9-زەرتتەۋ ماقالاسى
جاس ەر باۋىرلاستار، قاۋىمدا جاقساتقا يەسىڭدەر مە؟
«جاستار... تاڭ شاپاعىنان تۋعان شىققا ۇقسايدى» (ٴزاب. 110:3).
39-ٵن قۇداي الدىندا جاقساتقا يە بولايىق!
اڭداتپاa
1. جاس ەر باۋىرلاستاردىڭ قاۋىمدا ورنى قانداي؟
جاس ەر باۋىرلاستار، سەندەردىڭ كۇش-قايراتتارىڭ كوپ بولعاندىقتان قاۋىمدا كوپ ٸس اتقارا الاسىڭدار (ناق. س. 20:29). قاۋىم ٷشىن سەندەر ناعىز باتاسىڭدار. ەندى سەندەر قىزمەت كومەكشىسى بولىپ تاعايىندالاتىن كەزدى اسىعا كۇتىپ جۇرگەن بولارسىڭدار. ٴبىراق وزگەلەر سەندەردى ٵلى بۋىنى قاتپاعان، مۇنداي ماڭىزدى قىزمەتكە ٵلى دايىن ەمەس دەپ ويلاۋى مۇمكىن. دەسە دە سەندەر قاۋىمداعى باۋىرلاستاردىڭ سەنىمى مەن قۇرمەتىنە يە بولۋ ٷشىن، قازىردىڭ وزىندە كوپ ٸس جاساي الاسىڭدار.
2. بۇل ماقالا نە جايىندا بولماق؟
2 بۇل ماقالادا ٴبىز نەگىزىنەن ٴداۋىت پاتشا تۋرالى قاراستىرامىز. سونىمەن قاتار ياھۋدانىڭ پاتشالارى اسا مەن جوسافاتتىڭ دا باستان كەشكەن وقيعالارىنا توقتالامىز. بۇل ٷش كەيىپكەردىڭ قانداي قيىندىقتارعا كەزىككەنىن جانە سول قيىندىقتاردا قالاي ارەكەت ەتكەنىن بىلەتىن بولامىز. سونداي-اق جاس ەر باۋىرلاستار ولاردان نە ۇيرەنە الاتىنىن كورەمىز.
ٴداۋىت پاتشانىڭ ومىرىنەن ونەگە
3. جاستار قاۋىمداعى قاريالارعا قانداي كومەك ۇسىنا الادى؟
3 ٴداۋىت جاس كەزىندە مۋزىكالىق اسپاپتا شەبەر ويناۋدى ۇيرەنىپ الدى. كەيىن ٴداۋىت وسى قابىلەتىنىڭ ارقاسىندا قۇدايدىڭ مايلانعان پاتشاسى ساۋلعا كوپ قىزمەت ەتتى. ٴيا، ٴداۋىت جاس كەزىندە وزگەلەردىڭ يگىلىگىنە اساتىن قابىلەتتەرىن ارتتىرعان (سام. 1-ج. 16:16، 23). بۇدان ونىڭ رۋحاني ادام بولعانى كورىنەدى. ال سەندەر، جاس ەر باۋىرلاستار، قاۋىمداعىلار ٷشىن نە ىستەي الاسىڭدار؟ مىسالى، سەندەر تەحنيكانى بەس ساۋساقتاي بىلەسىڭدەر. ەندەشە وسى بىلىمدەرىڭدى قولدانىپ، قاۋىمداعى قاريالارعا پلانشەت سياقتى ەلەكتروندى قۇرىلعىلارىن قاۋىمدا جانە جەكە زەرتتەگەندە قالاي قولدانۋعا بولاتىنىن كورسەتە الاسىڭدار.
اكەسى داۋىتكە قوي باعۋدى تاپسىرعاندا، ول بۇل ىسكە جاۋاپكەرشىلىكپەن قاراپ، سەنىمدى ادام ەكەنىن كورسەتتى. ول ٴتىپتى قويعا ايۋ شاپقاندا، وتارىن قورعاپ قالعان (4-ابزاستى قاراڭىز).
