Oshimhungu shomapulo

◼ Fiyo onaini tu na okukonakona Ombibeli nomunhu oo ta ningi exumokomesho?

Oshiwa okutwikila okukonakona Ombibeli nomunhu oo ta ningi exumokomesho fiyo osheshi mwa mana ko oishangomwa ei ivali, Ombibeli otai hongo lela shike? nosho yo “Likalekeni mohole yaKalunga.” Osho osho yo shi na okuningwa nokuli nongeenge omukonakonimbibeli okwa ninginifwa fimbo ina mana ko omambo oo avali. Nonande omukonakonimbibeli okwa ninginifwa, oto dulu okuvalula omalishuneko, ekonakonombibeli nosho yo efimbo olo hamu konakona naye. Ngeenge omwa i pamwe nomuudifi mukweni umwe mu ka konakone Ombibeli nomukonakoni woye oo a ninginifwa nale, omuudifi oo naye ota dulu okuvalula efimbo olo. — Tala Oukalele Wetu wOuhamba waMarsa 2009, epandja 2.

Osha fimana okukwafela ovo vape fiyo osheshi tu wete kutya ova pama nawa moshili. Ova pumbwa okukala va ‘twama’ muKristus “nokulipamekela meitavelo” opo va dule okuungaunga nomaupyakadi oo tava ka shakeneka monakwiiwa. (Kol. 2:6, 7; 2 Tim. 3:12; 1 Pet. 5:8, 9) Kakele kaasho, ove na yo okukala ve na ‘eshiivo loshili’ opo va dule okuhonga vamwe nomupondo. (1 Tim. 2:4) Ngeenge otwa mane ko omambo aeshe avali novakonakonimbibeli, ohatu ke va kwafela va twikile okweenda ‘mondjila oyo tai twala komwenyo.’ — Mat. 7:14.

Ofimbo ovakulunhuongalo inava popila omunhu wonhumba kutya okwa wana okuninginifwa, ove na okushilipaleka kutya oku udite ko nawanawa omahovelohongo Ombibeli nonokutya oha kala metwokumwe nao. Ovakulunhuongalo ove na okukala va lungama unene tuu ngeenge tava tale kutya omukonakonimbibeli oo ina mana ko natango embo lotete okwa wana okuninginifwa ile hasho. Ngeenge ovakulunhuongalo ova mono kutya omunhu ina wana okuninginifwa, ove na okushilipaleka kutya okwa kwafelwa pauhandimwe opo a ka kale a wana okuninginifwa monakwiiwa. — Tala embo Organized to Do Jehovah’s Will, epandja 217-218.

[Eendjovo dididilikwedi pepandja 2]

Osha fimana kovanhu ovo vape okukala va pama nawa moshili