Katukila pamwe nehangano laJehova
“Kalunga kombili . . . ne mu longekidile ouwa keshe,
okuwanifa ehalo laye.”—OVAHEBERI 13:20, 21.
MOMUDO 1999, omuvalu wovanhu kombada yedu owa londa fiyo opomamiliyona omayovi ahamano! Embo ledina The World Almanac ola ulika kutya omuvalu u fike po 1 165 000 000 owOvamoslema; 1 030 000-000 Ovakatolika; 762 000 000 Ovahindu; 354-000 000 Ovabuddha; 316 000 000 Ovaprotestante no 214 000 000 Ovaortodoks.
2. Oshike tashi dulu okutiwa shi na sha nonghalo yomalongelokalunga oo e li po kunena?
2 Moku shi talela metukauko lopalongelokalunga nosho yo engwangwano olo li li po kunena, mbela omamiliyona aeshe aa otaa longo tuu metwokumwe nehalo laKalunga? Hasho, “osheshi Kalunga Ye ke fi Kalunga kedongakano, ndelenee okombili.” (1 Ovakorinto 14:33) Mepingafano naasho, ongahelipi shi na sha noumwainafana wovapiya vaJehova mounyuni aushe? (1 Petrus 2:17) Ekonakono olo la ningwa noukeka otali ulike kutya ‘Kalunga kombili ote va longekidile ouwa keshe opo va wanife po ehalo laye.’—Ovaheberi 13:20, 21.
3. Oshike sha ningwa muJerusalem pOpentekoste yo 33 O.P., nomolwashike?
3 Doshili, omuvalu wovanhu ovo hava endafana nEendombwedi daJehova hao u na okutalwa opo ku monike ngeenge oda hokiwa kuKalunga, nosho yo ehapupalo lomivalu halo hali tunhula Kalunga. Ka li a hoolola Ovaisrael molwaashi ‘omuvalu wavo wa li u dule’ woiwana aishe. Ndele doshili ova li ‘vanini.’ (Deuteronomion 7:7) Ndele molwaashi Israel okwa li e he na oudiinini, pOpentekoste yo 33 O.P., Jehova okwa yandja ohokwe yaye keongalo lipe olo la fikama po movashikuli vaJesus Kristus. Ova vaekwa nomhepo iyapuki yaJehova nova xuma komesho nokuudifila ovanhu vakwao oshili kombinga yaKalunga naKristus.—Oilonga 2:41, 42.
Eongalo lopaKriste ola kala alushe tali xumu komesho
4. Omolwashike to tile eongalo lotete lopaKriste okwa li tali xumu komesho efimbo alishe?
4 Mefelemudo lotete, eongalo lopaKriste ola kala alushe tali xumu komesho, mokuhovela okulonga moitukulwa ipe, mokuninga ovanhu ovahongwa, nosho yo mokumona eudeko lihapu li na sha nomalalakano aKalunga. Ovakriste vopetameko ova kala metwokumwe nouyelele wopamhepo oo wa kala tau yandjwa okupitila meenhumwafo da nwefwa mo kuKalunga. Mokutuwa omukumo komatalelepo ovayapostoli nosho yo kuvamwe, ova wanifa po oukalele wavo. Eshi otwe shi shangelwa nawa mOmishangwa dopaKriste dOshigreka.—Oilonga 10:21, 22; 13:46, 47; 2 Timoteus 1:13; 4:5; Ovaheberi 6:1-3; 2 Petrus 3:17, 18.
