Okukumaida taku ti sha

OVAKULUNHUONGALO Ovakriste ove na “okukumaida nelongo la pama.” (Tit. 1:9) Omafimbo amwe, ove na oku shi ninga meenghalo didjuu. Osha fimana okuyandja omayele oo e li metwokumwe nomafinamhango opamishangwa. Onghee hano, ovakulunhuongalo ove na okudulika komayele e na sha ‘nokudiinina okukumaida’ vamwe. (1 Tim. 4:13) Nonande oshileshwa eshi osha yukifwa unene kovakulunhuongalo ile kwaavo tava lalakanene oshinakuwanifwa osho, omafimbo amwe ovadali ova pumbwa okukumaida ovana vavo ile ovo ve na ovakonakonimbibeli ova pumbwa oku va kumaida. Onghee hano, omafinamhango oo taa ka kundafanwa moshileshwa eshi otaa longo yo meenghalo odo.

Onaini u na okukumaida vamwe? Opo u shiive kutya onaini u na okukumaida vamwe, osha fimana okukonakona eenghalo dimwe odo da popiwa mOmbibeli omo vamwe va li va pewa omakumaido. Omuyapostoli Petrus okwa li a ladipika ovakulunhuongalo va wanife po oshinakuwanifwa shavo ve li ovafita voufita waKalunga. (1 Pet. 5:1, 2) Paulus okwa li a pa Titus omayele a kumaide ovalumenhu ovanyasha va kale “ovalidiliki.” (Tit. 2:6) Paulus okwa li a kumaida Ovakriste vakwao va kale hava popi “nondaka imwe” nova henuke ovo hava kala va hala okweeta olutandu mokati kovamwaxe. (1 Kor. 1:10; Rom. 16:17; Fil. 4:2) Nonande Paulus okwa li a pandula oilyo yeongalo lomuTessalonika omolwoilonga iwa oyo va li tava longo, okwa li e va kumaida va tule moilonga pauyadi oinima oyo va li va hongwa. (1 Tes. 4:1, 10) Petrus okwa li a kumaida Ovakriste vakwao ve “lidilike okahalu kombelela.” (1 Pet. 2:11) Judas okwa li a kumaida ovamwaxe va “kondjele eitavelo” molwaashi opa li enwefemo lii lovahenakalunga ovo va li vehe na eenghedi. (Jud. 3, 4) Ovakriste aveshe ova ladipikwa va kumaidafane opo vaha kukutikwe kekotokelo loulunde. (Heb. 3:13) Petrus okwa li a ladipika Ovajuda ovo va li inava itavela muKristus va ‘xupifwe mo moludalo la pilalala.’ — Oil. 2:40.

Mbela owa pumbwa omaukwatya elipi opo u dule okukumaida vamwe meenghalo da tya ngaho? Ongahelipi omunhu oo ta yandje omakumaido ta dulu oku shi ninga nopehe na okufininika vamwe ile oku va ngwenyaukila?

Shi ninga ‘pahole.’ Ngeenge itatu kumaida vamwe ‘pahole,’ otashi dulika ovo hatu kumaida va kale ve udite kutya otu na onyanya. (Filem. 9) Odoshili kutya apa omupopi a pumbwa okuladipika ovanhu va katuke onghatu yonhumba meendelelo, oku na okuulika kutya oshinima osho osha endelela. Ngeenge ita popi nondjungu, ota ka kala a fa ta popi ina mana mo. Oku na okupopya monghedi oyo tai ulike kutya osho to popi osha endelela. Ndele pefimbo opo tuu opo, oku na okukala ta popi ta kumike nota holola omaliudo omoule. Ekumaido lopahole otali dulu okulinyengifa ovapwilikini va katuke eenghatu. Eshi Paulus a li ta popi shi na sha nanghee ye nosho yo ovaendi pamwe naye ve udite, okwa li a lombwela Ovatessaloniki a ti: “Otwa li hatu mu kumaida keshe umwe womunye ngaashi xe novana vaye.” (1 Tes. 2:11) Ovapashukili ovo Ovakriste ova li va kumaida ovamwaxe pahole. Ulika mokupopya kwoye kutya ou na ko nasha shili novapwilikini.

Ashike kala u na elungi. Ino ningifa ovanhu ovo wa hala okutwa omukumo va kale ve ku angala. Pefimbo opo tuu opo, ino kala ino lombwela ovapwilikini kombinga ‘yomhangela aishe yaKalunga.’ (Oil. 20:27) Ovapwilikini ovo ve na olupandu omolwomayele oo we va pa otava ka kala ve ku hole shi dulife nale molwaashi owe va kumaida pahole va longe osho sha yuka. — Eps. 141:5.