4. جاس ەر باۋىرلاستار ٴداۋىتتىڭ قانداي قاسيەتتەرىن ۇلگى ەتسە بولادى؟ (مۇقاباداعى سۋرەتتى قاراڭىز.)
4 ٴداۋىت تاپسىرىلعان ىسكە جاۋاپپەن قاراپ، سەنىمدى ادام ەكەنىن كورسەتكەن. اكەسى وعان قوي باعۋدى تاپسىرعاندا، ول بۇعان بار ىنتا-ىقىلاسىمەن كىرىستى. ٴبىراق ول ۋاقىتتا قوي باعۋ وڭاي بولماعان. بۇنى ٴداۋىتتىڭ ساۋل پاتشاعا ايتقان مىنا سوزدەرىنەن بىلەمىز: «قىزمەتشىڭىز اكەسىنىڭ قويىن باعىپ كەلەدى. كەيدە مالعا ارىستان نە ايۋ شاۋىپ، قويلاردىڭ بىرەۋىن الىپ كەتەتىن. مەن جىرتقىشتى قۋىپ جەتىپ، باس سالاتىنمىن دا، مالدى ارانىنان قۇتقارىپ الاتىنمىن» (سام. 1-ج. 17:34، 35). ول قويلارىن باتىل قورعاپ، وزىنە تاپسىرىلعان ىسكە ۇلكەن جاۋاپكەرشىلىكپەن قاراعان. جاس ەر باۋىرلاستار، سەندەر دە وزدەرىڭە تاپسىرىلعان كەز كەلگەن ٸستى ٴداۋىت سياقتى ىنتا-ىقىلاسپەن اتقارا الاسىڭدار.
5. ٴزابۇر 25:14 كە ساي، جاس ەر باۋىرلاستار ٴبىرىنشى كەزەكتە نەنى ماقسات ەتكەندەرى ٴجون؟
5 ٴداۋىت ٷشىن بويىنداعى باتىلدىعىنان دا، ارفادا ويناۋ قابىلەتىنەن دە باعالى ٴبىر نارسە بولدى. بۇل ەحوبامەن جاقىن دوستىعى ەدى. ٴداۋىت ەحوبانى قۇدايىم دەپ قانا ەمەس، جان دوسىم دەپ بىلگەن (ٴزابۇر 25:14 وقىڭىز). جاس ەر باۋىرلاستار، سەندەر دە كوكتەگى اكەلەرىڭ ەحوباعا جاقىنداي بەرىڭدەر. بۇل ومىرلەرىڭدەگى ەڭ باستى ماقسات بولسىن، سوندا كوپ ۇزاماي سەندەرگە قوسىمشا جاۋاپكەرشىلىكتەر بەرىلەدى.
6. كەيبىرەۋلەر ٴداۋىت تۋرالى قانداي ويدا بولدى؟
6 جاس كەزىندە ٴداۋىتتى وزگەلەر مەنسىنبەگەن كەزدەر دە بولعان. بىردە ول عولياتپەن جەكپە-جەككە شىعامىن دەگەندە، ساۋل پاتشا ونى بالا كورىپ، رايىنان قايتارماق بولادى (سام. 1-ج. 17:31—33). ال ٴداۋىتتىڭ اعاسى بولسا وعان جاۋاپكەرشىلىگىڭ جوق، ۇقىپسىزسىڭ دەپ ۇرىسقان (سام. 1-ج. 17:26—30). ٴبىراق ەحوبا بۇلاي ويلامادى. ول ٷشىن ٴداۋىت موينىنا مىندەت الا الاتىن سەنىمدى ادام بولدى. ويتكەنى ول ٴداۋىتتى وتە جاقسى ٴبىلدى. ٴداۋىت دوسى ەحوبانىڭ كۇشىنە سەنگەندىكتەن، قارسىلاسى عولياتتى جەڭىپ شىقتى (سام. 1-ج. 17:45، 48—51).
