Oukumwe wopaKriste ohau fimanekifa Kalunga
“Nye mu hale shili okudiinina oukumwe mOmhepo.” — EF. 4:3.
1. Ovakriste vomefelemudo lotete vomuEfeso ova li va fimanekifa Kalunga ngahelipi?
OUKUMWE oo wa li meongalo lopaKriste lomuEfeso shonale owa li wa fimanekifa Kalunga kashili, Jehova. Ovakriste vamwe vomoshilando osho sha li shi na omalandifilo taa ende nawa otashi dulika va li oipuna nove na ovapiya, ofimbo vamwe va li ovapiya notashi dulika va li va hepa neenghono. (Ef. 6:5, 9) Vamwe ova li Ovajuda ovo va li ve lihonga oshili moule weemwedi nhatu odo omuyapostoli Paulus a kala ta udifa moshinagoga shavo. Vamwe vomuvo ova li nale hava longele oshikalunga shedina Artemis nova li hava kufa ombinga moumhulile. (Oil. 19:8, 19, 26) Hano osha yela kutya oukumwe wOvakriste vashili ohau hanganifa ovanhu nonande ove na oudilo wa yoolokafana. Paulus okwa li a didilika kutya oukumwe weongalo olo owa li wa fimanekifa Jehova. Okwa ti: “Oye na fimanekwe meongalo.” — Ef. 3:21.
2. Oshike sha li tashi dulu okunyona po oukumwe wOvakriste vokuEfeso?
2 Opa li oinima imwe oyo ya li tai dulu okunyona po oukumwe weongalo lokuEfeso. Paulus okwa li a londwela ovakulunhuongalo vomeongalo olo a ti: “Munye tamu di yo ovalumenhu tava popi oinima inai yuka, ve lishilile ovalongwa.” (Oil. 20:30) Kakele kaasho, ovamwatate vamwe ova li natango ve na omhepo yetukauko. Paulus okwa li a londwela kombinga yomhepo oyo yetukauko, oyo ‘tai longo movana vokuhadulika.’ — Ef. 2:2; 4:22.
Onhumwafo oyo tai divilike oukumwe
3, 4. Onhumwafo oyo Paulus a li a shangela Ovaefeso oya li ya divilika ngahelipi oukumwe?
3 Paulus okwa li a didilika kutya opo Ovakriste va twikile okukala va hangana, keshe umwe womuvo oku na okuninga eenghendabala da mana mo opo a xumife komesho oukumwe. Kalunga okwa li a nwefa mo Paulus a shangele Ovaefeso onhumwafo oyo ya li tai divilike oukumwe. Pashihopaenenwa, Paulus okwa popya kombinga yelalakano laKalunga a ti kutya Kalunga ‘ota ka kwatakanifa muKristus aishe.’ (Ef. 1:10) Okwa li yo a faafanifa Ovakriste nomamanya e lili noku lili oo a tungifwa etungo. Okwa ti: “Etungo alishe tali kwatafana kumwe ndee tali kulu, tali ningi otembeli iyapuki omOmwene.” (Ef. 2:20, 21) Natango, Paulus okwa li a divilika oukumwe oo wa li mokati kOvajuda nosho yo Ovakriste ovo va dja moiwana imwe nokwa li yo e va dimbulukifa kutya aveshe ova shitwa kuKalunga. Okwa popya kutya Jehova oye ‘Xe oo muye epata keshe meulu nokombada yedu le mu lukilwa.’ — Ef. 3:5, 6, 14, 15.
4 Eshi hatu konakona etukulwa eti-4 lOvaefeso, ohatu ka mona kutya omolwashike twa pumbwa okuninga eenghendabala opo tu kale moukumwe, kutya ongahelipi Jehova he tu kwafele tu kale twa hangana nonokutya oikala ilipi tai tu kwafele tu kale moukumwe. Omolwashike ito lesha etukulwa eti-4 lOvaefeso alishe opo u mone ouwa muhapu eshi to konakona oshitukulwa eshi?
Etomheno molwaashi oukumwe tau pula eenghendabala da mana mo
5. Omolwashike ovaengeli vaKalunga have mu longele moukumwe, ndele omolwashike tashi dulu okukala shidjuu neenghono kufye okukala moukumwe?
