پاتشالار 1-جازبا
16 ەحوبا حاناني+ ۇلى يقۋعا+ ٴسوزىن ارناپ، باعاساعا شىعارعان مىناداي ۇكىمىن جەتكىزدى: 2 «مەن سەنى شاڭ-توزاڭنان كوتەرىپ، حالقىم يسرايلگە كوسەم ەتىپ قويدىم+. سەن بولساڭ ەروبوعامنىڭ جولىنا ٴتۇسىپ، حالقىمدى كۇناعا باتىردىڭ. وسىلاي ولار كۇنالارىمەن مەنى قورلادى+. 3 سول ٷشىن نابات ۇلى ەروبوعامنىڭ ٷي ٸشىن جويىپ جىبەرگەنىمدەي+، باعاسانىڭ ٷي ٸشىن دە تۇپتامىرىمەن قۇرتىپ جىبەرەمىن. 4 ونىڭ اۋلەتىنە جاتاتىنداردىڭ قالادا ولگەندەرى يتكە، ال دالادا ولگەندەرى قۇسقا جەم بولادى».
5 باعاسانىڭ باسقا ارەكەتتەرى، جاساعان ىستەرى مەن قۇدىرەتى جايلى يسرايل پاتشالارىنىڭ تاريحى باياندالعان كىتاپتا جازىلعان. 6 اقىرىندا باعاسا اتا-بابالارىنا قوسىلدى دا، سۇيەگى تيرساعا+ قويىلدى. ونىڭ ورنىنا ۇلى ەلاح تاققا وتىردى. 7 ەحوبا حاناني ۇلى يقۋ پايعامبار ارقىلى باعاسانىڭ وزىنە جانە ٷي ىشىنە شىعارعان ۇكىمىن جەتكىزدى. سەبەبى باعاسا جاساعان بارلىق زۇلىم ىستەرىمەن ەحوبانى قورلاعان ەدى: ول ەروبوعامنىڭ ٷي ٸشىنىڭ ٸسىن قايتالادى، ٵرى ناداپتى* ٶلتىردى+.
8 ياھۋدا پاتشاسى اسانىڭ بيلىك قۇرۋىنىڭ جيىرما التىنشى جىلى باعاسا ۇلى ەلاح يسرايل تاعىنا وتىرىپ، تيرسادا ەكى جىل پاتشالىق ەتتى. 9 ەلاحقا سوعىس اربالارىنىڭ جارتىسىنا باسشىلىق ەتەتىن زيمري دەگەن قىزمەتشىسى قاستاندىق جاسادى. ەلاح تيرسادا ساراي باسقارۋشىسى ارزانىڭ ۇيىندە ٸشىپ، ماس بولىپ وتىرعان ەدى. 10 زيمري كىرىپ كەلدى دە، ونى ٶلتىرىپ تاستادى+. ال ٶزى ورنىنا پاتشا بولىپ الدى. بۇل ياھۋدا پاتشاسى اسانىڭ بيلىك قۇرۋىنىڭ جيىرما جەتىنشى جىلى بولدى. 11 تاققا وتىرا سالىسىمەن، زيمري باعاسانىڭ ٷي ٸشىن تۇگەل قىرىپ سالدى. ونىڭ اۋلەتىندەگى ەركەك كىندىكتىلەردى، تۋىستارى* مەن دوستارىن دا ٴبىرىن قالدىرماي جويىپ جىبەردى. 12 وسىلاي زيمري يقۋ پايعامبار ارقىلى ايتقان ەحوبانىڭ سوزدەرىنە ساي، باعاسانىڭ ٷي ٸشىن تۇپتامىرىمەن قۇرتتى+. 13 ويتكەنى باعاسا مەن ونىڭ ۇلى ەلاح وزدەرى دە كۇناعا باتىپ، يسرايلدى دە كۇناعا باتىرىپ، تۇككە تۇرعىسىز پۇتتارىمەن يسرايلدىڭ قۇدايى ەحوبانى قورلاعان ەدى+. 14 ەلاحتىڭ باسقا دا ارەكەتتەرى مەن جاساعان ىستەرى جايلى يسرايل پاتشالارىنىڭ تاريحى باياندالعان كىتاپتا جازىلعان.
