«سەندەردەگى جارىق» جارقىراپ، ەحوبانى ماداقتاسىن
«سەندەردەگى جارىق ادامدار الدىندا جارقىراپ تۇرسىن. وسىلايشا ولار... اكەلەرىڭدى ماداقتاسىن» (ماتاي 5:16).
اندەر: 143، 104
1. قانداي ەرەكشە جايت ٴبىزدى قۋانىشقا بولەيدى؟
قۇداي قىزمەتشىلەرىنىڭ وزدەرىندەگى جارىقتى جارقىراتىپ جۇرگەندەرىن ەستۋ ٴبىر عانيبەت! ەحوبانىڭ حالقى بىلتىر 10 000 000-نان اسا كيەلى كىتاپ زەرتتەۋ ساباعىن جۇرگىزدى. سونداي-اق ەسكە الۋ كەشىنە ميلليونداعان قىزىعۋشىلىق تانىتقان ادامدار كەلىپ، ەحوبانىڭ سۇيىسپەنشىلىكپەن بەرگەن سىيى، تولەم قۇرباندىعى، جايلى ٴبىلدى (جوحاننىڭ 1-حاتى 4:9).
2، 3. ا) بىزگە «شىراقتاي نۇر شاشۋعا» نە كەدەرگى جاسامايدى؟ ٵ) بۇل ماقالادا ٴبىز نە قاراستىرامىز؟
2 الەم بويىنشا ەحوبا كۋاگەرلەرى ٵرتۇرلى تىلدەردە سويلەيدى. ٴبىراق بۇل بىزگە بىرلىگى جاراسقان وتباسىنداي ەحوبانى ماداقتاۋعا ەش كەدەرگى جاسامايدى (ايان 7:9). قاي تىلدە سويلەمەيىك، قاي جەردە تۇرمايىق، «وسى دۇنيەدە شىراقتاي نۇر شاشا» الامىز (فىلىپىلىكتەرگە 2:15).
3 قىزمەتىمىز، ٴماسىحشىلىك بىرلىگىمىز، سەرگەكتىك ساقتاعانىمىز — وسىنىڭ ٴبارى ەحوباعا ماداق اكەلەدى. بىزدەگى جارىق وسى ٷش سالادا جارقىراپ تۇرۋ ٷشىن نە ىستەي الامىز؟ (ماتاي 5:14—16 وقىڭىز).
وزگەلەرگە ەحوباعا عيبادات ەتۋگە كومەكتەسىڭىز
4، 5. ا) ۋاعىزداۋمەن قاتار، ٴبىز وزىمىزدەگى جارىقتى قالاي جارقىراتا الامىز؟ ٵ) جىلى شىراي تانىتۋ قانداي جاقسى ناتيجە اكەلەدى؟ (ماقالانىڭ باسىنداعى سۋرەتتى قاراڭىز.)
4 بىزدەگى جارىقتى جارقىراتۋدىڭ ٴبىر ماڭىزدى جولى — ۋاعىزداۋ مەن شاكىرت دايىنداۋ (ماتاي 28:19، 20). 1925 جىلى شىققان «تۇنەكتەگى جارىق» دەپ اتالاتىن ماقالادا زاماننىڭ اقىرىندا «وزىندەگى جارىقتى جارقىراتۋدىڭ مۇمكىندىگىن پايدالانبايتىن» ادامدى يەمىزگە ادال دەۋگە بولمايتىنى ايتىلعان. وندا تاعى بىلاي دەلىندى: «ول وزىندەگى جارىقتى جارقىراتۋ ٷشىن جەردەگى ادامزاتقا ىزگى حاباردى جاريالاپ، ەحوبانىڭ ٵدىل تالاپتارىنا ساي ٶمىر ٴسۇرۋى ٴتيىس» («كۇزەت مۇناراسى»، 1 ماۋسىم، 1925-جىل). ۋاعىزداۋمەن قاتار، ٴبىزدىڭ ٴجۇرىس-تۇرىسىمىز دا ەحوباعا ماداق اكەلەدى. ۋاعىزداپ جۇرگەنىمىزدە، كوپ ادامدار بىزگە نازار اۋدارادى. سونداي كەزدەرى ولارعا كۇلىمسىرەپ، جىلى امانداسساق، ولار ٴبىز جايلى جانە عيبادات ەتەتىن قۇدايىمىز جايلى جاقسى ويدا بولادى.
