2-زەرتتەۋ ماقالاسى
«يسانىڭ جاقسى كورەتىن شاكىرتىنەن» ۇلگى الايىق
«ٵرى قاراي دا ٴبىر-ٴبىرىمىزدى سۇيەيىك، سەبەبى سۇيىسپەنشىلىك قۇدايدان» (جوح. 1-ح. 4:7).
105-ٵن «قۇداي — سۇيىسپەنشىلىك»
اڭداتپاa
1. قۇدايدىڭ سۇيىسپەنشىلىگى ٴسىزدى قانداي سەزىمگە بولەيدى؟
ەلشى جوحان: «قۇداي — سۇيىسپەنشىلىك»،— دەپ جازعان (جوح. 1-ح. 4:8). وسى ەكى عانا ٴسوزدىڭ استارىندا وتە ماڭىزدى شىندىق جاتىر. ٶمىردىڭ قاينار كوزى بولىپ تابىلاتىن قۇداي — سۇيىسپەنشىلىكتىڭ دە قاينار كوزى. ەحوبا ٴبىزدى جاقسى كورەدى! ەحوبانىڭ سۇيىسپەنشىلىگى قاۋىپسىزدىك سيلاپ، ٴبىزدى باقىت پەن قاناعاتقا بولەيدى.
2. ماتاي 22:37—40-تارماقتارعا ساي، ەڭ باستى ەكى زاڭ قانداي جانە ەكىنشى زاڭعا مويىنسۇنۋ نەگە قيىن بولىپ جاتادى؟
2 ماسىحشىلەر سۇيىسپەنشىلىك تانىتۋ-تانىتپاۋدى وزدەرى شەشپەيدى. ويتكەنى بۇل — زاڭ (ماتاي 22:37—40 وقىڭىز). ەحوبانى جاقىنىراق تانىپ-بىلگەن كەزدە، ٴبىرىنشى زاڭعا مويىنسۇنۋ بىزگە ەش قيىنعا سوقپايدى. ويتكەنى ەحوبا — كەمەلدى تۇلعا، ول بىزگە تۇسىنىكپەن قاراپ، جۇمساقتىق تانىتادى. ال ەكىنشى زاڭعا مويىنسۇنۋ بىزگە قيىن بولىپ جاتادى. مۇنىڭ سەبەبى — وزگە ادامداردىڭ ىشىندەگى ەڭ جاقىندارىمىز، ياعني باۋىرلاستارىمىز كەمەلسىز. كەيدە ولاردىڭ ايتقان سوزدەرى مەن ىستەرى كوڭىلىمىزگە ٴتيىپ، جانىمىزعا باتىپ جاتادى. ەحوبا بىزگە وسى ەكىنشى زاڭعا مويىنسۇنۋ قيىن بولاتىنىن ٴبىلىپ، كەيبىر ادامدارعا ٴبىر-ٴبىرىمىزدى نە ٷشىن جاقسى كورۋىمىز كەرەكتىگى جانە سۇيىسپەنشىلىكتى قالاي تانىتۋ كەرەكتىگى جايلى ناقتى نۇسقاۋلار جازدىردى. سول ادامداردىڭ ٴبىرى — جوحان (جوح. 1-ح. 3:11، 12).
3. جوحان نە نارسەگە باسا نازار اۋداردى؟
3 جوحان ٶزىنىڭ جازبالارىندا ماسىحشىلەر سۇيىسپەنشىلىك تانىتۋعا مىندەتتى ەكەنىنە باسا نازار اۋدارعان. ول يسانىڭ ٶمىرى جايلى جازعاندا، ماتاي، مارقا، لۇقاعا قاراعاندا «سۇيىسپەنشىلىك» پەن «جاقسى كورۋ» جايلى جيىرەك ايتقان. شامامەن ٴجۇز جاسقا كەلگەندە، ول جوحان جازعان ىزگى حابار مەن وزگە ٷش حاتىن جازدى. كيەلى رۋحتىڭ جەتەلەۋىمەن جازىلعان بۇل جازبالاردان ٴماسىحشىنىڭ ٵربىر ارەكەتىنە سۇيىسپەنشىلىك ىقپال ەتۋ كەرەكتىگىن كورۋگە بولادى (جوح. 1-ح. 4:10، 11). الايدا جوحاننىڭ وزىنە بۇنى ۇيرەنۋگە ٴبىراز ۋاقىت كەتتى.
