23-ساباق
شومىلدىرۋ ٴراسىمى — وكىندىرمەس ماقسات!
يسا شومىلدىرۋ راسىمىنەن ٶتۋ ماسىحشىلەرگە قويىلاتىن تالاپ ەكەنىن ايتقان (ماتاي 28:19، 20 وقىڭىز). ال شومىلدىرۋ ٴراسىمى دەگەن نە؟ سول ماقساتقا قول جەتكىزۋ ٷشىن ادام نە ىستەۋ كەرەك؟
1. شومىلدىرۋ ٴراسىمى دەگەن نە؟
«شومىلدىرۋ ٴراسىمى» دەگەن ٴسوز گرەك تىلىنەن شىققان، ٵرى ول «سۋعا باتىرۋ» دەگەندى بىلدىرەدى. يسا يوردان وزەنىندە شومىلدىرۋ راسىمىنەن ٶتتى. ول سۋعا باتىرىلىپ، سوسىن «سۋدان شىقتى» (مارقا 1:9، 10). يسا سياقتى شىنايى ماسىحشىلەر دە شومىلدىرۋ راسىمىنەن وتكەندە، بۇكىل دەنەسىمەن سۋعا تولىق باتىرىلادى.
2. شومىلدىرۋ ٴراسىمى نەنىڭ بەلگىسى؟
شومىلدىرۋ راسىمىنەن وتكەندە، ادام ٶز ٶمىرىن ەحوباعا باعىشتاعانىن پاش ەتەدى. ال ادام قالاي باعىشتالادى؟ شومىلدىرۋ راسىمىنەن وتپەي تۇرىپ، ول ٶز دۇعاسىندا ەحوباعا ماڭگى باقي قىزمەت ەتكىسى كەلەتىنىن ايتادى. ول تەك ەحوباعا عيبادات ەتەتىنىن جانە ونىڭ قالاۋىن ورىنداۋ ومىرىندە ەڭ ماڭىزدى ٸس بولاتىنىن ۋادە ەتەدى. سونداي-اق «وزىنەن باس تارتىپ»، ۇدايى يسانىڭ تالىمدەرى مەن ۇلگىسىنە ساي ٶمىر ٴسۇرۋدى شەشەدى (ماتاي 16:24). باعىشتالۋ مەن شومىلدىرۋ ٴراسىمىنىڭ ارقاسىندا ول ەحوبامەن جانە وعان عيبادات ەتەتىندەرمەن جاقىن دوستىق ورناتادى.
3. شومىلدىرۋ راسىمىنەن ٶتۋ ٷشىن نە ىستەۋ كەرەك؟
شومىلدىرۋ راسىمىنەن ٶتۋ ٷشىن ادام ەحوبا جايلى ٴبىلىم الىپ، وعان دەگەن سەنىمىن نىعايتۋ كەرەك (ەۆرەيلەرگە 11:6 وقىڭىز). ٴبىلىمىڭىز بەن سەنىمىڭىز ارتقان سايىن، ەحوباعا دەگەن سۇيىسپەنشىلىگىڭىز دە ارتادى. سوسىن ول تۋرالى ايتۋعا جانە ونىڭ زاڭ-تالاپتارىمەن ٶمىر سۇرۋگە دەگەن ىقىلاسىڭىز ويانادى (تىموتەگە 2-حات 4:2؛ جوحاننىڭ 1-حاتى 5:3). ٴسۇيتىپ، ەحوباعا «بارلىق جاعىنان ۇنامدى» ٶمىر سۇرە باستاعان سوڭ، ادام ٶز ٶمىرىن قۇدايعا باعىشتاپ، شومىلدىرۋ راسىمىنەن وتەمىن دەگەن بايلامعا كەلۋى مۇمكىن (قولوستىقتارعا 1:9، 10)a.
تەرەڭىرەك ٷڭىلىڭىز
يسانىڭ شومىلدىرۋ راسىمىنەن نە بىلەتىنىمىزدى جانە وسى راسىمنەن وتكىسى كەلەتىندەر قالاي دايىندالاتىنىن بىلەيىك.
4. يسانىڭ شومىلدىرۋ راسىمىنەن بىلەرىمىز
ماتاي 3:13—17 وقىپ، يسانىڭ شومىلدىرۋ ٴراسىمى تۋرالى كوبىرەك بىلە الاسىز. سوسىن مىنا سۇراقتاردى تالقىلاڭىزدار:
يسا شومىلدىرۋ راسىمىنەن نارەستە كەزىندە ٶتتى مە؟
يسا شومىلدىرۋ راسىمىنەن قالاي ٶتتى؟ كەيبىر دىندەگىدەي، يسانىڭ تەك باسىنا عانا سۋ قۇيىلعان با؟
يسا شومىلدىرۋ راسىمىنەن وتكەننەن كەيىن، قۇداي وعان ارنايى تاپسىرعان ىسكە كىرىستى. لۇقا 3:21—23 جانە جوحان 6:38 وقىپ، مىنا سۇراقتى تالقىلاڭىزدار:
يسا شومىلدىرۋ راسىمىنەن وتكەن سوڭ، قانداي ٸستى ٶمىرىنىڭ تورىنە شىعاردى؟
5. شومىلدىرۋ ٴراسىمى — قولجەتىمدى ماقسات
قۇدايعا باعىشتالىپ، شومىلدىرۋ راسىمىنەن ٶتۋ العاشىندا قورقىنىشتى كورىنۋى مۇمكىن. الايدا زەرتتەي كەلە، سىزدە سەنىمدىلىك پايدا بولىپ، وسى ماڭىزدى شەشىمدى جاساۋعا دايىن بولاسىز. وسىلاي ىستەگەن ادامدار جايىندا ٴبىلۋ ٷشىن، بەينەروليكتى كورىڭىزدەر.
