Ovapashukili novayakuliongalo ohava nangekwa pauteokratika
“Litaleni hano nye vene, nye mu pashukile noshiunda ashishe, omo mwa nangekwa kOmhepo Iyapuki eshi [ye] mu ninga [ovapashukili, NW].”—OILONGA 20:28.
OKUDJA nale Jehova okwa xunganeka oshinima shikonekwedi tashi ka holoka pefimbo lexulilo. Okupitila momuprofeti Jesaja okwa popya ta ti: “Ou muningholi ota ka ninga eyovi, naau munini ota ningi oshiwana sha pama. Ame Omwene nda hala oku shi ninga diva pefimbo lasho.”—Jesaja 60:22.
1, 2. Ongahelipi Jesaja 60:22 ta wanifwa?
2 Mbela ope na oumbangi kutya exunganeko eli otali wanifwa kunena? Heeno, osho. Mo 1870 nasha, okwa totwa eongalo limwe lipe loshiwana shaJehova muAllegheny, Pennsylvania, mOilongo yaHangana yaAmerika. Okudja pehovelo linini li fike opo, omaongalo omayovi omilongo okwa holoka po notaa kulu mounyuni aushe. Ovaudifi vOuhamba omamiliyona—oshiwana sha pama paife ove li momaongalo e dulife po 91-000 moilongo 235 kongonga yedu alishe. Kape na omalimbililo, eshi otashi koleke kutya Jehova ota endelelifa eongelo lovalongelikalunga vashili omanga “oudjuu unene” oo u li popepi poduka inau holoka.—Mateus 24:21; Ehololo 7:9-14.
3. Okuninginifwa “medina laXe nolOmona nolOmhepo Iyapuki” otashi ti shike?
3 Konima yokuliyapulila Jehova paumwene, nosho yo metwokumwe nomalombwelo aJesus, omamiliyona aa okwa ninginifwa “medina laXe nolOmona nolOmhepo Iyapuki.” (Mateus 28:19) Okuninginifwa “medina laXe” otashi ti kutya ovaninginifwa ava ova dimina Jehova e li Xe yavo yomeulu nOmuyandji wOmwenyo nohava dulika kounamapangelo waye. Okuninginifwa ‘medina lOmona’ otashi ulike kutya ova dimina kutya Jesus Kristus oku li Omukulili wavo, Omuwiliki wavo nOhamba yavo. Otava dimine yo onghandangala yomhepo iyapuki yaKalunga ile eenghono daye tadi longo, mokuwilika onghalamwenyo yavo. Naashi otashi ulike kutya ova ninginifwa ‘medina lomhepo iyapuki.’
4. Ovakalele Ovakriste ohava yapulwa ngahelipi?
4 Peninginifo lavo, ovahongwa vape otava yapulwa ve li ovakalele vaJehova Kalunga. Olyelye he va yapula? Efinamhango meendjovo da shangwa mo 2 Ovakorinto 3:5 (NW) otadi va popi tadi ti: “Okukala kwetu twa wana [tu li ovakalele] otaku di kuKalunga.” Itava ka kala va hala efimano limwe linene li dule pokuyapulwa kuJehova Kalunga mwene. Konima yokuninginifwa kwavo otava ka twikila nokukula pamhepo ve li ovakalele ‘vevangeli’ shimha ashike tava tambula ko ewiliko lomhepo yaKalunga nokutwikila okutula moilonga Eendjovo daye.—Mateus 24:14; Oilonga 9:31.