15 ياھۋدا پاتشاسى اسانىڭ بيلىك قۇرۋىنىڭ جيىرما جەتىنشى جىلى زيمري تيرسادا جەتى كۇن پاتشا بولدى. بۇل كەزدە يسرايل جاساعى فىلىستىرلەردىڭ قالاسى گيبەتوندى قورشاۋعا الىپ جاتقان بولاتىن+. 16 قالانى قورشاۋعا الىپ جاتقان جاساققا ٴزيمريدىڭ پاتشاعا قاستاندىق جاساپ، ولتىرگەنى تۋرالى حابار جەتتى. سول-اق ەكەن كۇللى يسرايل قولباسشىلارى ومريدى+ اسكەر قوسىندا يسرايلگە پاتشا ەتىپ تاعايىندادى. 17 ومري مەن قاسىنداعى يسرايلدىكتەردىڭ ٴبارى گيبەتوندى تاستاپ، تيرسانى قورشاۋعا الدى. 18 زيمري قالانىڭ جاۋلاپ الىنعانىن كورگەندە، پاتشا سارايىنداعى بەكىنىس مۇناراسىنا كىرىپ الىپ، وت قويدى دا، سوندا ورتەنىپ ٶلدى+. 19 بۇل ونىڭ ەروبوعامنىڭ جولىمەن ٴجۇرىپ، ەحوبانىڭ الدىندا زۇلىمدىق جاساپ كۇناعا باتقانى ٷشىن جانە يسرايل ەلىن كۇناعا باتىرعانى ٷشىن وسىلاي بولدى+. 20 ٴزيمريدىڭ باسقا ارەكەتتەرى مەن جاساعان قاستاندىعى جايلى يسرايل پاتشالارىنىڭ تاريحى باياندالعان كىتاپتا جازىلعان.
21 سول كەزدە يسرايل ەلى ەكىگە بولىنگەن ەدى: ٴبىر جارتىسى گينات ۇلى ٴتيبنيدى پاتشا ەتكىسى كەلدى، ەكىنشى جارتىسى ومريدىڭ جاعىنا شىقتى. 22 اقىرىندا ومريدىڭ جاقتاستارى ۇستەم بولىپ، گينات ۇلى تيبني قازا تاپتى، ال ومري پاتشا بولدى.
23 وسىلاي ياھۋدا پاتشاسى اسانىڭ بيلىك قۇرۋىنىڭ وتىز ٴبىرىنشى جىلى ومري يسرايل تاعىنا وتىرىپ، 12 جىل بيلىك ەتتى. تيرسادا ول 6 جىل پاتشالىق قۇردى. 24 ومري شەمەر دەگەن كىسىدەن ەكى تالانتقا* ساماريا قىرىن ساتىپ الىپ، سول جەرگە قالا سالدى. ول قالانى قىردىڭ بۇرىنعى يەسى شەمەردىڭ ەسىمىمەن ساماريا*+ دەپ اتادى. 25 ومري ەحوبانىڭ الدىندا زۇلىمدىق جاساي بەردى. ونىڭ زۇلىمدىعى وزىنە دەيىنگىلەردىڭ بارىنەن اسىپ ٴتۇستى+. 26 ومري نابات ۇلى ەروبوعامنىڭ بارلىق جولىمەن ٴجۇرىپ، ونىڭ يسرايلدى كۇناعا باتىرعان ىستەرىنەن ايىرىلمادى. وسىلاي تۇككە تۇرعىسىز پۇتتارىمەن يسرايل قۇدايى ەحوبانى قورلادى+. 27 ومريدىڭ باسقا ارەكەتتەرى، جاساعان ىستەرى مەن ەرلىكتەرى جايلى يسرايل پاتشالارىنىڭ تاريحى باياندالعان كىتاپتا جازىلعان. 28 اقىرىندا، ول اتا-بابالارىنا قوسىلدى دا، سۇيەگى سامارياعا قويىلدى. ونىڭ ورنىنا ۇلى احاب+ تاققا وتىردى.
29 ومري ۇلى احاب ياھۋدا پاتشاسى اسانىڭ بيلىك قۇرۋىنىڭ وتىز سەگىزىنشى جىلى يسرايل ەلىنە پاتشا بولىپ، ساماريادا+ 22 جىل بيلىك ەتتى. 30 ومري ۇلى احابتىڭ ەحوبانىڭ الدىندا جاساعان زۇلىمدىعى وزىنە دەيىنگىلەردىڭ بارىنەن اسىپ ٴتۇستى+. 31 نابات ۇلى ەروبوعامنىڭ كۇناكار جولىمەن جۇرگەنى+ از بولعانداي، ول سيدون+ پاتشاسى ەتباعالدىڭ قىزى ەزابەلدى+ ايەلدىككە الىپ، باعالعا تابىنىپ+، باس ۇراتىن بولدى. 32 مۇنىسى بىلاي تۇرسىن، احاب ساماريادا باعالعا ارناپ عيباداتحانا+ سالىپ، سول جەردە باعالعا قۇرباندىق ورنىن تۇرعىزدى. 33 سونداي-اق ول قاسيەتتى باعانا* ورناتتى+. احاب يسرايلدىڭ قۇدايى ەحوبانى وزىنە دەيىنگى پاتشالاردىڭ قاي-قايسىسىنان دا بەتەر قورلادى.
34 احاب پاتشانىڭ تۇسىندا بەتەلدىك حيەل يەريحون قالاسىن قايتا تۇرعىزدى. ول قالانىڭ ىرگەتاسىن قالاعاندا، تۇڭعىشى ٵبيرامنان، ال قاقپالارىن ورناتقاندا، كەنجەسى سەگۋبتەن ايىرىلدى. وسىلاي ەحوبانىڭ نۇن ۇلى ەشۋا ارقىلى ايتقان سوزدەرى ورىندالدى+.