قاۋىمىڭىزداعى باۋىرلاستارمەن جاقىنىراق تانىسا الاسىز با؟
5 يسا شاكىرتتەرىنە: «ۇيگە كىرگەندە، ونداعىلارمەن امانداسىپ، تاتۋلىق تىلەڭدەر»،— دەگەن (ماتاي 10:12). يسا ۋاعىزداعان اۋماقتا ۇيگە كەلگەن بەيتانىس ادامدى داستۇر بويىنشا ىشكە كىرگىزەتىن بولعان. ٴبىزدىڭ كۇنىمىزدە كوپ جەرلەردە مۇنداي داستۇر ساقتالماعان. ادامدار ەسىگىنىڭ الدىندا بوتەن بىرەۋدى كورسە، ٴجيى ۋايىمداپ نە اشۋلانىپ جاتادى. ال ەگەر ٴبىز دوستىق پەيىل مەن جىلى شىراي تانىتاتىن بولساق، ولار وزدەرىن جايلى سەزىنۋى مۇمكىن. ٴسىز كوپشىلىك ورىنداردا ادەبيەت ارباسىمەن ۋاعىزداعاندا، ادامدارعا كۇلىمدەپ، جىلى جۇزبەن امانداسساڭىز، ولار ارباعا ەركىن جاقىنداپ، ادەبيەت الۋعا قىسىلمايتىنىن بايقاعانسىز با؟ ولار ٴتىپتى اڭگىمە باستاۋعا ىقىلاس ٴبىلدىرۋى مۇمكىن!
6. ٴبىر قارت ەرلى-زايىپتىعا قىزمەتتەن قول ۇزبەۋگە نە كومەكتەسەدى؟
6 انگليادا تۇراتىن ٴبىر قارت ەرلى-زايىپتى دەنساۋلىقتارى ناشارلاعاندىقتان، بۇرىنعىداي ۇيمە-ٷي كوپ ۋاعىزداي المايدى. سوندىقتان ولار تۋرا ۇيلەرىنىڭ الدىنا ۇستەل قويىپ، ادەبيەتتەردى جايىپ قويادى. ۇيلەرى مەكتەپتىڭ جانىندا بولعاندىقتان، ولار بالالارىن الىپ كەتۋگە كەلگەن اتا-انالار ٷشىن قىزىقتى بولاتىن ادەبيەتتەردى شىعارىپ قويادى ەكەن. كەيبىر اتا-انالار سول ادەبيەتتەردى، سونىڭ ىشىندە «جاستاردىڭ ساۋالدارى. پايدالى كەڭەستەر» كىتابىنىڭ 1، 2-تومىن الىپ كەتەدى. ٴجيى بۇل قارت ەرلى-زايىپتىمەن بىرگە ٸزاشار ايەل باۋىرلاس تۇرادى. اتا-انالار ونىڭ جىلى شىرايلى ەكەنىن جانە قارت ەرلى-زايىپتىنىڭ وزگەلەرگە شىنىمەن كومەكتەسكىسى كەلەتىنىن بايقايدى. اتا-انالاردىڭ ٴبىرى ٴتىپتى كيەلى كىتاپتى زەرتتەۋدى باستاعان.