5. Omolwashike ehangano laKalunga tali xumu komesho kunena, ndele omolwashike tu na okukatukila pamwe nalo?
5 Ngaashi Ovakriste vonale, Eendombwedi daJehova dopaife oda hovela nehovelo linini. (Sakaria 4:8-10) Okudja pexulilo lefelemido eti-19, opa kala oumbangi oo tau ulike sha yela kutya omhepo yaKalunga oi li kombada yehangano laye. Molwaashi inatu kala twe lineekela meenghono dopanhu ndelenee omewiliko lomhepo iyapuki, otwa twikila nokuxuma komesho meudeko lOmishangwa nosho yo mokulonga ehalo laKalunga. (Sakaria 4:6) Paife eshi tulyeni ‘momafiku axuuninwa,’ osha fimana tu katukile pamwe nehangano laJehova olo tali xumu komesho. (2 Timoteus 3:1-5) Mokuninga ngaho otashi tu ningifa tu dule okukaleka eteelelo letu li na omwenyo notu kufe ombinga mokuyandja oundombwedi u na sha nOuhamba waKalunga wa dikwa po fimbo exulilo inali hanga onghalelo ei yoinima.—Mateus 24:3-14.
6, 7. Oitukulwa itatu ilipi hatu ka kundafana omo ehangano laJehova la xuma komesho?
6 Mokati ketu omu na ovo va tameka okweendafana kwavo nehangano laJehova lwopomido 1920 nasha nolwopomido 1930 nasha nosho yo lwopomido 1940 nasha. Pefimbo leedula odo donale, olyelye womufye a li ta dulu okudiladila ekulo lididilikwedi nosho yo exumokomesho lekulo lehangano tali xumu komesho fiyo opefimbo eli? Diladila koitwa yopombada oyo ya hangika mondjokonona yetu kunena! Doshili, okudiladila kwaasho Jehova a wanifa po okupitila moshiwana shaye sha unganekwa pauteokratika oku na ondjabi meityo lopamhepo.
7 David wopefimbo lonale okwa li a kumwa neenghono eshi a konakona oilonga yaJehova ikumwifi. Okwa popya ta ti: “Nda hala oku i udifa noku i vilikila, ndele yo ihapu, itai dulika okuvalwa.” (Epsalme 40:6) Nafye otwa taalelwa kengabeko la faafana, lokukala itatu dulu okuhokolola oilonga ihapu yaJehova ikumwifi noina ongushu mefimbo letu. Nande ongaho, natu ka konakoneni eembinga nhatu omo ehangano laJehova la xuma komesho: (1) exumokomesho louyelele wopamhepo, (2) oukalele wa xwepopala nowa tamunuka mo, nosho yo (3) omalunduluko e li pefimbo momilandu dehangano.
Olupandu louyelele wopamhepo
8. Metwokumwe nOmayeletumbulo 4:18, ouyelele wopamhepo owe tu kwafela tu dule okumona shike kombinga yOuhamba?
8 Shi na sha nexumokomesho louyelele wopamhepo, eendjovo dOmayeletumbulo 4:18 oda wanifwa. Otadi ti: “Elila lovayuki li li ngaashi eluwa tali tende, lo tali eta ouyelele tau hapupala fiyo omutenya tau tu.” Inatu hafa tuu kexumokomesho louyelele wopamhepo oo twa mona! MoCedar Point, Ohio, poshoongalele mo 1919, Ouhamba waKalunga okwa li wa divilikwa. Jehova oha longifa Ouhamba ou mokuyapula edina laye nokuyukipalifa ounamapangelo waye. Doshili, ouyelele wopamhepo owe tu ningifa tu dule okumona kutya okudja kuGenesis fiyo okEhololo, Ombibeli otai ulike elalakano laJehova, lokuyapula edina laye okupitila mOuhamba u li koshi yepangelo lOmona. Muo omo mu na eteelelo likumwifi kwaaveshe ovo ve hole ouyuki.—Mateus 12:18, 21.
9, 10. Mo 1920 nasha, oshike kwa li she lihongwa kombinga yOuhamba nosho yo omahangano avali taa kondjifafana, naashi osha kala tashi tu kwafele ngahelipi?
