Lineekela muJehova oo e li Kalunga ‘komafimbo neetundi’

‘Ye ota lundulula omafimbo neetundi, ndele ye ota xutula eehamba noha nangeke po eehamba.’ — DAN. 2:21.

OTO NYAMUKULA NGAHELIPI?

Eshito nomaxunganeko oo a wanifwa otaa ulike ngahelipi kutya Jehova Omudiinini wefimbo Munene?

Okukala tu shii kutya Jehova oKalunga ‘komafimbo neetundi’ oshi na oku tu linyengifa tu ninge shike?

Omolwashike efimbolandulafano laJehova inali likolelela keemhangela dovanhu nokoiningwanima yomounyuni?

1, 2. Oshike tashi ulike kutya Jehova oku shii nawanawa nghee efimbo hali longo?

JEHOVA KALUNGA okwa kala nalenale a tula po oiyelekifo yefimbo ofimbo ina shita ovanhu. Pashihopaenenwa, mefiku etine lokushita oinima, Kalunga okwa tile: “Mevalelwa leulu namu uye omaminikilo okutongola omutenya noufiku; ndee naa ninge omadidiliko omafimbo, omafiku nomido.” (Gen. 1:14, 19, 26) Ndele ngaashi Jehova a li a lalakanena, osho osho naanaa sha li sha ningwa.

² Ashike ovanongononi ohava tu eemhata di na sha nefimbo fiyo okunena. O-encyclopedia imwe oya ti: “Efimbo olo shimwe shomoinyengandunge yomounyuni. Kape na omunhu ta dulu okuyelifa filufilu kutya efimbo ohali longo naanaa ngahelipi.” Ndele mepingafano naasho, Jehova oku shii nawanawa nghee efimbo hali longo. Osho osho shi li ngaho molwaashi oye a ‘shita omaulu nokwa ma edu ndee te li wapaleke.’ Kakele kaasho, Jehova okwa “holola kehovelo inya tai ke uya, oikulu ei yonale fimbo inai ningwa.” (Jes. 45:18; 46:10) Paife natu ka kundafaneni shi na sha nanghee eshito nokuwanifwa kwomaxunganeko tai ulike kutya Jehova Omudiinini wefimbo Munene, naasho otashi ka pameka eitavelo letu muKalunga nosho yo mEendjovo daye, Ombibeli.

ESHITO OTALI TU LINYENGIFA TU KALE TU NA EITAVELO MOMUDIININI WEFIMBO MUNENE

3. Oshike tashi ulike kutya oinima oyo i li meshito oi na efimbo lokondadalunde?

³ Oinima aishe ya kula naai inininini oyo i li meshito oi na efimbo lokondadalunde. Muyo omu na ounima ovo hava ifanwa eeatoma ovo hava kala tave linyengaanyenga alushe. Eevili odo da denga mbada mounyuni hadi longo tadi wilikwa keeatoma ihadi puka nande onosekonde imwe nokuli nonande opa pite omido omamiliyona 80. Omalinyengo eepulaneta nosho yo eenyofi nao ohaa endele pamwe nefimbo lao lokondadalunde. Okulundulukila kwado peenhele di lili naku lili mewangadjo oko haku kwafele ovanhu va mone kutya ove li pefimbo lilipi lomudo. Onghee hano, Jehova oo a shita oinima oyo hai longo ye likolelela kefimbo oku na shili ‘eenghono dinene’ nokwa wana okutangwa. — Lesha Jesaja 40:26.

4. Oinima i na omwenyo oyo hai wilikwa keevili dopaushitwe otai holola shike kombinga younongo waKalunga?

⁴ Oinima oyo i na omwenyo nayo otai ulike kutya oi na efimbo lokondadalunde. Okukalamwenyo kwoimeno nokwoinamwenyo ihapu ohaku wilikwa keevili dopaushitwe odo da shitilwa muyo. Pashihopaenenwa, oudila vahapu ove shii filufilu kutya onaini ve na okutembuka. (Jer. 8:7) Ovanhu navo ova shitilwa eevili odo hadi va wilike omutenya noufiku, nefiku keshe oli na oule weevili 24. Ngeenge omunhu okwa tavakana omadu nodila oko ku na omafimbo a yoolokafana, otashi dulika shi ka pule olutu laye oule womafiku onhumba opo eevili odo da shitilwa muye di longe vali nawa. Oinima ihapu i li meshito oyo hai wilikwa keevili odo ya shitilwa otai holola kutya Kalunga ‘komafimbo neetundi’ oku na eenghono nounongo munene. (Lesha Epsalme 104:24.) Doshili, Kalunga oo e li Omudiinini wefimbo Munene oku na ounongo wa shiya ko neenghono dinenenene. Onghee hano, ohatu dulu okukala noushili kutya ota dulu okuwanifa po omalalakano aye.

