“Lifeni oufita waKalunga mwe u pewa”
“Lifeni oufita waKalunga mwe u pewa, hakefininiko, ndelenee [onehalo] liwa.” — 1 PET. 5:2.
1. Ovakriste ova li va taalela eenghalo dilipi eshi Petrus a shanga onhumwafo yaye yotete?
FIMBO omupangeli waRoma wedina Nero a li ina hovela okuhepeka Ovakriste ovo va li muRoma, omuyapostoli Petrus okwa li a hangwa a shanga onhumwafo yaye yotete. Osho okwa li e shi ninga opo a pameke ovaitaveli vakwao. Ondiaboli oya li tai “dingilile” Ovakriste ya hala oku va xwaka po. Ovakriste ovo ova li va pumbwa okukala “nelidiliko” ‘nokulininipika koshi yeke li neenghono laKalunga’ opo va dule okukondjifa Ondiaboli nouladi. (1 Pet. 5:6, 8) Ova li va pumbwa okukala ve na elongelokumwe nova li yo ve na okuhenuka okukala tava ‘lumatafana nokulyaafana’ meityo lopafaneko, molwaashi osho osha li tashi dulu oku va ningifa va “manafane po filu.” — Gal. 5:15.
2, 3. Otu na okukondjifa lyelye, noshike hatu ka kundafana moitukulwa ei ivali?
2 Nafye kunena otwa taalela eenghalo da faafana naado dOvakriste vopefimbo lonale. Ondiaboli ohai kongo eemhito opo i tu xwake po. (Eh. 12:12) Shimwe vali, monakwiiwa i li popepi otaku ke uya “oudjuu unene, inau kala ko okehovelo lounyuni.” (Mat. 24:21) Ngaashi ashike Ovakriste vomefelemudo lotete va li ve na okuhenuka eenhamanana ile okukondjifafana, nafye otu na okuhenuka oinima oyo. Ndele opo tu pondole, omafimbo amwe otwa pumbwa ekwafo lovakulunhuongalo va pyokoka.
3 Natu ka taleni nghee ovakulunhuongalo tava dulu okuhapupalifa olupandu lavo li na sha noufembanghenda oo ve na ‘wokulifa oufita waKalunga oo va pewa.’ (1 Pet. 5:2) Opo nee, ohatu ka konakona shi na sha nonghedi ya yuka omo ve na okuwanifa po oshilonga shavo shoufita. Moshitukulwa tashi landula, ohatu ka konakona kombinga yanghee eongalo tali dulu ‘okupandula ava hava longo noudiinini mokati ketu nohave tu kwatele komesho.’ (1 Tes. 5:12, yelekanifa no-NW) Okukonakona oinima oyo otashi ke tu kwafela tu kondjife nouladi Omutondi wetu munene oo te tu lwifa. — Ef. 6:12.
Lifeni oufita waKalunga
4, 5. Ovakulunhuongalo ove na okutala ko ngahelipi oufita? Shi yelifa.
4 Petrus okwa li a ladipika ovakulunhuongalo vomefelemido lotete va kale hava tale ko oufita oo ve lineekelelwa ngaashi Kalunga he u tale ko. (Lesha 1 Petrus 5:1, 2.) Nonande Petrus okwa li a talwa ko e li ongudi yeongalo, ka li ha popi novakulunhuongalo vakwao nodino, ta ulike ngeno kutya okwa fimana e va dule. Ndele ngeenge a li te va kumaida okwa li ha popi navo nefimaneko ngaashi naanaa ta popi novakulunhuongalo vakwao. (Gal. 2:9) Ngaashi Petrus a li ha ningi, Olutuwiliki nalo ohali kumaida ovakulunhuongalo kunena va kendabale okuwanifa po oshinakuwanifwa shavo sha kwata moiti shokulifa oufita waKalunga.