4. جوحان وزگەلەردى بارلىق كەزدە جاقسى كورگەن بە؟
4 جاس كەزىندە جوحاننىڭ سۇيىسپەنشىلىك تانىتپاعان كەزدەرى بولعان. بىردە يسا مەن ونىڭ شاكىرتتەرى ساماريا ارقىلى يەرۋساليمگە بارا جاتتى. ساماريالىقتاردىڭ ٴبىر اۋىلىندا ولارعا ەشكىم قوناقجايلىلىق تانىتپادى. سول كەزدە جوحان قالاي ارەكەت ەتتى؟ ول كوكتەن وت ٴتۇسىرىپ، بۇكىل اۋىلدى جويىپ جىبەرۋگە دايىن تۇردى! (لۇقا 9:52—56). تاعى بىردە ول قاسىنداعى ەلشىلەرگە سۇيىسپەنشىلىك تانىتپادى. ول اعاسى جاقىپپەن بىرگە يسادان پاتشالىعىندا ٴدال قاسىنان ورىن بەرۋىن سۇراۋعا اناسىن كوندىرگەن كورىنەدى. وزگە ەلشىلەر جاقىپ پەن جوحاننىڭ بۇل ارەكەتى جايلى بىلگەندە، قاتتى اشۋلاندى. (مات. 20:20، 21، 24). جوحان وسىنداي قاتەلىكتەر جاساسا دا، يسا ونى جاقسى كوردى (جوح. 21:7).
5. بۇل ماقالادا ٴبىز نە قاراستىرامىز؟
5 بۇل ماقالادا ٴبىز جوحاننىڭ ۇلگىسىن جانە ونىڭ سۇيىسپەنشىلىككە قاتىستى جازعان سوزدەرىن قاراستىرامىز. قاراستىرۋ بارىسىندا باۋىرلاستاردى جاقسى كورەتىنىمىزدى قالاي كورسەتۋگە بولاتىنىن بىلەمىز. سونداي-اق وتباسىندا وتاعالار ٶز ٷي ٸشىن جاقسى كورەتىندەرىن قالاي كورسەتە الاتىندارىن قاراستىرامىز.
ٸس-ارەكەتتەن كورىنەتىن سۇيىسپەنشىلىك
ەحوبا ٴبىزدى جاقسى كورەتىنىن كورسەتىپ، ٶز ۇلىن جەرگە جىبەرىپ، ٴبىز ٷشىن ولىمگە قيدى (6، 7-ابزاستى قاراڭىز)
6. ەحوبا ٴبىزدى جاقسى كورەتىنىن قالاي كورسەتتى؟
6 ٴبىز ٴجيى سۇيىسپەنشىلىك دەگەندى ىشتەگى جىلى سەزىمدى سوزبەن ايتىپ جەتكىزۋ دەپ تۇسىنەمىز. ٴبىراق سۇيىسپەنشىلىك شىنايى بولۋ ٷشىن، ول ٸس-ارەكەتتەن دە كورىنىس تابۋ كەرەك (جاقىپ 2:17، 26 سالىستىرىڭىز). مىسالى، ەحوبانى الايىق. ول ٴبىزدى جاقسى كورەدى (جوح. 1-ح. 4:19). كيەلى كىتاپتا ەحوبا ٶزىنىڭ بىزگە دەگەن سۇيىسپەنشىلىگىن ادەمى سوزدەرمەن جەتكىزگەن (ٴزاب. 25:10؛ ريم. 8:38، 39). ٴبىراق ەحوبانىڭ ٴبىزدى جاقسى كورەتىنى ونىڭ سوزدەرىنەن عانا ەمەس، ىستەرىنەن دە كورىنەدى. جوحان: «قۇداي بىزگە دەگەن سۇيىسپەنشىلىگىن بىلاي كورسەتتى: جالعىز ۇلىن وسى دۇنيەگە جىبەردى. وسىلايشا سول ارقىلى ومىرگە يە بولۋىمىزعا جول اشتى»،— دەپ جازعان (جوح. 1-ح. 4:9). ەحوبا ٶزىنىڭ سۇيىكتى ۇلىن ٴبىز ٷشىن ازاپتى ولىمگە قيدى (جوح. 3:16). وسىدان كەيىن ەحوبانىڭ ٴبىزدى شىن سۇيەتىنىنە كۇماندانۋعا بولا ما؟
7. يسا ٴبىزدى جاقسى كورەتىنىن قالاي كورسەتتى؟