7. داۋىتپەن بولعان جاعدايدان نە ۇيرەندىڭدەر؟
7 داۋىتپەن بولعان جاعدايدان نە تۇسىنەمىز؟ ۇلكەندەر سەنىڭ ەسەيىپ قالعانىڭدى ٴتۇسىنۋ ٷشىن ٴبىراز ۋاقىت قاجەت بولۋى مۇمكىن. سوندىقتان شىدامدى بولعانىڭ ٴجون. ٴبىراق ەحوبا وزگەلەر كورمەيتىندى كورە الادى. ول سەنىڭ قاسيەتتەرىڭدى، جاسىرىن جاتقان قابىلەتتەرىڭدى بايقايدى (سام. 1-ج. 16:7). ولاي بولسا، ەحوبامەن دوستىعىڭدى كۇشەيتە بەر. مىسالى، ٴداۋىت ەحوبانىڭ تاماشا جاراتىلىستارىنا قاراپ تامسانعان. وسىنىڭ ارقاسىندا ول جاراتۋشىسىن جاقىننان تاني ٴتۇستى (ٴزاب. 8:3، 4؛ 139:14؛ ريم. 1:20). ەحوبامەن دوستىعىڭدى نىعايتۋدىڭ تاعى ٴبىر جولى — ٴداۋىت سياقتى، ەحوبانىڭ كۇشىنە ارقا سۇيەۋ. مىسالى، ەحوبا كۋاگەرى بولعانىڭ ٷشىن سىنىپتاستارىڭ ۇستىڭنەن كۇلەتىن شىعار. سونداي كەزدە ەحوبادان كومەك سۇراپ دۇعا ەت. كيەلى كىتاپتاعى، ادەبيەتتەر مەن بەينەروليكتەردەگى كەڭەستەردى قولدان. سوندا بۇلاردىڭ كومەگىن سەزگەن سايىن، ەحوباعا دەگەن سەنىمىڭ دە وسە بەرەدى. ال باۋىرلاستار سەنىڭ ەحوباعا سەنىم ارتاتىنىڭدى كورگەندە، ساعان دا سەنىم ارتا باستايدى.
جاس ەر باۋىرلاستار كوپ كومەك كورسەتە الادى (8، 9-ابزاستاردى قاراڭىز)
8، 9. ٴداۋىت تاققا وتىرۋدى ۇزاق ۋاقىت كۇتە ٴجۇرىپ نەمەن اينالىستى جانە جاس ەر باۋىرلاستار وعان قالاي ەلىكتەي الادى؟
8 ٴداۋىت كەزىككەن تاعى ٴبىر قيىندىققا نازار اۋدارايىق. ٴداۋىت ياھۋدانىڭ پاتشاسى بولىپ مايلانعانمەن، تاققا وتىرعانشا كوپ جىل كۇتتى (سام. 1-ج. 16:13؛ سام. 2-ج. 2:3، 4). ٴبىراق بۇدان ٴداۋىت مۇڭعا باتىپ كەتپەدى، قايتا، سول ۋاقىتتى ۇتىمدى پايدالاندى. ساۋلدان قاشىپ، ٴفىلىستىر ەلىندە جۇرگەندە، ول يسرايلدىڭ جاۋلارىمەن شايقاستى. ياھۋدا جەرىنىڭ شەگاراسىن جاۋدان قورعاپ، پايدالى ىسپەن اينالىستى (سام. 1-ج. 27:1—12).