Omanangeko ohaa ningwa pauteokratika—hapaudemokoli
5. Mbela ovapashukili Ovakriste nosho yo ovayakuliongalo ohava hoololwa paudemokoli? Shi yelifa.
5 Opa pumbwa epashukilo la tova tali ningwa kovapashukili va pyokoka nosho yo ekwafo olo tali dulu okuyandjwa kovayakuliongalo opo ku filwe oshisho eemhumbwe dopamhepo domuvalu munene oo tau kulu wovakalele ve lipyakidila. (Ovafilippi 1:1, NW) Ndele ongahelipi ovalumenhu ava vopamhepo hava nangekwa po? Ihava nangekwa po pamikalo ngaashi odo hadi longifwa mOukwakriste. Pashihopaenenwa, ovapashukili Ovakriste ihava hoololwa paudemokoli, sha hala kutya, okupitila mokumona omake mahapu oilyo yeongalo. Ponhele yaasho, omanangeko aa ohaa ningwa pauteokratika. Osho otashi ti ngahelipi?
6. (a) Outeokratika woshili oshike? (b) Omolwashike okunangekwa po kwovapashukili novayakuliongalo ku li pauteokratika?
6 Oku shi popya paunafangwa, outeokratika woshili otashi ti okupangelwa kuKalunga. Eendombwedi daJehova ohadi dulika nehalo liwa kepangelo laye nokulongela kumwe opo di longe ehalo laKalunga. (Epsalme 143:10; Mateus 6:9, 10) Okunangekwa po kwovapashukili ile ovakulunhuongalo Ovakriste, novayakuliongalo oku li pauteokratika, molwaashi omulandu wokuninga omaetepopopilo nokunangeka po ovalumenhu ava voshinakuwanifwa, ohau ningwa palongekido laKalunga la shangwa mOmishangwa Diyapuki. Ndele e li “Omupangeli waaishe,” doshili Jehova oku na oufemba wokutokola kutya ehangano laye li wetike oli na okulonga ngahelipi.—1 Omafimbo 29:11; Epsalme 97:9.
7. Eendombwedi daJehova ohadi wilikwa ngahelipi?
7 Mekondjifafano neengudu dihapu domalongelokalunga Oukwakriste, Eendombwedi daJehova ihadi litokolele do vene omulandu wopalongelokalunga oo da hala okushikula. Ovakriste ava ve na omitima diwa, otava kendabala okukanyatela komifikamhango daJehova. Ovapashukili mokati kavo ihava tulwa moilonga pamilandu dopamangelongeleka hadi ifanwa congregational, hierarchical, ile presbyterian. Ngeenge pe na eengudu domounyuni odo tadi kendabala okulidopa momanangeko aa, oshiwana shaJehova ihashi liyandje kuo. Ohashi diinine ondodo ya popiwa nawa kovayapostoli mefelemudo lotete eshi va ti: “Okudulika kuKalunga ku dule okudulika kovanhu.” (Oilonga 5:29) Kungaha, Eendombwedi ohadi dulika kuKalunga moinima aishe. (Ovaheberi 12:9; Jakob 4:7) Okushikula omilandu dopauteokratika ohaku eta okuhokiwa kuKalunga.
8. Omilandu dopaudemokoli nodopauteokratika oda yoolokafana ngahelipi?
8 Tu li ovapiya vOmuteokratika Munene, Jehova, ohatu ningi nawa mokukala tu shii eyooloko pokati komilandu dopaudemokoli nodopauteokratika. Omilandu dopaudemokoli ohadi pula okukalelwa po ku fike pamwe noluhapu ohau ningwa okupitila mokuninga oikonga molwondodo nosho yo mokumona omake mahapu okupitila mehoololo. Omilandu da tya ngaha inadi kwatelwa mo momanangeko opauteokratika. Omanangeko a tya ngaha ihaa di kovanhu navali ihaa ningwa okupitila kehangano lonhumba li li oshilongifo shopaveta. Tashi dulika mokuulika kokunangekwa po kwaye kuJesus naJehova e li “omuyapostoli wovapaani,” Paulus okwa lombwela Ovagalati kutya ye okwa nangekwa po ‘hakovanhu ile okupitila momunhu, ndelenee okuJesus Kristus nokuKalunga Xe, ou e mu nyumuna movafi.’—Ovaroma 11:13; Ovagalati 1:1.
