16-زەرتتەۋ ماقالاسى
87-ٵن كەلىپ، سەرگىپ قالىڭدار!
ٴبىر-بىرىمىزگە جاقىن بولعانىمىز قانداي يگى!
«باۋىرلاردىڭ بىرلىكتە تۇرعاندارى قانداي يگى، قانداي جاعىمدى!» (ٴزاب. 133:1).
نەگىزگى وي
ٴبىر-بىرىمىزگە جاقىن بولۋعا كومەكتەسەتىن كەڭەستەر مەن باۋىرلاستارعا جاقىن بولعانىمىزدىڭ يگىلىكتەرى.
1، 2. ەحوبا نە نارسەگە بەيجاي قارامايدى جانە ول ٴبىزدىڭ نە ىستەگەنىمىزدى قالايدى؟
ٴبىزدىڭ ادامدارعا قالاي قارايتىنىمىز ەحوباعا ٴبارىبىر ەمەس. يسا دا ٴبىزدى وزگەلەردى ٶزىمىزدى سۇيگەندەي سۇيۋگە شاقىرعان (مات. 22:37—39). وزگەلەر دەگەنگە ەحوباعا سەنبەيتىن ادامدار دا جاتادى. ەگەر ولارعا دا جاقسى قارايتىن بولساق، وندا ەحوباعا ەلىكتەگەنىمىز. ويتكەنى ەحوبا «جاماندارعا دا، جاقسىلارعا دا كۇن ساۋلەسىن توككىزىپ، ادىلدەرگە دە، ادىلەتسىزدەرگە دە جاڭبىر جاۋدىرادى» (مات. 5:45).
2 ەحوبا بارلىق ادامدى جاقسى كورەدى. ٴبىراق زاڭ-تالاپتارىن ورىندايتىن ادامداردى ول ەرەكشە سۇيەدى (جوح. 14:21). سۇيىكتى قىزمەتشىلەرىن ٴبىز دە جاقسى كورسەك، بۇل ەحوباعا قۋانىش سيلايدى. سول ٷشىن دە ول ٴبىزدى «ٴبىر-ٴبىرىڭدى بارىنشا سۇيىڭدەر»، «ٴبىر-ٴبىرىڭدى تۋعان باۋىرلارداي جاقسى كورىڭدەر» دەپ شاقىرادى (پەت. 1-ح. 4:8؛ ريم. 12:10). ٴبىز تۋعان باۋىرلارىمىز بەن جاقىن ادامدارىمىزدى شىن كوڭىلمەن جاقسى كورەمىز عوي. ەحوبا باۋىرلاستاردى دا تۋرا سولاي جاقسى كورگەنىمىزدى قالايدى.
3. سۇيىسپەنشىلىككە قاتىستى نەنى ەستە ۇستاۋىمىز كەرەك؟
3 سۇيىسپەنشىلىك گۇل سياقتى، ٶسۋ ٷشىن ونى ۇنەمى كۇتىپ-باپتاۋ قاجەت. سوندىقتان دا ەلشى پاۋىل ماسىحشىلەرگە: «باۋىرلاستاردى ٵردايىم جاقسى كورىڭدەر»،— دەپ كەڭەس بەرگەن (ەۆر. 13:1). ەحوبا باۋىرلاستارعا دەگەن سۇيىسپەنشىلىگىمىزدىڭ ٴبىر ورىندا تۇرماي، ارتا بەرگەنىن قالايدى. بۇل ماقالادا ٴبىز باۋىرلاستارىمىزعا جاقىن بولۋ نەگە ماڭىزدى ەكەنىن جانە ولاردى ٵردايىم جاقسى كورۋ ٷشىن نە ىستەۋىمىز كەرەكتىگىن قاراستىرامىز.
باۋىرلاستارعا جاقىن بولعانىمىز نەگە ماڭىزدى؟
4. ٴزابۇر 133:1 دە ايتىلعان بىرلىگىمىزدى باعالاۋ ٷشىن نە ىستەۋىمىز كەرەك؟ (سۋرەتتەردى دە قاراڭىز.)
