15-زەرتتەۋ ماقالاسى
30-ٵن ەحوبا، قۇدايىمسىڭ، ادال دوسىم
«قۇدايعا جاقىن بولعانىمىز قانداي يگى!»
«مەنىڭ قۇدايعا جاقىن بولعانىم قانداي يگى!» (ٴزاب. 73:28).
نەگىزگى وي
ەحوباعا جاقىنداي بەرۋدىڭ ماڭىزى مەن ونىمەن دوستىعىمىزدىڭ يگىلىكتەرى.
1، 2. ا) بىرەۋمەن دوس بولعىمىز كەلسە، نە ىستەۋىمىز قاجەت؟ ٵ) بۇل ماقالادا نە قاراستىرامىز؟
ٴسىزدىڭ جاقىن دوسىڭىز كىم؟ ونىمەن قالاي دوس بولىپ كەتكەن ەدىڭىز؟ ٴبىراز ۋاقىت ارالاسىپ، باسىنان وتكىزگەن قيىندىقتارىن، وعان نە ۇنايدى، نە ۇنامايدى — سونىڭ ٴبارىن ٴبىلىپ العان بولارسىز. بويىنداعى جاقسى قاسيەتتەرىن كورىپ، ٴتانتى دە بولعان شىعارسىز. ٴسۇيتىپ-ٴسۇيتىپ، ول اداممەن جاقىن بولىپ كەتتىڭىز.
2 كورگەنىمىزدەي، بىرەۋمەن دوس بولۋ ٷشىن وعان ۋاقىت ٴبولىپ، ارەكەت جاساۋ كەرەك. ەحوبا قۇدايمەن دوس بولۋ دا تۋرا سولاي. بۇل ماقالادا ٴبىز ەحوباعا جاقىن بولۋ ٷشىن نە ىستەۋىمىز كەرەكتىگىن قاراستىرامىز. ٴبىراق الدىمەن ەحوباعا جاقىن بولۋدىڭ نەسىمەن يگى ەكەنىن كورەيىك.
3. ەحوبامەن دوس بولۋدىڭ يگىلىكتەرى جايلى نەگە ويلانىپ تۇرۋىمىز كەرەك؟ مىسال كەلتىرىڭىز.
3 ەحوباعا جاقىن بولۋدىڭ يگى ەكەنىمەن ٴبارىمىز دە كەلىسەمىز. ٴبىراق ٴبىز ونىڭ نەسىمەن يگى ەكەنى تۋرالى ويلانىپ تۇرۋىمىز كەرەك، سوندا ەحوباعا جاقىنداي بەرۋگە تالپىنا تۇسەمىز (ٴزاب. 63:6—8). مىسالى، كوپ ادام دۇرىس تاماقتانۋدىڭ، جاتتىعۋ جاساۋدىڭ، جەتكىلىكتى دەمالىپ، كوپ سۋ ٸشۋدىڭ ماڭىزدى ەكەنىن بىلەدى. ٴبىراق بىلسە دە، ىستەمەيدى. ويتكەنى دەنساۋلىققا پايداسى تۋرالى ويلانا بەرمەيدى. ەگەر ويلانسا، ۇزبەي ىستەۋگە تالپىنار ەدى. تۋرا سولاي، ەحوباعا جاقىن بولۋدىڭ يگى ەكەنىن ٴتۇسىنىپ قانا قويۋ جەتكىلىكسىز. ٴبىز ەحوباعا ٵرى قاراي دا جاقىنداي تۇسكىمىز كەلسە، ونىمەن دوس بولۋدىڭ يگىلىكتەرى جايلى ويلانىپ تۇرۋىمىز كەرەك (ٴزاب. 119:27—30).
4. ٴزابۇر جىرشىسى ٴزابۇر 73:28 دە نە دەگەن؟
4 ٴزابۇر 73:28 وقىڭىز. ٴزابۇردىڭ 73-تاراۋىن جازعان ادام لەۋى رۋىنان شىققان، ٵرى ول ەحوبانىڭ عيباداتحاناسىندا ٵن-كۇيمەن بايلانىستى قىزمەت اتقارعان. ول ەحوباعا ٴبىرتالاي جىل ادال قىزمەت ەتكەن كورىنەدى. ٴبىراق بىردە ول تۋرا جولدان تايۋعا شاق قالدى. قۋانىشقا وراي، ول «قۇدايعا جاقىن بولعانى قانداي يگى» ەكەنىن ٴتۇسىندى. ال ەحوبامەن دوس بولۋدىڭ يگىلىكتەرى قانداي؟
«قۇدايعا جاقىن بولعانىمىز» ٴبىزدى باقىتقا جەتەلەيدى
5. ا) نەگە ەحوباعا جاقىنداعان سايىن باقىتتى بولا تۇسەمىز؟ ٵ) ناقىل سوزدەر 2:6—16 تارماقتارعا ساي، ەحوبا بەرىپ جاتقان دانالىقتىڭ قانداي يگىلىگىن كورىپ ٴجۇرسىز؟
5 ەحوباعا جاقىن بولعان سايىن، ٴبىز باقىتتى بولا تۇسەمىز (ٴزاب. 65:4). مۇنىڭ ٴبىر سەبەبى — ونىڭ سوزىندەگى اقىل-كەڭەستەردىڭ ارقاسىندا باسىمىزدى تاۋعا دا، تاسقا دا سوعىپ، ومىردەن تاياق جەمەيمىز (ناقىل سوزدەر 2:6—16 وقىڭىز). كيەلى كىتاپتا: «قانداي باقىتتى دانالىقتى تاپقان ادام، پارىقتىلىققا ۇيرەنگەن جان!»— دەپ تۋرا ايتىلعان (ناق. س. 3:13).