5 Omuyapostoli Petrus okwa li a lombwela ovakulunhuongalo vomefelemudo lotete kutya nava ‘life oufita waKalunga oo va pewa.’ Osha li sha fimanenena kuvo okudimbuluka kutya oufita owaJehova naJesus Kristus. Onghee hano, ovakulunhuongalo ove na oku ke lihokolola kuKalunga shi na sha nonghedi omo hava pashukile oufita waye. Natu tye nee ngeno kaume koye kopofingo okwe ku fiila ounona vaye ofimbo a dja po. Mbela ito ka fila oshisho ounona vaye noku va palula? Ngeenge kamwe oka vele, mbela ito ka shilipaleka kutya oka mona ekwafo lopaunamiti? Sha faafana, ovakulunhuongalo navo ove na ‘okulifa eongalo laKalunga, e li lilikolela nohonde [yOmona waye, NW].’ (Oil. 20:28) Ohava kaleke alushe momadiladilo oushili oo kutya odi keshe oya landwa nohonde yaJesus Kristus i na ondilo. Kakele kaasho, molwaashi ovakulunhuongalo ove na oku ke lihokolola kuKalunga, ohava palula eedi, have di amene nohave di file oshisho.
6. Ovafita vopefimbo lonale ova li ve na oinakuwanifwa ilipi?
6 Diladila kombinga yoinakuwanifwa oyo ya li hai kala i niwe kovafita voimuna vopefimbo lOmbibeli. Ova li have lididimikile omutenya nosho yo outalala opo va dule okufila oshisho oufita. (Gen. 31:40) Ova li yo hava tula eemwenyo davo moshiponga opo va amene eedi davo. Pashihopaenenwa, eshi David a li omufita omunyasha okwa li a amena eedi daye koilyani, mwa kwatelwa onghoshi nemwangha. Okwa ti: ‘Onde i kwata keendjedi dayo nonde i denga poshi ndele handi i dipaa.’ (1 Sam. 17:34, 35) David ka li tuu ependa! Nonande okwa li hanga a like po koilyani oyo, osho kasha li she mu shololifa aha xupife eedi daye.
7. Ongahelipi ovakulunhuongalo tava dulu okunyekula pafaneko eedi mokanya kaSatana?
7 Kunena, ovakulunhuongalo ove na okwaamena oufita komaponokelo Ondiaboli oo taa faafanifwa naao onghoshi. Osho otashi dulu okukala sha kwatela mo okukatuka eenghatu nouladi opo va dule okunyekula pafaneko eedi mokanya kOndiaboli. Ovakulunhuongalo otava dulu okuxupifa eedi mokukwata pafaneko oshilyani keendjedi. Pashihopaenenwa, otashi dulika va kale tava tomhafana novamwatate ovo va kofa pamhepo, ovo ve li pokukwatwa keemwiyo daSatana. (Lesha Judas 22, 23.) Ndele nande ongaho, ovakulunhuongalo itava dulu okupondola moshinima osho nopehe na ekwafo laJehova. Onghee hano, ohava ungaunga pahole needi odo da yahamekwa, tave di mange noku di vaeka omaadi omEendjovo daKalunga.
8. Ovakulunhuongalo ove na okuwilika eedi di ye peni, nongahelipi tava dulu oku shi ninga?
8 Omufita weedi do venevene ohe di wilike yo opo e di twale konhele oko ku na oulifilo muwa nomeva. Sha faafana, ovakulunhuongalo navo ohava wilike eedi di ye keongalo, have di ladipike di kale hadi kala pokwoongala pandjikilile opo di dule okukala da paluka nawa nokupewa “oikulya pefimbo [la wapala, NW].” (Mat. 24:45) Ovakulunhuongalo otashi dulika va pumbwa okukala oule wefimbo lonhumba naavo tava vele pamhepo opo ve va kwafele va kale va lenga Eendjovo daKalunga. Pashihopaenenwa, odi oyo ya kana otashi dulika i kale tai kendabala okwaalukila koufita. Onghee hano, ovakulunhuongalo ove na okuyelifila pahole omumwatate oo omifikamhango dOmbibeli noku mu ulikila nghee e na oku di tula moilonga mokukalamwenyo kwaye, ponhele yoku mu mbadapaleka.
9, 10. Ongahelipi ovakulunhuongalo ve na okufila oshisho ovo tava vele pamhepo?