Ova nangekwa po komhepo iyapuki
9. Oilonga 20:28 otai ti shike shi na sha nokunangekwa po kwovapashukili Ovakriste?
9 Paulus okwa li a dimbulukifa ovapashukili ovo va li muEfeso kutya ova nangekwa po kuKalunga okupitila momhepo iyapuki. Okwa ti: “Litaleni hano nye vene, nye mu pashukile noshiunda ashishe, omo mwa nangekwa kOmhepo Iyapuki eshi [ye] mu ninga ovafita vokulifa eongalo laKalunga, e li lilikolela nohonde [yOmona, NW].” (Oilonga 20:28, eendada ofye twe di shanga da endama.) Ovapashukili Ovakriste ovo, ova li va pumbwa okukala tava twikile tava kwatelwa komesho komhepo iyapuki eshi tava longo oilonga ve li ovafita voufita waKalunga. Ngeenge omulumenhu oo a nangekwa po omolwoshilonga shonhumba ita wanifa po vali omifikamhango dopaKalunga, mokweendela ko kwefimbo omhepo iyapuki otai ka longa i mu kufe oshilonga osho.
10. Ongahelipi omhepo iyapuki tai dana onghandangala ya fimana ngaho momanangeko opauteokratika?
10 Ongahelipi omhepo iyapuki tai dana onghandangala ya fimana ngaho? Shotete, omishangwa omo tamu hangika oiteelelwa omolwepashukilo lopamhepo oda nwefwa mo komhepo iyapuki. Monhumwafo yaye kuTimoteus nosho yo kuTitus, Paulus okwa yandja omifikamhango odo di na okuwanifwa po kovapashukili nosho yo kovayakuliongalo. Oiteelelwa aishe kumwe ya yoolokafana oyo a tumbula oi li 16. Pashihopaenenwa, ovapashukili okwa li ve na okukala ve he na edilo lasha, ve na eenghedi diwa, ovanandunge, ve na elandulafano, ve shii okuyakula ovaenda, ve shii okuhonga, nove li ovahopaelelwa ve li omitwe domaukwaneumbo. Okwa li ve na okukala ve na ondjele mokulongifa oikunwa yoalkoholi, kakwa li ve na okukala ovanalwisho voimaliwa nokwa li ve na okulongifa elipangelo. Sha faafana, omifikamhango da denga mbada oda yandjwa omolwovalumenhu ovo va wana okunangekwa ve li ovayakuliongalo.—1 Timoteus 3:1-10, 12, 13; Titus 1:5-9.
11. Oipumbiwa imwe ilipi po oyo i na okuwanifwa po kovalumenhu ovo va wana okupewa oinakuwanifwa meongalo?
11 Okweendulula oipumbiwa ei otaku ulike kutya ovo ve na okukwatela komesho melongelokalunga laJehova ove na okukala ovahopaelelwa melihumbato lopaKriste. Ovalumenhu ovo va wana okupewa oinakuwanifwa meongalo ove na oku shi ulika kutya omhepo iyapuki otai longo muvo. (2 Timoteus 1:14) Oshi na okukala sha yela kutya omhepo yaKalunga otai imike oiimati ngaashi “ohole, ehafo, ombili, onheni, olune, ouwa, eitavelo, ounambili nelipangelo” movalumenhu ava. (Ovagalati 5:22, 23, NW) Oiimati ya tya ngaha oi na okumonika mokuviyauka novaitaveli vakwao osho yo novanhu vamwe. Doshili, vamwe otashi dulika va ulike oiimati yonhumba yopamhepo panghedi ya denga mbada, omanga vakwao tashi dulika va wanife po oipumbiwa ikwao yovapashukili pamufika u li pombada. Ndelenee, aveshe ovo va hala okunangekwa ve li ovapashukili ile ovayakuliongalo ove na oku shi ulika monghalamwenyo yavo kutya vo ove li ovalumenhu vopamhepo, va wanifa po oiteelelwa yomEendjovo daKalunga.