7. ٴسىز اۋماعىڭىزدا تۇراتىن بوسقىندارعا قالاي كومەكتەسە الاسىز؟
7 جاقىندا كوپتەگەن ادامدار تۋعان جەرلەرىن تاستاپ، وزگە ەلدەردەن پانا ىزدەۋگە ٴماجبۇر بولدى. ٴسىز تۇراتىن جەردە دە وسىنداي بوسقىندار بولسا، ولارعا ەحوبا تۋرالى بىلۋگە قالاي كومەكتەسە الاسىز؟ الدىمەن، ولاردىڭ تىلىندە امانداسۋدى ۇيرەنىپ الساڭىز بولادى. سونداي-اق JW Language قوسىمشاسىنان بىرنەشە سوزدەردى جاتتاپ الىپ ايتساڭىز، ولار ٴسال كىدىرىپ، ٴسىزبەن اڭگىمەلەسۋگە ىقىلاس ٴبىلدىرۋى مۇمكىن. سوسىن jw.org تور بەكەتىنەن ولاردىڭ تىلىندەگى بەينەروليكتەر مەن باسىلىمداردى كورسەتسەڭىز بولادى (مۇسانىڭ 5-جازباسى 10:19).
8، 9. ا) اپتا ىشىندەگى كەزدەسۋلەردىڭ بىزگە قانداي كومەگى بار؟ ٵ) اتا-انالار بالالارىنا قاۋىمدا ايتاتىن تۇسىنىكتەمەلەرىن جاقسارتۋعا قالاي كومەكتەسە الادى؟
8 ەحوبا ۋاعىزدا جەمىستى بولۋىمىزعا كومەكتەسەتىن بارلىق نارسەنى بەرىپ جاتىر. مىسالى، «ماسىحشىلىك ٶمىرىمىز بەن قىزمەتىمىز» كەزدەسۋىندە بىلگەندەرىمىز بىزگە قايتا بارۋعا، كيەلى كىتاپ زەرتتەۋ ساباعىن باستاۋعا كوبىرەك سەنىمدىلىك بەرەدى.
9 كەزدەسۋلەرىمىزگە جاڭا ادامدار كەلگەندە، ولار كوبىنەسە بالالاردىڭ ايتقان تۇسىنىكتەمەلەرىنە قايران قالىپ جاتادى. ٴسىز بالالارىڭىزدى ٶز سوزىمەن جاۋاپ بەرۋگە ۇيرەتە الاسىز. بالالاردىڭ ٶز سەنىمدەرىن قاراپايىم سوزدەرمەن ٵرى شىن جۇرەكتەن جەتكىزگەنىن ەستىپ، كەيبىرەۋلەر شىندىققا قىزىعۋشىلىق تانىتقان (قورىنتتىقتارعا 1-حات 14:25).
بىرلىكتى نىعايتىڭىز
10. وتباسىلىق عيبادات جانۇيانىڭ بىرلىگىن قالاي نىعايتا الادى؟
10 وتباسىمىزعا ٶزارا بىرلىك پەن تاتۋلىق ساقتاۋدى ۇيرەتۋ ٷشىن بارىنشا كۇش سالساق، ەحوباعا ماداق اكەلەمىز. مىسالى، اتا-انا بولساڭىز، وتباسىلىق عيبادات كەشىنىڭ جۇيەلى تۇردە وتۋىنە قام جاساڭىز. كوپتەگەن وتباسىلار JW Broadcasting باعدارلاماسىن كورىپ، ارتىنان بىلگەندەرىن ومىردە قالاي قولداناتىندارىن تالقىلايدى. كىشكەنتاي بالاعا جانە جاسوسپىرىمگە بەرىلەتىن ٴتالىم-تاربيە ەكى بولەك بولۋ كەرەكتىگىن ۇمىتپاڭىز. جانۇياڭىزدىڭ ٵربىر مۇشەسىنە وتباسىلىق عيباداتتىڭ مەيلىنشە پايداسىن كورۋگە كومەكتەسۋ ٷشىن بارىڭىزدى سالىڭىز (ٴزابۇر 148:12، 13).