9 جاس ەر باۋىرلاستار، سەندەر داۋىتتەن نە ۇيرەنە الاسىڭدار؟ باۋىرلاستارىڭا قىزمەت ەتۋدىڭ مۇمكىندىگىن قالت جىبەرمەڭدەر. ريكاردوb ەسىمدى باۋىرلاستىڭ وقيعاسىن الايىق. ول جاسوسپىرىم كەزىنەن تۇراقتى ٸزاشار بولۋدى ارماندايتىن. ٴبىراق اقساقالدار وعان ٵلى دايىن ەمەس ەكەنىن ايتادى. ريكاردو بۇعان رەنجىمەدى، ارمانىنان دا باس تارتپادى. قايتا، قىزمەتىن جاقسارتا بەردى. ول بىلاي دەيدى: «قازىر ويلاسام، سول كەزدە كەڭەستى قابىلداپ، قاجەتتى وزگەرىستەر جاساعانىم دۇرىس بولىپتى. مەن قىزمەتتە قىزىعۋشىلىق تانىتقان ادامداردىڭ ەشقايسىسىن ۇمىتپاي، ولارعا جاقسى دايىندىقپەن قايتا بارۋدى ۇيرەندىم. ٴتىپتى ٴبىرىنشى رەت بىرەۋمەن كيەلى كىتاپتى زەرتتەۋ ساباعىن باستادىم. وسىلاي قىزمەتكە كوبىرەك اتسالىسقان سايىن، سەنىمدىلىگىم دە ارتا بەردى». قازىر ريكاردو — ۇلگىلى تۇراقتى ٸزاشار ٵرى قىزمەت كومەكشىسى.
10. ماڭىزدى شەشىم قابىلداماس بۇرىن ٴداۋىت نە ىستەدى؟
10 ٴداۋىتتىڭ باس ساۋعالاپ جۇرگەن كەزىندە بولعان تاعى ٴبىر وقيعاعا نازار اۋدارايىق. ول قاسىنداعى ساربازدارىمەن بىرگە شايقاسقا اتتانىپ كەتكەن كەزدە توناۋشىلار كەلىپ، بالا-شاعالارىنىڭ ٴبارىن تۇتقىنعا الىپ كەتەدى. سول كەزدە ٴداۋىت بۇعان دەيىن سوعىستا جيناعان تاجىريبەسىنە سۇيەنىپ، مىقتى ٴبىر ستراتەگيا قۇرامىن دا، ٷي-ٸشىمدى قايتارىپ الامىن دەپ ويلاسا بولار ەدى. ٴبىراق ول ٶزىنىڭ ەمەس، ەحوبانىڭ اقىلىنا سۇيەندى. ٴدىني قىزمەتكەر ٵبياتاردىڭ كومەگىمەن ٴداۋىت ەحوبادان: «توناۋشىلاردى قۋايىن با؟»— دەپ سۇرايدى. سوندا ەحوبا: «سوڭدارىنا ٴتۇس! ولاردى قۋىپ جەتىپ، ٴبارىن قۇتقارىپ الاسىڭ!»— دەپ جاۋاپ بەردى (سام. 1-ج. 30:7—10). جاس ەر باۋىرلاستار، ٴداۋىتتىڭ بۇل وقيعاسىنان نە ۇيرەنە الاسىڭدار؟
جاس ەر باۋىرلاستار اقساقالداردان اقىل-كەڭەس سۇراي الادى (11-ابزاستى قاراڭىز)
11. شەشىم قابىلدار الدىندا نە ىستەگەندەرىڭ جاقسى؟
11 قانداي دا ٴبىر شەشىم قابىلداماس بۇرىن اتا-انالارىڭمەن اقىلداسىڭدار. قاۋىمداعى اقساقالدار دا سەندەرگە جاقسى كەڭەستەر بەرە الادى. ولارعا سەنىم ارتساڭدار بولادى، ويتكەنى ەحوبانىڭ ٶزى ولارعا سەنىم ارتادى. ەحوبا ولاردى قاۋىمعا «سي رەتىندە» بەرگەن (ەفەس. 4:8). ولاردىڭ سەنىمدەرىن ۇلگى ەتىپ، اقىل-كەڭەستەرىنە قۇلاق اسساڭدار، وزدەرىڭە جاقسى بولادى. ال ەندى اسا پاتشا جايلى اڭگىمە قوزعايىق.
