17-تاراۋ
ەحوبانىڭ ۇيىمىنا جاقىن بولىڭىز
شاكىرت جاقىپ: «قۇدايعا جاقىنداڭدار، سوندا ول دا سەندەرگە جاقىندايدى»،— دەپ جازعان (جاق. 4:8). راسىندا دا، ەحوبا ادامزاتتىڭ ٷنىن ەستىمەيتىندەي تىم اسقاق، تىم الىس ەمەس. وعان ٴبىزدىڭ كەمەلسىزدىگىمىز دە كەدەرگى ەتپەيدى (ەل. ٸس. 17:27). الايدا قۇدايعا قالاي جاقىنداي الامىز؟ بۇل ٷشىن ىستىق دۇعا ارقىلى ەحوبامەن جەكە تىعىز قارىم-قاتىناس ورناتۋىمىز قاجەت (ٴزاب. 39:12). سونداي-اق ونىڭ ٴسوزىن جۇيەلى تۇردە زەرتتەۋ دە ماڭىزدى. وسىلايشا ٴبىز ەحوبا قۇدايدى جاقىننان تانىپ، ونىڭ ماقساتتارىن جانە بىزگە قاتىستى ەركىن بىلە تۇسەمىز (ٴتىم. 2-ح. 3:16، 17). ناتيجەسىندە ونى جاقسى كورۋدى ۇيرەنەمىز، ٵرى ونىڭ الدىندا ورىندى قورقىنىشقا يە بولامىز (ٴزاب. 25:14).
2 ەحوبامەن جاقىن قارىم-قاتىناستى تەك ونىڭ ۇلى يسا ارقىلى عانا ورناتا الامىز (جوح. 17:3؛ ريم. 5:10). ەشبىر پەندە اتاۋلى ەحوبانىڭ وي-سەزىمىن يسا سياقتى اشىپ جەتكىزە المايدى. ول اكەسىمەن جاقىن بولعانى سونشا: «ۇلىنىڭ كىم ەكەنىن اكەدەن باسقا ەشكىم بىلمەيدى. اكەنىڭ كىم ەكەنىن ۇلىنان جانە ۇلى اشقىسى كەلگەن ادامنان باسقا ەشكىم بىلمەيدى»،— دەگەن بولاتىن (لۇقا 10:22). سوندىقتان يسانىڭ وي-سەزىمدەرى جايلى ىزگى حابارلاردان وقىپ-زەرتتەگەندە، ٴبىز نەگىزىنەن ەحوبانىڭ وي-سەزىمدەرى جايلى بىلەمىز. مۇنداي ٴبىلىم ٴبىزدى قۇدايعا ٴسوزسىز جاقىنداتادى.
3 ٴبىز قۇداي ۇلىنىڭ باسشىلىعىمەن ەحوبامەن جاقىن قارىم-قاتىناس دامىتامىز. بۇل ٷشىن قۇداي ەركىن ورىنداۋدى ۇيرەتىپ جاتقان كوزگە كورىنەتىن ارناعا ەتەنە جاقىن بولامىز. ماتاي 24:45—47 تارماقتاردا جازىلعان پايعامبارلىققا ساي، قوجايىن، ياعني يسا ٴماسىح، ادال ٷي ىشىندەگىلەرىنە اس-سۋدى ۋاقتىلى بەرىپ تۇرۋ ٷشىن «ادال دا اقىلدى قۇلدى» تاعايىندادى. بۇگىندە ادال قۇل رۋحاني اس-سۋدى مولىنان بەرىپ جاتىر. وسى ارنا ارقىلى ەحوبا بىزگە ٶز ٴسوزىن كۇن سايىن وقۋدى، قاۋىم كەزدەسۋلەرىنە جۇيەلى تۇردە بارىپ تۇرۋدى، «پاتشالىق جايلى ىزگى حاباردى» قۇلشىنا جاريالاۋدى كەڭەس ەتەدى (مات. 24:14؛ 28:19، 20؛ ەشۋا 1:8؛ ٴزاب. 1:1—3). ادال قۇل كەمەلسىز بولسا دا، ولارعا باسشىلىق ەتىپ جاتقان قۇداي ەكەنىنە نىق سەنۋىمىز كەرەك. ەحوبانىڭ ۇيىمىنىڭ كوزگە كورىنەتىن بولىگىنە جاقىن بولىپ، باسشىلىعىنا قۇلاق اسقانىمىز ٴجون. بۇل ٴبىزدى ەحوباعا جاقىنداتىپ، قيىندىق كەزىندە نىعايتادى ٵرى قورعايدى.