7 يسا شاكىرتتەرىنە ولاردى جاقسى كورەتىنىن ايتقان (جوح. 13:1؛ 15:15). يسا ولاردى جانە ٴبىزدى قانشالىقتى جاقسى كورەتىنىن سوزىمەن عانا ەمەس، ىسىمەن دە كورسەتتى. ول: «دوستارى ٷشىن جانىن قيعان ادامنىڭ سۇيىسپەنشىلىگىنەن ارتىق سۇيىسپەنشىلىك جوق»،— دەگەن (جوح. 15:13). ەحوبا مەن يسانىڭ ٴبىز ٷشىن نە ىستەگەنى جايلى وي جۇگىرتكەندە، بۇل ٴبىزدى نە ىستەۋگە تالپىندىرۋ كەرەك؟
8. جوحاننىڭ 1-حاتى 3:18 گە ساي، ٴبىز نە ىستەۋىمىز كەرەك؟
8 ٴبىز ەحوبا مەن يسانى جاقسى كورەتىنىمىزدى ولارعا مويىنسۇنۋ ارقىلى كورسەتەمىز (جوح. 14:15؛ جوح. 1-ح. 5:3). ال يسا بىزگە ٴبىر-ٴبىرىمىزدى ٴسۇيۋدى وسيەت ەتكەن (جوح. 13:34، 35). ٴبىز باۋىرلاستارىمىزدى سۇيەتىنىمىزدى ٴسوز جۇزىندە عانا ەمەس، ٸس جۇزىندە دە كورسەتۋىمىز كەرەك (جوحاننىڭ 1-حاتى 3:18 وقىڭىز). باۋىرلاستارىمىزدى جاقسى كورەتىنىمىزدى كورسەتۋدىڭ ناقتى قانداي جولدارى بار؟
باۋىرلاستارىڭىزدى جاقسى كورىڭىز
9. سۇيىسپەنشىلىگى جوحاندى نە ىستەۋگە تالپىندىردى؟
9 جوحان اكەسىنىڭ قاسىندا قالىپ، وتباسىلىق بالىق اۋلاۋ كاسىپتەرىن العا جىلجىتىپ، كوپ اقشا تابۋىنا بولار ەدى. ٴبىراق ول بۇكىل عۇمىرىن ەحوبا مەن يسا تۋرالى شىندىقتى وزگەلەرگە ۇيرەتۋگە ارنادى. جوحان تاڭداعان ٶمىر وڭاي بولعان جوق. ول يسا تۋرالى ۋاعىزداعانى ٷشىن كوپ قۋعىن-سۇرگىن كوردى. ال I عاسىردىڭ اياعىنا تامان، قارتايعان شاعىندا، جەر اۋدارىلىپ كەتتى (ەل. ٸس. 3:1؛ 4:1—3؛ 5:18؛ ايان 1:9). ٴتىپتى سونداي كەزدەرى دە ول باۋىرلاستارىن جاقسى كورەتىنىن كورسەتە بەردى. مىسالى، ول پاتموس ارالىندا جۇرگەندە ايان كىتابىن جازىپ، باۋىرلاستار «جۋىردا بولاتىن جايتتاردى» ٴبىلۋ ٷشىن، جازعاندارىن قاۋىمدارعا جىبەردى (ايان 1:1). كەيىن، پاتموس ارالىنان ورالعان سوڭ بولسا كەرەك، جوحان يسانىڭ ٶمىرى مەن قىزمەتى جايلى كىتابىن جازدى. سونداي-اق ول باۋىرلاستاردى جىگەرلەندىرىپ، نىعايتۋ ٷشىن ٷش حات جازدى. ٴسىز جانقيار جوحاننان قانداي ۇلگى الا الاسىز؟
10. ادامداردى جاقسى كورەتىنىڭىزدى قالاي كورسەتە الاسىز؟
10 ٶمىرىڭىزدى نە نارسەگە ارنايتىنىڭىز ادامداردى قانشالىقتى جاقسى كورەتىنىڭىزدى كورسەتەدى. شايتاننىڭ دۇنيەسى بار كۇشىڭىز بەن ۋاقىتىڭىزدى تەك وزىڭىزگە عانا جۇمساپ، باي بولۋعا جانە ٶز اتاعىڭىزدى شىعارۋعا ۇمتىلعانىڭىزدى قالايدى. ال دۇنيەجۇزىندەگى پاتشالىقتىڭ جانقيار جاريالاۋشىلارى ۋاقىتتارىن بارىنشا ىزگى حاباردى تاراتۋعا جۇمساپ، ادامدارعا ەحوباعا جاقىنداۋعا كومەكتەسىپ ٴجۇر. كەيبىرەۋلەر ٴتىپتى ۋاعىزداۋ مەن ٴتالىم بەرۋگە تولىق ۋاقىتتارىن ارنايدى.
