25-تاراۋ
عيبادات ەتۋگە ارنالعان شاتىر
مۇسا سيناي تاۋىندا بولعاندا، ەحوبا وعان كيەلى شاتىر جاساۋدى تاپسىردى. يسرايلدىكتەر سول كيەلى شاتىرعا بارىپ عيبادات ەتۋ كەرەك ەدى. ال كوشكەندە، ونى وزدەرىمەن بىرگە الىپ ٴجۇرۋ كەرەك بولاتىن.
ەحوبا مۇساعا: «حالىق بەرە الاتىن نارسەلەرىن اكەلىپ، كيەلى شاتىردى تۇرعىزۋعا كومەكتەسسىن»،— دەدى. سوندا يسرايلدىكتەر التىن، كۇمىس، مىس، اسىل تاستار مەن اشەكەيلەر اكەلە باستادى. ولار اعاش، زىعىر ماتا، جانۋارلاردىڭ تەرىسىن تاعى سول سياقتى كوپ زاتتار بەردى. حالىقتىڭ جومارت بولعانى سونشا — مۇسانىڭ: «ەندى ەشتەڭە اكەلمەي-اق قويىڭدار»،— دەۋىنە تۋرا كەلدى.
شاتىردى جاساۋعا كوپتەگەن شەبەر ەر كىسىلەر مەن ايەلدەر كومەكتەستى. ەحوبا ولارعا دانالىق بەردى. ولاردىڭ كەيبىرى ٴجىپ ٴيىردى، ماتا توقىدى، كەستە تىكتى، ال وزگە بىرەۋلەرى تاسپەن، التىنمەن جۇمىس ىستەدى نەمەسە اعاشتان ويىلعان بۇيىمدار جاسادى.
حالىق كيەلى شاتىردى تۋرا ەحوبا ايتقانداي ەتىپ ىستەدى. ولار قاسيەتتى بولمە مەن ەڭ قاسيەتتى بولمەنى ٴبولىپ تۇراتىن ادەمى شىمىلدىق تا جاسادى. ەڭ قاسيەتتى بولمەدە قاراعان اعاشىنان جاسالىپ، التىنمەن قاپتالعان كەلىسىم ساندىعى تۇردى. ال قاسيەتتى بولمەگە التىن شامدال، ۇستەل جانە حوش ٴيىستى زات تۇتەتەتىن ۇستەل قويىلدى. شاتىردىڭ اۋلاسىنا مىس قازان مەن ۇلكەن قۇرباندىق وشاعى قويىلدى. كەلىسىم ساندىعى يسرايلدىكتەردىڭ ەحوباعا بەرگەن ۋادەلەرىن ەستەرىنە سالىپ تۇردى. ولار قۇدايعا مويىنسۇنامىز دەپ ۋادە ەتكەن ەدى. سەن كەلىسىم دەگەننىڭ نە ەكەنىن بىلەسىڭ بە؟ بۇل — سالتاناتتى تۇردە بەرىلەتىن ۋادە.
ەحوبا حارون مەن ونىڭ ۇلدارىن كيەلى شاتىردا ٴدىني قىزمەتكەر بولسىن دەپ تاڭدادى. ولار شاتىردى كۇتىپ ۇستاپ، سول جەردە ەحوباعا قۇرباندىقتار شالۋ كەرەك ەدى. ەڭ قاسيەتتى بولمەگە تەك باس ٴدىني قىزمەتكەر حاروننىڭ كىرۋىنە بولاتىن. ول بۇل بولمەگە جىلىنا ٴبىر-اق رەت كىرىپ، ٶزىنىڭ، وتباسىنىڭ جانە بۇكىل يسرايل حالقىنىڭ كۇناسى ٷشىن ەحوباعا قۇرباندىق ۇسىناتىن.
يسرايلدىكتەر مىسىردان شىققاندارىنا ٴبىر جىل بولعاندا، كيەلى شاتىردى جاساپ ٴبىتتى. ەندى ولاردىڭ ەحوباعا عيبادات ەتەتىن ورنى بار ەدى.
ەحوباعا كيەلى شاتىر ۇناپ، ونىڭ ۇستىندە بۇلت پايدا بولدى. بۇلت كيەلى شاتىردىڭ ۇستىندە تۇرعاندا، يسرايلدىكتەر تۇرىپ جاتقان جەرلەرىنەن جىلجىمايتىن. ال بۇلت جوعارى كوتەرىلگەندە، ولار جولعا شىعاتىن. حالىق كيەلى شاتىردى بۇزاتىن دا، ونى الىپ، بۇلتتىڭ سوڭىنان ەرەتىن.
«سونان سوڭ كوكتەگى تاقتان بىلاي دەگەن زور داۋىستى ەستىدىم: «مىنە، قۇدايدىڭ تۇراعى ادامدار اراسىندا! ول سولارمەن بىرگە تۇرىپ، ولار ونىڭ حالقى بولماق. وسىلاي قۇدايدىڭ ٶزى سولارمەن بىرگە بولادى» (ايان 21:3).