OKUWANIFWA PEFIMBO KWOMAXUNGANEKO OHAKU PAMEKE EITAVELO LETU

5. (a) Oshike naanaa tashi dulu oku tu kwafela tu shiive kutya onakwiiwa yovanhu otai ka kala ya tya ngahelipi? (b) Omolwashike Jehova ta dulu okuxunganeka oiningwanima nosho yo efimbo opo tai ka ningwa?

⁵ Nonande eshito ohali tu kwafele tu lihonge shihapu kombinga yomaukwatya aJehova ‘ehe wetike,’ itali tu kwafele tu mone omanyamukulo komapulo a fimana ngaashi, Onakwiiwa yovanhu otai ka kala ya tya ngahelipi? (Rom. 1:20) Ndele opo tu mone omanyamukulo omapulo ngaashi olo, otu na okukonakona osho Kalunga a popya mEendjovo daye Ombibeli. Ngeenge otwa konakona Ombibeli, ohatu ka hanga mo omaxunganeko oo a li a wanifwa naanaa peufwafimbo lao. Ashike Jehova oha dulu yo okuholola osho tashi ka ningwa po komesho molwaashi oku shii kutya onakwiiwa otai ka kala ya tya ngahelipi. Shimwe vali, osho Jehova Kalunga a xunganeka mOmishangwa daye ohashi wanifwa po pefimbo molwaashi ota dulu okuyukifa oiningwanima te shi ningi metwokumwe nelalakano laye nosho yo peufwafimbo laye.

6. Oshike tashi ulike kutya Jehova okwa hala tu ude ko okuwanifwa komaxunganeko Ombibeli?

⁶ Jehova okwa hala ovapiya vaye va ude ko omaxunganeko Ombibeli nokumona ouwa muo. Ndele nonande eudeko laJehova li na sha nefimbo inali ngabekwa ngaashi letu, ngeenge a xunganeka kutya oshiningwanima shonhumba otashi ka ningwa pefimbo lonhumba lokondadalunde ohatu dulu okuuda ko omautumbulilo oo a longifa. (Lesha Epsalme 90:4.) Pashihopaenenwa, embo lEhololo ola longifa omautumbulilo oo hatu dulu okuuda ko noupu eshi la ti kutya ‘ovaengeli vane ove lilongekidila okufikama keshe tuu otundi nefiku nohani nomudo.’ (Eh. 9:14, 15) Ngeenge otwa mono nghee omaxunganeko onhumba a li a wanifwa pefimbo lokondadalunde otashi ka pameka eitavelo letu muKalunga ‘komafimbo neetundi’ nosho yo mEendjovo daye. Natu ka taleni koihopaenenwa yonhumba.

7. Ongahelipi okuwanifwa kwexunganeko laJeremia li na sha naJerusalem naJuda taku ulike kutya Jehova Omudiinini wefimbo Munene?

⁷ Tete natu ka taleni kwaasho sha li sha ningwa po omido 2 600 lwaapo da pita. Ombibeli oya ti: “Ondjovo [yOmudiinini wefimbo Munene] ya hanga Jeremia, tai tongo oshiwana ashishe shaJuda, momudo omutine wepangelo laJojakim yaJosia, ohamba yaJuda.” (Jer. 25:1) Jehova okwa li a xunganeka shi na sha nehanauno laJerusalem nokutwalwa moukwatwa kwOvajuda kuBabilon. Ovajuda ova li tava “ka longela ohamba yaBabel omido 70.” Etangakwaita laBabilon ola li la hanauna po Jerusalem mo 607 K.O.P., nOvajuda ova li shili va twalwa moukwatwa kuBabilon. Ndele mbela oshike sha li tashi ka ningwa po konima yomido 70? Jeremia okwa xunganeka a ti: “Omwene ota ti ngaha: Omido 70 domuBabel nge da xula, Ame ohandi ke mu dimbulukwa noku mu wanifila eudaneko lange liwa, ndi mu alulile ponhele ei.” (Jer. 25:11, 12; 29:10) Exunganeko olo ola li naanaa la wanifwa pefimbo, mo 537 K.O.P., eshi Ovamedia nOvapersia va li va mangulula Ovajuda moupika wOvababilon.