4 ٴزابۇر 133:1 وقىڭىز. قۇداي قىزمەتشىلەرىنىڭ بىرلىگىن كورىپ سۇيسىنگەن ٴزابۇر جىرشىسىنىڭ سوزدەرمەن ٴبىز دە كەلىسەمىز. راسىمەن دە، ٴبىز بىرلىگى جاراسقان تاتۋ-ٴتاتتى حالىقپىز. ٴبىراق ارامىزداعى بىرلىكتى قالىپتى جاعداي ساناپ، باعالاماي كەتىپ جۇرمەيىك. ويتكەنى ادام ٴبىر نارسەنى قانشا ۇناتىپ، قانشا ٴتانتى بولسا دا، كۇندە-كۇندە كورە بەرگەننەن كوزى ۇيرەنىپ كەتەدى. ٴبىز دە باۋىرلاستاردى ٴجيى كورە بەرگەننەن ارامىزداعى سۇيىسپەنشىلىك پەن بىرلىككە كوزىمىز ۇيرەنىپ، ولاردى باعالاماي كەتۋىمىز مۇمكىن. بۇعان جول بەرمەس ٷشىن نە ىستەۋىمىز كەرەك؟ ٵربىر باۋىرلاس قاۋىم ٷشىن، مەن ٷشىن قانشالىقتى باعالى دەپ ويلانىپ تۇرايىق. بۇلاي وي جۇگىرتۋ باۋىرلاستارعا دەگەن سۇيىسپەنشىلىگىمىزدى ارتتىرا تۇسۋگە كومەكتەسەدى.
ارامىزداعى تاڭعاجايىپ بىرلىككە كوزىڭىز ۇيرەنىپ كەتىپ جۇرمەسىن (4-ابزاستى قاراڭىز)
5. ارامىزداعى سۇيىسپەنشىلىك وزگەلەرگە قالاي اسەر ەتۋى مۇمكىن؟
5 ادامدار قاۋىمىمىزعا العاش رەت كەلگەندە، كوزدەرىنە بىردەن تۇسەتىنى — ارامىزداعى سۇيىسپەنشىلىك. كەيبىرەۋلەر وسىنى كورىپ-اق شىندىقتى تاپقاندارىنا كوزدەرى جەتىپ جاتادى. بۇلاي بولۋى بەكەر ەمەس، ويتكەنى يسا: «مەنىڭ شاكىرتتەرىم ەكەندەرىڭدى جۇرتتىڭ ٴبارى ٶزارا سۇيىسپەنشىلىكتەرىڭنەن بىلەتىن بولادى»،— دەگەن (جوح. 13:35). چيترا دەگەن قىزبەن بولعان جاعداي دا بۇنى راستايدى. ول كيەلى كىتاپتى زەرتتەپ جۇرگەنىندە ٴبىرىنشى رەت ايماقتىق كونگرەسكە كەلەدى. كونگرەستىڭ ٴبىرىنشى كۇنى بىتكەن سوڭ، ول تالىمگەرىنە بىلاي دەيدى: «تۋعان اتا-انامنىڭ ٶزى مەنى قۇشاقتاپ، باۋىرىنا باسقان جوق ەدى. ال بۇگىن باۋىرلاستار مەنى 1 رەت ەمەس، 52 رەت قۇشاقتادى. باۋىرلاستار ارقىلى ەحوبانىڭ ٶزى مەنى قۇشاقتاپ جاتقانداي بولدى. ونىڭ وسىنداي ۇلكەن وتباسىنا مەن دە قوسىلعىم كەلەدى». 2024-جىلى چيترا شومىلدىرۋ راسىمىنەن ٶتىپ، ەحوبانىڭ وتباسىنا قوسىلدى. راسىندا دا، سۇيىسپەنشىلىگىمىز بەن يگى ىستەرىمىزدى كورىپ، كوپ ادام ەحوباعا قىزمەت ەتۋگە تالپىنىپ جاتادى (مات. 5:16).