9 Ngeenge to vele, mbela oto ka kala wa hala okuhakulwa kundokotola a tya ngahelipi? Mbela okwaau ta pwilikine ashike kwoove kanini opo nee te ku shangele divadiva omiti opo u dje po puye pe uye omunaudu umwe vali? Ile ponhele yaasho oto ka ya kundokotola oo ta pwilikine kwoove, ndele te ku yelifile osho to vele nosho yo ouhaku oo tau dulu oku ku kwafela?
10 Sha faafana, ovakulunhuongalo navo otava dulu okupwilikina kwaao ta vele pamhepo nokukendabala okuhakula oshipute shaye, nokungaho otave mu “vaeke omaadi medina lOmwene” pafaneko. (Lesha Jakob 5:14, 15.) Ngaashi omaadi abalsam okuGilead, Eendjovo daKalunga nado ohadi tulumukifa ovo tava vele pamhepo. (Jer. 8:22; Hes. 34:16) Ngeenge omafinamhango Ombibeli okwa tulwa moilonga, otaa dulu okukwafela ovo va nghundipala pamhepo va dule vali okuninga omatokolo oo tae ke va kwafela va longele Jehova pauyadi. Ovakulunhuongalo otava dulu shili okulonga ouwa muhapu ngeenge ova pwilikine kwaasho omunaudu te lipula nasho nokwiilikana pamwe naye.
Inamu shi ninga kefininiko, ndele onehalo liwa
11. Oshike hashi linyengifa ovakulunhuongalo va life oufita waKalunga nehalo liwa?
11 Petrus okwa li natango a dimbulukifa ovakulunhuongalo nghee ve na okulifa oufita nosho yo osho va li ve na okuhenuka. Ovakulunhuongalo ove na okulifa oufita waKalunga ‘nehalo liwa ndele hakefininiko.’ Oshike hashi linyengifa ovakulunhuongalo va yakule ovamwaxe nehalo liwa? Mbela oshike sha li she linyengifa Petrus a life noku palule eedi daJesus? Oshinima sha fimanenena osho sha li she mu linyengifa osho ohole yaye yokuhola Omwene waye. (Joh. 21:15-17) Omolwohole, ovakulunhuongalo kave na “[okulikalela] vali vo vene, ndelenee Oye tuu ou e va fila.” (2 Kor. 5:14, 15) Kakele kokukala ve hole Jesus, ove hole yo Kalunga nosho yo ovamwaxe, nohole ya tya ngaho ohai ve linyengifa va yakule oufita, tava longifa oiniwe yavo nosho yo efimbo lavo nohashi va pula yo va ninge eenghendabala da mana mo. (Mat. 22:37-39) Ndele nande ongaho, ohave liyambe nehalo liwa ndele hanomunyengutima.
12. Omuyapostoli Paulus okwa li a yakula ovamwaxe fiyo oposhitwa shilipi?
12 Ovakulunhuongalo ove na okuyambidida vamwe fiyo oposhitwa shilipi? Ngeenge ovakulunhuongalo tava file oshisho eedi otava hopaenene omuyapostoli Paulus, oo a li yo a hopaenena Jesus. (1 Kor. 11:1) Molwaashi Paulus novaendi pamwe naye ova li ve hole ovamwaxe vokuTessalonika, ova li va halelela okuyandja ‘eemwenyo davo omolwavo ndele havangeli laKalunga alike.’ Osho osha li she va kwafela va kale ovanambili “ngaashi ina omunyamifi ha tekula ouhanana vaye.” (1 Tes. 2:7, 8) Paulus okwa li e shii kutya omudalakadi oha kala e uditile ngahelipi okahanana kaye. Omudalakadi oha ningi keshe osho sha pumbiwa opo a kwafele okahanana kaye, mwa kwatelwa okupenduka mokati koufiku opo e ka nyamife.