نەگە قيىندىقتار كوبەيۋدە؟
4 بالكىم، ٴسىز شىندىق جولىندا ۇزاق جىلدان بەرى جۇرگەن شىعارسىز. ەندەشە، مىنسىزدىك سىنالعاندا تاباندى بولۋدىڭ نە ەكەنىن ايتپاي-اق جاقسى تۇسىنەسىز. ال ەحوبانى جۋىردا عانا ٴبىلىپ، ونىڭ حالقىمەن تانىسقانىڭىزعا كوپ بولماسا، ەحوبانىڭ بۇكىلالەمدىك بيلىگىنە مويىنسۇنعان اركىمگە شايتان ٸبىلىس قارسى ەكەنىن بىلەتىن شىعارسىز (ٴتىم. 2-ح. 3:12). سونىمەن، تاباندى بولىپ كەلە جاتقانىڭىزعا، مەيلى كوپ بولسىن نە از بولسىن، قورقىنىشقا بوي الدىرىپ، مۇڭايۋعا ەش سەبەپ جوق. ويتكەنى ەحوبا ٴسىزدى تاستامايتىنىن، قۇتقاراتىنىن، ٶمىر سيلايتىنىن ۋادە ەتەدى (ەۆر. 13:5، 6؛ ايان 2:10).
5 شايتاننىڭ جۇيەسى اياقتالعانشا، ٴبارىمىز قيىندىقتارعا دۋشار بولۋىمىز ابدەن مۇمكىن. 1914-جىلى قۇداي پاتشالىعى ورناعاننان بەرى ەحوبانىڭ كوكتەگى تۇراعىنا شايتان ٷشىن جول جوق. ول جەرگە لاقتىرىلعان، سوندىقتان زۇلىم پەرىشتەلەرىمەن بىرگە جەردىڭ اياسىنان شىعىپ كەتە المايدى. شايتان وتە قاھارلى. جەردەگى قاسىرەتتىڭ كوبەيۋى جانە ەحوبانىڭ ادال قىزمەتشىلەرىنىڭ قۋعىندالۋى — سونىڭ دالەلى، ٵرى ونىڭ زۇلىم بيلىگىنىڭ سوڭعى كۇندەرىندە ٶمىر ٴسۇرىپ جاتقانىمىزدى راستايدى (ايان 12:1—12).
6 ماسقارا كۇيگە ۇشىراعانىنا اشۋلى شايتان ٶز ۋاقىتىنىڭ از قالعانىن بىلەدى. ول جىن-پەرىلەرمەن بىرگە پاتشالىق جايلى ۋاعىز ىسىنە قالاي دا بولسا توسقاۋىل قويىپ، قۇداي حالقىنىڭ بىرلىگىن بۇزۋدى كوكسەيدى. سول سەبەپتى ٴبىز رۋحاني مايداندا سوعىسۋدامىز، كيەلى كىتاپتا ايتىلعانداي، ٴبىز «ادام بالاسىنا قارسى ەمەس، ۇكىمەتتەرگە، بيلەۋشىلەرگە جانە تۇنەكتەگى وسى دۇنيەنى بيلەپ-توستەپ وتىرعان اكىمدەرگە قارسى، ياعني كوكتەگى زۇلىم رۋحتارعا قارسى كۇرەسۋدەمىز». ەگەر ەحوبانىڭ جاعىندا ٴجۇرىپ، جەڭىسكە جەتكىمىز كەلسە، مايداندا بوساڭسىماي، رۋحاني قارۋ-جاراقتارىمىزدى جاقسى كۇيدە ساقتاۋىمىز قاجەت. ٸبىلىستىڭ «زىميان ٸس-ارەكەتتەرىنە تويتارىس بەرۋىمىز» كەرەك (ەفەس. 6:10—17). ارينە، بۇل ٷشىن تاباندىلىق قاجەت.