6. باۋىرلاستارعا جاقىن بولعانىمىز نەگە ٶزىمىز ٷشىن قورعانىش؟
6 ەلشى پاۋىل ماسىحشىلەردى: «ەشقايسىسىڭ كۇناعا ازعىرىلىپ، جۇرەكتەرىڭ قاسارىسىپ كەتپەۋ ٷشىن، كۇن سايىن ٴبىر-ٴبىرىڭدى جىگەرلەندىرىپ وتىرىڭدار»،— دەپ تالپىندىرعان (ەۆر. 3:13). بۇدان كورەتىنىمىزدەي، باۋىرلاستارعا جاقىن بولعانىمىز ٶزىمىز ٷشىن قورعانىش. مىسالى، تۋرا جولدان تايۋعا شاق قالىپ جاتساق، ەحوبا بىزگە بايقامپاز باۋىرلاستى كومەككە جىبەرۋى مۇمكىن (ٴزاب. 73:2، 17، 23). قاسىمىزدا دەر كەزىندە كومەككە كەلەتىن باۋىرلاستارىمىزدىڭ بولعانى نەتكەن كەرەمەت!
7. سۇيىسپەنشىلىك پەن بىرلىكتىڭ قانداي بايلانىسى بار؟ (قولوستىقتارعا 3:13، 14)
7 ەحوبانىڭ ۇيىمىندا ٵربىر باۋىرلاس سۇيىسپەنشىلىك تانىتۋعا بار كۇشىن سالاتىندىقتان، ٴبىز مۇنىڭ كوپ يگىلىگىن كورىپ ٴجۇرمىز (جوح. 1-ح. 4:11). مىسالى، سۇيىسپەنشىلىك ٴبىزدى «ٴبىر-ٴبىرىمىزدى كەڭپەيىلمەن كەشىرۋگە»، «ٶزارا ٴتوزىمدى» بولۋعا تالپىندىرادى، سونىڭ ارقاسىندا ارامىزدا مىزعىماس بىرلىك بار (قولوستىقتارعا 3:13، 14 وقىڭىز؛ ەفەس. 4:2—6). جەر بەتىندە بىزدىكىندەي ىنتىماق-بىرلىگى جاراسقان بىردە-ٴبىر ۇيىم جوق دەپ نىق سەنىممەن ايتا الامىز.
«ٴبىر-بىرىڭە... قۇرمەت كورسەتىڭدەر»
8. نەگە ارامىزداعى بىرلىك تەك ەحوبانىڭ ارقاسى دەي الامىز؟
8 الەمنىڭ شارتارابىندا جۇرسەك تە ٴبۇتىن ٴبىر حالىق بولعانىمىز — ەحوبانىڭ جاساعان كەرەمەتى. ول بولماعاندا، كەمەلسىز ادامداردىڭ اراسىندا مۇنداي بىرلىك ەشقاشان بولماس ەدى (قور. 1-ح. 12:25). بىزگە «ٴبىر-ٴبىرىمىزدى ٴسۇيۋدى... قۇداي ۇيرەتىپ جاتىر» (سال. 1-ح. 4:9). ٴبىر-ٴبىرىمىزدى ٴسۇيۋ ٷشىن نە ىستەۋىمىز كەرەكتىگىن ول بىزگە ٶزىنىڭ ٴسوزى كيەلى كىتاپ ارقىلى ايتادى. دەمەك، باۋىرلاستاردى ٴسۇيۋدى ۇيرەنگىمىز كەلسە، قۇداي ٴسوزىن تىڭعىلىقتى وقىپ-زەرتتەپ، بىلگەندەرىمىزدى ىسكە اسىرعانىمىز ماڭىزدى (ەۆر. 4:12؛ جاق. 1:25). بۇعان ەحوبانىڭ حالقى بار كۇشىن سالىپ تا ٴجۇر.
