oyo? Okupitila movakalelipo vaye vopanhu.
4. Olyelye e li odjo yeenghono domapangelo opanhu, naasho otu shi shii ngahelipi?
4 Konima yaasho, Johannes okwa li a ulikilwa oshilyani shi na omitwe heyali neembinga omulongo, shi na eenghonopangelo “kombada yoludi noyepata noyelaka noyoshiwana keshe.” Oshilyani osho otashi faneke onghalelo aishe yopapolotika mounyuni aushe. Johannes okwa li a shiivifilwa kutya “ongadu [Satana Ondiaboli] oye shi pa eenghono dayo nolukalwapangelo layo nepangelonghono linene.” (Ehololo 13:1, 2, 7) Heeno, Satana oye odjo yeenghono noyeenghonopangelo domapangelo opanhu. Kungaha, ngaashi omuyapostoli Paulus a shanga, ‘ovapangeli vounyuni’ volela ovo ‘eemhepo dowii mevalelwa,’ odo tadi wilike omapangelo opanhu. Aveshe ovo va hala okulongela Jehova ova pumbwa okuuda ko filufilu eityo lasho.—Lukas 4:5, 6.
5. Ovapangeli vopapolitika otava ongalekwa peni paife?
5 Nonande ovapangeli vahapu vopapolitika otave liti kutya ovo ovalongelikalunga, kape na nande oshimwe shomoiwana osho she liyandja kepangelo laJehova ile kwaalo lOhamba yaye ya nangekwa po, Jesus Kristus. Aveshe otava kondjo va mana mo opo va kaleke po eenghono davo. Kunena, ngaashi ehokololo lEhololo tali ulike, “eemhepo deendemoni” otadi ongaleke ovapangeli vounyuni ‘koita mefiku linene laKalunga omunamapangelo aeshe’ puHarmagedon.—Ehololo 16:13, 14, 16; 19:17-19.
6. Omolwashike twa pumbwa okukala twa lungama opo tu henuke okuhekwa tu yambidide onghalelo yaSatana?
6 Efiku keshe, okukalamwenyo kwovanhu okwa kumwa komalipumomumwe opapolitika, opanghalafano, opamaxupilo nosho yo opamalongelokalunga oo taa tukaula ovanhu. Momalipumomumwe oo, luhapu ovanhu ohava ame ombinga yonhumba—paendjovo ile pailonga—koshiwana shavo, komuhoko wavo, kelaka lavo ile komufika wavo wopanghalafano. Nokuli nongeenge ovanhu itava kufa ombinga sha yukilila momalipumomumwe onhumba, ohava kala luhapu va panda ombinga imwe ponhele yaimwe. Ndele kashi na nee mbudi kutya otava yambidida lyelye ile oshinima shilipi, mbela otava yambidida lelalela lyelye? Ombibeli otai yelifa nawa tai ti: ‘Ounyuni aushe ou li mepangelo lomunawii.’ (1 Johannes 5:19) Hano, ongahelipi omunhu ta dulu okuhenuka okupukifwa pamwe novanhu aveshe? Omokuyambidida ashike filufilu Ouhamba waKalunga auke nokudiinina okuhenombinga nandenande momalipumomumwe ounyuni.—Johannes 17:15, 16.
Oinheya yOmunawii
7. Ongahelipi oinheya yaSatana ya ulikwa mokulongifa kwaye omalongelokalunga oipupulu?
7 Momafimbo aeshe ondjokonona, Satana okwa longifa omahepeko opaendjovo noopalutu opo a amune ko oohandimwe kelongelokalunga lashili. Okwa longifa yo eenghedi dihapu domakoto. Okwa tula yo ovanhu vahapu painheya momilaulu okupitila momalongelokalunga oipupulu, te va diladilifa kutya otava longele Kalunga. Omolwoku he na eshiivo lashili lokushiiva Kalunga nosho yo oku he na ohole yokuhola oshili, otava dulu okunanwa komalongelokalunga e na ko nasha noumhulile notaa pendula omaliudo ile va kumwifwe koilonga yeenghono. (2 Ovatessaloniki 2:9, 10) Ndele otwa londwelwa kutya nokuli nomokati kaavo va li hava kufa ombinga melongelokalunga lashili, “vamwe otave liteeka . . . ndee tava ka shikula eemhepo dipukifi nomalongo eendemoni.” (1 Timoteus 4:1) Osho otashi dulu okuningwa ngahelipi?