5 Paulus okwa li a ladipika ovamwaxe vokuEfeso va ‘diinine oukumwe momhepo.’ (Ef. 4:3) Opo tu ude ko kutya omolwashike twa pumbwa okuninga eenghendabala moshinima osho, natu tale kombinga yovaengeli vaKalunga. Kape na oinima i na omwenyo kombada yedu ya faafana filufilu, onghee hano, ohatu dulu okufika pexulifodiladilo kutya Jehova okwa shita ovaengeli vaye omamiliyona keshe umwe e na omaukwatya aye e likalekelwa. (Dan. 7:10) Ndele nande ongaho, ohava dulu okulongela Jehova moukumwe molwaashi aveshe ohava pwilikine kuye nohava longo ehalo laye. (Lesha Epsalme 103:20, 21.) Ngaashi ashike ovaengeli ovadiinini ve na omaukwatya a yoolokafana, Ovakriste navo ove na omaunghundi a yoolokafana. Osho otashi dulu okukala shidjuu neenghono kovamwatate okukala moukumwe.
6. Omaukwatya elipi tae ke tu kwafela tu kale hatu longele kumwe novamwatate ovo ve na omaunghundi a yooloka ko kwaao etu?
6 Luhapu ngeenge ovanhu inava wanenena tava kendabala okulongela kumwe, ohapa dulu okuholoka omaudjuu. Pashihopaenenwa, ongahelipi ngeenge omumwatate omunambili oo he uya alushe kokwoongala a shelelelwa ota longele Jehova pamwe nomumwatate oo ha fiki alushe pefimbo ndele oha handuka diva? Keshe umwe otashi dulika a kale e wete mukwao ihe lihumbata nawa, ndele ta dimbwa kutya naye elihumbato laye inali wapala. Ndele ongahelipi ovamwatate va tya ngaho tava dulu okulongela Jehova pamwe ve li moukumwe? Didilika nghee omaukwatya oo a popiwa kuPaulus meendjovo edi tadi landula taa dulu oku va kwafela. Opo nee, diladila kutya ongahelipi hatu dulu okuxumifa komesho oukumwe ngeenge otwa kulike omaukwatya a tya ngaho. Paulus okwa ti: ‘Ohandi mu kumaida, mu kale nokweenda ngaashi sha wapalela, mu nelininipiko nombili nonheni nokulididimikilafana mohole, ndele nye mu hale shili okudiinina oukumwe momhepo omekwamo lombili lokumanga kumwe.’ — Ef. 4:1-3.
7. Omolwashike sha fimanenena okuninga eenghendabala opo tu kale twa hangana nOvakriste vakwetu ovo navo inava wanenena?
7 Okulihonga okulongela Kalunga moukumwe pamwe novanhu vakwetu ovo inava wanenena osha fimana neenghono molwaashi ope na ashike elongelokalunga lashili limwe olo la faafanifwa nolutu. Paulus okwa ti: “Olutu limwe nOmhepo imwe, ngaashi mwa ifanenwa meteelelo limwe mwe li pewa, eshi mwa ifanwa; Omwene umwe, eitavelo limwe, [eninginifo, NW] limwe, Kalunga umwe Xe yaaveshe.” (Ef. 4:4-6) Jehova oha yandje omhepo yaye nosho yo omanangeko noupuna okupitila ashike moukumwe wovamwatate oo ta longifa. Nonande umwe oku tu nyemateke meongalo, openi vali hatu dulu okuya? Katu na vali apa hatu dulu oku ka uda eendjovo domwenyo waalushe. — Joh. 6:68.
