“MU SHITUKE VAPE MOMHEPO YOMADILADILO ENI”

7. Ongahelipi hatu dulu okulundulula omadiladilo etu?

⁷ Mbela otashi shiiva ngoo tu shituke vape momadiladilo etu? Eendjovo daKalunga oda ti: “Mu shituke vape momhepo yomadiladilo eni, ndele nye mu djale omunhu mupe a shitwa a fa Kalunga omouyuki nomouyapuki woshili.” (Ef. 4:23, 24) Heeno, otashi shiiva okulunduluka momadiladilo, ndele kashi pu okuninga ngaho. Otwa pumbwa okuninga shihapu shihe fi ashike okukondjifa omahalo neenghatu da puka. Otwa pumbwa okulundulula ‘omhepo yomomadiladilo’ etu. Osho osha kwatela mo omahalo etu, eamo letu nosho yo omauko etu. Naasho otashi pula eenghendabala tadi twikile.

8-9. Oshihopaenenwa shomumwatate umwe osha divilika ngahelipi omhumbwe yokulundulula omadiladilo etu?

⁸ Natu ka konakoneni oshihopaenenwa shomumwatate umwe oo a li e hole elongifo leenghono monakudiwa. Konima eshi a efa po okunwa sha pitilila nokulwa, okwa li a ninginifwa naasho osha li sha yandja oundombwedi muwa momudingonoko wavo. Ashike onguloshi imwe, diva ashike konima yeninginifo laye, okwa li a yelekwa monghedi omo ine shi teelela. Peumbo laye opa li pe uya omulumenhu a kolwa nokwa hala oku mu lwifa. Potete omumwatate okwa li ta kondjifa ehalo laye lokulwa. Ndele eshi omulumenhu oo a hovela okusheka edina laJehova, osha li sha handukifa omumwatate neenghono. Okwa li a dja mo meumbo ndele ta lafa omulumenhu oo oupuka. Omolwashike a li a ningila ngaho? Nonande ekonakonombiibeli laye ola li le mu kwafela a kondjife elongifo leenghono, ka li natango a lundulula omadiladilo aye.

⁹ Ashike omumwatate oo ka li a sholola. (Omayel. 24:16) Kekwafo lovakulunhuongalo, okwa li a twikila okuninga exumokomesho. Okwa li a ninga omukulunhuongalo diva. Onguloshi imwe, pondje ashike yOlupale lOuhamba, okwa li a shakeneka vali eyeleko la faafana naalo a shakenekele nale. Omulumenhu a kolwa okwa li a hala okudenga omukulunhuongalo umwe. Omumwatate oo okwa li a ninga po shike? Okwa li a popya nengungumano nomulumenhu oo a kolwa, e mu kwafela a ngungumane noku ye keumbo. Omolwashike omumwatate oo a li e linyenga monghedi i lili pomhito oyo? Omumwatate oo okwa li a lundulula omadiladilo aye. Okwa li a ninga omunhu omunambili nomulininipiki, naasho osha li sha fimanekifa Jehova.

10. Oshike sha kwatelwa mo mokuninga omalunduluko oo?

¹⁰ Omalunduluko oo ihaa ningwa ashike moufiku umwe, noihaa ningwa ashike ngahenya nopehe na okuninga eenghendabala. Otashi dulika twa pumbwa okuninga “eenghendabala da mana mo” oule womido. (2 Pet. 1:5, NW) Itatu ka ninga ashike omalunduluko molwaashi ngeno twa kala “moshili” efimbo lile. Otwa pumbwa okuninga omalunduluko opo tu lundulule omadiladilo etu. Ope na eenghatu dimwe odo tadi ke tu kwafela tu ninge elunduluko la tya ngaho. Natu ka konakoneni dimwe domudo.

NGHEE HATU DULU OKULUNDULULA OMADILADILO ETU

11. Eilikano ohali tu kwafele ngahelipi tu lundulule omadiladilo etu?

¹¹ Eilikano olo onghatu yotete ya fimana. Otwa pumbwa okwiilikana ngaashi omupsalme a ti: “Kalunga, shitile nge omutima wa yela, nomeni lange tula mo omhepo ipe i neenghono.” (Eps. 51:10) Otu na okudimina kutya otwa pumbwa okulundulula omadiladilo etu, nokupula Jehova etu kwafele. Ongahelipi hatu dulu okukala noushili kutya Jehova ote ke tu kwafela tu ninge omalunduluko? Ohatu dulu okutuwa omukumo keudaneko olo Jehova a li a udanekela Ovaisrael ovatangalali, a ti: “Ndele Ame ohandi ke va pa omutima umwe nomhepo ipe meni lavo. . . . Ndele handi va pe omutima wonhumba,” sha hala okutya omutima u na ehalo lokushikula ewiliko laKalunga. (Hes. 11:19) Jehova okwa li a halelela okukwafela Ovaisrael ovo va ninge omalunduluko, nafye okwa halelela oku tu kwafela.

12-13. (a) She likolelela kEpsalme 119:59, oshike osho twa pumbwa okudilonga kusho? (b) Omapulo elipi wa pumbwa okulipula?

¹² Okudilonga oko onghatu onhivali ya fimana. Eshi hatu lesha noukeka Eendjovo daKalunga efiku keshe, otwa pumbwa okukonga omhito tu dilonge, ile tu diladile moule kombinga yaasho twa lesha opo tu mone kutya omadiladilo nomaliudo elipi twa pumbwa okulundulula. (Lesha Epsalme 119:59; Heb. 4:12; Jak. 1:25) Otu na okudidilika omadiladilo nomaliudo oo tashi dulika tu na a nwefwa mo komadiladilo ounyuni ou. Otwa pumbwa okudimina kutya otu na omaunghundi notu na okulonga noudiinini opo tu a finde.

¹³ Pashihopaenenwa, lipula kutya: ‘Mbela ondi na olwisho ile ondubo momutima wange?’ (1 Pet. 2:1) ‘Mbela ohandi kala ndi udite kutya ondi li xwepo ndi dule vamwe omolwonhele opo nda dja, ouhongelwe wange, ile oimaliwa ihapu oyo ndi na?’ (Omayel. 16:5) ‘Mbela onda dina ovanhu ovo vehe na oinima ngaashi oyo ndi na ile ovo va dja meputuko la yooloka ko kulange?’ (Jak. 2:2-4) ‘Mbela ondi hole oinima oyo i li mounyuni waSatana?’ (Joh. 2:15-17) ‘Mbela ohandi hafele omalihafifo inaa koshoka nokwa kwatela mo elongifo leenghono?’ (Eps. 97:10; 101:3; Amos 5:15) Omanyamukulo komapulo oo otae ke ku kwafela u mone opo wa pumbwa okuninga omalunduluko. Ngeenge otwa findi omadiladilo oo mai, ohatu ka hafifa Tate yetu womeulu. — Eps. 19:14.

14. Omolwashike sha fimana okuhoolola ookaume vawa?

¹⁴ Okuhoolola ookaume vawa oku li onghatu onhinhatu ya fimana. Kutya nee otwe shi didilika ile inatu shi didilika, ovo hatu endafana navo ohave tu nwefa mo neenghono. (Omayel. 13:20) Ngeenge tu li koilonga ile kofikola, ohatu kala novanhu ovo ihave tu kwafele tu diladile monghedi oyo Kalunga a hokwa. Ashike ohatu dulu okumona ookaume vawa meongalo. Meongalo omo ashike hatu dulu okutuwa omukumo “mohole nomoilonga iwa.” — Heb. 10:24, 25.