ٴبىز باۋىرلاستاردى جانە وتباسىمىزدى جاقسى كورەتىنىمىزدى ىستەرىمىز ارقىلى كورسەتەمىز (11، 17-ابزاستى قاراڭىز)b
11. كوپتەگەن ادال جاريالاۋشىلار ەحوبا مەن باۋىرلاستارىن جاقسى كورەتىندەرىن قالاي كورسەتىپ ٴجۇر؟
11 كوپتەگەن ادال ماسىحشىلەرگە وزدەرى مەن وتباسىلارىن قامتاماسىز ەتۋ ٷشىن تولىق ۋاقىتتى جۇمىس ىستەۋگە تۋرا كەلەدى. سوندا دا بۇل ادال باۋىرلاستار قولدارىنان كەلگەنشە قۇدايدىڭ ۇيىمىن قولداپ ٴجۇر. مىسالى، كەيبىرەۋلەر تابيعي اپاتتان زارداپ شەككەندەرگە كومەكتەسەدى، وزگەلەرى قۇرىلىس جوبالارىنا قاتىسادى جانە ولاردىڭ بارلىعى دۇنيەجۇزىلىك ىسكە ساداقا جاسايدى. بۇل ىستەردى ولار قۇدايدى جانە وزگەلەردى جاقسى كورگەندىكتەن ىستەيدى. باۋىرلاستارىمىزدى جاقسى كورەتىنىمىزدى اپتا سايىن قاۋىم كەزدەسۋلەرىنە بارۋ جانە وعان اتسالىسۋ ارقىلى دا كورسەتەمىز. كەيدە ٴبىز شارشاپ تۇرساق تا، قاۋىم كەزدەسۋلەرىنە بارامىز. قوبالجىپ تۇرساق تا، تۇسىنىكتەمەلەر بەرەمىز. ٵرقايسىسىمىزدىڭ ٶز قيىندىعىمىز بولسا دا، كەزدەسۋگە دەيىن جانە ودان كەيىن باۋىرلاستاردى جىگەرلەندىرەمىز (ەۆر. 10:24، 25). اياۋلى باۋىرلاستارىمىزدىڭ جاساپ جۇرگەن ەرەن ەڭبەكتەرىنە قانشالىقتى ريزامىز دەسەڭىزشى!
12. جوحان باۋىرلاستارىن جاقسى كورەتىنىن تاعى قالاي كورسەتتى؟
12 جوحان ماقتاۋ ارقىلى عانا ەمەس، كەڭەس بەرۋ ارقىلى دا باۋىرلاستارىن جاقسى كورەتىنىن كورسەتكەن. مىسالى، ول ٶز حاتتارىندا باۋىرلاستارىن سەنىمدەرى ٷشىن جانە يگى ىستەرى ٷشىن ماقتاعان. ٴبىراق كۇناعا قاتىستى تىكەلەي كەڭەس تە بەرگەن (جوح. 1-ح. 1:8—2:1، 13، 14). ٴبىز دە باۋىرلاستارىمىزدى جاقسى ىستەرى ٷشىن ماقتاۋىمىز كەرەك. ٴبىراق بىرەۋدىڭ بويىندا جامان ادەت نە قاتە كوزقاراس پايدا بولىپ جاتقانىن بايقاساق، وعان ايتىلۋى قاجەت نارسەنى ىلتيپاتپەن ايتۋىمىز قاجەت. وسىلاي ونى جاقسى كورەتىنىمىزدى كورسەتەمىز. ارينە، بۇل باتىلدىقتى تالاپ ەتەدى. ٴبىراق كيەلى كىتاپتا شىنايى دوستاردىڭ ٴبىر-ٴبىرىن قايرايتىنى، باسقاشا ايتقاندا، تۇزەتەتىنى ايتىلعان (ناق. س. 27:17).