8, 9. Ongahelipi exunganeko laDaniel li na sha nokuuya kwaMessias nosho yo lokudikwa po kwOuhamba womeulu taa ulike kutya Jehova oKalunga ‘komafimbo neetundi’?

⁸ Natu ka kundafaneni kombinga yexunganeko limwe vali li na sha noshiwana shaKalunga shopefimbo lonale. Omido mbali lwaapo okudja eshi Ovajuda va dja muBabilon, Jehova okwa li a xunganeka okupitila momuprofeti Daniel kutya Messias ota ka holoka konima yomido 483 okudja eshi kwa yandjwa elombwelo li na sha nokutungululwa kwaJerusalem. Ohamba yOvamedia nOvapersia oya li ya yandja elombwelo olo mo 455 K.O.P. Ndele konima naanaa yomido 483, momudo 29 O.P., Jesus Omunasaret okwa li a vaekwa nomhepo iyapuki pefimbo lokuninginifwa kwaye nokwa ninga Messias.a — Neh. 2:1, 5-8; Dan. 9:24, 25; Luk. 3:1, 2, 21, 22.

⁹ Paife natu ka kundafaneni kombinga yaasho Omishangwa da popya shi na sha nOuhamba. Exunganeko limwe lOmbibeli otali ulike kutya Ouhamba wopaMessias owa li tau ka dikwa po meulu mo 1914. Mexunganeko omo omwa popiwa shi na sha “nedidiliko” lokukala po kwaJesus nosho yo efimbo opo Satana a li ta ka umbwa mo meulu, naasho osha li tashi ka etifa omaupyakadi manene kombada yedu. (Mat. 24:3-14; Eh. 12:9, 12) Shimwe vali, omaxunganeko amwe Ombibeli okwe tu kwafela tu shiive efimbo lokondadalunde omo ‘omafimbo ovapaani a li taa ka’ xula po nonokutya Ouhamba waKalunga owa li tau ka hovela naini okupangela meulu. Osho osha li sha ningwa momudo 1914. — Luk. 21:24; Dan. 4:10-17.b

10. Oiningwanima yomonakwiiwa ilipi tu shii kutya otai ka ningwa shili pefimbo layo?

¹⁰ Paife otwa teelela ‘oudjuu munene’ oo wa xunganekwa kuJesus. Konima yaasho, otaku ka shikula Epangelo lOmido Eyovi laKristus. Ndele katu na okukala twa limbililwa kutya oinima oyo otai ka wanifwa ngoo peufwafimbo layo ile hasho. Eshi Jesus a li kombada yedu, Jehova okwa hangwa nale a tula po ‘efiku notundi’ opo oiningwanima oyo tai ka ningwa. — Mat. 24:21, 36; Eh. 20:6.

“LONGIFENI NAWA EFIMBO”

11. Okukala tu shii kutya otu li pefimbo lexulilo oshi na oku tu kuma ngahelipi?

¹¹ Okukala tu shii kutya Ouhamba owa hovela okupangela nosho yo kutya otu li ‘pefimbo lexulilo’ oshi na oku tu kuma ngahelipi? (Dan. 12:4) Nonande ovanhu vahapu ove wete kutya eenghalo mounyuni otadi ende tadi naipala, inava dimina natango kutya osho oshi li ewanifo lexunganeko lOmbibeli li na sha nomafiku axuuninwa. Otashi dulika ngoo ve na eteelelo kutya ounyuni ou onau ka xule po fikulimwe ile va itavela kutya eenghendabala odo ovanhu tava ningi otadi ka etifa po “ombili [neameno, NW].” (1 Tes. 5:3) Ndele mbela ongahelipi shi na sha nafye? Ngeenge otwa dimina shili kutya otu li komuxundalili womafiku axuuninwa ounyuni ou waSatana, mbela katu na okuninga eenghendabala tu longife nawa efimbo olo la xupa ko mokulongela Kalunga ‘komafimbo neetundi’ nokukwafela vamwe ve mu shiive? (2 Tim. 3:1) Otu na okuninga omatokolo e li mondjila e na sha nanghee hatu ka longifa efimbo letu. — Lesha Ovaefeso 5:15-17.

