Otu na okukandula po ngahelipi eenhamanana di na sha noinima yopangeshefa?

Omuyapostoli Paulus okwa kundafana kombinga yoihokolola pokati kOvakriste mo 1 Ovakorinto 6:1-8. Okwa popya a nyemata molwaashi Ovakriste vamwe muKorinto ova li have ‘ke lihokololifa koshipala shaava vehe fi ovayuki.’ (Ovelishe 1) Okwa li a yandja omatomheno a fimana kutya omolwashike Ovakriste vehe na okulitwala keemhangu domounyuni ndele ponhele yaasho ove na okukandula po eenhamanana tava landula omifindalandu odo da li da tulwa po meongalo lopaKriste. Natu ka kundafaneni amwe omomatomheno oo e li momayele oo a nwefwa mo nokukundafana yo eenghalo dinini odo inadi kwatelwa momayele oo a kundafanwa kuPaulus.

Ngeenge otu na eenhamanana nOmukriste mukwetu da kwatela mo oinima yopangeshefa, tete natu kendabale oku di kandula po monghedi oyo Jehova a tula po, ndele hangaashi twa hala. (Omayeletumbulo 14:12) Ngaashi Jesus a popya, oshiwa okukandula po meendelelo okuhaudafana oko kwa holoka po fimbo inaku ninga oshinima sha kwata moiti. (Mateus 5:23-26) Ndele shi nyikifa oluhodi, Ovakriste vamwe ohava kala ve na eenhamanana da kwata moiti neenghono, nohave di twala nokuli keemhangu domounyuni. Paulus okwa ti: “Oshiponga nokuli kunye eshi [mu na] oihokolola mokati keni.” Omolwashike Paulus ta tile ngaho? Omolwaashi oihokolola ya tya ngaho otai dulu okunyona po edina liwa leongalo nokushekifa edina laKalunga oo hatu longele. Onghee hano, natu kaleke momadiladilo epulo olo Paulus a li a pula a ti: “Oshike itamu liefa mu ningwe nai ngeno shi dule?” — Ovelishe 7.

Paulus okwa ti yo kutya Kalunga okwa tula po elongekido liwa meongalo li na sha nanghee eenhamanana di na sha noinima i lili noku lili di na okukandulwa po. Ovakulunhuongalo Ovakriste ove na ounongo molwaashi ove na eshiivo loshili yOmishangwa, na Paulus okwa ti kutya ove ‘shii okutokola mokati kovamwaxe’ ngeenge tashi uya ‘poinima yokukalamwenyo.’ (Ovelishe 3-5) Jesus okwa li a popya kutya eenhamanana odo da kwatela mo omanyono a kwata moiti, ngaashi omalundilo nosho yo okunyokoma, odi na okukandulwa po metwokumwe nomafinamhango opatatu taa landula. Lotete, omunhu oku na okukendabala okukandula po oupyakadi oye aeke naao a kwatelwa mo. Etivali, ngeenge inava dula okukandula po oupyakadi ovo aveke, na ifane ondombwedi imwe ile mbali. Etitatu, ngeenge oupyakadi inau pongololwa po konima eshi kwa ifanwa ondombwedi imwe ile mbali, omunhu oku na okulombwela eongalo oupyakadi oo, sha hala okutya, ta lombwele ovakulunhuongalo ovo ve lile po eongalo. — Mateus 18:15-17.

Ovakulunhuongalo Ovakriste kave fi ovapanguli ile ovanangeshefa, noshinakuwanifwa shavo kashi fi okuyandja omayele opaveta ile eengeshefa. Ihava tula po omifindalandu di na sha nokupongolola po eenhamanana di na sha noinima yopangeshefa pokati kovamwatate. Ndele ponhele yaasho, ohava kendabala okukwafela ovanhu aveshe ovo va kwatelwa meenhamanana opo va tule moilonga Omishangwa nova kandule po eenhamanana pambili. Ngeenge ope na eenghalo odo da kwata moiti neenghono, ovakulunhuongalo otava dulu okupula ekwafo komupashukilishikandjo ile koshitaimbelewa shEendombwedi daJehova. Ndelenee ope na eenghalo dimwe odo inadi kwatelwa momayele oo a kundafanwa kuPaulus. Eenghalo odo odilipi mbela?

Peemhito dimwe, omunhu otashi dulika a kale a pumbwa ekwafo lopaveta opo a yukifilwe oinima oyo a hala okuninga nomalinyengotomheno mawa nosho yo pambili. Pashihopaenenwa, otashi dulika omunhu a kale a pumbwa okukatuka onghatu yopaveta opo a mone omukanda weteyohombo, ediminino lopaveta lokukala nokaana, okumona oshapota, okumona oimaliwa komahangano omakwashilipaleko, okukala e na omukanda oo tau ulike kutya ongeshefa yonhumba oyo ya mbangolota oi na eendjo daye nosho yo okukwashilipaleka omikanda daasho a hala shi ningwe po ngeenge a fi. Peemhito dimwe omumwatate otashi dulika a katuke eenghatu donhumba opo e liamene paveta.a

Ngeenge oihokolola ya tya ngaho oya ningwa nopehe na eenhamanana, itai nyono efinamhango olo li li momayele aPaulus a nwefwa mo.b Ndele nande ongaho, Ovakriste ove na okukala va pitifa komesho okuyapulwa kwedina laJehova nosho yo ombili noukumwe weongalo. Ohole oyo edidiliko linene olo hali didilikifa ovashikuli vaKristus, ‘nohole ihai kongo shayo vene.’ — 1 Ovakorinto 13:4, 5; Johannes 13:34, 35.