13. ٴبىز نە ىستەۋدەن اۋلاق بولۋىمىز كەرەك؟
13 كەيدە ٴبىز، كەرىسىنشە، باۋىرلاستارىمىزدى جاقسى كورەتىنىمىزدى ٴبىر نارسەلەردى ىستەمەۋ ارقىلى كورسەتەمىز. مىسالى، ولاردىڭ ايتقان سوزدەرىنە تەز رەنجىپ، اشۋلانۋدان اۋلاق بولۋىمىز كەرەك. يسانىڭ كەزىندە بولعان ٴبىر جاعدايدى الايىق. بىردە ول شاكىرتتەرىنە: «ادام ۇلىنىڭ ٴتانىن جەپ، قانىن ىشپەسەڭدەر، ومىرگە يە بولمايسىڭدار»،— دەدى (جوح. 6:53—57). شاكىرتتەرىنىڭ كوبىسى ونىڭ سوزدەرىن سۇمدىق كورىپ، ونى تاستاپ كەتتى. ٴبىراق شىن دوستارى، سونىڭ ىشىندە جوحان دا ادالدىق تانىتىپ، يسادان ٴبىر ەلى اجىرامادى. ولار دا يسانىڭ سوزدەرىن تۇسىنبەي، تاڭعالىپ قالسا كەرەك. ٴبىراق ولار يسانىڭ ايتقان سوزدەرى دۇرىس ەمەس دەپ ويلاپ، وعان اشۋلانعان جوق. قايتا، ولار يسانىڭ ٵردايىم شىندىقتى ايتاتىنىن ٴبىلىپ، وعان سەنىم ارتتى (جوح. 6:60، 66—69). دوستارىمىزدىڭ ايتقان سوزدەرىنە تەز رەنجىپ قالماعانىمىز قانشالىقتى ماڭىزدى دەسەڭىزشى! قايتا، ولارعا تۇسىنىسپەۋشىلىك تۋعىزعان جاعدايدى ٴتۇسىندىرىپ بەرۋگە مۇرشا بەرەيىك (ناق. س. 18:13؛ ۋاع. 7:9).
14. نەگە ٴبىز جەككورۋشىلىكتىڭ جۇرەگىمىزگە تامىر جايۋىنا جول بەرمەۋىمىز كەرەك؟
14 جوحان باۋىرلاستاردى جەك كورۋدەن اۋلاق بولۋعا دا شاقىرعان. ەگەر وسى كەڭەسكە قۇلاق اسپاساق، شايتان ٴبىزدى پايدالانىپ كەتۋى مۇمكىن (جوح. 1-ح. 2:11؛ 3:15). I عاسىردىڭ اياعىندا كەيبىرەۋلەر وسىلاي شايتاننىڭ ىقپالىنا بەرىلىپ قالعان. قۇداي حالقى جىككە ٴبولىنىپ، ٴبىر-ٴبىرىن جەك كورىپ كەتۋ ٷشىن، شايتان سول ۋاقىتتارى قولىنان كەلگەننىڭ ٴبارىن ىستەپ جاتتى. جوحان ٶز حاتتارىن جازىپ جاتقان ۋاقىتتا قاۋىمعا شايتاندىكىندەي رۋح تانىتاتىن ادامدار ەنىپ العان ەدى. مىسالى، ٴبىر قاۋىمدا ديوترەپ دەگەن كىسى باۋىرلاستاردىڭ اراسىنا كادىمگىدەي جىك سالدى. ول باسقارۋشى كەڭەس جىبەرگەن اقساقالدارعا ەشقانداي قۇرمەت تانىتپادى. ول ٴتىپتى ٶزى ۇناتپاعان ادامدارعا قوناقجايلىلىق تانىتقان باۋىرلاستاردى قاۋىمنان شىعارۋعا تىرىستى. نە دەگەن پاڭدىق! (جوح. 3-ح. 9، 10). شايتان قۇداي حالقىن جىككە ٴبولىپ، ٶز دەگەنىنە جەتۋ ٷشىن ٵلى كۇنگە دەيىن تىرىسىپ باعۋدا. ٴبىراق ٴبىز جەك كورۋشىلىكتىڭ ارامىزعا جىك سالۋىنا ەشقاشان جول بەرمەيىك!