اسا پاتشادان الار ساباق
12. اسا پاتشا ەندى بيلىك ەتە باستاعاندا قانداي جاقسى قاسيەتتەر تانىتتى؟
12 اسا جاس كەزىندە كىشىپەيىل ٵرى ەرجۇرەك پاتشا بولعان. اكەسى ٵبياح قايتىس بولعان سوڭ، ول تاققا وتىرىپ، ياھۋدا ەلىن پۇتتاردان تازارتا باستادى. بۇعان قوسا، ول «ياھۋدا ەلىنە اتا-بابالارىنىڭ قۇدايى ەحوباعا عيبادات ەتۋدى، ونىڭ زاڭى مەن وسيەتتەرىن ورىنداۋدى تاپسىردى» (شەج. 2-ج. 14:1—7). بىردە ەفيوپيالىق زاراح باستاعان 1 000 000 اسكەر ياھۋدا ەلىنە قارسى اتتانعاندا، اسا ەحوباعا ارقا سۇيەپ دۇرىس ارەكەت ەتتى. ول ەحوباعا: «ۋا، ەحوبا، سەن ٷشىن كۇشتىگە دە، السىزگە دە كومەكتەسۋ تۇك ەمەس. ۋا، ەحوبا قۇدايىمىز، بىزگە كومەكتەسە كورشى. ويتكەنى ٴبىز ساعان ارقا سۇيەيمىز»،— دەدى. اسا ەحوبانىڭ قۇتقارا الاتىنىنا تولىق سەندى. ونىڭ سەنىمىن اقتاپ، كوكتەگى اكەسى ەحوبا «ەفيوپيالىقتارعا سوققى بەردى دە، ولار قاشا جونەلدى» (شەج. 2-ج. 14:8—12).
13. اسا پاتشا كەيىنىرەك قانداي جاعدايعا دۋشار بولدى جانە ونىڭ سەبەبى نەدە؟
13 جاۋدىڭ 1 000 000 اسكەرىنە قارسى تۇرۋدى ويلاپ كورشى! ٴبىراق اسا جەڭىسكە جەتتى. كەيىنىرەك سونشالىقتى قورقىنىشتى ەمەس باسقا ٴبىر جاعدايدا اسا ەحوبامەن اقىلداسپادى. يسرايلدىڭ زۇلىم پاتشاسى باعاسانىڭ تاراپىنىن قاۋىپ تونگەندە، ول سيريا پاتشاسىنان كومەك سۇرادى. بۇنىڭ سالدارى جامان بولدى. حاناني پايعامبار ارقىلى ەحوبا وعان بىلاي دەدى: «سەن قۇدايىڭ ەحوباعا ەمەس، سيريا پاتشاسىنا ارقا سۇيەگەندىكتەن، سيريا پاتشاسىنىڭ اسكەرى قولىڭا تۇسپەي، قۇتىلىپ كەتتى». وسى وقيعادان كەيىن اسا سوعىستان كوز اشپادى (شەج. 2-ج. 16:7، 9؛ پات. 1-ج. 15:32). سەن اسا پاتشادان قانداي ساباق الساڭ بولادى؟
14. قانداي كەزدەردە ەحوباعا ارقا سۇيەگەنىڭ ٴجون؟ وسىلاي ەتسەڭ، تىموتەگە 1-حات 4:12 گە ساي، قاۋىمداعىلارعا قالاي اسەر ەتەسىڭ؟
14 ٵردايىم كىشىپەيىل بولىپ، ەحوباعا ٵرقاشان ارقا سۇيە. بۇعان دەيىن سەن شومىلدىرۋ راسىمىنەن ٶتىپ، ەحوباعا دەگەن سەنىمىڭ زور ەكەنىن كورسەتتىڭ. سول كەزدە ەحوبا سەنى ٶز وتباسىنا قۇشاق جايا قابىلدادى. ەندى سەن ٷشىن ومىردە ماڭىزدىسى — ٵرى قاراي دا ەحوباعا سەنىم ارتۋ. ارينە، سەن وتە ماڭىزدى، ۇلكەن ماسەلەلەردە ەحوبانىڭ كومەگىنە جۇگىنەسىڭ. بۇنىڭ جاقسى. ٴبىراق كىشىگىرىم ىستەردە شە؟ مىسالى، ويىن-ساۋىق پەن جۇمىس تاڭداعاندا، العا ماقساتتار قويعاندا ەحوبادان كومەك سۇرايسىڭ با؟ مۇندايدا ٶز اقىلىڭا ەمەس، كيەلى كىتاپتىڭ اقىلىنا سۇيەن جانە سوعان ساي ارەكەت ەت (ناق. س. 3:5، 6). سوندا ەحوبا قۇدايىڭدى قۋانتاسىڭ جانە قاۋىمداعىلاردىڭ قۇرمەتىنە بولەنەسىڭ (تىموتەگە 1-حات 4:12 وقىڭىز).