تاباندىلىق دامىتايىق
7 تاباندىلىق دەگەنىمىز قيىنشىلىققا نە باقىتسىزدىققا ۇشىراعاندا بەرىلمەۋدى بىلدىرەدى. كيەلى كىتاپتا تاباندىلىق دەپ قيىندىققا، قارسىلىققا، قۋعىن-سۇرگىنگە نەمەسە قۇدايعا دەگەن مىنسىزدىگىمىزدەن تايدىراتىن باسقا دا جايتتارعا قاراماستان، دۇرىس نارسەنى ىستەۋدەن اينىماي نىق تۇرۋدى بىلدىرەدى. ماسىحشىلەردىڭ تاباندىلىعى وزدىگىنەن كەلمەيدى، ونى دامىتۋ قاجەت، ٵرى بۇعان ۋاقىت كەرەك. سەنىمىمىز كۇشەيگەن سايىن، تاباندىلىعىمىز دا سوعۇرلىم نىعايا تۇسەدى. ماسىحشىلەر جولىنا جاڭادان تۇسكەندە، ٴبىز سەنىمىمىزدى سىنعا العان كىشىگىرىم سىناقتاردا تاباندى بولىپ، نىعايا تۇستىك، ەندى الدا كۇتىپ تۇرعان ۇلكەن سىناقتارعا دا توزۋگە دايىنبىز (لۇقا 16:10). سەنىمدە بەرىك تۇرۋعا قاتىستى شەشىمدى قابىلداۋ ٷشىن ۇلكەن سىناقتاردى كۇتۋدىڭ قاجەتى جوق. مۇنداي شەشىمدى سىناقتار تونبەس بۇرىن قابىلداۋ كەرەك. تاباندىلىق قاسيەتىنىڭ قۇدايعا ۇنامدى باسقا دا قاسيەتتەرمەن قاتار داميتىنىن ەلشى پەتىر بىلاي دەپ جەتكىزدى: «ٶز تاراپتارىڭنان بارىنشا كۇش سالىپ، سەنىمدەرىڭدى ىزگىلىكپەن، ىزگىلىكتەرىڭدى بىلىممەن، بىلىمدەرىڭدى ۇستامدىلىقپەن، ۇستامدىلىقتارىڭدى تاباندىلىقپەن، تاباندىلىقتارىڭدى قۇدايعا شىن بەرىلگەندىكپەن، قۇدايعا شىن بەرىلگەندىكتەرىڭدى باۋىرلاستىق سۇيىسپەنشىلىكپەن، باۋىرلاستىق سۇيىسپەنشىلىكتەرىڭدى بارىنە دەگەن سۇيىسپەنشىلىكپەن تولىقتىرىڭدار» (پەت. 2-ح. 1:5—7؛ ٴتىم. 1-ح. 6:11).
قيىندىققا كەزىگىپ، ولاردى جەڭگەن سايىن تاباندىلىعىمىز كۇن ساناپ ارتا بەرەدى
8 تاباندىلىق دامىتۋدىڭ قانشالىقتى ماڭىزدى ەكەنىن جاقىپ بىلاي دەپ ايتقان: «باۋىرلاستارىم، ٵرتۇرلى سىناقتارعا ۇشىراعاندا، بۇنى زور قۋانىشپەن قابىلداڭدار. ويتكەنى وسىلاي سىنالعان سەنىمدەرىڭنىڭ تاباندىلىق تۋدىراتىنىن بىلەسىڭدەر. ٴبىراق تاباندىلىقتارىڭ تولىعىمەن كورسەتىلسىن، سوندا بارلىق جاعىنان كەمەلدى دە تولىسقان، ەش كەمشىلىكسىز بولاسىڭدار» (جاق. 1:2—4). بايقاساق، جاقىپ سىناقتاردى قۋانا قابىلداۋ كەرەكتىگىن ايتقان، ويتكەنى ولار تاباندىلىق تۋدىرادى. ٴسىز دە قيىندىقتارعا وسىلاي قارايسىز با؟ سودان كەيىن جاقىپ تاباندىلىقتىڭ ارقاسىندا ماسىحشىلىك بولمىسىمىز كەمەلىنە جەتىپ، قۇدايعا تولىقتاي ۇنامدى بولا الاتىنىمىزدى كورسەتتى. ٴيا، ٴبىز قيىندىققا كەزىگىپ، ولاردى جەڭگەن سايىن تاباندىلىعىمىز كۇن ساناپ ارتا بەرەدى. ال تاباندىلىق باسقا دا قاجەتتى كوركەم قاسيەتتەردى تۋدىرادى.