12. Oshike hatu dulu okulihonga meendjovo daJesus di na sha nomafiku aNoa?

¹² Ihashi kala shipu ‘okulongifa nawa efimbo’ mounyuni ou u yadi omapiyaaneko. Jesus okwa londwela a ti: “Ngaashi sha li pomafiku aNoa, osho tuu taku ka kala pokuuya kwOmona wOmunhu.” Oshike sha li sha ningwa po pomafiku aNoa? Okwa li kwa xunganekwa kutya ounyuni wopefimbo olo otau ka xulifwa po. Ovakolokoshi ova li tava ka hanaunwa po neyelu lomounyuni aushe. Noa oo a li “omuudifi wouyuki” omudiinini okwa kala ta shiivifile ovanhu vopefimbo laye etumwalaka laKalunga. (Mat. 24:37; 2 Pet. 2:5) Ndele ova li ashike ve litula ‘mokulya nokunwa, tava hombola notava hombolifa, ndele vo inave shi shiiva, fiyo eyelu le uya nole va hanauna po aveshe.’ Onghee hano, Jesus okwa li a londwela ovashikuli vaye a ti: “Kaleni mwe lilongekida, osheshi Omona wOmunhu te uya efimbo tuu olo inamu mu teelela.” (Mat. 24:38, 39, 44) Natu hopaeneneni oikala yaNoa, ndele hayovanhu vopefimbo laye. Ndele mbela oshike tashi dulu oku tu kwafela tu kale twe lilongekida?

13, 14. Oshike tu na okudimbuluka shi na sha naJehova osho tashi ke tu kwafela tu mu longele noudiinini ofimbo twa teelela okuuya kwOmona womunhu?

¹³ Nonande Omona womunhu ote uya potundi tuu oyo inatu mu teelela, inatu dimbweni kutya Jehova Omudiinini wefimbo Munene. Efimbolandulafano laye inali likolelela keemhangela dovanhu nosho yo koiningwanima yomounyuni. Jehova oha unganeke efimbo nonghedi omo oinima i na okuningwa opo a wanife po elalakano laye. (Lesha Daniel 2:21.) Omayeletumbulo 21:1 otaa ti: “Omutima wohamba u li meke lOmwene ngaashi omakungulukilo omeva. Ye ote u endifa keshe apa a hala.”

¹⁴ Jehova ota dulu okuya olunyala moinima opo a wanife po elalakano laye pefimbo. Omalunduluko mahapu manene oo a ningwa mounyuni okwa wanifa po omaxunganeko onhumba, naunene tuu olo li na sha nokuudifwa kwonghundana iwa yOuhamba waKalunga mounyuni aushe. Pashihopaenenwa, diladila shi na sha nokuteka po kwepangelo laSoviet Union nosho yo kutya oshidjemo osha li shike. Ovanhu vahapu kava li tava diladila kutya elunduluko olo linene lopapolitika otali dulu okuningwa divadiva ngaho. Ndele omolwelunduluko olo, paife onghundana iwa otai udifwa moilongo ihapu omo oilonga yetu yokuudifa ya li ya shilikwa. Onghee hano, natu kendabaleni okulongifa nawa efimbo opo tu longeleni noudiinini Kalunga ‘komafimbo neetundi.’

KALA U NA EITAVELO KUTYA JEHOVA OMUDIININI WEFIMBO

15. Ongahelipi hatu dulu okuulika kutya otu na eitavelo ngeenge tashi uya pomalunduluko opahangano?

¹⁵ Opo tu dule okutwikila noilonga yokuudifa Ouhamba pefimbo eli lexulilo, otwa pumbwa okukala twa itavela kutya Jehova omudiinini wefimbo. Ndele omolwomalunduluko oo taa ningwa mounyuni, otashi dulika nafye twa pumbwa okulundulula onghedi yetu yokuudifa. Otashi dulika ehangano laJehova li kale tali ningi po omalunduluko onhumba opo li tu kwafele tu wanife po oshilonga shetu. Ngeenge otwa kala hatu tambula ko nehafo omalunduluko oo eshi hatu longo noudiinini koshi yewiliko lOmona waKalunga oo e li “omutwe weongalo,” ohatu ka ulika kutya otu na eitavelo muKalunga ‘komafimbo neetundi.’ — Ef. 5:23.

