Onghandangala ye likalekelwa oyo Jesus ta dana mokuwanifwa kwelalakano laKalunga
“Aame ondjila noshili nomwenyo; kape na ou te uya kuTate, ngenge hamuame ta pitile.” — JOH. 14:6.
1, 2. Omolwashike tu na okukala tu na ohokwe okukonakona onghandangala ye likalekelwa oyo Jesus ta dana mokuwanifwa kwelalakano laKalunga?
OKUDJA nale, ovanhu vahapu ova kala tava kendabala opo ngeno va kale va yooloka ko filufilu kovanhu vakwao, ndele havahapu va pondola mwaasho. Ope na oohandimwe vanini lela ovo tava dulu okupopya kutya ove likalekelwa monghedi yonhumba ile yongadi. Ndele Omona waKalunga, Jesus Kristus, okwe likalekelwa meenghedi dihapu.
2 Omolwashike tu na okukala tu na ohokwe monghandangala ye likalekelwa oyo Jesus ta dana? Omolwaashi onghandangala oyo Jesus ta dana oya kuma ekwatafano letu naTate yetu womeulu, Jehova. Jesus okwa ti: “Aame ondjila noshili nomwenyo; kape na ou te uya kuTate, ngenge hamuame ta pitile.” (Joh. 14:6; 17:3) Natu ka konakoneni eenghedi donhumba omo Jesus e li omunhu e likalekelwa. Osho otashi ke tu kwafela tu ude ko notu kale twa lenga onghandangala ye likalekelwa oyo Jesus ta dana mokuwanifwa kwelalakano laKalunga.
‘Omona Ewifa’
3, 4. (a) Omolwashike taku dulu okutiwa kutya Jesus okwe likalekelwa e li Omona ewifa? (b) Onghandangala ye likalekelwa ilipi Jesus a dana mokushitwa kwoinima?
3 Eshi Satana a li ta yeleke Jesus, okwa li a longifa outumbulilo “Omona waKalunga.” (Mat. 4:3, 6) Ndelenee Jesus ke fi ashike Omona waKalunga, ndele oku li “Omona waye Efiwa.” (Joh. 3:16, 18) Oshitya shOshigreka osho sha tolokwa “Ewifa” otashi ti “oye aeke woludi laye,” ile “e likalekelwa.” Jehova oku na ovanamati vopamhepo omamiliyona omafele. Ndele mbela omeityo lilipi Jesus e li oye aeke “woludi laye?”
4 Jesus okwe likalekelwa meityo olo kutya oye aeke a shitwa odikilila kuXe. Oye Omona waKalunga, omudalwa wotete. Oku li nokuli “Omudalwa wotete [woishitwa] aishe.” (Kol. 1:15) Oye “efina leshito laKalunga.” (Eh. 3:14) Omona Ewifa laKalunga okwa dana yo onghandangala ye likalekelwa mokushitwa kwoinima. Osho inashi hala okutya Jesus oku li Omushiti, ndele okwa longifwa kuJehova mokushita oinima ikwao aishe. (Lesha Johannes 1:3.) Omuyapostoli Paulus okwa ti: “Fye otu na Kalunga umwe, oTate, omuou mwa dja aishe, nefikilo letu omuye, nOmwene umwe, Jesus Kristus, omolwaou aishe i li po, nafye yo omolwaye.” — 1 Kor. 8:6.
5. Omishangwa oda ulika ngahelipi kutya Jesus oku li omunhu e likalekelwa?
5 Ope na natango eenghedi dihapu omo Jesus e li omunhu e likalekelwa. Ohatu hange mOmishangwa omadinafimaneko mahapu oo taa ulike konghandangala ye likalekelwa oyo Jesus ta dana mokuwanifwa kwelalakano laKalunga. Natu ka konakoneni omadinafimaneko amwe aJesus atano oo a longifwa mOmishangwa dopaKriste dOshigreka.