9. ريمدىكتەرگە 12:9—13 تارماقتارعا ساي، ٴبىرىنشى بولىپ قۇرمەت كورسەتۋ دەگەن نەنى بىلدىرەدى؟
9 ەحوبا بىزگە ٴبىر-ٴبىرىمىزدى ٴسۇيۋدى قالاي ۇيرەتىپ جاتقانىن كورەيىك. مىسالى، پاۋىلدىڭ ريمدىكتەرگە 12:9—13 تارماقتارداعى (وقىڭىز) سوزدەرىن الايىق. بۇل تارماقتارداعى «ٴبىر-بىرىڭە ٴبىرىنشى بولىپ قۇرمەت كورسەتىڭدەر» دەگەن سوزدەر ٴبىر-ٴبىرىمىزدى ٴبىرىنشى بولىپ ٴسۇيۋىمىز كەرەكتىگىن بىلدىرەدى. ال ٴسۇيۋ كەڭپەيىلمەن كەشىرۋ، قوناقجايلىلىق تانىتۋ، قولدا بارمەن ٴبولىسۋ سياقتى يگى ىستەردى قامتيدى (ەفەس. 4:32). «بۇلاردى ماعان كىم، قاشان ىستەيدى ەكەن» دەپ كۇتىپ وتىرمايىق، قايتا، ٶزىمىز ٴبىرىنشى بولىپ ارەكەت ەتەيىك. سوندا، يسا ايتقانداي، «العاننان گورى بەرگەن باقىتتى» ەكەنىنە كوزىمىز جەتەدى (ەل. ٸس. 20:35).
10. قۇرمەت كورسەتۋ مەن ەرىنشەك بولماۋدىڭ قانداي بايلانىسى بار؟ (سۋرەتتەردى دە قاراڭىز.)
10 تاعى ٴبىر نازار اۋداراتىن جايت، پاۋىل «ٴبىر-بىرىڭە ٴبىرىنشى بولىپ قۇرمەت كورسەتىڭدەر» دەگەن سوڭ، ارتىنان بىردەن «ەرىنشەك بولماي، ىستەرىڭدى ىنتا-جىگەرمەن اتقارىڭدار» دەگەن. ٸسىن ىنتا-جىگەرمەن اتقاراتىن ادام ەڭبەكقور كەلەدى جانە وزىنە سەنىپ تاپسىرىلعان ٸستى تياناقتى اتقارادى. ناقىل سوزدەر 3:27، 28 دە: «قولىڭنان كەلىپ تۇرعاندا، مۇقتاجدارعا جاقسىلىق جاساۋدان تارتىنبا»،— دەلىنگەن. ەندەشە، بىرەۋدىڭ كومەككە مۇقتاج ەكەنىن بايقاساق، قول ۇشىن بەرۋگە اسىعايىق، بۇنى كەيىنگە قالدىرىپ جۇرمەيىك. مەن بولماسام، ايتەۋىر بىرەۋ كومەكتەسەدى عوي دەپ ويلامايىق (جوح. 1-ح. 3:17، 18).
مۇقتاج باۋىرلاستارعا كومەكتەسۋگە ٶزىمىز ٴبىرىنشى بولىپ ۇمتىلۋىمىز كەرەك (10-ابزاستى قاراڭىز)
11. باۋىرلاستارعا جاقىن بولىپ قالۋ ٷشىن نە ىستەگەنىمىز ماڭىزدى؟
11 وزگەلەرگە قۇرمەت كورسەتۋدىڭ تاعى ٴبىر جولى — كەشىرۋگە اسىق بولۋ. كيەلى كىتاپتا ەحوبا ٴبىزدى كەشىرىمدى بولۋعا قايتا-قايتا شاقىرادى. مىسالى، ەفەستىكتەرگە 4:26 دا: «كۇن باتپاي تۇرىپ اشۋلارىڭدى باسىڭدار»،— دەلىنگەن. وسىلاي ەتسەك، ٴبىز كەلەسى 27-تارماقتا ايتىلعانداي، «ٸبىلىستىڭ وزىمىزگە ىقپال ەتۋىنە جول بەرمەيمىز». ال قولوستىقتارعا 3:13 تە: «ٴبىر-ٴبىرىڭدى كەڭپەيىلمەن كەشىرىڭدەر»،— دەپ جازىلعان. باۋىرلاستارمەن جاقىن بولىپ قالعىمىز كەلسە، ەڭ دۇرىسى — ولاردىڭ قاتەلىكتەرى مەن ولقىلىقتارىنا ٴمان بەرمەي-اق قويا سالۋ. وسى كەڭەستەرگە قۇلاق اسىپ كەشىرىمدى بولساق، «كيەلى رۋح ارقىلى يەمدەنگەن بىرلىگىمىزدى ساقتاپ قالامىز» (ەفەس. 4:3). ٴبىر سوزبەن ايتقاندا، كەشىرىمدى بولماساق، بىرلىك تە بولمايدى.