16. Omolwashike hatu dulu okukala nelineekelo kutya Jehova ota dulu oku tu kwafela pefimbo liwa?

¹⁶ Jehova okwa hala tu kale hatu ilikana kuye tu na elineekelo filufilu kutya ote ke tu “kwafa pefimbo liwa.” (Heb. 4:16) Mbela osho itashi ulike kutya oku na ko nasha nafye shili pauhandimwe? (Mat. 6:8; 10:29-31) Otu na okuulika kutya otu na eitavelo muJehova Kalunga mokukala hatu pula ekwafo kuye pandjikilile okupitila meilikano nokukatuka metwokumwe nomailikano etu nosho yo newiliko laye. Shimwe vali, inatu dimbweni okukala hatu ilikanene ovaitaveli vakwetu.

17, 18. (a) Eenghatu dilipi Jehova ta ka katukila ovatondi vaye mafiku? (b) Otu na okuhenuka okukwatwa keamo lokuninga shike?

¹⁷ Paife olo efimbo lokukala neitavelo la kola, ndele hafimbo ‘lokuhaitavela.’ (Rom. 4:20) Ovatondi vaKalunga, Satana nosho yo ovo ve li koshi yenwefemo laye, otava kendabala okuxulifa po oilonga oyo Jesus a pa ovashikuli vaye, nafye twa kwatelwa mo. (Mat. 28:19, 20) Ndele nande Ondiaboli nai tu ponokele, otu shii kutya Jehova oo e li ‘Kalunga omunamwenyo, oku li Omukulili wovanhu aveshe, naunene tuu wovaitaveli.’ Oku shii yo “[okuxupifa] ovayuki momahongaulo.” — 1 Tim. 4:10; 2 Pet. 2:9.

¹⁸ Mafiku Jehova ota ka xulifa po ounyuni ou woukolokoshi. Ndele nonande inatu shiivifilwa ashishe osho tashi ka ningwa po nokatu shii efimbo lokondadalunde opo tashi ka ningwa, otu na oushili kutya Kristus ota ka hanauna po ovatondi vaKalunga nosho yo kutya ounamapangelo waJehova otau ka yukipalifwa pefimbo la wapala. Onghee hano, itashi ka kala tuu epuko la kula ngeenge otwa dopa okudidilika mo “omafimbo neetundi” omo tu li! Inatu kwatweni nandenande keamo lokudiladila kutya “oinima aishe oi li ngaashi ya kala pehovelo leshito.” — 1 Tes. 5:1; 2 Pet. 3:3, 4.

KULIKA OIKALA ‘YOKUTEELELA’

19, 20. Omolwashike tu na okukulika oikala yokuteelela kuJehova?

¹⁹ Elalakano laJehova Kalunga lopehovelo li na sha novanhu ola li la kwatela mo okukala tave lihongo fiyo alushe kombinga yaye nosho yo yeshito laye lihokwifa. Omuudifi 3:11 okwa ti: “[Jehova] okwa ninga ashishe shiwa pefimbo lasho, nokwa tula momutima wavo oukwaalushe, ndelenee omunhu ita koneke oshilonga osho Kalunga ta ningi kehovelo fiyo kexulilo.”

²⁰ Inatu hafa tuu eshi Jehova ina lundulula elalakano laye li na sha novanhu! (Mal. 3:6) Ombibeli oya ti kutya puKalunga kape “nomalundululo ile omapilauko ouyelele nomulaulu.” (Jak. 1:17) Efimbolandulafano laye ihali wilikwa koinima oyo hai longifwa kovanhu opo va tengeneke efimbo, ngaashi edingonoko ledu. Jehova oye “Ohamba [yaalushe, NW].” (1 Tim. 1:17) Onghee hano, natu ‘teeleleni Kalunga kexupifo letu.’ (Mika 7:7) “Kaleni nomwenyo muwa, nomitima deni nadi tiluluke, nye amushe ava hamu teelele Omwene!” — Eps. 31:24.

[Omashangelo opedu]

[Efano pepandja 19]

Daniel okwa li a itavela kutya Kalunga ota ka wanifa po osho a xunganeka

[Efano pepandja 21]

Oho longifa ngoo nawa efimbo opo u longe ehalo laJehova?