13. Ovakulunhuongalo ova pumbwa okukala ve na ondjele ngeenge tashi uya poinima ilipi?
13 Ovakulunhuongalo ova pumbwa okukala nondjele ngeenge tashi uya pokuwanifa po oinakuwanifwa yavo youfita nosho yo yomaukwaneumbo avo. (1 Tim. 5:8) Efimbo li nondilo olo ovakulunhuongalo hava longifa mokuungaunga noinima yeongalo ova li tava dulu ngeno oku li longifa mokukala nomaukwaneumbo avo. Onghedi imwe omo tava dulu okuwanifa po oinakuwanifwa yavo oyo yopavali pandjele omokukala vaha shivi vamwe kElongelokalunga lOukwaneumbo wavo omafimbo amwe. Oule womido donhumba, omukulunhuongalo wedina Masanao wokuJapan okwa kala ha shivi ovamwaxe ovo vehe na ookaume kopahombo nosho yo omaukwaneumbo oo omitwe dao dihe li moshili ve uye va ninge ekonakono loukwaneumbo pamwe navo. Mokweendela ko kwefimbo, vamwe vomwaavo a li a kwafela navo ova ka ninga ovakulunhuongalo nova li va hopaenena oshihopaenenwa shaye shiwa.
Lifeni oufita waKalunga nehalo liwa, ndele hamolweliko la kaka
14, 15. Omolwashike ovakulunhuongalo ve na okuhenuka okulalakanena ‘eliko la kala,’ nongahelipi tava dulu okuhopaenena Paulus moshinima osho?
14 Petrus okwa li yo a ladipika ovakulunhuongalo va life oufita ‘nehalo liwa ndele hamolweliko la kaka.’ Oshoshili kutya ohashi pula efimbo lihapu opo ovakulunhuongalo va wanife po oilonga yavo, ndele nande ongaho, kave na okukala va teelela va pewe ofuto yasha. Petrus okwa li e wete sha pumbiwa okulondwela ovakulunhuongalo vakwao va henuke okuya momwiyo wokulifa oufita ‘omolweliko la kaka.’ Oikala ya tya ngaho oi liwetikile mokukalamwenyo kwoudjeko kwovawiliki vomalongelokalunga ‘aBabilon shinene,’ ovo va ningifa ovanhu vahapu va kale moluhepo. (Eh. 18:2, 3) Onghee hano, ovakulunhuongalo kunena ove na etomheno liwa lokuhenuka oikala ya tya ngaho.
15 Paulus okwa tulila po ovakulunhuongalo Ovakriste oshihopaenenwa shiwa. Nonande Paulus okwa li omuyapostoli nokwa li ta dulu ‘okutwika omutengi mudjuu’ Ovakriste vomuTessalonika, ka li a “lya omungome oshali pomunhu nande oumwe.” Ndele ponhele yaasho, okwa “kala nokulonga noudjuu oufiku nomutenya.” (2 Tes. 3:8) Ovakulunhuongalo vahapu vokunena, mwa kwatelwa ovo ve li moilonga youtumwa, ova tula po oshihopaenenwa shiwa moshinima osho. Nonande ohava tambula ko nehafo ekwafo olo hava pewa kovaitaveli vakwao, ihava ‘etele nande umwe oudjuu.’ — 1 Tes. 2:9.
16. Okulifa oufita ‘nehalo liwa’ otashi ti shike?
16 Ovakulunhuongalo ohava lifa oufita ‘nehalo liwa,’ naasho oshi liwetikile momaliyambo oo hava ningi opo va kwafele oufita. Ndele osho inashi hala kutya ovakulunhuongalo ove na okufininika vamwe va longele Jehova ile ve va ladipike ve mu longele ve na omhepo yefiyafanepo. (Gal. 5:26, NW) Ovakulunhuongalo ove shii kutya odi keshe oi na omaukwatya ayo e likalekelwa nohava kala va halelela okukwafela ovamwaxe opo va longele Jehova nehafo.
Inamu pangela oufita, ndele ningeni ovahopaenenwa
17, 18. (a) Omolwashike omafimbo amwe ovayapostoli va li hava mono shidjuu okuuda ko osho Jesus e va honga shi na sha nelininipiko? (b) Otashi dulika nafye tu kwatwe keamo lilipi?
17 Ngaashi twe shi kundafana nale, ovakulunhuongalo ove na okudimbulukwa alushe kutya oufita oo tava lifa owaKalunga, ndele kau fi wavo. Ove na yo okulungama vaha ‘pangele ngaashi omalenga ava [ve] va pewa’ kuKalunga. (Lesha 1 Petrus 5:3.) Omafimbo amwe, ovayapostoli vaJesus ova li hava lalakanene oinakuwanifwa ve na omalinyengotomheno a puka. Ova li va hala okukala ve na eendodo da tya ngaho va fa ovapangeli voiwana. — Lesha Markus 10:42-45.