9 Poshoongalele moCedar Point mo 1922, omupopi munene J. F. Rutherford okwa ladipika oshiwana shaKalunga ta ti: “Udifeni, udifeni, udifeni, Ohamba nouhamba wayo.” Moshitukulwa shimwe shi na oshipalanyole “Edalo lOshiwana,” sha nyanyangidwa mOshungonangelo yOshiingilisha yefiku 1 Marsa 1925, elitulemo okwa li la yandjwa keudeko lopamhepo li na sha nomaxunganeko oo taa ulike komesho kedikepo lOuhamba waKalunga mo 1914. Mo 1920 okwa li yo kwa monika kutya ope na omahangano avali taa kondjifafana—laJehova nolaSatana. Olwoodi oli li metifa pokati komahangano aa ndele ohatu ka kala ashike tu li kombinga oyo tai ka findana ngeenge hatu katukile pamwe nehangano laJehova.
10 Ongahelipi ouyelele wa tya ngaho wopamhepo we tu kwafela? Molwaashi Ouhamba waKalunga nosho yo Ohamba Jesus Kristus kave fi oshitukulwa shounyuni, nafye itatu dulu okukala oshitukulwa shao. Okupitila mokukala twa yooloka kounyuni ohatu ulike kutya otu li kombinga yoshili. (Johannes 17:16; 18:37) Ngeenge hatu tale komaupyakadi a kitakana taa dedaula onghalelo ei yoinima youkolokoshi, inatu pandula tuu eshi tu he li oshitukulwa shehangano laSatana! Ndele katu na tuu oufembanghenda mokukala tu na eameno lopamhepo mehangano laJehova!
11. Edina lopamishangwa lilipi la tambulwa koshiwana shaKalunga mo 1931?
11 MuColumbus, Ohio, poshoongalele shomo 1931, eityo la yuka laJesaja 43:10-12 okwa li la tulwa moilonga. Ovakonakoni vOmbibeli ova tambula ko edina Eendombwedi daJehova li li oshilimbo. Kau fi tuu oufembanghenda muwa kufye wokushiivifa edina laKalunga opo vamwe va dule oku li ifana opo va xupifwe!—Epsalme 83:18, KB-1955; Ovaroma 10:13.
12. Ouyelele wopamhepo washike u na sha nongudu inene wa yandjelwe mo 1935?
12 Komesho yo 1930 nasha, vahapu vomoshiwana shaKalunga okwa li va ngwangwana kanini kombinga yeteelelo longhalamwenyo yavo yomonakwiiwa. Vamwe okwa li tava diladila omwenyo womeulu ndele okwa li va tunhulwa komahongo Ombibeli kombinga yoparadisa kombada yedu. Poshoongalele moWashington, D.C., mo 1935, okwa li shitunhula okushiiva kutya ongudu inene yomEhololo etukulwa eti-7 oi li ongudu oyo i na eteelelo lokukala kombada yedu. Okudja opo eongelo longudu inene ola xuma komesho neenghono inashi monika nande onale. Mbela inatu pandula eshi okukonekwa kwongudu inene ku he fi oshinima osho she tu holekwa? Oushili wokwoongelwa kwovanhu momuvalu munene wa dja moiwana aishe, momihoko adishe nosho yo momalaka aeshe, otau tu linyengifa tu endelelife eenghatu detu tu katukile pamwe nehangano laJehova.
13. Omhata inene ilipi kwa li ya divilikwa poshoongalele muSt. Louis mo 1941?
13 Omhata ya kula oyo i na okulipulwa nayo koulipamwe wovanhu oya li ya divilikwa mo 1941 poshoongalele muSt. Louis, Missouri. Oyo ounamapangelo weshito alishe. Ei oyo omhata oyo i na okukandulwa po diva, nefiku linene nolitilifa laasho tashi ka ningwa oli li pokuuya! Osho yo sha li sha pewa elitulemo mo 1941 osha li omhata ya kwatafana naikwao yotete, omhata youdiinini, oyo tai tu pitike tu ulike kutya tu li oohandimwe otwa ama peni moshinima shi na sha nounamapangelo waKalunga.