ۇلكەن جاستاعى باۋىرلاستارعا ۋاقىت بولۋدىڭ پايداسى كوپ (11-ابزاستى قاراڭىز)
11—13. قاۋىمىمىزدىڭ بىرلىگىن نىعايتۋعا قالاي اتسالىسا الامىز؟
11 ٵلى جاس بولساڭ، سەن دە قاۋىمداعى بارلىق باۋىرلاستاردىڭ وزدەرىن باعالى سەزىنۋىنە ۇلەس قوسا الاسىڭ. مۇنىڭ ٴبىر جولى — ۇلكەن جاستاعى باۋىرلاستارمەن دوستاسۋ. ولاردان ەحوباعا كوپ جىل بويى تاباندىلىقپەن قىزمەت ەتۋگە نە كومەكتەسكەنىن سۇراپ كور. ولار سەنى كوپتەگەن قۇندى نارسەلەرگە ۇيرەتە الادى. بۇل سەنى دە، ولاردى دا جىگەرلەندىرەدى! كىشى نە ۇلكەن بولايىق، ٴبارىمىز دە پاتشالىق سارايىنا كەلگەن قوناقتاردى قۇشاق جايا قارسى الا الامىز. بۇل ٷشىن سالەمدەسىپ، كۇلىمدەپ، ورىن تابۋعا كومەكتەسىپ، باسقالارمەن تانىستىرۋعا بولادى. ولاردىڭ وزدەرىن ەركىن سەزىنۋىنە جاعداي جاسايىق.
12 ەگەر ٴسىز ۋاعىزعا ارنالعان كەزدەسۋدى جۇرگىزۋگە تاعايىندالعان بولساڭىز، ەگدە باۋىرلاستارعا وزدەرىندەگى جارىقتى جارقىراتا بەرۋگە كومەكتەسە الاسىز. قالاي؟ ايماقتاردىڭ ولارعا ىڭعايلى بولۋىن قاداعالاڭىز. ولاردى ۋاعىزعا جاستاۋ باۋىرلاستارمەن جىبەرۋگە تىرىسىڭىز. ەگدە جاستاعى نەمەسە دەنساۋلىعى ناشار باۋىرلاستار بۇرىنعىداي كوپ ۋاعىزداي المايتىندارىنا ٴجيى كوڭىلدەرى تۇسەدى. ال ەگەر ولاردىڭ قامىن ويلايتىنىڭىزدى، جاعدايلارىنا تۇسىنىكپەن قارايتىنىڭىزدى بىلسە، ولار وزدەرىن الدەقايدا جاقسى سەزىنىپ قالادى. جاستارى نەشەدە بولماسىن، شىندىقتا قانشا جۇرمەسىن، ٴسىزدىڭ مەيىرىمدىلىگىڭىز ولاردى قۇلشىنىسپەن ۋاعىزداي بەرۋگە تالپىندىرا الادى (مۇسانىڭ 3-جازباسى 19:32).
13 يسرايلدىكتەرگە ەحوباعا بىرگە عيبادات ەتۋ قۋانىش سىيلاعان. زابۇر جىرشىسى بىلاي دەپ جازعان: «باۋىرلاردىڭ بىرلىكتە تۇرعاندارى قانداي يگى، قانداي جاعىمدى!» (ٴزابۇر 133:1، 2 وقىڭىز). ول بىرلىكتى مايلاۋ راسىمىنە ارنالعان مايعا تەڭەگەن. بۇل ماي تەرىنى بالعىن ەتكەن، ٵرى جۇپار ٴيىستى بولعان. سول ىسپەتتى، ٴبىز جىلى ٴجۇزدى دە مەيىرىمدى بولۋ ارقىلى باۋىرلاستارىمىزدى سەرگىتە الامىز. سوندا قاۋىمنىڭ بىرلىگى نىعايا تۇسەدى. قاۋىمىڭىزداعى باۋىرلاستارمەن جاقىنىراق تانىسا الاسىز با؟ (قورىنتتىقتارعا 2-حات 6:11—13).