“Ondjovo”
6. Omolwashike Jesus a yeleka okwiifanwa “Ondjovo”?
6 Lesha Johannes 1:14. Omolwashike Jesus ta ifanwa ‘Ondjovo’? Edinafimaneko olo otali ulike konghandangala oyo Jesus a kala ta dana okudja eshi oishitwa ikwao inaendunge ya shitwa. Jehova okwa kala ta longifa Omona waye okuyandja omauyelele nosho yo omalombwelo kovanamati vakwao vaJehova vopamhepo. Eshi a li kombada yedu, okwa li yo ha lombwele ovanhu etumwalaka laKalunga. Oushili oo kutya Jesus okwa li Ondjovo ile tu tye Omupopikalelipo waKalunga, otau kolekwa keendjovo odo a li a lombwela Ovajuda, a ti: “Elongo lange kali fi lange, ndele laau a tuma nge. Ngenge pe na ou a hala okulonga ehalo laye, ota ka shiiva elongo, ngenge ola dja muKalunga, ile handi popi muame mwene.” (Joh. 7:16, 17) Eshi Jesus a shuna meulu okwa twikila okukala ta dana onghandangala e li “Ondjovo yaKalunga.” — Eh. 19:11, 13, 16.
7. Ongahelipi hatu dulu okuulika oukwatya welininipiko oo Jesus a ulika e li “Ondjovo”?
7 Mbela edinafimaneko olo ola kwatela mo vali shike? Nonande Jesus oye oshishitwa oshinaendunge unene e dule oishitwa ikwao yaJehova, iha kala e liameka keendunge daye mwene. Mepingafano naasho, oha hongo oinima oyo a hongwa kuXe noha yukifa alushe elitulemo kuJehova, ponhele yokuyukifa elitulemo kuye mwene. (Joh. 12:50) Jesus ine tu tulila po tuu oshihopaenenwa shiwa! Nafye otwe lineekelelwa oufembanghenda munene ‘wokuudifa eenghundana diwa.’ (Rom. 10:15) Onghee hano, oshihopaenenwa shaJesus shelininipiko oshi na oku tu linyengifa tu henuke oikala yokukala hatu xumifa komesho omadiladilo etu vene. Ngeenge hatu udifa etumwalaka lopamishangwa olo tali xupifa eemwenyo, katu na “okukoya kombada yasho sha shangwa.” — 1 Kor. 4:6.
“Amen”
8, 9. (a) Oshitya “amen” osha hala okutya ngahelipi, nomolwashike Jesus ta ifanwa “Amen”? (b) Onghandangala ilipi Jesus a dana e li “Amen”?
8 Lesha Ehololo 3:14. Omolwashike Jesus ta ifanwa “Amen”? “Amen” oshitya shOshiheberi osho tashi ti “nashi kale ngaho” ile “oshoshili.” Osha dja koshitya shOshiheberi shopefina osho tashi ti “kala omudiinini” ile “omulineekelwa.” Oshitya osho shopefina ohashi longifwa yo okuulika koudiinini waJehova. (Deut. 7:9; Jes. 49:7) Onghandangala ye likalekelwa ilipi Jesus ta dana e li “Amen”? Didilika nghee 2 Ovakorinto 1:19, 20 tava nyamukula epulo olo, tava ti: “Omona waKalunga Kristus Jesus, Oye ou a udifwa mokati keni kufye, . . . oye ke fi ‘heeno’ na ‘ahowe’, ndelenee muye omwa dja ‘heeno.’ Osheshi keshe apa omuvalu womaudaneko aKalunga apa u fike, aeshe oku li muye ‘heeno’, onghee hano muye tamu di ‘amen’ yao kefimano laKalunga kufye.”
9 Jesus oku li “Amen” komaudaneko aeshe aKalunga. Okukalamwenyo kwaye kwokombada yedu e li omunhu oo a li ehe na oshipo, mwa kwatelwa efyo laye lopayambo, okwe shi ninga tashi shiiva opo omaudaneko aeshe aJehova Kalunga a kale taa wanifwa. Oudiinini waJesus owa nyaneka pomutenya omapopyo oipupulu aSatana eshi a tile kutya ovapiya vaKalunga itava ka kala ovadiinini kuKalunga ngeenge va hepa, tava mono oixuna ile ngeenge tava yelekwa, ngaashi sha shangwa membo laJob. (Job 1:6-12; 2:2-7) Mokati koishitwa aishe yaKalunga, Omona waye omudalwa wotete oye aeke a li ta dulu okunyaneka pomutenya filufilu oipupulu yaSatana. Kakele kaasho, Jesus okwa ulika filufilu kutya okwa ama kombinga yaXe Jehova momhata inenenene i na sha nounamapangelo weshito alishe.