14. Poshoongalele shopaiwana mo 1950, oshike she lihongwa kombinga yoidale ya tumbulwa mEpsalme 45:17?
14 Poshoongalele shopaiwana mo 1950 mOshilando New York, oidale oyo tai tongwa mEpsalme 45:17 okwa li ya ulikwa mo kondadalunde kutya oyo oolyelye. Osha li omhito itunhula eshi Omumwatate Frederick Franz a kundafana oshipalanyole osho nokuyelifa kutya oidale yomedu lipe oi li mokati ketu. Poshoongalele opo osho yo poyoongalele ikwao ya ka shikula ko opa yandjwa omauyelele opamhepo e lili naku lili. (Epsalme 97:11) Inatu hafa tuu eshi elila letu “li li ngaashi eluwa tali tende, lo tali eta ouyelele tau hapupala”!
Natu twikile komesho moukalele wetu
15, 16. (a) Ongahelipi twa xuma komesho moukalele wetu mo 1920 nasha nosho yo mo 1930 nasha? (b) Oishangomwa ilipi ya xwameka oukalele wopaKriste momido opo da di ko?
15 Onghedi onhivali omo ehangano laJehova la xuma komesho oi na sha noilonga yetu ya fimana—okuudifa Ouhamba nokuninga ovanhu ovalongwa. (Mateus 28:19, 20; Markus 13:10) Okuwanifa po oilonga ei, ehangano ola twikila noku tu kwafela tu mone nghee sha fimana okutamununa mo oukalele wetu. Mo 1922, Ovakriste aveshe ova ladipikwa va kufe ombinga moilonga yokuudifa. Osha li she likolelela kukeshe umwe a pitike ouyelele waye u minikile opo a kale e na ombinga paumwene yokuyandja oundombwedi kombinga yoshili. (Mateus 5:14-16) Mo 1927, eenghatu okwa li da katukwa okukaleka Oshoondaxa i li efiku loukalele womomapya. Okutameka muFebruali 1940, okwa li sha ikililwa apeshe okumona Eendombwedi momapandavanda omoitukulwa yomangeshefelo tadi yandje Oshungonangelo noConsolation (paife oAwake!).
16 Momudo 1937 omwa yandjwa okambo kedina Model Study, taka tu omufindo okuninga omalishuneko opo ku hongwe ovanhu oshili yOmbibeli. Omido da ka shikula ko, oilonga yokuninga Omakonakonombibeli oya li ya divilikwa unene. Ombinga ei youkalele oya xwamekwa eshi kwa nyanyangidwa embo “Let God Be True” mo 1946 nosho yo embo Oshili Oyo Tai Twala kOmwenyo Waalushe mo 1968. Paife ohatu longifa embo Ontseyo Ndjoka Tayi Fala kOmwenyo Gwaaluhe. Okukonakona novanhu omambo aa otaku diki ekanghameno lopamishangwa lokuninga ovanhu ovahongwa.
Katukila pamwe nomayelifo opahangano
17. Ongahelipi ehangano laJehova la xuma komesho metwokumwe naJesaja 60:17?
17 Onghedi onhinhatu omo ehangano laJehova la xuma komesho oi na sha nomayele omayelifo opahangano. PaJesaja 60:17, Jehova okwa xunganeka ta ti: “Ponhele yoshivela shitwima ohandi tula po oshingoldo noponhele yoivela ohandi tula po oshisilveri, ponhele yomuti ohandi tula po oivela [itwima] noponhele yemanya oivela ilaula. Ombili ohandi i ningi epangelo loye, nouyuki ohandi u ningi omuyukifili woye.” Metwokumwe nexunganeko eli, eenghatu oda katukwa opo ku xwepopalekwe epashukilo loilonga yokuudifa yOuhamba nosho yo yokulifa oufita.
18, 19. Omayelifo opahangano ashike a ningwa momukokomoko womido?