14. تۇرعىلىقتى جەرىڭىزدە وزىڭىزدەگى جارىقتى قالاي جارقىراتا الاسىز؟
14 قاي جەردە بولساق تا، ٴبىز وزىمىزدەگى جارىقتى جارقىراتا الامىز. ٴسىزدىڭ مەيىرباندىلىعىڭىزدى كورىپ، كورشىلەرىڭىز ەحوبا جايلى كوبىرەك بىلگىسى كەلۋى مۇمكىن. بىلايشا ويلانىپ كورسەڭىز بولادى: «كورشىلەرىم مەن تۋرالى قانداي پىكىردە؟ ٷيىم ۇقىپتى ٵرى تازا ما؟ ٴبىزدىڭ ٷي اينالانىڭ ٴسانىن كەلتىرىپ تۇر ما؟ كورشىلەرىمە كومەكتەسىپ تۇرامىن با؟» باسقا باۋىرلاستاردان ولاردىڭ مەيىرباندىلىعى مەن جاقسى ۇلگىسى تۋىستارىنا، كورشىلەرىنە، ارىپتەستەرىنە نە سىنىپتاستارىنا قالاي ىقپال ەتكەنى جايلى سۇراپ كورىڭىز (ەفەستىكتەرگە 5:9).
سەرگەك بولىڭىز
15. نەگە سەرگەك بولۋىمىز قاجەت؟
15 جارىعىمىزدىڭ جارقىراي بەرگەنىن قالاساق، قاي ۋاقىتتا ٶمىر ٴسۇرىپ جاتقانىمىزدى ەستەن شىعارماۋىمىز قاجەت. يسا شاكىرتتەرىنە بىرنەشە رەت: «سەرگەك بولىڭدار!»— دەگەن (ماتاي 24:42؛ 25:13؛ 26:41). «زور الاپات» جۋىق ارادا كەلمەيدى دەپ ويلاساق، ادامدارعا ەحوبا جايلى ۇيرەتۋدىڭ ٵربىر مۇمكىندىگىن قولدانۋعا كۇش سالمايمىز (ماتاي 24:21). سوندا بىزدەگى جارىق جارقىراپ تۇرۋدىڭ ورنىنا، بىرتە-بىرتە السىرەپ، ٴتىپتى ٴسونىپ قالۋى مۇمكىن.
16، 17. سەرگەكتىك ساقتاۋ ٷشىن نە ىستەي الاسىز؟
16 قازىر ٴبىز ٷشىن بۇرىنعىدان بەتەر سەرگەك بولاتىن ۋاقىت. مىنا دۇنيەدەگى احۋال بارعان سايىن ناشارلاپ بارادى. ٴبىراق ٴبىز دۇنيەنىڭ سوڭى ٴدال ەحوبا بەلگىلەگەن ۋاقىتتا كەلەتىنىن بىلەمىز (ماتاي 24:42—44). ال سول ۋاقىت كەلگەنشە، ٴبىز شىدامدى بولىپ، بولاشاققا كوز تىگۋىمىز كەرەك. كيەلى كىتاپتى كۇن سايىن وقىڭىز. ەحوباعا دۇعا ەتۋدى ەش دوعارماڭىز (پەتىردىڭ 1-حاتى 4:7). جىلدار بويى ەحوباعا قىزمەت ەتىپ كەلە جاتقان باۋىرلاستاردان ۇلگى-ونەگە الىڭىز. مىسالى، ولاردىڭ ٶمىرباياندارىن وقىپ كورىڭىز. سولاردىڭ ٴبىرى — «جەتپىس جىل بويى ياھۋدالىق ادامنىڭ ەتەگىنە جارماسىپ كەلەمىن» دەگەن ٶمىربايان («كۇزەت مۇناراسى»، 2012-جىل، 15 ٴساۋىر، 18—21 بەتتەر).
17 ەحوباعا دەگەن قىزمەتتە كوپ ەڭبەكتەنە بەرىڭىز. وزگەلەرگە جاقسىلىق جاساڭىز، باۋىرلاستارمەن بىرگە ۋاقىت وتكىزىڭىز. سوندا قۋانىشقا كەنەلىپ، ۋاقىتتىڭ قالاي تەز وتكەنىن بايقاماي قالاسىز (ەفەستىكتەرگە 5:16). سوڭعى ٴجۇز جىلدا ەحوبانىڭ قىزمەتشىلەرى وتە كوپ جۇمىس اتقاردى. قازىر ٴبىز بۇرىن-سوڭدى بولماعانداي كوپ ٸس اتقارۋدامىز. ەحوبانىڭ ٸسى ٴبىز ەش ويلاماعان دەڭگەيدە العا باستى. ٴبىزدىڭ جارىعىمىز كۇندەي جارقىراۋدا!