جوحان 17:3 پەن جاقىپ 1:5 وقىپ، كەلەسى سۇراقتى تالقىلاڭىزدار:
شومىلدىرۋ راسىمىنەن وتۋگە دايىن بولۋعا نە كومەكتەسەدى؟
ا. ٴبىز ەحوباعا باعىشتالعاندا، وعان ماڭگى باقي قىزمەت ەتكىمىز كەلەتىنىن ايتامىز
ٵ. ال شومىلدىرۋ راسىمىنەن وتكەندە، قۇدايعا باعىشتالعانىمىزدى پاش ەتەمىز
6. شومىلدىرۋ راسىمىنەن وتكەندە، ەحوبانىڭ وتباسىنا قوسىلامىز
ٴبىز شومىلدىرۋ راسىمىنەن وتكەندە، بىرلىگى جاراسقان حالىقارالىق وتباسىنا قوسىلامىز. تۋعان جەرىمىز بەن العان تاربيەمىز ٵرتۇرلى بولسا دا، سەنەتىن نانىمدارىمىز بەن ونەگەلىك قۇندىلىقتارىمىز ٴبىر. ٴزابۇر 25:14 پەن پەتىردىڭ 1-حاتى 2:17 وقىپ، مىنا سۇراقتى تالقىلاڭىزدار:
ادامنىڭ شومىلدىرۋ راسىمىنەن وتكەنى ەحوبامەن جانە وعان عيبادات ەتەتىن ادامدارمەن قارىم-قاتىناسىنا قالاي ىقپال ەتەدى؟
كەيبىرەۋلەردىڭ ايتاتىنى: «شومىلدىرۋ راسىمىنەن وتۋگە دايىن ەمەسپىن».
وسىلاي سەزىنسەڭىز دە، بۇل ماقساتقا قول جەتكىزگىڭىز كەلە مە؟
تۇيىندەمە
يسا ماسىحشىلەر شومىلدىرۋ راسىمىنەن ٶتۋ كەرەك دەپ ايتقان. بۇل ماقساتقا قول جەتكىزۋ ٷشىن، ادام ەحوباعا بەرىك سەنىم ٶسىرۋ كەرەك، ونىڭ زاڭ-تالاپتارىنا ساي ٶمىر ٴسۇرۋ كەرەك جانە ٶمىرىن وعان باعىشتاۋ قاجەت.
قايتالاۋ
شومىلدىرۋ ٴراسىمى دەگەن نە جانە نەگە ول ماڭىزدى قادام؟
شومىلدىرۋ ٴراسىمى نەنى پاش ەتەدى؟
ادام باعىشتالىپ، شومىلدىرۋ راسىمىنەن وتپەس بۇرىن نە ىستەۋ كەرەك؟
قوسىمشا ىزدەنىڭىز
شومىلدىرۋ ٴراسىمىنىڭ شىن مانىندە نە ەكەنىن وقىپ كورىڭىز.
«شومىلدىرۋ ٴراسىمى دەگەن نە؟» (jw.org تور بەكەتىندەگى ماقالا)
شومىلدىرۋ راسىمىنەن ٶتۋ ٷشىن ادام نە ىستەي الاتىنىن ٴبىلىڭىز.
ٴبىر ەر ادامنىڭ شومىلدىرۋ راسىمىنەن وتۋىنە نە تۇرتكى بولعانىن وقىپ كورىڭىز.
شومىلدىرۋ ٴراسىمى نەگە قويۋعا تۇرارلىق ماقسات ەكەنىن ٵرى وعان قالاي دايىندالا الاتىنىڭىزدى ٴبىلىڭىز.
a ەگەر ادام بۇرىن باسقا دىندە شومىلدىرۋ راسىمىنەن وتكەن بولسا، وعان قايتادان شومىلدىرۋ راسىمىنەن ٶتۋ كەرەك. نەگە؟ ويتكەنى سول ٴدىن كيەلى كىتاپتاعى شىندىقتى ۇيرەتپەگەن. ەلشىلەردىڭ ىستەرى 19:1—5 جانە 13-ساباقتى قاراڭىز.