“Eeshali di li ovanhu” ohadi xumifa komesho oukumwe
8. Kristus oha longifa shike opo e tu kwafele tu finde oinima oyo hai eta etukauko?
8 Paulus okwa li a longifa oshihopaenenwa shi na sha naasho ovakwaita vopefimbo lonale va li hava ningi opo a yelife nghee Jesus a li a longekida “eeshali di li ovanhu” a kwafele eongalo li kale li na oukumwe. Omukwaita oo a findana molwoodi otashi dulika a ete onghwate keumbo opo i yakule omukulukadi waye moilonga yomeumbo i li omupika. (Eps. 68:2, 13, 19) Sha faafana, eshi Jesus a finda ounyuni okwe li likolela eenghwate ile ovapiya vahapu ovo va hala oku mu longela. (Lesha Ovaefeso 4:7, 8, yelekanifa no-NW.) Ndele mbela Jesus oha longifa ngahelipi eenghwate da tya ngaho meityo lopafaneko? Paulus okwa ti: “Oye okwa yandja vamwe va ninge ovayapostoli navamwe ovaprofeti navamwe ovaevangeliste navamwe ovafita navamwe ovalongindjovo opo a longekide ovayapuki va kale va wana va pwa moshilonga sheyakulo, okutunga olutu laKristus, fiyo ofye atushe hatu hange oukumwe womeitavelo.” — Ef. 4:11-13.
9. (a) Ongahelipi “eeshali di li ovanhu” hadi kwafele mokukaleka po oukumwe? (b) Omolwashike oshilyo keshe sheongalo shi na okuninga eenghendabala opo shi xumife komesho oukumwe?
9 Di li ovafita ovanahole, ‘eeshali odo di li ovanhu’ ohadi tu kwafele opo tu kaleke po oukumwe wetu. Pashihopaenenwa, ngeenge omukulunhuongalo meongalo okwa didilike kutya ovamwatate vonhumba vavali otava ‘shindafana,’ ota dulu okuxumifa komesho oukumwe meongalo moku va pa omayele pauhandimwe, ‘te va pukulula nomhepo yonheni.’ (Gal. 5:26–6:1) Di li ovahongi, ‘eeshali odo di li ovanhu’ ohadi tu kwafele tu pameke eitavelo letu nomahongo a kanghamena kOmbibeli. Onghee hano, eeshali da tya ngaho ohadi xumifa komesho oukumwe notadi tu kwafele tu ninge Ovakriste va pyokoka. Paulus okwa ti: “Tu ha kale vali ouhanana hava telaanifwa nohava fungaafungifwa keemhepo adishe delongo [nomomanyanekelodanauko] ovanhu nomomakonda omalungameno omapukifo.” (Ef. 4:13, 14) Omukriste keshe oku na okuninga eenghendabala a xumife komesho oukumwe wovamwatate, ngaashi ashike oshilyo keshe sholutu hashi yambidida ikwao mokuyandja ekwafo olo la pumbiwa. — Lesha Ovaefeso 4:15, 16.
Natu djaleni ounhu mupe
10. Ongahelipi elihumbato lopaenghedi inali koshoka tali dulu okunyona po oukumwe wetu?
10 Mbela otwa didilika ngoo kutya etukulwa eti-4 lonhumwafo yaPaulus oyo a li a shangela Ovaefeso otali ulike kutya okuulikila vamwe ohole otaku ke tu kwafela tu kale moukumwe tu li Ovakriste va pyokoka pamhepo? Etukulwa olo otali ulike yo kutya okukala nohole osha kwatela mo shike. Shimwe vali, okweenda mondjila yohole itaku pitike oluhaelo nosho yo elihumbato inali koshoka. Paulus okwa kumaida ovamwaxe vaha ‘kale vali nokweenda ngaashi ovapaani hava ende ovo va fifa omaliudo avo nove liefela mouhalu.’ (Ef. 4:17-19) Ounyuni ou uhe na eenghedi otau dulu okunyona po oukumwe wetu. Ovanhu ohava ningi omashendjo kombinga yoluhaelo, ohava imbi kombinga yalo nohava tale oinima ya kwatela mo oluhaelo opo ve lihafife nohava haele, kutya nee otave shi ningi meholeko ile omoipafi yavamwe. Natango, okukala ho lihumbata tai kokele momilele, wa fa wa hala omunhu wonhumba oo ino lalakanena okuhombola ile okuhombolwa kuye shili, otaku dulu oku ku efifa po Jehova nokufiya po eongalo. Omolwashike mbela? Omolwaashi otashi dulu oku ku twala noupu moluhaelo. Natango, elihumbato olo tali kokele momilele ohali ningifa ovalihomboli va ye moluhaelo nohali etifa etukauko pokati kounona novadali. Elihumbato la tya ngaho ohali etifa yo etukauko pokati kovalihomboli, unene tuu oo ehe na ondjo. Elihumbato la tya ngaho ihali eta tuu etukauko! Onghee hano, itashi kumwifa eshi Paulus a li a popya a ti: “Hasho mwa longwa okushiiva Kristus”! — Ef. 4:20, 21.