18 Ovamwatate ovo tava ‘ningi eenghendabala va kale noshilonga shokupashukila’ kunena, otashi ka kala shiwa ngeenge ove likonakona tete va tale kutya omolwashike va hala okupewa oshilonga osho. (1 Tim. 3:1, NW) Ovakulunhuongalo ove na okulikonakona paushili va tale ngeenge pamwe ove na oikala yokulongifa nai eenghonopangelo ile va hala okukala va tumbula ngaashi ovayapostoli vamwe vopefimbo lonale va li va ninga. Ngeenge ovayapostoli vamwe navo ova li va wila momwiyo wokukala va hala etumbalo, osha yela kutya ovakulunhuongalo ove na okudimina kutya ova pumbwa okulonga noudiinini opo va henuke eamo keshe lounyuni lokupangela vamwe.
19. Ovakulunhuongalo ove na okudimbuluka shike ngeenge tava amene oufita?
19 Omafimbo amwe, ovakulunhuongalo ohava kala va pumbwa shili okukatuka eenghatu da kwata moiti, ngaashi ngeenge tava amene oufita ‘komambungu haa lyana.’ (Oil. 20:28-30) Paulus okwa li a lombwela Titus a kale ta ‘kumaida nokuhanyena neenghono adishe.’ (Tit. 2:15) Ndele nonande ovakulunhuongalo ove na okukumaida nokuhanyena vamwe, ohava kendabala va ungaunge navo nefimaneko. Ove shii kutya luhapu ohava pondola okuhanga omitima davamwe noku ve linyengifa va ende mondjila ya yuka ngeenge ova tomhafana navo pahole ponhele yoku va kembaula.
20. Ongahelipi ovakulunhuongalo tava dulu okuhopaenena Jesus mokutulila po vamwe oshihopaenenwa shiwa?
20 Oshihopaenenwa shiwa shaJesus ohashi linyengifa ovakulunhuongalo va kale ve hole oufita. (Joh. 13:12-15) Omitima detu ohadi kala da tunhukwa ngeenge hatu lesha shi na sha nanghee Jesus a li ha hongo ovahongwa vaye ngeenge ve li moilonga yokuudifa nokuninga ovanhu ovahongwa. Elininipiko laye ola li la kuma omitima dovahongwa vaye nole ve linyengifa va kale ve ‘nelininipiko nakeshe umwe a tale ko mukwao e li komesho yaye.’ (Fil. 2:3) Ovakulunhuongalo vokunena navo ohave linyengifwa va shikule oshihopaenenwa shaJesus, naasho ohashi va ningifa va kale va hala okukala “ovahopaelelwa voufita.”
21. Ovakulunhuongalo otava ka pewa ondjabi ilipi?
21 Konima eshi Petrus a mana okukumaida ovakulunhuongalo okwa li a popya shi na sha neudaneko lomonakwiiwa. (Lesha 1 Petrus 5:4.) Ovapashukili ovavaekwa otava ka pewa “oshishani shefimano itashi lembe” pamwe naKristus meulu. Ovafita ovo ve li ‘eedi dimwe,’ ovo ve li koshi yewiliko lovavaekwa, otava ka kala ve na oufembanghenda wokulifa oufita waKalunga kombada yedu koshi yepangelo ‘lOmufita omukulunhu.’ (Joh. 10:16, OB-1986) Oshitukulwa tashi landula otashi ka kundafana eenghedi omo oilyo yeongalo tai dulu okuyambidida ovo va nangekwa po va kwatele komesho meongalo.
Omapulo eendululo
• Omolwashike sha li sha yuka eshi Petrus a li a kumaida ovakulunhuongalo vakwao va life oufita waKalunga oo va pewa?
• Ongahelipi ovakulunhuongalo ve na okulifa ovo tava vele pamhepo?
• Oshike hashi linyengifa ovakulunhuongalo va life oufita waKalunga oo va pewa?
[Efano pepandja 21]
Ngaashi ovafita veedi vopefimbo lonale, ovakulunhuongalo ove na okwaamena ‘eedi’ odo di li mepashukilo lavo