12. Oolyelye tava dulu okutiwa kutya ova nangekwa komhepo iyapuki?
12 Eshi Paulus a kumaida vakwao va ninge ovahopaeleli vaye, okwe shi ninga nomutima wa yela molwaashi ye okwa hopaenena Jesus Kristus, oo e tu ‘fiila oshihopaelelwa tu shikule oshikoti shaye.’ (1 Petrus 2:21; 1 Ovakorinto 11:1) Ovo va wanifa po oiteelelwa yopamishangwa pefimbo lokunangekwa kwavo ve li ovapashukili ile ovayakuliongalo kungaha otaku dulu ku tiwe ova nangekwa po komhepo iyapuki.
13. Ongahelipi omhepo iyapuki hai kwafele ovo hava ningi omaetepopopilo e na sha novalumenhu ovo ve na okuyakula meongalo?
13 Ope na yo natango oshinima shimwe osho tashi ulike nghee omhepo iyapuki tai longo momaetepopopilo nosho yo momanangeko ovapashukili. Jesus okwa ti kutya ‘Tate yomeulu oha yandje omhepo iyapuki kwaava tave mu indile.’ (Lukas 11:13) Hano ngeenge ovakulunhuongalo vomeongalo lomoshitukulwa tava ongala va ninge omaetepopopilo ovalumenhu ovo va wana okupewa oinakuwanifwa meongalo, ohava ilikana omolwomhepo yaKalunga i va wilike. Ohava kanghameke omaetepopopilo avo kwaasho sha popiwa mEendjovo daKalunga da nwefwa mo, nomhepo iyapuki ohai va ningifa va dule okumona ngeenge omunhu oo taku diladililwa a nangekwe okwa wanifa po tuu oiteelelwa yopamishangwa. Ovo tava ningi omaetepopopilo kave na okunwefwa mo kemoniko lokombada lomunhu, ondodo yaye yehongo ile eenghono dopaushitwe. Tete ove na okutala ngeenge omunhu oku li tuu omulumenhu wopamhepo, oo oilyo yeongalo itai ka ongaonga okuya kuye nokupula omayele moinima yopamhepo.
14. Oshike hatu lihongo mOilonga 6:1-3?
14 Nande olutu lovakulunhuongalo hali kufa ombinga pamwe novapashukili ovaendi mokuninga omaetepopopilo e na sha novamwatate va longe ve li ovakulunhuongalo ile ovayakuliongalo, omanangeko oovene ohaa ningwa pamulandu oo wa yandjwa mefelemido lotete. Efimbo limwe, opa li pe na omhumbwe yovalumenhu ovo va wanifa po oipumbiwa yopamhepo va dule okufila oshisho oinakuwanifwa ya fimana. Olutuwiliki ola yandjele omayele taa shikula apa: “Hoololeni mokati keni ovalumenhu va-7 ve shii kulineekelwa, ve yadi Omhepo Iyapuki neendunge, ovo hatu va tula moshilonga eshi.” (Oilonga 6:1-3) Nande ovalumenhu ovo va ungaunga nonghalo kondadalunde ovo va ninga omaetepopopilo, omanangeko okwa ningwa kovalumenhu ovo ve lineekelelwa okuwanifa po oshinakuwanifwa ovo va li muJerusalem. Oshihopaenenwa sha faafana otashi shikulwa kunena.