10. Ongahelipi hatu dulu okuhopaenena Jesus e li “Amen”?
10 Ongahelipi hatu dulu okuhopaenena Jesus e li “Amen”? Omokukala ovadiinini kuJehova nokuyambidida ounamapangelo waye. Kungaho, ohatu katuka metwokumwe neindilo laJehova lopahole tali hangwa mOmayeletumbulo 27:11, olo tali ti: “[Kala] u neendunge, omumwange, hafifa omutima wange, opo nee handi dulu okunyamukula [ou ta lundile nge, NW].”
“Omupokati wehangano lipe”
11, 12. Onghandangala ilipi Jesus a dana e li Omupokati?
11 Lesha 1 Timoteus 2:5, 6. Jesus oku li ‘omupokati wovanhu naKalunga.’ Oku li yo “Omupokati wehangano lipe.” (Heb. 9:15; 12:24) Moses naye okwa popiwa yo e li omupopili ile omupokati wehangano lOmhango. (Gal. 3:19) Omeityo lilipi Jesus ta dana onghandangala ye likalekelwa e li Omupokati?
12 Oshitya shOshigreka osho sha tolokwa “omupokati” ohashi longifwa moinima yopaveta. Kungaho, otashi ulike kutya Jesus oku li Omupokati paveta (ile tu tye omupopili) wehangano lipe olo le shi ninga tashi shiiva opo pa totwe oshiwana shipe, ‘Israel yaKalunga.’ (Gal. 6:16) Oshiwana osho osha fikama po mOvakriste ovavaekwa, ovo ve li ‘ongudu youpristeri pauhamba’ nove na eifano lokuya meulu. (1 Pet. 2:9; Ex. 19:6) Ehangano lOmhango olo Moses a li omupokati walo, kala li la dula okweetifa po oshiwana sha tya ngaho.
13. Onghandangala oyo Jesus ta dana e li Omupokati oya kwatela mo shike?
13 Onghandangala oyo Jesus ta dana e li Omupokati oya kwatela mo shike? Jehova oha longifa ongushu yohonde yaJesus okuyukipalifa pamhango ovanhu ovo hava ningi oilyo yehangano lipe. (Rom. 3:24; Heb. 9:15) Kungaho, ohe va tale ko va wana okuninga eehamba novapristeri meulu. Jesus e li Omupokati wavo, ohe va kwafele va kale va koshoka koshipala shaKalunga. — Heb. 2:16, OB-1986.
14. Omolwashike Ovakriste aveshe ve na okukala va lenga onghandangala oyo Jesus ta dana e li Omupokati, kashi na nee mbudi kutya ove na eteelelo lilipi?
14 Ongahelipi kombinga yaavo vehe li oshitukulwa shehangano lipe, ovo ve na eteelelo loku ka kala nomwenyo fiyo alushe kombada yedu? Nonande ovanhu va tya ngaho kave fi oshitukulwa shehangano lipe, ohava mono ouwa okupitila mulo. Ohava diminwa po omatimba avo nokuyukipalifwa va kale yo ookaume kaKalunga. (Jak. 2:23; 1 Joh. 2:1, 2) Kashi na nee mbudi kutya otu na eteelelo lokuya meulu ile oloku ka kala kombada yedu, atusheni otu na etomheno liwa okukala twa lenga onghandangala ye likalekelwa oyo Jesus ta dana e li Omupokati wehangano lipe.
‘Omupristeri Omukulunhu’
15. Onghandangala oyo Jesus ta dana e li Omupristeri Omukulunhu oya yooloka ko ngahelipi kwaayo yovalumenhu aveshe ovo va kala tava longo ve li ovapristeri ovakulunhu mondjokonona?
15 Opa kala ovalumenhu vahapu mondjokonona ovo va li ovapristeri ovakulunhu. Ndele omolwashike taku dulu okutiwa kutya onghandangala oyo Jesus ta dana e li Omupristeri Omukulunhu oye likalekelwa? Paulus okwe shi yelifa nawa eshi a ti: “[Jesus] ita pumbwa ngaashi ovapristeri ovakulunhu, okuyamba keshe efiku, tete omolwomatimba aye mwene, opo nee a yambe omolwomatimba oshiwana. Osheshi Oye e shi ninga lumwe aluke, eshi e liyandja Ye mwene eyambo. Osheshi omhango otai nangeke moupristeri ovakulunhu ovanhu va nyika oungone, ndelenee ondjovo ei yeano, oyo ya shikula omhango, otai nangeke Omona ou a ningwa a wana a pwa fiyo alushe.” — Heb. 7:27, 28.a
16. Omolwashike ekuliloyambo laJesus le likalekelwa?
16 Jesus okwa li omunhu a wanenena ngaashi naanaa Adam fimbo a li ina nyona. (1 Kor. 15:45) Kungaho, Jesus oye aeke a li ta dulu okuyandja ekuliloyambo le lixwa po nola wanenena lumwe aluke ndele opuwo. Pamhango yaMoses, omayambo okwa li haa yambwa efiku keshe. Omayambo aeshe nosho yo oilonga youpristeri oya li tai faneke onghandangala oyo Jesus a li ta ka dana. (Heb. 8:5; 10:1) Onghee hano, oupristeri waJesus owe likalekelwa molwaashi okwa pondola shihapu, noku li Omupristeri Omukulunhu ta kalelele.
