Etukulwa etimilongo mbali nalimwe
Elalakano laJehova tali wanifwa po panghedi ikumwifi
1, 2. (a) Elalakano laJehova li na sha noishitwa inaendunge olilipi? (b) Oolyelye va kwatelwa moukwaneumbo waKalunga wovalongeli vaye va hangana?
ELALAKANO laKalunga lopahole ololo kutya oishitwa aishe inaendunge i kale ya hangana moku mu longela e li Kalunga aeke kashili nokuhafela emanguluko loshinge i li ovana vaye. Osho osho yo sha halika neenghono kovaholi vouyuki.
2 Jehova okwa hovela okuwanifa po elalakano olo linenenene eshi a hovela oilonga yaye yeshito. Oshishitwa shaye shotete osha li Omona waye oo okudja pokunyumunwa kwaye e li “evadimifo lefimano [laKalunga] nolupe loukwatya waye.” (Ovaheberi 1:1-3) Omona oo okwe likalekelwa, molwaashi okwa shitwa kuKalunga aeke. Konima yaasho, oishitwa aishe ikwao oya ka shitwa okupitila mOmona oo: tete ovaengeli meulu, opo nee ovanhu kombada yedu. (Job 38:7; Lukas 3:38) Aveshe ova li oukwaneumbo umwe auke meshito alishe. Kwaaveshe, Jehova okwa kala e li Kalunga, Omunamapangelo aeshe, naXe yavo omunahole.
3. (a) Atusheni otwa fyuulula shike kovadali vetu votete? (b) Jehova okwa ninga po elongekido lopahole lilipi omolwoludalo laAdam?
3 Eshi ovakulunhu vetu votete vopanhu va li va tokolelwa efyo omolwokunyonena owina, ova li va tewa mo muEden ndele tava ekelwashi kuKalunga. Inava kala vali oshitukulwa shoukwaneumbo waye womeshito alishe. (Genesis 3:22-24; Deuteronomion 32:4, 5) Atusheni otu li oludalo lavo, onghee hano otwa dalwa tu na eamo loulunde. Ndele Jehova okwa li e shi shii kutya vamwe vomoludalo laAdam naEva ova li tava ka kala ve hole ouyuki. Onghee hano, okwa ninga elongekido pahole opo ovanhu va tya ngaho va ka dule okumona ‘emanguluko loshinge shovana vaKalunga.’—Ovaroma 8:20, 21.
Israel sha kanifa ondodo yokuhokiwa
4. Oufembanghenda ulipi Jehova a li a pa oshiwana shaIsrael shonale?
4 Omido 2 500 lwaapo konima yokushitwa kwaAdam, Jehova okwa pa ovanhu vonhumba oufembanghenda wokukala ve na ekwatafano naYe le likalekelwa. Okwa li a hoolola Israel shonale shi kale oshiwana shaye nokwa li e shi pa Omhango yaye. (Genesis 12:1, 2) Okwa li e va ninga oshiwana nokwe va longifa metwokumwe nelalakano laye. (Deuteronomion 14:1, 2; Jesaja 43:1) Ndelenee ova li natango moupika woulunde nefyo, onghee inava hafela emanguluko loshinge olo Adam naEva va li ve na pehovelo.
5. Ongahelipi Israel sha kanifa ondodo yasho ye likalekelwa naKalunga?
5 Ndele nande ongaho, Ovaisrael ova li va hokiwa kuKalunga. Ova li yo ve na oshinakuwanifwa shokufimaneka Jehova e li Xe yavo nokulonga metwokumwe nelalakano laye. Jesus okwa divilika nghee okuwanifa po oshinakuwanifwa osho kwa fimana. (Mateus 5:43-48) Ndele oshiwana shaIsrael osha dopa oku shi ninga. Ofimbo Ovajuda ovo va li tava popi kutya “otu na Tate umwe aeke, Kalunga,” Jesus okwa popya kutya oilonga yavo nosho yo omhepo oyo va li tava ulike oya li tai kondjifafana nepopyo olo. (Johannes 8:41, 44, 47) Mo 33 O.P., Omhango oya li ya xulifwa po kuKalunga, nekwatafano laye naIsrael le likalekelwa ola xula po. Mbela osho osha li sha hala okutya ovanhu kava li vali tava dulu okuhafela ekwatafano liwa naKalunga?
Okwoongela “aishe oyo yomeulu”
6. Elalakano ‘lelelo’ olo la tumbulwa kuPaulus mOvaefeso 1:9, 10 olashike?
6 Omuyapostoli Paulus okwa ulika kutya vamwe mokati kovanhu otava dulu okuhafela ekwatafano le likalekelwa naKalunga. Pashihopaenenwa, shi na sha nelongekido laJehova omo ovo ve na eitavelo tava dulu okuninga oilyo youkwaneumbo waYe, Paulus okwa shanga a ti: “[Kalunga] e tu shiivifila oshiholekwa shehalo laye opahokwe yaye iwa ei, e i pangela muye mwene—omolwelelo leumbo, te ke li wanifa pakufika komafimbo—nokutya ta ka kwatakanifa muKristus aishe oyo yomeulu naai yokombada yedu.” (Ovaefeso 1:9, 10) ‘Elelo’ olo ondingandinga yalo oJesus Kristus. Okupitila muye, ovanhu otava etwa monghalo ya hokiwa koshipala shaKalunga. Omuvalu wa ngabekwa womuvo ou na eteelelo loku ka kala meulu. Omuvalu munenenene otau ka kala kombada yedu fiyo alushe.