9 تاباندى بولعانىمىز قۇدايعا جاعىمدى. تاباندىلىعىمىزدى كورىپ، ول بىزگە ماڭگىلىك ٶمىر سيلايدى. جاقىپ ٶز ٴسوزىن بىلاي جالعادى: «سىناقتاردا تاباندىلىق تانىتاتىن ادام باقىتتى، سەبەبى ەحوبانىڭ ىقىلاسىنا يە بولىپ، ٶزىن سۇيەتىندەرگە ۋادە ەتكەن ٶمىر ٴتاجىن الادى» (جاق. 1:12). ٴيا، ومىرگە يە بولۋ ٷشىن تاباندىلىق قاجەت. تاباندىلىقسىز ٴبىز شىندىق جولىندا قالا المايمىز. وسى دۇنيەنىڭ قىسپاعىنا توتەپ بەرمەسەك، بۇل الەمگە قايتا ورالۋىمىز عاجاپ ەمەس. تاباندى بولماساق، ەحوبانىڭ رۋحىنان ايىرىلىپ قالامىز، ال سونىڭ سالدارىنان رۋحتىڭ جەمىسىن تانىتا المايمىز.
10 وسىنداي قيىن زاماندا تاباندىلىق ساقتاۋ ٷشىن، ماسىحشىلەر رەتىندە كورەتىن قيىندىقتارىمىزعا دۇرىس كوزقاراس تانىتۋ قاجەت. جاقىپتىڭ ٴسوزىن ەسكە الساق، ول: «زور قۋانىشپەن قابىلداڭدار»،— دەگەن. بۇلاي ەتۋ وڭاي ەمەس، ويتكەنى قيىندىقتار ٴتان ازابى مەن جان ازابىنا دۋشار ەتۋى مۇمكىن. ٴبىراق بولاشاق ٶمىر بايگەگە تىگىلگەنىن ۇمىتپاڭىز. كەزىندەگى ەلشىلەردىڭ وقيعالارى قيىندىقتاردا قالاي قۋانىپ جۇرۋگە بولاتىنىن تۇسىنۋگە كومەكتەسەدى. ەلشىلەردىڭ ىستەرى كىتابىندا مىناداي وقيعا جازىلعان: «سودان ەلشىلەردى شاقىرتىپ، دۇرە سوقتىردى دا، بۇدان بىلاي يسانىڭ اتىنان سويلەمەۋدى بۇيىرىپ، بوساتىپ جىبەردى. جوعارعى كەڭەستەن شىققان ەلشىلەر ونىڭ اتى ٷشىن قورلىق كورۋگە لايىق سانالعاندارىنا قۋاندى» (ەل. ٸس. 5:40، 41). ەلشىلەر ٴبىر نارسەنى تۇسىنگەن: ولاردىڭ باسىنا تۇسكەن قيىندىق — يسانىڭ تاپسىرماسىنا مويىنسۇنىپ جاتقاندارىنىڭ جانە ەحوبانىڭ ماقۇلداۋىنا يە بولعاندارىنىڭ دالەلى. جىلدار وتە، پەتىر رۋحتىڭ جەتەلەۋىمەن ٴبىرىنشى حاتىن جازعاندا، ادىلدىك ٷشىن جاپا شەگۋدىڭ باعالى ەكەنىن ايتىپ ٶتتى (پەت. 1-ح. 4:12—16).