15. Ongahelipi Olutuwiliki li na mo ombinga moshinima shokunangeka po ovalumenhu?
15 Olutuwiliki lEendombwedi daJehova olo hali nangeke sha yukilila oilyo yEekomitiye dOitaimbelewa. Ngeenge tava ningi etokolo kutya olyelye ta dulu okupewa oshinakuwanifwa shidjuu sha tya ngaho, Olutuwiliki ohali kaleke momadiladilo eendjovo daJesus tadi ti: “Keshe tuu ou a pewa shihapu, oye ota pulwa yo shihapu, ndele ou a pewa epangelo loihapu, ota pulwa yo ihapu.” (Lukas 12:48) Kakele kokunangeka oilyo yEekomitiye dOitaimbelewa, Olutuwiliki ohali nangeke ovakulunhuongalo vaBetel nosho yo ovapashukili ovaendi. Ndelenee ohali pe ovamwatate voshinakuwanifwa oufemba va katuke eenghatu ponhele yalo mokuninga omanangeko onhumba. Ope na yo oihopaenenwa yopamishangwa i na sha naashi.
‘Nangeka ngaashi ame nde shi ku lombwela’
16. Omolwashike Paulus kwa li a fiya Titus muKreta, naashi otashi ulike shike shi na sha nomanangeko opauteokratika kunena?
16 Paulus okwa lombwela omulongi pamwe naye Titus ta ti: “Osho onde ku fiya muKreta, u yukife, eshi ame nda fiya po inashi yukifwa, ove u nangeke moshilando keshe ovakulunhu, ngaashi ame nde shi ku lombwela.” (Titus 1:5) Opo nee Paulus okwa yandja oipumbiwa oyo kwa li i na okutalika kuTitus movalumenhu ovo tava ka kala va wana okunangekwa moilonga ya tya ngaha. Hano kunena, Olutuwiliki ohali nangeke po ovamwatate ovanekeka moitaimbelewa ve li kalele po mokunangeka ovakulunhuongalo nosho yo ovayakuliongalo. Ohaku fiwa oshisho opo ovo ve lile po Olutuwiliki va kale ve udite ko filufilu nokushikula ewiliko lopamishangwa li na sha nokuninga omanangeko aa. Hano, okoshi yewiliko lOlutuwiliki ovalumenhu ovo va wanifa po oipumbiwa hava nangekwa va longe momaongalo Eendombwedi daJehova mounyuni aushe.
17. Omaetepopopilo e na sha nomanangeko ovapashukili nosho yo ovayakuliongalo ohaa ungaungwa nao ngahelipi koshitaimbelewa?
17 Ngeenge omaetepopopilo e na sha nomanangeko ovapashukili novayakuliongalo a yandjwa koshitaimbelewa shEhangano loWatch Tower, ovalumenhu ovo ve na owino ohave lineekele omhepo yaKalunga omolwomayele e na sha nokunangeka. Ovalumenhu ava ove na oku ka pulwa shihapu, omolwaashi ova dimina kutya kave na okweendelela okutenheka omake avo komunhu, opo va ha kwatafane nomatimba aye.—1 Timoteus 5:22.
18, 19. (a) Ongahelipi omanangeko amwe haa ningwa? (b) Ongahelipi omulandu aushe u na sha nomaetepopopilo nosho yo womanangeko hau ningwa?
18 Omanangeko onhumba otashi dulika a shiivifwe monhumwafo i na oshihako shopambelewa okudja kehangano li li oshilongifo shopaveta. Onhumwafo ya tya ngaho otashi dulika i longifwe mokunangeka ovamwatate ve dulife puumwe meongalo.
19 Omanangeko opauteokratika ohaa di kuJehova okupitila mOmona waye nosho yo moupitilo waKalunga u wetike kombada yedu, “omupiya omudiinini nomunaendunge” nosho yo Olutuwiliki lao. (Mateus 24:45-47) Omulandu aushe womaetepopopilo a tya ngaha osho yo omanangeko otau wilikwa komhepo iyapuki. Eshi osho shi li ngaha molwaashi oipumbiwa oya yandjwa mEendjovo daKalunga, odo da nwefwa mo komhepo iyapuki, naau ta nangekwa oha ulike oiimati yopamhepo. Onghee hano omanangeko oku na okutalika ko kutya ohaa ningwa komhepo iyapuki. Ngaashi ashike ovapashukili nosho yo ovayakuliongalo kwa li hava nangekwa pauteokratika mefelemudo lotete, eshi osho shi li yo ngaho kunena.