7. Oolyelye ve li ‘aishe yomeulu’?
7 Shotete, okuhovela pOpentekoste 33 O.P., elitulemo ola li la yandjwa koinima “aishe oyo yomeulu,” sha hala okutya, ovo tava ka kala ovafyuululi pamwe naKristus mOuhamba womeulu. Omolweitavelo lavo mongushu yeyambo laJesus, ova yukipalifwa kuKalunga. (Ovaroma 5:1, 2) Konima yefimbo, Ovajuda naavo ve he fi Ovajuda ova li va kwatelwa mo, ‘naaishe yomeulu’ oya li i fike po 144 000. (Ovagalati 3:26-29; Ehololo 14:1) Oshixupe ashike shinini shomuvo shi li kombada yedu natango.
Okwoongela oinima “yokombada yedu”
8. Oolyelye ve li oinima “yokombada yedu,” nekwatafano lavo naJehova olilipi?
8 Elelo olo tuu olo otali ongele yo oinima “yokombada yedu.” Ovanhu omamiliyona otava ongelwa paife ve na eteelelo lokukala fiyo alushe kombada yedu. Ohava tumbaleke edina laJehova nohava fimaneke elongelokalunga laye, ve li moukumwe noshixupe shovafyuululi vOuhamba. (Jesaja 2:2, 3; Sefanja 3:9) Ohava ifana yo Jehova e li “Xe” molwaashi ova dimina kutya oye odjo yomwenyo. Nohava hafele ondodo ya hokiwa koshipala shaye omolweitavelo lavo mohonde yaJesus ya tika. (Ehololo 7:9, 14) Ndele molwaashi inava wanenena natango, otava ka talika ko ashike ve li ovana vaKalunga filufilu monakwiiwa.
9. Ovaroma 8:21 otava udanekele shike ovanhu?
9 Ovo ve na eteelelo lokombada yedu paife ova teelela nodjuulufi efimbo eshi eshito lovanhu tali ka “mangululwa moupika wenyonauko.” (Ovaroma 8:21) Okumangululwa oko otaku ka hovela konima eshi Kristus nosho yo omatanga aye ovakwaita omeulu a xulifa po oudjuu munene okupitila muHarmagedon. Osho otashi ka tya okuhanaunwa po kwonghalelo yaSatana aishe yoinima youkolokoshi, notashi ka landulwa komanangeko noupuna Epangelo lOmido Eyovi laKristus e na eenghono dOuhamba.—Ehololo 19:17-21; 20:6.
10. Ovapiya vaJehova otava ka imba eimbilo lehambelelo lilipi?
10 Itashi ka kala tuu shitunhula eshi ovapiya vaJehova kombada yedu tava ka hangana mokutwa kumwe nomadiladilo ovapiya vaye vomeulu, ovo tava ingida nehafo tava ti: “Oilonga yoye oinene noikumifa, Omwene Kalunga, Omunamapangelo aeshe, eendjila doye oda yuka nodoshili, Oove ohamba yoiwana aishe. Olyelye ou ite ku tila, Omwene, ndee ita fimaneke edina loye? Osheshi Oove auke omuyapuki; osheshi oiwana aishe otai uya ndee tai ku linyongamenene, osheshi omatokolo oye omayuki a holoka.” (Ehololo 15:3, 4) Heeno, ovapiya vaJehova aveshe otava ka hangana mokulongela Kalunga aeke kashili. Nokuli noonakufya otava ka nyumunwa notava ka pewa omhito okukufa ombinga mokuyelula eendaka davo mokutanga Jehova.—Oilonga 24:15.
Emanguluko likumwifi lomonakwiiwa
11. Emanguluko likumwifi lilipi tali ka hafelwa kovaxupipo poudjuu munene?
11 Konima eshi oudjuu munene, oo tau ka xula po puHarmagedon, wa koshola edu oukolokoshi, Satana Ondiaboli ita ka kala vali ‘kalunga kounyuni ou.’ Ovalongeli vaJehova itava ka kala vali va pumbwa okukondjifa enwefemo lii neenghono laSatana. (2 Ovakorinto 4:4, OB-1954; Ehololo 20:1, 2) Itapa ka kala vali omapopyo a penga omalongelokalunga oipupulu okupopya Jehova, enwefemo olo hali tukaula oulikumwe wovanhu. Ovapiya vaKalunga kashili itava ka ningilwa vali okuhenouyuki nosho yo okuningwa nai kovapangeli vopanhu. Kali fi tuu emanguluko likumwifi olo tali ka hafelwa!