جوسافات پاتشادان الار ساباق
15. شەجىرەلەر 2-جازبا 18:1—3؛ 19:2 دەن كورەتىنىمىزدەي، جوسافات پاتشا قانداي قاتەلىكتەر جاسادى؟
15 قانداي جاستا بولمايىق، ٴبارىمىز كەمەلسىزبىز. سەندەر دە قاتەلىك جاساپ قويۋلارىڭ مۇمكىن. ٴبىراق بۇل جايت ەحوباعا بار كۇشتەرىڭمەن قىزمەت ەتۋگە كەدەرگى بولماۋ كەرەك. مىسالى، جوسافات پاتشانىڭ كوپ جاقسى قاسيەتتەرى بولعان. ول جاس كەزىنەن-اق «اكەسىنىڭ قۇدايىن ىزدەپ، سونىڭ وسيەتتەرىن ورىندادى». ول سونىمەن قاتار ياھۋدا ەلىنىڭ بارلىق قالالارىنا بەكزادالارىن جىبەرىپ، حالىققا ەحوبا جايىندا ٴتالىم بەرۋدى تاپسىردى (شەج. 2-ج. 17:4، 7). ٴبىراق ونىڭ دۇرىس ەمەس ارەكەت ەتكەن كەزدەرى دە بولدى. سول جاعدايلاردىڭ بىرىندە ەحوبا وعان وكىلىن جىبەرىپ، قاتاڭ ەسكەرتۋ ايتتى (شەجىرەلەر 2-جازبا 18:1—3؛ 19:2 وقىڭىز). جوسافاتپەن بولعان وسى جاعدايدان نە تۇيۋگە بولادى؟
ەڭبەكقور ٵرى سەنىمدى جاس ەر باۋىرلاستار قاۋىمدا جاقساتقا يە بولادى (16-ابزاستى قاراڭىز)
16. رادجيۆتىڭ وقيعاسى ساعان نەسىمەن ۇنادى؟
16 بەرىلگەن كەڭەستى قابىلداپ، جاقسارا بەر. بالكىم كەيبىر جاستار سياقتى ساعان دا ەحوباعا قىزمەت ەتۋدى ومىردە باستى ورىنعا قويۋ قيىن شىعار. ٴبىراق سەن مۇڭايما. رادجيۆ دەگەن جاس ەر باۋىرلاستىڭ سوزدەرىنە كوڭىل بۇرشى. جاسوسپىرىم كەزى جايلى ول بىلاي دەيدى: «سول ۋاقىتتارى ماعان نە كەرەك ەكەنىن ٶزىم تۇسىنبەيتىنمىن. كوپ جاستار سياقتى مەن دە سپورتقا قىزىقتىم، ويىن-كۇلكىنى ۇناتتىم. ال قاۋىمعا جانە قىزمەتكە بارعىم كەلمەيتىن». كەيىن ٴرادجيۆتى ۋايىمداعان ٴبىر اقساقال وعان جاقسى كەڭەس بەرەدى. «ول ماعان تىموتەگە 1-حات 4:8 دەگى ٴپرينسيپتى كورسەتىپ، ٴبىراز ويلاندىرىپ تاستادى»،— دەيدى رادجيۆ. ول اقساقالدىڭ كەڭەسىن كىشىپەيىلدىلىكپەن قابىلداپ، ٶمىرىن رەتكە كەلتىردى. رادجيۆ بىلاي دەيدى: «مەن ەڭ الدىمەن رۋحاني ماقساتتارعا ۇمتىلدىم. سودان، ٴبىر-ەكى جىل وتە قىزمەت كومەكشىسى بولىپ تاعايىندالدىم».