وتباسىڭىزدى جاقسى كورىڭىز
يسا اناسىن تاندىك جانە رۋحاني جاعىنان قامقورلاۋدى جوحانعا تاپسىردى. بۇگىندە وتاعالار دا وتباسىلارىنىڭ قاجەتتىلىكتەرىن قامداۋ كەرەك (15، 16-ابزاستى قاراڭىز)
15. وتاعالار نەنى ۇمىتپاۋلارى قاجەت؟
15 وتاعالار ٷشىن وتباسىلارىن جاقسى كورەتىنىن كورسەتۋدىڭ ماڭىزدى ٴبىر جولى — ولاردى ماتەريالدىق جاعىنان قامتاماسىز ەتۋ (ٴتىم. 1-ح. 5:8). ٴبىراق ولار وتباسىنىڭ رۋحاني قاجەتتىلىگىن قامتاماسىز ەتۋ ودان دا ماڭىزدى ەكەنىن ۇمىتپاۋلارى قاجەت (مات. 5:3). يسا وتاعالار ٷشىن جاقسى ۇلگى قالدىردى. جوحان كىتابىنان كورەتىنىمىزدەي، يسا ٴتىپتى باعاناعا ٸلىنىپ تۇرعان كەزدە دە وتباسىنىڭ قامىن ويلاپ تۇردى. باعانانىڭ قاسىندا يسانىڭ اناسى ٴماريام مەن جوحان تۇرعان ەدى. ازاپ شەگىپ، قاتتى قينالىپ تۇرسا دا، يسا جوحاننان ٴماريامدى قامقورلاۋدى ٶتىندى (جوح. 19:26، 27). نەگىزى، ٴماريامدى قامقورلاي الاتىن يسانىڭ باۋىرلارى بار ەدى. ٴبىراق سول كەزدە ولاردىڭ ەشقايسىسى ونىڭ شاكىرتى بولماعان كورىنەدى. ال يسا ٴماريامدى تەك تاندىك جاعىنان عانا ەمەس، رۋحاني جاعىنان دا قامتاماسىز ەتەتىن ادامعا تاپسىرىپ كەتكىسى كەلدى.
16. جوحاننىڭ قانداي جاۋاپكەرشىلىكتەرى بولدى؟
16 جوحاننىڭ كوپتەگەن جاۋاپكەرشىلىكتەرى بولعان. ەلشىلەردىڭ ٴبىرى بولعاندىقتان، ول ۋاعىز ىسىنە جەتەكشىلىك ەتكەن. جوحان ۇيلەنگەن بولۋى دا مۇمكىن، سوندىقتان ول وتباسىنىڭ ماتەريالدىق جانە رۋحاني كۇيىن قاتار الىپ جۇرگەن بولسا كەرەك (قور. 1-ح. 9:5). بۇدان بۇگىندە وتاعالار نە نارسەگە ۇيرەنسە بولادى؟
17. نەلىكتەن وتاعالاردىڭ ٶز وتباسىلارىنىڭ رۋحاني كۇيىن ويلاعاندارى ماڭىزدى؟
17 وتباسىلى ەر باۋىرلاستىڭ كوپتەگەن ماڭىزدى جاۋاپكەرشىلىكتەرى بولۋى مۇمكىن. مىسالى، ول ٴجۇرىس-تۇرىسى ەحوباعا داڭق اكەلۋ ٷشىن، جۇمىسىندا ىستەرىن تىڭعىلىقتى اتقارۋ كەرەك (ەفەس. 6:5، 6؛ تيت. 2:9، 10). ونىڭ تاعى قاۋىمدا باقتاشىلىق ساپار جاساۋ، ۋاعىز ىسىنە جەتەكشىلىك ەتۋ سياقتى جاۋاپكەرشىلىكتەرى بولۋى مۇمكىن. ونىڭ بۇل ىستەرىمەن قوسا، ايەلىمەن جانە بالالارىمەن جۇيەلى تۇردە كيەلى كىتاپتى زەرتتەۋدى قاتار الىپ جۇرگەنى دە ماڭىزدى. وتباسىنىڭ تاندىك، ەموسيالىق جانە رۋحاني كۇيىنىڭ جاقسى بولۋى وتاعالاردىڭ جاۋاپكەرشىلىگىندە. ال ٷي ىشىندەگىلەر بولسا ولاردىڭ ٵربىر ٸسىن قاتتى باعالايدى (ەفەس. 5:28، 29؛ 6:4).