8. Ongahelipi Satana ta dulu oku tu kokela momalongelokalunga oipupulu nokuli nonande ohatu longele Jehova?
8 Ondiaboli ohai tu kondjifa noinheya okupitila momaunghundi etu. Mbela otu na natango oumbada wokutila ovanhu? Ngeenge osho, otashi dulika tu liyandje komafininiko ovapambele ile ovashiinda tu kufe ombinga moilonga ye likolelela komalongelokalunga oipupulu. Mbela otu na ounhwa? Ngeenge osho, otashi dulika tu kwatele umwe onghone ngeenge okwe tu pukulula ile ngeenge vamwe itava tambula ko omadiladilo oo hatu popile. (Omayeletumbulo 15:10; 29:25; 1 Timoteus 6:3, 4) Ponhele yokulundulula omataleko etu a twe kumwe noshihopaenenwa shaKristus, otashi dulika tu kale twa hala okupwilikina kwaao ‘taa nyuwifa omatwi etu,’ mokutya kutya osha wana ashike okulesha Ombibeli nokukala nonghalamwenyo iwa. (2 Timoteus 4:3) Kutya nee otwa i melongelokalunga limwe ile otwa kala mwaalo letu osho hasho sha fimana kuSatana; ye okwa hala ashike tu kale itatu longele Jehova monghedi oyo a popya okupitila mEendjovo daye nosho yo mehangano laye.
9. Ongahelipi Satana ta longifa pamakoto omahalo opaushitwe e na sha nomilele opo a wanife po omalalakano aye?
9 Satana ota koko yo ovanhu nomakoto opo va hafife omahalo avo opaushitwe meenghedi da puka. Osho okwe shi ninga shi na sha nomahalo opamilele. Omolwokweekelashi oukoshoki wopaenghedi wopaMbibeli, vahapu mounyuni ohava tale ko enangalafano pokati kovanhu inava hombolafana li li elihafifo la tambulwa ko ile li li onghedi yokuulika kutya ova kula. Ndele ongahelipi shi na sha naavo va hombola ile va hombolwa? Vahapu ohava nyono ohombo. Nokuli nonande kape na oo a ya momilele kondje yohombo, oohandimwe vahapu ohava hengafana ile va topoke opo va dule okukala naumwe e lili. Omakoto aSatana okwa nunwa okunwefa mo ovanhu va kale tave lihafifa paife, tae va nwefa mo ve lipwililikile oilanduliko oyo tai ke uya konima yefimbo, oyo itai ke va kuma ovo aveke ile vamwe, ndele otai kumu unene tuu ekwatafano lavo naJehova nosho yo nOmona waye.—1 Ovakorinto 6:9, 10; Ovagalati 6:7, 8.
10. Omokupitila mushike Satana ta kendabala okunyona po oikala yetu i na sha nanghee hatu tale ko oluhaelo nelongifo leenghono?
10 Omahalo amwe opaushitwe oo omalihafifo. Ngeenge omawa, otaa dulu okupepaleka ovanhu palutu, pamadiladilo nopamaliudo. Ndele mbela ohatu linyenge ngahelipi ngeenge Satana ta longifa noinheya omafimbo okulihafifa ta kendabala okwaamuna ko omadiladilo etu kwaao aKalunga? Pashihopaenenwa, otu shi shii kutya Jehova oku tonde oluhaelo nosho yo elongifo leenghono. Ngeenge eekino, eeprograma doTV ile omauliko opeenhele domaudano tai ulike oinima oyo, mbela ohatu kala ashike omutumba ndele hatu twikile okutala? Dimbuluka yo kutya Satana ota ka kwashilipaleka opo oinima oyo i kale ya shunduka unene eshi efimbo lokutulwa kwaye mombwili tali ehene popepi, molwaashi “ovanhu [vai] novakengeleledi otava ka ehena komesho mowii nokupukifa nokupuka.” (2 Timoteus 3:13; Ehololo 20:1-3) Onghee hano, otwa pumbwa alushe okulungamena omakonda aSatana.—Genesis 6:13; Epsalme 11:5; Ovaroma 1:24-32.