12. وزگەلەردى كەشىرۋگە ەحوبا بىزگە قالاي كومەكتەسە الادى؟
12 جاسىراتىنى جوق، كەيدە كەشىرۋ وتە قيىن بولىپ جاتادى. ٴبىراق كيەلى رۋح ٷشىن مۇمكىن ەمەس نارسە جوق. پاۋىل «تۋعان باۋىرلارداي جاقسى كورۋ» مەن «ەرىنشەك بولماۋ» تۋرالى ايتقان سوڭ، «رۋحتىڭ اسەرىمەن جالىنداي بەرىڭدەر» دەگەن (ريم. 12:11). «جالىنداۋ» دەگەن ٴسوز ٴبىر ٸستى قۇلشىنىسپەن، زور ىقىلاسپەن اتقارۋدى بىلدىرەدى. دەمەك، رۋحتىڭ اسەرىمەن ٴبىز باۋىرلاستاردى ەرەكشە ىقىلاسپەن ٴسۇيىپ، ەرەكشە ىقىلاسپەن كەشىرە الامىز. ەندەشە، ەحوبادان كيەلى رۋح سۇراۋدان تالمايىق (لۇقا 11:13).
«جىككە بولىنبەي... تولىقتاي بىرلىكتە تۇرىڭدار»
13. ارامىزداعى بىرلىككە نە قاۋىپ ٴتوندىرۋى مۇمكىن؟
13 قاۋىمدارىمىز ٴتۇرلى ورتادان شىققان «ٵرتۇرلى ادامداردان» قۇرالعان (ٴتىم. 1-ح. 2:3، 4). سوندىقتان كيىم كييۋگە، سىرت كورىنىسكە، دەنساۋلىقتى كۇتۋگە، كوڭىل كوتەرۋگە قاتىستى كوزقاراسىمىز دا ٵرتۇرلى. اباي بولماساق، بۇنداي ٴتۇرلى كوزقاراسىمىز وپ-وڭاي جىككە بولىنۋگە اكەپ سوعۋى مۇمكىن (ريم. 14:4؛ قور. 1-ح. 1:10). «ٴبىر-ٴبىرىمىزدى ٴسۇيۋدى بىزگە قۇداي ۇيرەتىپ جاتقاندىقتان»، جەكە باستىڭ ماسەلەلەرىندە مەنىڭ كوزقاراسىم، مەنىڭ تاڭداۋىم بارىنىكىنەن دۇرىس دەپ تۇرىپ الۋدان اۋلاق بولعانىمىز ٴجون (ٴفىلىپ. 2:3).
14. باۋىرلاستاردى بارلىق كەزدە جىگەرلەندىرگەنىمىز نەگە ماڭىزدى؟
14 جىككە بولىنۋشىلىكتى بولدىرماۋدىڭ تاعى ٴبىر جولى — باۋىرلاستاردى بارلىق كەزدە جۇباتىپ، جىگەرلەندىرۋ (سال. 1-ح. 5:11). سوڭعى ۋاقىتتا قاۋىمعا كەلمەي كەتكەن جانە قاۋىمنان الاستاتىلعان باۋىرلاستارىمىزدىڭ كوبى قايتىپ كەلىپ جاتىر. ٴبىز ولاردى قۇشاق جايا قارسى الامىز! (قور. 2-ح. 2:8) ون جىل بويى قاۋىمعا كەلمەگەن ٴبىر ايەل باۋىرلاس بىلاي دەيدى: «پاتشالىق سارايىنا كىرىپ كەلگەنىمدە، باۋىرلاستاردىڭ ٴبارى قولىمدى الىپ امانداسىپ، مەنى جىلى جۇزبەن قارسى الدى». قاۋىمداعىلاردىڭ جىلى امانداسقانىنىڭ ٶزى قانشالىقتى اسەر ەتكەنىن ايتىپ، ول تاعى بىلاي دەدى: «ەحوبانىڭ ٶزى مەنى قۇشاق جايا قارسى الىپ، ماعان ەڭسەڭدى كوتەرىپ، قۋان دەپ جاتقانداي بولدى» (ەل. ٸس. 3:19). ەگەر ٴبىز «بەينەت شەككەندەر مەن ەڭسەلەرىن اۋىر جۇك باسقانداردى» سەرگىتۋگە تىرىسساق، ٴماسىحتىڭ ناعىز كومەكشىسى بولامىز (مات. 11:28، 29).