باقتاشىلىق ساپار كەزىندە ٴبىز قۇداي دانالىعىنىڭ يگىلىگىن كورە الامىز (18، 19-ابزاستى قاراڭىز)
18، 19. اقساقالدار بىزگە ەحوباعا قۇلشىنىسپەن قىزمەت ەتۋگە قالاي كومەكتەسە الادى؟ مىسال كەلتىرىڭىز.
18 كوپ قاتەلىك جاساساق تا، ەحوبا بىزگە وزىنە قىزمەت ەتۋگە مۇمكىندىك بەرىپ وتىر. بىزگە كومەكتەسۋ ٷشىن ول «سىي رەتىندە ادامداردى»، ياعني اقساقالداردى بەرگەن (ەفەستىكتەرگە 4:8، 11، 12 وقىڭىز). سوندىقتان ٴسىزگە اقساقالدار كەلگەندە، مۇمكىندىكتى پايدالانىپ، ولاردىڭ دانالىعى مەن اقىل-كەڭەسىنەن ۇيرەنىڭىز.
19 انگليادا تۇراتىن ٴبىر ەرلى-زايىپتىنىڭ نەكەسىندە قيىندىقتار تۋىنداپ، ولار ەكى اقساقالدان كومەك سۇراعان. ايەلىنىڭ ويىنشا، كۇيەۋى ەحوباعا قىزمەت ەتۋدە جەتەكشىلىكتى قولعا الماعان. ال كۇيەۋى ٴتالىم بەرۋ قولىمنان كەلمەيدى دەپ ويلاپ، وتباسىلىق عيباداتتى جۇيەلى تۇردە وتكىزبەيتىنىن مويىنداعان. اقساقالدار ولاردىڭ نازارىن يسانىڭ ۇلگىسىنە اۋداردى. ولار كۇيەۋىن يسانىڭ شاكىرتتەرىنە قالاي قامقورلىق ەتكەنىنەن ۇلگى الۋعا تالپىندىردى. ال ايەلىن كۇيەۋىنە شىداممەن قاراۋعا شاقىردى. سونداي-اق ولارعا ەكى بالاسىمەن وتباسىلىق عيباداتتى قالاي وتكىزە الاتىندارىنا قاتىستى ٴبىراز كەڭەستەر بەردى (ەفەستىكتەرگە 5:21—29). سودان كۇيەۋى وتاعاسى رەتىندەگى مىندەتىن جاقسىراق اتقارۋعا كوپ كۇش سالدى. اقساقالدار ونى ەش بەرىلمەي، ەحوبانىڭ رۋحىنا ارقا سۇيەي بەرۋگە تالپىندىردى. اقساقالداردىڭ سۇيىسپەنشىلىگى مەن مەيىرىمدىلىگى بۇل وتباسىنا قاتتى كومەكتەستى!
20. وزىڭىزدەگى جارىقتى جارقىراتا تۇسسەڭىز، ناتيجەسى قانداي بولادى؟
20 «ەحوبادان قورقاتىن، ونىڭ جولدارىمەن جۇرەتىن ادام باقىتتى» (ٴزابۇر 128:1). وزىڭىزدەگى جارىقتى جارقىراتا تۇسسەڭىز، باقىتتى بولاسىز. سوندىقتان وزگەلەرگە قۇداي تۋرالى ٴتالىم بەرىڭىز، وتباسىڭىز بەن قاۋىمىڭىزعا بىرلىكتە بولۋعا بارىنشا كومەكتەسىڭىز جانە سەرگەك بولىڭىز. سوندا ٴسىزدىڭ يگى ىستەرىڭىزدى كورىپ، وزگەلەر دە اكەمىز ەحوبانى ماداقتاعىسى كەلەدى (ماتاي 5:16).