11. Omeenghedi dilipi omunhu oo e shii oshili i na sha noumhulile naye ta dulu okuyulwa ngeenge ina lungama?
11 Otu shi shii yo kutya ovo have liefele moludi keshe loumhulile—tava kufa ombinga menyanekelo, tava longifa oulodi ile tava kendabala okupopya novafi—ovanyanyalifi koshipala shaJehova. (Deuteronomion 18:10-12) Okudimbuluka osho, itatu ka diladila okuya kovapopi neemhepo dovafi noitatu ke va efela nandenande momaumbo etu opo va longe oilonga yavo youndemoni. Ndele mbela ohatu ka pwilikina kuvo ngeenge ove uya koTV yetu ile koInternet? Nonande itatu ka tambula ko nande ouhaku weendudu, mbela ohatu ka manga okangodi poshikesho shokaana ketu opo ka dalwa, hatu diladila kutya otake ke ka amena kowii? Molwaashi otu shii kutya Ombibeli otai tokola okulowa vamwe, mbela ohatu ka konga oimbodi keendudu?—Ovagalati 5:19-21.
12. (a) Ongahelipi eemusika hadi longifwa di tu diladilife shi na sha nomadiladilo oo tu shii kutya okwa puka? (b) Ongahelipi omidjalo domunhu, omushingo weexwiki daye ile onghedi yaye yokupopya tai dulu okuulika kutya okwa hokwa onghedi yokukalamwenyo yaavo inai hokiwa kuJehova? (c) Oshike twa pumbwa okuninga ngeenge otwa hala okuhenuka okuninga oihakanwa yoinheya yaSatana?
12 Ombibeli otai ti kutya oluhaelo nedilo keshe kai na nande okutumbulwa (nomalinyengotomheno a nyata) mokati ketu. (Ovaefeso 5:3-5) Ndele ongahelipi ngeenge oinima ya tya ngaho otai tumbulwa momusika oyo i na ongovela ihafifa, omukwelengedjo tau hokwifa ile omutono tau twaalele? Mbela ohatu ka tameka okweendulula eendjovo odo tadi tange omilele nope he na ohombo, elongifo loingangamifi omolwokulihafifa nosho yo oilonga ikwao youlunde? Ile nonande otu shi shii kutya katu na okuhopaenena onghedi yokukalamwenyo yovanhu ovo hava kufa ombinga moinima oyo, mbela ohatu kala twa hala okumonika twe va fa, mokuhopaenena onghedi oyo hava djala, omushingo weexwiki davo ile onghedi oyo hava popi? Satana ita longifa tuu eenghedi domakoto okukoka ovanhu va twe kumwe nonghedi yaye yokudiladila ya nyonauka! (2 Ovakorinto 4:3, 4) Opo tu ha ninge oihakanwa yoinheya yaye, otu na okuhenuka okutwaalelwa kounyuni. Otu na okudimbuluka kutya oolyelye ve li ‘ovapangeli vounyuni ou womilaulu,’ ndele hatu kondjifa neenghono enwefemo lavo.—Ovaefeso 6:12; 1 Petrus 5:8.
Otwa longekidwa tu findane
13. Otashi shiiva ngahelipi kukeshe umwe womufye a finde ounyuni oo tau pangelwa kuSatana, nonande inatu wanenena?
13 Fimbo Jesus ina fya, okwa lombwela ovayapostoli vaye a ti: “Kaleni [mwa nyatipala, NW], Ame onda finda ounyuni.” (Johannes 16:33) Navo ova li tava dulu okukala ovafindani. Omido 60 lwaapo konima yaasho, omuyapostoli Johannes okwa shanga a ti: “Olyelye ou ta findi ounyuni, ngenge e he fi ou ta itavele Jesus Oye Omona waKalunga?” (1 Johannes 5:5) Eitavelo la tya ngaho ohali ulikwa mokudulika kwetu koipango yaJesus nokulineekela Eendjovo daKalunga, ngaashi Jesus a ninga. Oshike vali sha pumbiwa? Otu na yo okukala popepi neongalo olo e li Omutwe walo. Ngeenge twa nyona, otu na okulivela ombedi shili ndele hatu kongo ediminepo laKalunga she likolelela keyambo laJesus. Monghedi oyo, nonande inatu wanenena notu na omaunghundi, nafye ohatu dulu okukala ovafindani.—Epsalme 130:3, 4.