كوكتەگى اكەمىزدىڭ ماقتان تۇتارى بول!
17. جاسى ۇلكەن باۋىرلاستار ەحوباعا قىزمەت ەتىپ جۇرگەن جاس جىگىتتەر جايلى قانداي ويدا؟
17 جاس ەر باۋىرلاستار، سەندەردى جاسى ۇلكەن باۋىرلاستار قاتتى باعالايدى. ويتكەنى سەندەر ولارمەن بىرگە ەحوباعا «يىق تىرەسە» قىزمەت ەتىپ جۇرسىڭدەر (ساف. 3:9). تاپسىرىلعان ىستەردى ىنتا-ىقىلاسپەن اتقارىپ جۇرگەندەرىڭدى كورىپ، ولار سەندەرگە قاتتى سۇيسىنەدى. ولار ٷشىن سەندەردىڭ ورىندارىڭ بولەك (جوح. 1-ح. 2:14).
18. ناقىل سوزدەر 27:11 دەن كورىنەتىندەي، ەحوبا وزىنە قىزمەت ەتەتىن جاس جىگىتتەرگە قالاي قارايدى؟
18 ەحوبا سوڭعى كۇندەرى وعان ەرۋگە دايىن تۇراتىن اسكەردىڭ، ياعني كوپتەگەن جاستاردىڭ بولاتىنىن ايتقان (ٴزاب. 110:1—3). ەحوبا سەندەردى جاقسى كورەدى، سەندەرگە سەنىم ارتادى، قىمباتتى جاس ەر باۋىرلاستار! وسىنى ەشقاشان ۇمىتپاڭدار. سەن ەحوبانى قانشالىقتى جاقسى كورەتىنىڭدى، بارىنشا قىزمەت ەتكىڭ كەلەتىنىن ول جاقسى بىلەدى. ول سەنىڭ وزگەلەرگە شىدامدىلىق تانىتقانىڭدى ٵرى ٶزىڭ دە شىداممەن كۇتكەنىڭدى قالايدى. قاتەلىك جاساپ قويعان كەزىڭدە، بەرىلگەن اقىل-كەڭەس پەن تۇزەتۋگە قۇلاق اس. ونى ەحوبادان دەپ قابىلدا (ەۆر. 12:6). بەرىلگەن كەز كەلگەن تاپسىرماعا بار كۇشىڭدى سال. ال ەڭ باستىسى، ٵربىر ىسىڭدە كوكتەگى اكەڭ ەحوبانى قۋانت. سوندا ول ساعان قاراپ: «جارايسىڭ، ۇلىم!»— دەيتىن بولادى! (ناقىل سوزدەر 27:11 وقىڭىز).
135-ٵن ەحوبانىڭ شاقىرۋى: «اقىلدى بول، بالام»
a جاس ەر باۋىرلاستار رۋحاني وسە كەلە قىزمەت كومەكشىسى بولۋعا ۇمتىلىپ جاتادى. بۇل ماقساتقا جەتۋ ٷشىن ولار، الدىمەن، قاۋىمدا جاقساتقا يە بولۋلارى كەرەك. وسى ورايدا ولارعا نە كومەكتەسە الاتىنىن كورەيىك.
b كەيبىر ەسىمدەر وزگەرتىلگەن.