17. Omolwashike tu na okukala twa lenga onghandangala oyo Jesus ta dana e li Omupristeri Omukulunhu, nongahelipi hatu dulu oku shi ulika?
17 Otwa pumbwa oilongayakulo yaJesus e li Omupristeri Omukulunhu opo tu kale twa koshoka koshipala shaKalunga. Jesus ke fi tuu Omupristeri Omukulunhu a denga mbada! Paulus okwa ti: “Omupristeri wetu omukulunhu haye ou, e he uditile oungone wetu olukeno, ndelenee oye ou a shindwa moinima aishe ngaashi fye, ndelenee ke netimba.” (Heb. 4:15) Okukala tu udite ko onghandangala oyo Jesus ta dana e li Omupristeri Omukulunhu oshi na oku tu linyengifa ‘tuhe likalele vali fye vene, ndele tu kalele ou e tu fila.’ — 2 Kor. 5:14, 15; Luk. 9:23.
‘Oludalo’ la udanekwa
18. Exunganeko lilipi Kalunga a li a xunganeka konima eshi Adam a nyona, nouyelele wa wedwa po ulipi Kalunga a li a holola mokweendela ko kwefimbo shi na sha nexunganeko olo?
18 Eshi ounhu wa li pokukanifa keshe shimwe moshikunino shaEden, mwa kwatelwa ekwatafano liwa naKalunga, omwenyo waalushe, elao lashili nosho yo Oparadisa, Jehova Kalunga okwa li a udaneka kombinga yOmuxupifi. Omuxupifi oo okwa popiwa muGenesis 3:15 e li ‘oludalo.’ Oludalo olo ola kala tali popiwa momaxunganeko mahapu Ombibeli momukokomoko wefimbo. Ola li tali ka dja mepata laAbraham, Isak naJakob. Okwa li yo kwa xunganekwa kutya oludalo olo otali ka dja mepata lohamba David. — Gen. 21:12; 22:16-18; 28:14; 2 Sam. 7:12-16.
19, 20. (a) Olyelye e li Oludalo la udanekwa? (b) Omolwashike taku dulu okutiwa kutya oludalo la udanekwa ola kwatela mo vamwe shihe fi ashike Jesus?
19 Oludalo olo la udanekwa ola li lyelye? Enyamukulo kepulo olo otali hangwa mOvagalati 3:16. (Lesha.) Lwanima metukulwa olo tuu olo, omuyapostoli Paulus okwa li a popya shi na sha nOvakriste ovavaekwa a ti: “Ndele onye ngenge vaKristus, onye yo oludalo laAbraham novafyuululi paudaneko.” (Gal. 3:29) Omolwashike taku tiwa kutya Kristus oye Oludalo la udanekwa, nonande mOludalo olo omwa kwatela yo vamwe?
20 Ope na ovanhu omamiliyona ovo have liti kutya ova dja mepata laAbraham. Vamwe ohava ti nokuli kutya ove li ovaprofeti. Omalongelokalunga amwe ohaa fimaneke ovaprofeti ovo taku tiwa kutya ova dja mepata laAbraham. Ndele mbela osho osha hala kutya ovanhu aveshe va tya ngaho ove li oshitukulwa shOludalo la udanekwa? Hasho nandenande. Omuyapostoli Paulus okwa li a nwefwa mo a yelife kutya haaveshe ovo va dja mepata laAbraham ve li oshitukulwa shOludalo olo la udanekwa. Oludalo lovana vaAbraham vamwe kala li la longifwa opo li nangeke noupuna ounhu. Oludalo olo la li tali ka eta omanangeko noupuna ola li tali ka dja muIsak aeke. (Heb. 11:18) Hauxuuninwa, omunhu ashike umwe, Jesus Kristus, a li a ninga oshitukulwa sha fimanenena sholudalo olo la udanekwa, oo epata omo a dja la ndjadjukununwa nawa mOmbibeli okudja kuAbraham.b Ovo lwanima va ka ninga oshitukulwa oshitivali sholudalo laAbraham ova ninga ashike oshitukulwa sholudalo olo molwaashi va ninga “vaKristus.” Onghee hano, Jesus okwa dana onghandangala ye likalekelwa shili mokuwanifa po exunganeko lomuGenesis 3:15.