12. Ongahelipi ovanhu aveshe tava ka mangululwa moulunde nosho yo koilanduliko yao?
12 Jesus e li “Odjona yaKalunga tai kufa po omatimba ounyuni,” ota ka longifa ongushu yeyambo laye okudima po omanyono ovanhu. (Johannes 1:29) Eshi Jesus a li kombada yedu nokwa dima po omatimba ovanhu vonhumba, okwa velula ovo va diminwa po shi li oumbangi wediminepo lomatimba. (Mateus 9:1-7; 15:30, 31) Monghedi ya faafana, Kristus Jesus e li Ohamba yomeulu yOuhamba waKalunga, ota ka twikulula ovapofi pashikumwifilonga, ta ka velula ovo ihava popi, eembolo, oilema yopalutu, ovo ve na omikifi dopamadiladilo nosho yo ovo ve na omaudu makwao. (Ehololo 21:3, 4) Ovanhu aveshe ovaduliki otava ka kufwa ‘omhango youlunde,’ opo nee omadiladilo noilonga yavo otai ka kala ihafifa, kuvo vene nosho yo kuKalunga. (Ovaroma 7:21-23) Pexulilo lEyovimudo, otava ka kala ovanhu va wanenena, ve li “oshifeka” shaKalunga aeke kashili.—Genesis 1:26.
13. Pexulilo lEpangelo lOmido Eyovi, Kristus ota ka katuka eenghatu dilipi, noidjemo otai ka kala ngahelipi?
13 Konima eshi Kristus a ninga ovanhu va kale va wanenena, ota ka shunifila Xe eenghonopangelo odo kwa li a pewa a longe nado oilonga oyo: “Ta yandje ouhamba kuKalunga Xe, eshi a hanauna po elelo alishe nepangelo neenghono adishe. Osheshi Oye e nokupangela fiyo ota tula ovatondi vaye aveshe koshi yeemhadi daye.” (1 Ovakorinto 15:24, 25) Epangelo lOmido Eyovi lOuhamba otali ka wanifa po filufilu elalakano lalo; opo nee epangelo olo itali ka pumbiwa vali li kale pokati kaJehova novanhu. Nomolwaashi oulunde nefyo otai ka kala ya kufwa po filufilu novanhu otava ka kala va kulilwa, itashi ka kala vali sha pumbiwa opo Jesus a kale Omukulili. Ombibeli otai yelifa tai ti: “Opo nee Omona Ye mwene ote ke litula yo koshi yaau e mu tulila ko aishe, Kalunga opo a kale omunashishe moinima aishe.”—1 Ovakorinto 15:28.
14. Ovanhu aveshe va wanenena otava ka efelwa mushike, nomolwashike?
14 Konima yaasho, ovanhu va wanenena otava ka pewa omhito va ulike kutya ova hoolola okulongela Kalunga aeke kashili fiyo alushe. Onghee hano, fimbo ine va tambula ko filufilu ve li ovana vaye, Jehova ota ka efela ovanhu aveshe ovo va wanenena meyeleko laxuuninwa. Satana neendemoni daye otava ka mangululwa mo mombwili. Ovo ve hole shili Jehova itava ka ningilwa owii kuvo. Ndele keshe oo ta ka efa nokuhenoudiinini a twalwe mokukala ita dulika kuJehova ota ka hanaunwa po fiyo alushe, pamwe nomunashibofa wotete nosho yo eendemoni daye.—Ehololo 20:7-10.
15. Onghalo ilipi vali tai ka kala mokati koishitwa aishe yaJehova inaendunge?
15 Opo nee Jehova ota ka tambula ko ovanhu aveshe va wanenena ovo tava yambidida ounamapangelo waYe pefimbo leyeleko olo laxuuninwa va kale ovana vaye. Okudja opo okuyuka komesho, otava ka hafela filufilu emanguluko loshinge shovana vaKalunga ve li oshitukulwa shoukwaneumbo waKalunga womeshito alishe. Oishitwa aishe inaendunge meulu nosho yo kombada yedu otai ka kala vali ya hangana moku mu longela e li Kalunga aeke kashili. Elalakano laJehova itali ka kala tuu la wanifwa panghedi ikumwifi! Mbela owa hala okukala oshitukulwa shoukwaneumbo womeshito alishe wa hafa notau kalelele? Ngeenge osho, ohatu ku ladipike u dulike kwaasho Ombibeli tai ti mu 1 Johannes 2:17, taku ti: “Ounyuni otau xulu po pamwe nokahalu [kao]; ndelenee ou ta longo ehalo laKalunga, oye ta kala alushe.”
Eenghundafana dokweendulula
• Fimbo oshibofa inashi tukuluka muEden, ekwatafano lilipi ovalongeli Jehova aveshe va li ve na naye?
• Oshinakuwanifwa shilipi shi niwe kwaavo ve li ovapiya vaKalunga?
• Oolyelye tava ningi ovana vaKalunga natango, nongahelipi osho sha pambafana nelalakano laJehova li na sha noku mu longela moukumwe?
[Efano pepandja 190]
Ovanhu ovaduliki otava ka hafela omwenyo moparadisa mounyuni aushe