11 پاۋىل مەن سيلاستىڭ باسىنان وتكەن ٴبىر جاعدايدى كورەيىك. فىلىپىدە ميسسيونەرلىك ىستەرىن اتقارىپ جۇرگەندە، ولار «قالانى دۇرلىكتىردى، زاڭسىز داستۇرلەردى ۇيرەتىپ ٴجۇر» دەگەن ايىپپەن قاماۋعا الىندى. ٴسۇيتىپ، ولار قاتتى سوققىعا جىعىلىپ، تۇرمەگە تاستالدى. كيەلى كىتاپتا باياندالعانداي، جارالارى تاڭىلماعان كۇيدە تۇرمەدە جاتىپ، «ٴتۇن ورتاسىندا پاۋىل مەن سيلاس دۇعا ەتىپ، قۇدايدى انمەن ماداقتادى. مۇنى وزگە تۇتقىندار ەستىپ جاتتى» (ەل. ٸس. 16:16—25). پاۋىل مەن سيلاس ٴماسىح ٷشىن كورىپ جاتقان قيىندىقتارىنا دۇرىس كوزقاراس تانىتتى. ولار مۇنى قۇداي الدىنداعى مىنسىزدىكتەرىنىڭ دالەلى دەپ ساناۋمەن قوسا، ىزگى حابارعا ىڭعاي تانىتقان ادامدارعا كوبىرەك كۋالىك بەرۋدىڭ مۇمكىندىگى دەپ ەسەپتەدى. بۇل وزگەلەردىڭ ومىرىنە اسەر ەتتى. سول ٴتۇنى-اق تۇرمە باستىعى مەن ونىڭ ٷي ٸشى پاۋىل مەن سيلاستى تىڭداپ، ٴماسىحتىڭ شاكىرتى بولدى (ەل. ٸس. 16:26—34). پاۋىل مەن سيلاس ەحوباعا، ونىڭ قۇدىرەتىنە جانە قيىن شاقتا قۇدايدىڭ قولداپ-دەمەيتىنىنە سەنىم ارتتى. بۇل سەنىمدەرى اقتالدى دا.
12 ەحوبا ٴبىزدىڭ دە تاباندى بولعانىمىزدى قالايدى. سوندىقتان قيىن شاقتاردا ٴبىزدى قولداپ-دەمەۋ ٷشىن قاجەتتىنىڭ ٴبارىن بەرگەن. ول رۋحتىڭ جەتەلەۋىمەن جازىلعان كيەلى كىتاپتى بەردى، وسىلاي ٶزىنىڭ ەركى جايلى تۋرا ٴبىلىم سيلادى. بۇل بولسا سەنىمىمىزدى وسىرەدى. بۇعان قوسا، بىزدە ٴبىر سەنىمدەگى باۋىرلاستارمەن ارالاسۋ جانە قاسيەتتى قىزمەتتى اتقارۋ مۇمكىندىگى بار. ەحوبامەن تىعىز قارىم-قاتىناس دامىتۋىمىز ٷشىن بىزگە دۇعا ايتۋ مارتەبەسى دە بەرىلگەن. ول ٴبىزدىڭ ماداعىمىزدى ەستيدى، ونىڭ كوز الدىندا تازا بولىپ قالۋ ٷشىن كومەك سۇراپ ايتقان وتىنىشتەرىمىزگە قۇلاق تۇرەدى (ٴفىلىپ. 4:13). قۇداي سيلاعان ٷمىتتى دە ەستەن شىعارماي، سول جايلى ويلانعانىمىز دا زور كۇش دارىتادى (مات. 24:13؛ ەۆر. 6:18؛ ايان 21:1—4).