«سۇيىسپەنشىلىگىمنەن ايىرىلماڭدار»
18. جوحان نە نارسەگە نىق سەندى؟
18 جوحاننىڭ ٶمىرى ۇزاق ٵرى قۋانىشتى وقيعالارعا تولى بولدى. ول سول عۇمىرىندا قيىندىقتاردىڭ دا ٴتۇر-ٴتۇرىن كوردى. ٴبىراق بۇل قيىندىقتار ونىڭ سەنىمىن ەش شايقالتپادى. ول يسانىڭ وسيەتتەرىن ورىنداۋعا، سونىڭ ىشىندە باۋىرلاستارىن جاقسى كورۋگە ٵردايىم بارىن سالدى. سونىڭ ارقاسىندا جوحان ەحوبا مەن يسانىڭ ونى جاقسى كورەتىنىنە جانە كەز كەلگەن قيىندىققا توزۋگە كۇش بەرەتىنىنە نىق سەندى (جوح. 14:15—17؛ 15:9، 10؛ جوح. 1-ح. 4:16). شايتان مەن ونىڭ دۇنيەسى جوحانعا باۋىرلاستارىن جاقسى كورۋگە جانە سۇيىسپەنشىلىگىن سوزىمەن، ىسىمەن كورسەتۋگە توسقاۋىل بولا المادى.
19. جوحاننىڭ 1-حاتى 4:7 دەگى سوزدەر ٴبىزدى نە ىستەۋگە تالپىندىرادى جانە نەگە؟
19 جوحان سياقتى، ٴبىز دە سۇيىسپەنشىلىك اتاۋلىدان جۇرداي شايتاننىڭ دۇنيەسىندە ٶمىر ٴسۇرىپ جاتىرمىز (جوح. 1-ح. 3:1، 10). ول ٴبىزدىڭ باۋىرلاستارعا دەگەن سۇيىسپەنشىلىگىمىزدى سۋىتقىسى كەلەدى. ٴبىراق ٶزىمىز جول بەرمەسەك، ول ەشقاشان بىزگە ٶز دەگەنىن ىستەتكىزە المايدى. ەندەشە، باۋىرلاستارىمىزدى جاقسى كورۋگە جانە سۇيىسپەنشىلىگىمىزدى سوزىمىزبەن، ىسىمىزبەن كورسەتۋگە نىق بەكىنەيىك! سوندا ەحوبانىڭ وتباسىنىڭ ٴبىر بولىگى بولۋدان قۋانىش تاۋىپ، ٶمىرىمىز ٴمان-ماعىناعا تولادى (جوحاننىڭ 1-حاتى 4:7 وقىڭىز).
88-ٵن اق جولىڭنان تايمايىن
a كيەلى كىتاپتاعى «يسانىڭ جاقسى كورەتىن شاكىرتى» دەگەن سوزدەر جوحانعا نۇسقاسا كەرەك (جوح. 21:7). جاس بولسا دا، جوحاننىڭ تاماشا قاسيەتتەرى كوپ بولعانعا ۇقسايدى. جىلدار وتە ەحوبا وعان سۇيىسپەنشىلىك جايلى كوپ نارسە جازدىردى. بۇل ماقالادا ٴبىز جوحاننىڭ جازبالارىنان جانە ونىڭ وزىنەن نە ۇيرەنەتىنىمىزدى قاراستىرامىز.
b سۋرەت سيپاتتاماسى: جاۋاپكەرشىلىكتەرى كوپ وتاعاسى اپات كەزىندە كومەك كورسەتىپ جاتىر، دۇنيەجۇزىلىك ىسكە ساداقا جاساپ جاتىر. ول وتباسىلىق عيباداتقا وزگە دە باۋىرلاستاردى شاقىرعان.