Olupandu omolwewiliko laJehova
20. Omolwashike tu na omaliudo a fa oo aDavid a shangwa mEpsalme 133:1?
20 Mefimbo eli lehepuluko lopamhepo nosho yo ehapupalo lopauteokratika momalipyakidilo oilonga yokuudifa Ouhamba, otwa pandula molwaashi Jehova oye e na oshinakuwanifwa shotete shokunangeka po ovapashukili nosho yo ovayakuliongalo. Elongekido eli lopamishangwa otali tu kwafele tu kanyatele omifikamhango daKalunga da denga mbada douyuki mokati ketu tu li Eendombwedi daJehova. Kakele kaasho, omhepo yopaKriste yovalumenhu ava nosho yo eenghendabala davo da mana mo otadi yambidida neenghono ombili yetu inene nosho yo oukumwe tu li ovapiya vaJehova. Hano ngaashi omupsalme David, ohatu linyengifwa tu ingide hatu ti: “Taleni, oshiwa nosha wapala shi fike peni, ovamwatate ngenge tava kala kumwe nombili.”—Epsalme 133:1.
21. Jesaja 60:17 ota wanifwa ngahelipi kunena?
21 Inatu hafa tuu omolwewiliko laJehova okupitila mEendjovo daye nosho yo momhepo yaye iyapuki! Ndele doshili, eendjovo di li muJesaja 60:17 odi na eityo la fimana: “Ponhele yoshivela shitwima ohandi tula po oshingoldo noponhele yoivela ohandi tula po oshisilveri, ponhele yomuti ohandi tula po oivela ya twima noponhele yemanya oivela ilaula. Ombili ohandi i ningi epangelo loye, nouyuki ohandi u ningi omuyukifili woye.” Eshi omilandu dopauteokratika da kala nokutulwa moilonga pauyadi kanini nakanini mokati kEendombwedi daJehova, otwa kala nokuhafela onghalo ya nangekwa noupuna mehangano alishe laKalunga lokombada yedu.
22 Oshike osho twa pandula shi li mondjila, noshike osho tu na okukala twa tokola okuninga?
22 Otwa pandula neenghono omolwomalongekido opauteokratika oo a tulwa po mokati ketu. Notwa pandula unene oilonga idjuu ndele otai mbilipaleke tai longwa kovapashukili novayakuliongalo ovo va nangekwa pauteokratika. Nomutima aushe ohatu tumbaleke Tate yetu omunahole womeulu, oo e tu pa ehepuluko lopamhepo nokwe tu nangeka noupuna. (Omayeletumbulo 10:22) Onghee hano, natu kale twa tokola toko tu kaleni hatu katukile pamwe nehangano laJehova. Komesho yaaishe, natu twikileni nokulonga moukumwe omolwefimano, ehambelelo netumbaleko ledina linene liyapuki laJehova.
[Efano pepandja 9]
Ovakulunhuongalo nosho yo ovayakuliongalo ohava pewa oufembanghenda wokuyakula okupitila mokunangekwa pauteokratika
[Efano pepandja 10]
Oto nyamukula ngahelipi?
• Omolwashike hatu dulu okupopya kutya okunangekwa po kwovapashukili nokwovayakuliongalo oku li pauteokratika ndele hapaudemokoli?
• Ongahelipi ovalumenhu Ovakriste voshinakuwanifwa va nangekwa komhepo iyapuki?
• Ongahelipi Olutuwiliki li na ombinga mokunangeka po ovapashukili nosho yo ovayakuliongalo?
• Omolwashike tu na okupandula Jehova shi na sha nomanangeko opauteokratika?