ٴتۇرلى قيىندىقتاردا تاباندى بولۋ
13 بۇگىندە ٴبىز كەزىگەتىن قيىندىقتارعا ەرتەدە يسا ٴماسىحتىڭ شاكىرتتەرى دە كەزىككەن. مىسالى، بۇگىندە ەحوبا كۋاگەرلەرى تەرىس اقپارات العان قارسىلاستاردىڭ تاراپىنان ٴسوز جۇزىندە جانە ٸس جۇزىندە قورلىق كورىپ جاتادى. تۋرا ەلشىلەردىڭ زامانىنداعىداي، مۇنداي قارسىلىقتاردىڭ كوبىسى قۇداي سوزىندە ايىپتالاتىن ىلىمدەر مەن سالت-جورالاردى ۇستاناتىن ٴدىني فاناتيكتەردىڭ ايداۋىمەن بولادى (ەل. ٸس. 17:5—9، 13). كەيدە ەحوبانىڭ حالقى ۇكىمەتتەر بەكىتكەن زاڭدى قۇقىقتارىنا جۇگىنگەننىڭ ارقاسىندا ماسەلە شەشىلىپ جاتادى (ەل. ٸس. 22:25؛ 25:11). ٴبىراق كەيدە ۇكىمەتتەردىڭ ٶزى ماسىحشىلىك قىزمەتىمىزدى توقتاتۋ ٷشىن، ىسىمىزگە رەسمي تۇردە تيىم سالادى (ٴزاب. 2:1—3). مۇنداي جاعدايدا ٴبىز ادال ەلشىلەردىڭ سوزدەرى مەن ىستەرىنە باتىلدىقپەن ەلىكتەيمىز. ولار بىلاي دەگەن بولاتىن: «بيلەۋشى رەتىندە ٴبىرىنشى كەزەكتە ادامعا ەمەس، قۇدايعا مويىنسۇنۋىمىز كەرەك» (ەل. ٸس. 5:29).
14 ۇلتشىلدىق رۋحى دۇنيەجۇزى بويىنشا كۇشىنە مىنگەن سايىن، ىزگى حاباردىڭ جاريالاۋشىلارىنا قۇداي تاپسىرعان قىزمەتتى توقتاتقىزۋ ٷشىن ۇلكەن قىسىم كورسەتىلۋدە. قۇدايدىڭ بارلىق قىزمەتشىلەرى ايان 14:9—12-تارماقتاردا جازىلعان «جىرتقىش اڭ مەن ونىڭ مۇسىنىنە» عيبادات ەتەتىندەرگە قاتىستى ەسكەرتۋدىڭ ٴمان-ماعىناسىن انىق تۇسىنەدى. ٴبىز جوحاننىڭ مىنا سوزدەرىنىڭ ماڭىزدىلىعىن بىلەمىز: «مۇندا قاسيەتتىلەرگە، ياعني قۇدايدىڭ وسيەتتەرىن ورىندايتىن ٵرى يساعا دەگەن سەنىمىن بەرىك ساقتايتىندارعا، تاباندىلىق قاجەت».
15 سوعىس يا رەۆوليۋسيا بۇرق ەتسە، قۋعىن-سۇرگىن تونسە يا ىسىمىزگە رەسمي تۇردە شەك قويىلسا، عيباداتىمىزدى ەمىن-ەركىن اتقارا الماي قالۋىمىز ابدەن مۇمكىن. قاۋىم بولىپ جينالۋ دا مۇمكىن بولمايتىن شىعار. فيليالمەن بايلانىس ٷزىلۋى مۇمكىن. اۋداندىق باقىلاۋشىلاردىڭ ساپارى توقتايتىن شىعار. جاڭا ادەبيەتتەر ٴسىز ٷشىن قولجەتىمسىز بولۋى مۇمكىن. وسى جاعدايدىڭ ٴبارى بولماسا دا، ٴبىرى تۋىپ قالسا، نە ىستەۋ كەرەك؟
16 مۇنىڭ جاۋابى — قانداي جاعداي بولماسىن، قولىڭىزدان كەلگەندى ىستەي بەرىڭىز. جەكە زەرتتەۋ جۇرگىزىڭىز. كىشىگىرىم توپ بولىپ ۇيلەردە جينالۋعا بولادى. كەزدەسۋلەردە ادەبيەتتەردىڭ ەسكى ساندارى مەن كيەلى كىتاپتىڭ ٶزىن زەرتتەۋگە بولادى. تەك مازاڭىز قاشپاسىن، قورقىنىشقا دا بوي الدىرماڭىز. مۇنداي جاعدايلاردا باسقارۋشى كەڭەس تەز ارادا جاۋاپتى باۋىرلاستارمەن بايلانىس ورناتۋدىڭ جولدارىن تاۋىپ جاتادى.