11. Ombibeli otai ladipike Ovakriste va ninge omalunduluko elipi?
11 Paulus okwa divilika kutya otu na okweefa okudiladila oinima oyo hai etifa etukauko nokukulika oikala oyo tai dulu oku tu kwafela tu kale moukumwe navamwe, a ti: “Mu nokulidula omunhu mukulu, ou mwe mu shikula nale, ndele ohe linyono po mokushikula ouhalu u nekonda. Ndele mu shituke vape momhepo yomadiladilo eni, ndele nye mu djale omunhu mupe a shitwa a [fa] Kalunga omouyuki nomouyapuki woshili.” (Ef. 4:22-24) Ndele ongahelipi hatu dulu ‘okushituka vape momhepo yomadiladilo etu’? Ngeenge otwa dilonga nolupandu kwaasho twe lihonga mEendjovo daKalunga nosho yo moihopaenenwa iwa yOvakriste va pyokoka, ohatu ka dula okudjala ounhu mupe oo ‘wa shitwa a fa Kalunga.’
Natu lihonge eenghedi diwa dokupopya
12. Ongahelipi okupopya oshili haku xumifa komesho oukumwe, nomolwashike shidjuu kuvamwe okupopya oshili?
12 Osha fimanenena okukala hatu popi oshili momaukwaneumbo ile meongalo. Okukala hatu kundafana twa manguluka nohatu lombwelafana oshili otaku dulu okuxumifa komesho ekwatafano liwa. (Joh. 15:15) Ndele mbela ongahelipi ngeenge omunhu oha lombwele vakwao oipupulu? Ngeenge vakwao ove shi mono mo kutya oha popi oipupulu, itava ka kala vali ve mu lineekela. Onghee hano, oshi shii okuudiwa ko eshi Paulus a ti: “Popyeni oshili keshe tuu namukwao, osheshi mokukalafana ofye oinhimbu.” (Ef. 4:25) Omunhu oo e na onghedindjikilile yokupopya oipupulu, tashi dulika a hovela okupopya oipupulu okudja kounona waye, otashi dulika shi kale shidjuu kuye okukala ha popi oshili. Ndele Jehova ota ka pandula omunhu oo ta kendabala okweefa po okupopya oipupulu note ke mu kwafela.
13. Oshike sha kwatelwa mo mokweefa po okupopya omalaka mai?
13 Jehova ohe tu hongo nghee tu na okuxumifa komesho oukumwe nokukala twa fimaneka vamwe meongalo nomomaukwaneumbo nosho yo nghee tu na okupangela elaka letu. Ombibeli oya ti: ‘Momakanya eni muha pite nande ondjovo ya nyata. Onya keshe, ekeshuko nehandu, efulakato netukano, owii keshe nau kale kokule nanye.’ (Ef. 4:29, 31) Onghedi imwe omo hatu dulu okuhenuka okupopya monghedi tai nyemateke vamwe oyo okulihonga okukala hatu fimaneke vamwe. Pashihopaenenwa, omushamane oo ha ula omukulukadi waye omalaka mai oku na okukendabala a lundulule onghedi omo ha ungaunga nomukulukadi waye, unene tuu eshi te lihongo nghee Jehova ha fimaneke ovakainhu. Jehova okwa vaeka nokuli ovakainhu vamwe nomhepo iyapuki nokwe va pa eteelelo loku ka pangela ve li eehamba pamwe naKristus. (Gal. 3:28; 1 Pet. 3:7) Omukulukadi oo ha hanyaukile omushamane waye naye oku na okulinyengifwa a lundulule oikala yaye eshi e lihonga kutya Jesus naye okwa li he lipangele ngeenge a li a handukifwa. — 1 Pet. 2:21-23.