18 Mo 1919 opa nangekwa omukwatelikomesho umwe woilonga meongalo keshe, olo la indila eunganeko loilonga yomomapya. Elongekido eli lipe ola xwameka oukalele wetu momapya. Okuhoololwa kwovakulunhuongalo novadiakoni okwa li kwa xulifwa po mo 1932, nosha didilikifa okweefa po kwetu omikalo dopaudemokoli. Mo 1938 okwa hangwa oshitwa shimwe vali sha fimana eshi ovayakuli aveshe meongalo va tamekwa okunangekwa she likolelela unene metwokumwe nomalongekido omanangeko opauteokratika omeongalo lotete lopaKriste. (Oilonga 14:23, NW; 1 Timoteus 4:14) Mo 1972 ovakulunhuongalo novayakuliongalo okwa li va nangekwa opo va longe, ngaashi ovalumenhu venya va li mokati kOvakriste votete kwa li hava longo. Ponhele yokukala ashike nomulumenhu umwe aeke oye e li omupashukili weongalo, Ovafilippi 1:1, nosho yo omishangwa dimwe otadi ulike kutya ovo va wanifa po oiteelelwa yopamishangwa yokukala ovapashukili aveshe kumwe ove li olutu lovakulunhuongalo.—Oilonga 20:28; Ovaefeso 4:11, 12.
19 Mo 1975 opa longekidwa eekomitiye dOlutuwiliki lEendombwedi daJehova di pashukile omalipyakidilo ehangano laKalunga mounyuni aushe. Kakele kaasho, opwa totwa Eekomitiye dOitaimbelewa di pashukile oilonga moitukulwa yado. Okudja opo elitulemo ola yandjwa kokupupaleka oilonga keembelewa da kula nosho yo koitaimbelewa yEhangano loWatch Tower opo ku ‘shilipalekwe oinima oyo ya fimana unene.’ (Ovafilippi 1:9, 10, NW) Oinakuwanifwa oyo i li komapepe ovafita ve li koshi yewiliko laKristus, oya kwatela mo okukwatela komesho moilonga yevangeli, okuhonga meongalo nosho yo okulifa oufita waKalunga.—1 Timoteus 4:16; Ovaheberi 13:7, 17; 1 Petrus 5:2, 3.
Ewiliko laJesus tali longo
20. Okukatukila pamwe nehangano laJehova otashi pula tu dimine shike kombinga yondodo yaJesus?
20 Okukatukila pamwe nehangano laJehova olo tali ende tali xumu komesho otashi pula tu dimine oilonga oyo Kalunga a pa Jesus Kristus e li “omutwe weongalo.” (Ovaefeso 5:22, 23) Osho shikonekwedi yo osho eshi hatu lombwelwa muJesaja 55:4: “Tala, Ame [Jehova] onde mu lenga a ninge ondombwedi kovanhu, a ninge ohamba nomupangeli koiwana.” Osha yela kutya Jesus oku shii nghee e na okuwilika. Oku shii yo eedi daye nosho yo oilonga yado. Doshili, eshi a konakona omaongalo aheyali muAsia Linini, okwa popya oikando itano ta ti: “Oilonga yoye ondi i shii.” (Ehololo 2:2, 19; 3:1, 8, 15) Jesus oku shii yo eemhumbwe detu, ngaashi naanaa Xe Jehova e di shii. Fimbo ina yandja Oshihopaenenwa sheilikano, Jesus okwa ti: “Xo yeni e shi shii eshi mwe shi pumbwa fimbo inamu mu indila.”—Mateus 6:8-13.
21. Ongahelipi ewiliko laJesus tali hololwa meongalo lopaKriste?
21 Ewiliko laJesus otali hololwa ngahelipi? Onghedi imwe okupitila movapashukili vopaKriste, “eeshali odo di li ovanhu.” (Ovaefeso 4:8, NW) Ehololo 1:16 otali ulike ovapashukili ovavaekwa ve li meke laKristus lokolulyo, hano koshi yewiliko laye. Kunena, Jesus ota wilike elongekido lovakulunhuongalo, kutya nee ovalumenhu va tya ngaha ove na eteelelo lomeulu ile olokombada yedu. Ngaashi sha yelifwa moshitukulwa sha tetekela, ova nangekwa po komhepo iyapuki metwokumwe noiteelelwa yopamishangwa. (1 Timoteus 3:1-7; Titus 1:5-9) Mefelemudo lotete, ongudu yovakulunhu muJerusalem muyo omo kwa li mwa fikama po olutuwiliki olo kwa li tali pashukile omalipyakidilo okuudifa Ouhamba. Kunena oshihopaenenwa sha faafana osho tashi shikulwa kehangano laJehova.