21. Oshike she ku kuma unene eshi we lihonga kombinga yonghandangala ye likalekelwa oyo Jesus ta dana mokuwanifwa kwelalakano laJehova?
21 Oshike twe lihonga mokukonakona pauxupi kombinga yonghandangala ye likalekelwa oyo Jesus ta dana mokuwanifwa kwelalakano laJehova? Otwe lihonga kutya Omona ewifa laKalunga okwa kala e likalekelwa okudja pokushitwa kwaye. Oye aeke woludi laye. Ndele Omona waKalunga, oo a li e likalekelwa, okwa kala alushe e lininipika noha longo ehalo laXe Kalunga naashi a li kombada yedu. Ka li nande ha kongo efimano laye mwene. (Joh. 5:41; 8:50) Ka li tuu e tu tulila po oshihopaenenwa shiwa! Ngaashi Jesus, nafye natu shi ninge elalakano letu ‘okuninga ashishe okufimanekifa Kalunga.’ — 1 Kor. 10:31.
[Omashangelo opedu]
a Omuhongwanhu umwe wOmbibeli okwa ti kutya oshitya osho sha tolokwa “lumwe aluke” otashi yandje ediladilo kutya “efyo laKristus ola yooloka ko ile ole likalekelwa.” Oshinima osho oshi li ehongo la fimana mOmbibeli.
b Nonande Ovajuda vomefelemudo lotete O.P. ova li tava diladila kutya otava ka kala oshiwana sha hokiwa kuKalunga molwaashi ve li oludalo laAbraham lopambelela, ova li va teelela ashike omunhu umwe oo a li ta ka ninga Messias, ile tu tye, Kristus. — Joh. 1:25; 7:41, 42; 8:39-41.
Oto dimbuluka?
• Oshike we lihonga momadinafimaneko aJesus kombinga yonghandangala ye likalekelwa oyo ta dana? (Tala oshimhungu.)
• Ongahelipi hatu dulu okuhopaenena Omona waJehova e likalekelwa?
[Oshimhungu/Efano pepandja 23]
Omadinafimaneko amwe aJesus oo taa ulike konghandangala ye likalekelwa oyo a dana mokuwanifwa kwelalakano laKalunga
◼ Omona ewifa. (Joh. 1:3) Jesus oye aeke a shitwa odikilila kuXe.
◼ Ondjovo. (Joh. 1:14) Jehova oha longifa Omona e li Omupopikalelipo waye wokuyandja ouyelele nomalombwelo koishitwa ikwao.
◼ Amen. (Eh. 3:14) Okukalamwenyo kwaJesus kwokombada yedu e li omunhu oo a li ehe na oshipo, mwa kwatelwa efyo laye lopayambo, okwe shi ninga tashi shiiva opo omaudaneko aeshe aJehova Kalunga a kale taa wanifwa.
◼ Omupokati wehangano lipe. (1 Tim. 2:5, 6) Jesus oku li Omupokati wehangano lipe paveta olo le shi ninga tashi shiiva opo pa totwe oshiwana shipe, ‘Israel yaKalunga,’ osho sha fikama po mOvakriste ovo ve li ‘ongudu youpristeri pauhamba’ nove na eifano lokuya meulu. — Gal. 6:16; 1 Pet. 2:9.
◼ Omupristeri omukulunhu. (Heb. 7:27, 28) Jesus oye aeke a li omunhu oo ta dulu okuyandja ekuliloyambo la wanenena lumwe aluke ndele opuwo. Nokungaho, ota dulu okukosha po omatimba etu noku tu mangulula mefyo.
◼ Oludalo la udanekwa. (Gen. 3:15) Omunhu ashike umwe, Jesus Kristus, a li a ninga oshitukulwa sha fimanenena sholudalo olo la udanekwa. Ovo lwanima va ka ninga oshitukulwa oshitivali sholudalo laAbraham ova ninga ashike oshitukulwa sholudalo olo pakanghameno laashi va ninga “vaKristus.” — Gal. 3:29.