14. Lesha Ovaefeso 6:13-17, ndele to longifa omapulo nomishangwa odo da yandjwa mokatendo aka di li ekanghameno lokukundafana omauwa okudja moshilwifo keshe shopamhepo.
14 Opo tu pondole, otwa pumbwa okudjala “oilwifo aishe yaKalunga,” tu ha efe po nande oshimwe shomuyo. Pandja Ombibeli yoye kOvaefeso 6:13-17, ndele to lesha ehokololo li na sha noilwifo oyo. Opo nee, mokunyamukula omapulo oo taa landula, diladila nghee to dulu okumona ouwa meameno olo hali yandjwa koludi keshe loshilwifo.
‘Oiya ya mangwa noshili’
Nonande otu shii oshili, ongahelipi ekonakono nokudilonga oshili yOmbibeli pandjikilile nosho yo okukala pokwoongala tai tu amene? (1 Ovakorinto 10:12, 13; 2 Ovakorinto 13:5; Ovafilippi 4:8, 9)
‘Djaleni ponhulo oipapa yoivela youyuki’
Omufikamhango wouyuki oo owalyelye? (Ehololo 15:3)
Yelifa nghee okudopa okulandula eendjila daJehova douyuki taku ningifa umwe a yahamekwe pamhepo. (Deuteronomion 7:3, 4; 1 Samuel 15:22, 23)
‘Evangeli lombili li ninge eenghaku keemhadi deni’
Ongahelipi tashi tu amene okukala hatu longifa luhapu eemhadi detu di tu twale tu ka popye novanhu shi na sha nomafiloshisho aKalunga e na sha nombili? (Epsalme 73:2, 3; Ovaroma 10:15; 1 Timoteus 5:13)
‘Oshikelelifo sheitavelo’
Ngeenge otu na eitavelo olo la pamenena, ongahelipi hatu ke linyenga ngeenge hatu shakeneke eenghendabala odo tadi tu ningifa tu kale nomalimbililo ile twa tila? (2 Eehamba 6:15-17; 2 Timoteus 1:12)
‘Embale loshivela lexupifo’
Ongahelipi eteelelo lexupifo tali kwafele omunhu a henuke okukwatwa koshisho sha pitilila shi na sha nomaliko? (1 Timoteus 6:7-10, 19)
‘Eongamukonda lomhepo’
Otu na alushe okulineekela shike ngeenge hatu lwifa omaponokelo oo taa ponokele oupamhepo wetu ile wavakwetu? (Epsalme 119:98; Omayeletumbulo 3:5, 6; Mateus 4:3, 4)
Oshike vali sha fimanenena opo tu pondole moita yopamhepo? Oshi na okuningwa lungapi? Oshi na okuningilwa oolyelye? (Ovaefeso 6:18, 19)
15. Ongahelipi hatu dulu okukatuka eenghatu da mana mo moita yopamhepo?
15 Tu li ovakwaita vaKristus, otu li oshitukulwa shetanga linene lovakwaita olo tali kufa ombinga moita yopamhepo. Ngeenge ohatu twikile okukala oupafi nokulongifa nawa oilwifo aishe ya dja kuKalunga, itatu ka fila mo moita oyo. Ponhele yaasho, ohatu ka kala ekwafo tali pameke kovapiya vakwetu vaKalunga. Ohatu ka kala twe lilongekida notwa hala okukatuka eenghatu da mana mo mokutandavelifa onghundana iwa yOuhamba waKalunga wopaMessias, epangelo lomeulu olo Satana ta pataneke nonyanya.
Eenghundafana dokweendulula
• Omolwashike ovalongeli vaJehova hava diinine okuhenombinga filufilu momalipumomumwe ounyuni?
• Oinheya imwe ilipi Satana ta longifa okuhanauna po oupamhepo wOvakriste?
• Ongahelipi oilwifo yopamhepo oyo ya yandjwa kuKalunga tai tu amene moita yetu yopamhepo?
[Omafano e li pepandja 76]
Oiwana otai ongelwa omolwaHarmagedon