Katukila pamwe!
22. Olutuwiliki ohali yandje ekwafo lashike?
22 Kunena oinima yOhamba oye lineekelelwa “omupiya omudiinini nomunaendunge,” oo a fikama po mOlutuwiliki lEendombwedi daJehova. (Mateus 24:45-47) Oshinakuwanifwa shOlutuwiliki shotete osho okuyandja ehongo nosho yo ewiliko lopamhepo keongalo lopaKriste. (Oilonga 6:1-6) Ndelenee ngeenge ovalongelikalunga vakwao va kumwa koiponga inene yopaushitwe, Olutuwiliki ohali pula oshilongifo shopaveta shimwe ile i dulife pushimwe ku yandjwe omakwafo nosho yo okutungulula omaumbo nOmalupale Ouhamba oo a hanaunwa po. Ngeenge Ovakriste vonhumba tava ningwa nai ile tava hepekwa, ohaku katukwa eenghatu doku va ladipika pamhepo. Ndele ngeenge pa holoka ‘efimbo lii,’ ohaku ningwa eenghendabala keshe opo oilonga yokuudifa i kale tai xumu komesho.—2 Timoteus 4:1, 2.
23, 24. Kashi na nee mbudi kutya oshike tashi hange oshiwana shaye, oshike osho Jehova ha yandje alushe, notu na okukala twa tokola toko tu ninge shike?
23 Kashi na mbudi kutya oshike tashi hange oshiwana shaye, Jehova alushe oha yandje oikulya yopamhepo nosho yo omayele a pumbiwa. Kalunga oha yandje yo eendunge dokuyoolola nosho yo ounongo kovamwatate ovo ve na oshinakuwanifwa okulongekidila exumokomesho nosho yo omayelifo a wedwa po mokuunganeka oinima yopauteokratika. (Deuteronomion 34:9; Ovaefeso 1:16, 17) Jehova ohe tu pe osho twa pumbwa nope he na okufaula tu dule okuwanifa po oshilonga shetu shokuninga ovanhu ovahongwa nosho yo oukalele wetu mounyuni aushe.—2 Timoteus 4:5.
24 Otu na elineekelo filufilu kutya Jehova ke na fiku na ka ekeleshi oshiwana shaye shidiinini; ote ke shi xupifa “moudjuu unene” tau uya. (Ehololo 7:9-14, NW; Epsalme 94:14; 2 Petrus 2:9) Otu na omatomheno mahapu okukala nelineekelo olo twa kala nalo pehovelo fiyo okexulilo. (Ovaheberi 3:14) Onghee hano, natu kale twa tokolatoko tu katukile pamwe nehangano laJehova.
1. Omuvalu wovanhu mounyuni ou fike peni, novanhu vangapi va valulwa ve li oilyo yomalongelokalunga onhumba?
[Efano pepandja 11]
Ngaashi David, ihatu dulu okuvala oikumwifilonga yaJehova
[Efano pepandja 12]
Oshiwana shaKalunga osha kala tashi mono ouwa okudja momalunduluko e li pefimbo momilandu dopahangano
[Efano pepandja 15]
Oto nyamukula ngahelipi?
• Omolwashike hatu dulu okupopya kutya ehangano laJehova otali ende la yuka komesho?
• Ope na oumbangi washike oo tau ulike kutya oshiwana shaKalunga otashi hafele ouyelele wopamhepo oo tau xumu komesho?
• Ongahelipi pa kala tapa ningwa omalunduluko moukalele wopaKriste?
• Omalunduluko e li pefimbo elipi a kala taa ningwa momilandu dopahangano mokati kovapiya vaJehova?