15. ىنتىماق-بىرلىگىمىزدى نىعايتۋدىڭ تاعى ٴبىر جولى قانداي؟ (سۋرەتتەردى دە قاراڭىز.)
15 ىنتىماق-بىرلىگىمىزدى نىعايتۋدىڭ تاعى ٴبىر جولى — سوزدەرىمىزگە ٴمان بەرۋ. ٵيۇپ 12:11 دە: «ٴسوزدى قۇلاق، ٴدامدى ٴتىل اجىراتپاي ما؟»— دەلىنگەن. ازىرلەگەن تاماعىمىزدى قوناقتارعا ۇسىنباس بۇرىن ٴدامىن تاتىپ كورەتىنىمىزدەي، وزگەلەرگە بىردەڭە ايتپاس بۇرىن ويلانىپ العانىمىز ٴجون (ٴزاب. 141:3). سوندا ايتقان ٴسوزىمىز ٵردايىم وزگەلەردى جىگەرلەندىرىپ، سەرگىتىپ، «پايدالارىنا اساتىنداي» بولادى (ەفەس. 4:29).
سويلەمەس بۇرىن ٴسوزىڭىزدىڭ ٴدامىن تاتىپ كورىڭىز (15-ابزاستى قاراڭىز)
16. اسىرەسە كىمدەر ايتاتىن سوزدەرىنە مۇقيات بولۋ كەرەك؟
16 كۇيەۋلەر مەن اتا-انالار نە ايتاتىندارىنا اسىرەسە مۇقيات بولعاندارى ٴجون. ولاردىڭ سوزدەرى ٵردايىم كوڭىلدى سەرگىتەتىندەي بولۋ كەرەك (قول. 3:19، 21؛ تيت. 2:4). اقساقالدار دا ەحوبانىڭ وتارىن ٵردايىم جىگەرلەندىرىپ، جۇباتىپ جۇرۋلەرى ٴتيىس (يشايا 32:1، 2؛ عال. 6:1). كيەلى كىتاپتاعى: «ۋاقىتىندا ايتىلعان ٴسوز قانداي جاقسى!»— دەگەن دانا سوزدەردى ەشقاشان ەستەن شىعارمايىق (ناق. س. 15:23).
«ٸس جۇزىندە ٵرى شىن جۇرەكتەن سۇيەيىك»
17. باۋىرلاستاردى شىن كوڭىلمەن جاقسى كورەتىنىمىزدى قالاي كورسەتسەك بولادى؟
17 ەلشى جوحان: «ٴبىر-ٴبىرىمىزدى ٴسوز جۇزىندە نە اۋىزبەن عانا ەمەس، ٸس جۇزىندە ٵرى شىن جۇرەكتەن سۇيەيىك»،— دەگەن (جوح. 1-ح. 3:18). باۋىرلاستاردى شىن كوڭىلمەن ٴسۇيۋ ٷشىن، ٴبىز ولارعا جاقىن بولۋىمىز كەرەك. بۇل ٷشىن نە ىستەسەك بولادى؟ قاۋىمعا بارعاندا، قىزمەتكە شىققاندا باۋىرلاستارمەن ارالاسىپ، جاقىنىراق تانىسىپ الىڭىز، ۇيلەرىنە قال-جاعدايلارىن سۇراپ بارىڭىز. وسىلاي ەتسەك، ٴبىر-ٴبىرىمىزدى ٴسۇيۋدى قۇدايدان ۇيرەنىپ جاتقانىمىزدى دالەلدەيمىز (سال. 1-ح. 4:9). «باۋىرلاردىڭ بىرلىكتە تۇرعاندارى قانداي يگى، قانداي جاعىمدى» ەكەنىنە دە كوزىمىز جەتە تۇسەدى (ٴزاب. 133:1).
90-ٵن ٴبىر-ٴبىرىمىزدى جىگەرلەندىرەيىك