Luhapu, ohashi kala shiwa ngeenge owa hovele tete nokupandula omunhu tashi di komutima fimbo ino mu kumaida. Diladila shi na sha noinima iwa oyo ovamwaxo tava ningi, oinima oyo Jehova a hokwa, ngaashi, eitavelo lavo olo li liwetikile moilonga yavo, ohole oyo hai ve linyengifa va katuke eenghatu nosho yo okulididimika kwavo ngeenge tava yelekwa. (1 Tes. 1:2-8; 2 Tes. 1:3-5) Osho otashi ka kwafela ovamwaxo va kale ve udite kutya eenghendabala davo ohadi pandulwa nonokutya otu udite ko eenghalo davo, naasho otashi va ningifa yo va kale va hala okupwilikina omakumaido oo hatu va pewa.

“Kumaida monheni.” Omakumaido oku na okuyandjwa ‘nonheni.’ (2 Tim. 4:2) Mbela osho osha kwatela mo shike? Onheni oya kwatela mo okulididimikila okuningwa nai ile olushindo. Omunhu oo e na onheni oha kala e lineekela kutya ovapwilikini vaye otava ka tula moilonga osho ta popi. Ngeenge owa kumaida vamwe monghedi ya tya ngaho, ovapwilikini itava ka diladila kutya oho va diladilile mowii. Elineekelo loye kutya ovamwaxo ova hala okulongela Jehova ngaashi tava dulu otali ke va ningifa va kale va hala okulonga osho sha yuka. — Heb. 6:9.

‘Kumaida nelongo la pama.’ Ongahelipi omukulunhuongalo ta dulu “okukumaida nelongo la pama”? ‘Omokudama mondjovo ei i shii kulineekelwa yopalongo.’ (Tit. 1:9) Longifa Eendjovo daKalunga ngeenge to kumaida vamwe, ponhele yokulongifa omataleko oye opaumwene. Osho to popi nashi kale alushe metwokumwe nOmbibeli. Popya kutya omauwa elipi tava dulu okumona ngeenge ova tula moilonga osho Ombibeli tai ti shi na sha noshinima shonhumba osho to kundafana navo. Kaleka momadiladilo oilanduliko yopaife nosho yo yomonakwiiwa, oyo tai dulu oku va hanga ngeenge ova kala inava dulika kEendjovo daKalunga, na longifa oinima oyo u tomhe ovapwilikini va itavele kutya ove na okuninga osho shi li mondjila.

Shilipaleka kutya owa yelifila nawa ovapwilikini voye osho ve na okuninga nanghee ve na oku shi ninga. Ulika kutya okutomhafana kwoye okwe likolelela filufilu kOmishangwa. Ngeenge Omishangwa ode tu pa emanguluko lonhumba lokuninga omatokolo moshinima shonhumba, shiivifila ovapwilikini shi na sha nemanguluko la tya ngaho. Eshi to xulifa oshipopiwa shoye, va kumaida va kale va tokola toko okukatuka eenghatu odo da pumbiwa.

Kumaida vamwe u na “emanguluko lokupopya.” Opo u kumaide vamwe nomupondo, owa pumbwa ‘emanguluko lokupopya meitavelo.’ (1 Tim. 3:13, NW) Oshike hashi ningifa omunhu a kale a manguluka okupopya? Okukala e shii kutya ‘oshihopaelelwa shaye shoilonga iwa’ otashi tu kumwe naasho ta ladipikile ovamwaxe va ninge. (Tit. 2:6, 7; 1 Pet. 5:3) Ngeenge omunhu oku na emanguluko lokupopya, ovo ta ladipike va katuke eenghatu otava ka mona kutya omunhu oo te va kumaida ina teelela va ninge sha osho ye mwene iha ningi. Otava ka mona kutya otava dulu okuhopaenena eitavelo laye ngaashi ashike ye ha kendabala okuhopaenena Kristus. — 1 Kor. 11:1; Fil. 3:17.

Okukumaida vamwe we likolelela kEendjovo daKalunga noku shi ninga pahole otaku dulu okweeta ouwa muhapu. Ovo ve na oshinakuwanifwa shokukumaida vamwe ove na okuninga eenghendabala da mana mo opo va kumaide vamwe monghedi iwa. — Rom. 12:8.