14. Omolwashike ehandu la nyika oshiponga?
14 Oshinima vali shimwe osho sha pambafana nokupopya omalaka mai osho okuhapangela ehandu. Okuhapangela ehandu nako otaku dulu okunyona po oukumwe wovanhu. Ehandu ola fa omundilo. Otali dulu okuxwama diva nokweetifa omaupyakadi. (Omayel. 29:22) Omunhu oo a nyematekwa kumukwao moshinima shonhumba oku na okulungama a pangele ehandu laye opo aha nyone po ekwatafano lavo li na ondilo. Ovakriste ove na okukala hava diminafana po, ndele haku kwatela vamwe onghone ile okukala tava popi kombinga yoshinima osho lwoikando. (Eps. 37:8; 103:8, 9; Omayel. 17:9) Paulus okwa li a kumaida Ovaefeso a ti: “Handukeni, ndelenee inamu nyona. Inamu efa etango li ningine mu nehandu. Ndele inamu pa Satana onhele.” (Ef. 4:26, 27) Ngeenge omunhu okwa dopa okupangela ehandu laye otashi ka pa Ondiaboli omhito i etife etukauko nosho yo okuhaudafana meongalo.
15. Okukufa po oshinima shihe fi shoye ohaku eta oidjemo ilipi?
15 Okufimaneka oinima yavamwe ohaku xumifa komesho oukumwe meongalo. Ohatu lesha taku ti: “Omulunga a ha vake vali.” (Ef. 4:28) Oshiwana shaJehova ashishe oshe lineekelafana. Ngeenge Omukriste okwa longifa nai oufembanghenda wokukala e lineekelwa kuvamwe mokukufa po oshinima shihe fi shaye, ota ka nyona po oukumwe oo mukumwifi.
Ohole yokuhola Kalunga ohai tu hanganifa
16. Ongahelipi hatu dulu okukala hatu popi eendjovo diwa odo tadi dulu okuxumifa komesho oukumwe wetu?
16 Ngeenge oilyo aishe yeongalo lopaKriste oya kala i hole Kalunga nohai ungaunga naikwao pahole, eongalo otali ka kala li na oukumwe. Okukala tu na olupandu lokupandula ouwanghenda waJehova ohashi tu linyengifa tu ninge eenghendabala da mana mo opo tu tule moilonga omayele oo taa ti: ‘Popyeni eendjovo diwa dokutungafana, da wapala okupwilikina. Ndelenee kalafaneni mu noukaume nokufilafana onghenda nokudiminafana po omatimba, ngaashi Kalunga e mu dimina po muKristus.’ (Ef. 4:29, 32) Jehova oha dimine po pahole ovanhu inava wanenena. Mbela nafye katu na okukala hatu dimine po vamwe omolwokuhawanenena kwavo?
17. Omolwashike tu na okuninga eenghendabala tu xumife komesho oukumwe?
17 Oukumwe woshiwana shaJehova ohau mu fimanekifa. Omhepo yaye ohai tu linyengifa meenghedi di lili noku lili opo tu xumife komesho oukumwe. Doshili, inatu hala nande okukala tu li omhinge newiliko lomhepo iyapuki. Paulus okwa ti: “Omhepo Iyapuki yaKalunga inamu [i] nyikifa oluhodi.” (Ef. 4:30) Oukumwe wetu oo emona olo twa pumbwa okwaamena. Ohau etele ehafo aveshe ovo hava longele kumwe nohau fimanekifa Jehova. Ombibeli oya ti: “Ningeni hano [ovahopaeleli] vaKalunga ngaashi ovana ovaholike, nye mu kale nokweenda mohole.” — Ef. 5:1, 2.
Oto nyamukula ngahelipi?
• Oikala ilipi hai xumifa komesho oukumwe mokati kOvakriste?
• Ongahelipi elihumbato letu tali dulu okuxumifa komesho oukumwe meongalo?
• Ongahelipi okupopya kwetu taku dulu oku tu kwafela tu kale hatu longele kumwe navamwe?
[Efano pepandja 20]
Ovanhu vahapu ovo va dja momaputuko a yoolokafana ova hangana moukumwe
[Efano pepandja 23]
Ou shii ngoo kutya osha nyika oshiponga okukala to lihumbata monghedi oyo tai kokele momilele?