17 ٴسىز ٴتىپتى باۋىرلاستاردىڭ بارىنەن اجىراپ، وقشاۋ قالساڭىز دا، مىنانى ەستە ۇستاڭىز: ٴسىز ەحوبا مەن ونىڭ ۇلى يسا ماسىحتەن اجىراپ قالعان جوقسىز. ٷمىت وتىن سوندىرۋگە ەش سەبەپ جوق. دۇعالارىڭىز ٵلى دە قۇدايدىڭ قۇلاعىنا جەتەدى، ول ٴسىزدى رۋحىمەن قۋاتتاي الادى. ونىڭ باسشىلىعىن ىزدەڭىز. ەحوبانىڭ قىزمەتشىسى ٵرى يسا ٴماسىحتىڭ شاكىرتى ەكەنىڭىزدى ەستەن شىعارماڭىز. سول سەبەپتى كۋالىك بەرۋدىڭ مۇمكىندىگىن قالت جىبەرمەڭىز. ەحوبا تالپىنىسىڭىزعا باتاسىن بەرىپ، كوپ ۇزاماي شىنايى عيباداتقا جاڭا ادامدار دا قوسىلۋى بەك مۇمكىن (ەل. ٸس. 4:13—31؛ 5:27—42؛ ٴفىلىپ. 1:27—30؛ 4:6، 7؛ ٴتىم. 2-ح. 4:16—18).
18 ال ەگەر ولىممەن بەتپە-بەت كەزىككەن ەلشىلەر مەن باسقا كىسىلەر سياقتى، سىزگە دە ٶلىم قاۋپى تونسە، «ولگەندەردى تىرىلتەتىن» قۇدايعا سەنىم ارتىڭىز (قور. 2-ح. 1:8—10). قايتا تىرىلۋگە دەگەن سەنىمنىڭ ارقاسىندا ەڭ اۋىر دەگەن سىناقتىڭ وزىندە تاباندى بولا الاسىز (لۇقا 21:19). وسى ورايدا يسا ٴماسىح جاقسى ۇلگى قالدىرعان. ول سىناق كەزىندە تانىتقان ادالدىعى وزگەلەردىڭ تاباندى بولۋعا دەگەن شەشىمىن نىعايتاتىنىن بىلگەن. ٴسىز دە وسىلاي باۋىرلاستار ٷشىن قايرات-جىگەردىڭ قاينارى بولا الاسىز (جوح. 16:33؛ ەۆر. 12:2، 3؛ پەت. 1-ح. 2:21).
19 قارسىلىقتار مەن قۋعىن-سۇرگىندى ايتپاعاندا، تاباندىلىقتى تالاپ ەتەتىن باسقا دا قيىندىقتارىڭىز بار شىعار. مىسالى، اۋماقتاعى ادامداردىڭ ىزگى حابارعا سالعىرت قارايتىنى كەيبىر باۋىرلاستاردىڭ كوڭىلىن تۇسىرەدى. ال وزگە بىرەۋلەر اۋىر دەرتتىڭ يا جۇيكە اۋرۋلارىنىڭ زاردابىن كورۋدە، يا بولماسا پەندەشىلىكپەن بايلانىستى شەكتەۋلەرىنە ٴتوزىپ ٴجۇر. قىزمەتىنە كەدەرگى ەتكەن وسىنداي قيىندىق ەلشى پاۋىلدا دا بولعان (قور. 2-ح. 12:7). I عاسىردا ٴفىلىپى قالاسىندا ٶمىر سۇرگەن ەپافروديت تە «ٶزىنىڭ اۋىرىپ قالعانى تۋرالى [دوستارىنا] حابار جەتكەنىنە قاتتى كۇيزەلگەن» (ٴفىلىپ. 2:25—27). كەيدە ٶزىمىزدىڭ جانە وزگەلەردىڭ پەندەشىلىگى جاعدايدى توزە الماستاي قيىنداتىپ جاتادى. باۋىرلاسىمىزبەن، ٴتىپتى وتباسىمىزدا جەكە كەلىسپەۋشىلىكتەر تۋىنداۋى مۇمكىن. ٴبىراق مۇنداي كەدەرگىلەردى ەحوبانىڭ سوزىندەگى كەڭەستەرگە قۇلاق اسۋ ارقىلى جەڭە الاسىز (ەزەك. 2:3—5؛ قور. 1-ح. 9:27؛ 13:8؛ قول. 3:12—14؛ پەت. 1-ح. 4:8).
