Etukulwa 39

Jesus ta popi shi na sha novalinenepeki nosho yo ovalininipiki

KONIMA eshi Jesus a li a tumbula omaukwatya mawa aJohannes Omuninginifi, okwa li a hovela okupopya shi na sha novalinenepeki novatengauki ovo va li puye. Jesus okwa ti: ‘Epupi eli ola fa ounona, ve li omutumba poilandelo tava ingidile vakwao, tava ti: Ofye otwe mu shikila eenyalilo, nye inamu tutula oudano, notwa imba omaimbilo eenghali, ndele onye inamu lila.’

Jesus okwa li a hala okutya shike eshi a popya eendjovo odo? Jesus okwa li a yelifa a ti: “Osheshi Johannes okwe uya, oye ita li noita nu, ndele va tya: Oye e nondemoni. Omona wOmunhu okwe uya, ta li nota nu, vo notava ti: Tala, [omufukulume] nongholwe, okaume kovafutifi nokovalunde.”

Oshidjuu okuhafifa ovanhu. Johannes okwa li e na onghalamwenyo yanafangwa, a li he lidilike ngaashi Omunasiri, nokungaho okwa li a wanifa po eendjovo domweengeli oo a tile kutya “omaviinyu nomeva keshe haa kolwifa ita nu.” Ndele ovanhu ova li hava ti kutya oku na ondemoni. Mepingafano naasho, Jesus okwa li e na onghalamwenyo ya faafana naayo yovanhu vakwao, a li ihe lidilike, ndele ovanhu ova li tava ti kutya ongholwe nomufukenhu.

Kashidjuu tuu okuhafifa ovanhu! Ovanhu ovo ova li va fa ounona tava danauka, ovo vamwe vomuvo va li inava hala okundanisha eshi vakwao va li tava shiki eenyalilo ile inava lila eshi vakwao va imba omaimbilo eenghali. Ndele nande ongaho, Jesus okwa ti: ‘Ounongo wa hololwa koilonga yavo owa yuka.’ Oumbangi, sha hala okutya, oilonga oyo Jesus naJohannes va li va longa oya li tai shi ulike sha yela kutya oinima oyo va li tava ulwa kai fi yoshili.

Opo nee Jesus okwa li a twikila ko ta tangunine ovanhu vomoilando itatu, Korasin, Betsaida nosho yo Kapernaum, oko a li a longa oikumwifilonga ihapu yomwaayo a longa. Jesus okwa ti kutya ngeno okwa longele oikumwifilonga oyo moilando yOvafoinikia, Tirus naSidon, ngeno ovanhu moilando oyo ove livela ombedi nokudjala eeshako nokulivaeka omite. Jesus okwa li a tokola Kapernaum, omo a kala unene pefimbo loukalele waye, a ti: “Edu laSodom otali ningi hixwe li ku dule efiku letokolo.”

Konima yokupopya ngaho, Jesus okwa li a tanga Xe womeulu moipafi yovanhu. Okwa li ta tange Kalunga molwaashi ina hololela ovanaendunge novanongo eeshili daye dopamhepo di na ondilo, ndele eeshili odo dikumwifi okwe di hololela ovalininipiki, ovo ve li ngaashi ounona.

Lwanima Jesus okwa li a shiva ovanhu neshivo tali kumu omutima a ti: “Ileni kuame, nye amushe hamu longo nomwa lolokifwa, Ame ohandi mu pe etulumuko. Litwikeni ondjoko yange nye mu lilonge kuame, osheshi Aame omunambili momutima onde lininipika; ndee tamu limonene eemwenyo deni etulumuko. Osheshi ondjoko yange iwa nomutengi wange omupu.”

Jesus oha pe ngahelipi ovanhu etulumuko? Ohe va pe etulumuko moku va mangulula moupika weenghulunghedi omo va tulwa kovawiliki vomalongelokalunga, mwa kwatelwa pashihopaenenwa, oinima ngaashi eemhango da kwata moiti di na sha nokudiinina Eshabata. Oha ulikile yo ovanhu ovo va wililwa po komitengi odo va twikwa komapangelo opapolotika nosho yo ovo ve na eliudo tali va pe oushima omolwomanyono avo nghee tava dulu okumona epepelelo. Oha ulikile ovanhu va tya ngaho nghee omanyono avo taa dulu okudimwa po nonghee tava dulu okukala ve na ekwatafano liwa naKalunga.

Ondjoko iwa oyo Jesus ta yandje oyo okuliyapulila filufilu Kalunga, opo tu dule okukala hatu longele Tate yetu womeulu omunalukeno nomunanghenda. Omutengi mupu waJesus oo ta yandje kwaavo tave uya kuye oo okudulika koiteelelwa yaKalunga i na sha nonghalamwenyo, sha hala okutya, oipango yaYe oyo i li mOmbibeli. Okudulika koipango yaKalunga kaku fi oshinima shidjuu. Mateus 11:16-30; Lukas 1:15; 7:31-35; 1 Johannes 5:3.

▪ Ovanhu vopefimbo laJesus ovo va li ovalinenepeki novatengauki ova li ngahelipi va fa ounona?

▪ Oshike sha li she linyengifa Jesus a tange Xe womeulu?

▪ Omeenghedi dilipi ovanhu va lolokifwa komitengi, netalaleko lilipi Jesus ta yandje?