ادال بولىپ قالۋعا بەكىنىڭىز
20 ەحوبا يسا ٴماسىحتى قاۋىمنىڭ باسى ەتىپ تاعايىنداعان. سوندىقتان ونىمەن «بايلانىسىمىز» بولۋ كەرەك (قول. 2:18، 19). «ادال دا اقىلدى قۇلمەن» جانە تاعايىندالعان باقىلاۋشىلارمەن قىزمەتتەسۋىمىز قاجەت (ەۆر. 13:7، 17). تەوكراتيالىق شارالارعا باعىنىپ، جەتەكشىلىك ەتەتىن باۋىرلاستارمەن قىزمەتتەسسەك، ەحوبانىڭ ەركىن ۇيىمداسا ورىنداي الامىز. دۇعا ەتۋ مارتەبەسىن دە بارىنشا قولدانۋعا ٴتيىسپىز. ەسىڭىزدە بولسىن، ەشقانداي تۇرمە تورى، ٴتىپتى وندا جالعىز وتىرساڭىز دا، كوكتەگى ٴسۇيۋشى اكەمىزبەن سويلەسۋگە كەدەرگى بولا المايدى جانە باۋىرلاستارمەن ارامىزداعى بىرلىكتى بۇزا المايدى.
21 ەندەشە، بەلىمىزدى بەكەم بۋىپ، تاباندى بولىپ، كەزىندە يسا ٴماسىح قايتا تىرىلگەننەن كەيىن ٸزباسارلارىنا تاپسىرعان ۋاعىز ٸسىن ەش بەرىلمەي ورىنداۋ ٷشىن بارىمىزدى سالايىق! سول كەزدە يسا بىلاي دەگەن ەدى: «سوندىقتان بارىڭدار دا، بارلىق حالىقتاردان شاكىرتتەر دايىنداپ، ولاردى اكەنىڭ، ۇلدىڭ جانە كيەلى رۋحتىڭ اتىنان شومىلدىرۋ راسىمىنەن وتكىزىڭدەر، ٵرى مەن سەندەرگە بۇيىرعانداردىڭ ٴبارىن ۇستانۋدى ۇيرەتىڭدەر» (مات. 28:19، 20). يسا سياقتى تاباندى بولايىق. پاتشالىققا دەگەن ۇكىلى ٷمىتىمىزدى سوندىرمەي، ماڭگىلىك ٶمىردى نازاردا انىق ۇستايىق (ەۆر. 12:2). شومىلدىرۋ راسىمىنەن وتكەن ماسىحشىلەردە ٴبىر مارتەبە بار — «وسى زاماننىڭ اياقتالۋى» جايلى يسانىڭ پايعامبارلىعىنىڭ ورىندالۋىنا ۇلەس قوسۋ. ول: «پاتشالىق جايلى وسى ىزگى حابار بارلىق حالىقتار ەستۋ ٷشىن بۇكىل جەر بەتىندە ۋاعىزدالادى. سودان كەيىن وسى زاماننىڭ سوڭى كەلەدى»،— دەگەن (مات. 24:3، 14). قازىر وسى ىسكە شىن جۇرەكتەن قاتىسساق، ەحوبانىڭ ادىلدىك ورناعان جاڭا دۇنيەسىنە قۋانىشپەن اياق باسامىز!