6. ٴزابۇر جىرشىسى نە ٷشىن ٴتۇڭىلىپ كەتتى؟
6 ەحوباعا جاقىن بولعانىمىز ەشقاشان كوڭىلىمىز تۇسپەيدى دەگەندى بىلدىرمەيدى. ٴبىزدىڭ دە ەڭسەمىز تۇسەتىن كەزدەر بولادى. ٴزابۇردىڭ 73-تاراۋىن جازعان ادام دا بىردە ومىردەن ٴتۇڭىلىپ كەتتى. وعان قۇدايسىز ادامدار قاننەن-قاپەرسىز، شالقىپ ٶمىر ٴسۇرىپ جاتقانداي كورىندى. ول سول ادامدارعا ٴتىپتى قىزعانا قارادى (ٴزاب. 73:3—7، 12). بۇنى ادىلەتسىز كورىپ، اشىنعانى سونشا — قۇدايعا قىزمەت ەتكەننەن كەلىپ-كەتەر پايدا جوق دەپ ويلادى. سول ٷشىن دە: «مەن جۇرەگىمدى بەكەرگە تازا ساقتاپپىن، كىناراتسىز ەكەنىمدى كورسەتۋ ٷشىن قولىمدى بوسقا جۋىپپىن»،— دەدى ول (ٴزاب. 73:13).
7. مۇڭايعان كەزدەرى نە ىستەگەنىمىز ماڭىزدى؟ (سۋرەتتى دە قاراڭىز.)
7 ٴبىراق ٴزابۇر جىرشىسى ٴتۇڭىلىپ جۇرە بەرمەي، «قۇدايدىڭ ايبىندى عيباداتحاناسىنا» باردى. سول جەردە ەحوبا وعان ويىن تۇزەۋگە كومەكتەستى (ٴزاب. 73:17—19). ٴبىز دە مۇڭايعان كەزىمىزدە ەحوباعا جۇگىنگەنىمىز ٴجون، ويتكەنى ول ٴبىزدىڭ نە كۇي كەشىپ جاتقانىمىزدى جاقسى تۇسىنەدى. ەگەر دۇعا ەتسەك، كيەلى كىتاپتا جانە قاۋىمدا ايتىلاتىن اقىل-كەڭەستەرگە قۇلاق اسساق، قايعى-مۇڭىمىزدى جەڭۋگە كۇش تابامىز. ٴتىپتى جۇيكەمىز توزىپ، كۇيزەلىپ كەتسەك تە، ەحوبا ٴبىزدى جۇباتىپ، جانىمىزدى جايلاندىرا الادى (ٴزاب. 94:19)a.
ٴزابۇردىڭ 73-تاراۋىن جازعان لەۋىلىك «قۇدايدىڭ ايبىندى عيباداتحاناسىنىڭ» الدىندا تۇر (7-ابزاستى قاراڭىز)
«قۇدايعا جاقىن بولعانىمىز» ومىرىمىزگە ٴمان كىرگىزەدى
8. ەحوباعا جاقىن بولعانىمىزدىڭ تاعى قانداي يگىلىگىن كورىپ ٴجۇرمىز؟
8 ەحوباعا جاقىن بولعانىمىزدىڭ ارقاسىندا ٴبىز ٴماندى دە ماعىنالى ٶمىر كەشىپ جاتىرمىز. سونداي-اق بولاشاققا زور ۇمىتپەن قارايمىز (ەرم. 29:11). ەحوبامەن دوستىعىمىزدىڭ وسى ەكى يگىلىگىنە جەكە-جەكە توقتالايىق.
9. ەحوباعا جاقىن بولعانىمىز ومىرىمىزگە قالاي ٴمان كىرگىزدى؟
9 قۇدايعا جاقىن بولماعاندا، ٶمىرىمىزدىڭ ٴمانى بولماس ەدى. بۇگىندە قۇداي جوق دەيتىن ادامدار ومىرگە نە ٷشىن كەلگەندەرىن تۇسىنبەيدى. سول ٷشىن دە ولار ٶمىردىڭ ەش ٴمانى جوق، ادامدار تۇبىندە قۇرىپ جوق بولادى دەپ پايىمدايدى. ال ٴبىز كيەلى كىتاپتى وقىعاننىڭ ارقاسىندا «قۇداي بار ەكەنىن» بىلەمىز، سونداي-اق ول «ٶزىن شىن جۇرەكتەن ىزدەيتىندەرگە سي بەرەتىنىنە سەنەمىز» (ەۆر. 11:6). ادام ەحوبا قۇدايعا عيبادات ەتۋ ٷشىن جاراتىلعان. ٴبىز جاراتىلىسىمىزعا ساي ٶمىر ٴسۇرىپ جۇرگەندىكتەن، قازىردىڭ وزىندە ٶمىرىمىز ٴماندى دە ماعىنالى (مۇس. 5-ج. 10:12، 13).
10. ٴزابۇر 37:29 عا ساي، ەحوباعا ٷمىت ارتاتىنداردىڭ بولاشاعى قانداي؟
10 كوپ ادام جۇمىس ىستەپ، اقشا تاپسام، بالا-شاعامنىڭ قىزىعىن كورسەم، جاسارىمدى جاساپ، ادەمى قارتايسام دەيدى. ولاردىڭ ومىردەن بار كۇتەتىندەرى — وسى. ولار قۇدايعا مۇلدەم ٷمىت ارتپايدى، ويتكەنى ونىڭ ادامزاتقا قانداي بولاشاق ۋادە ەتىپ وتىرعانىن بىلمەيدى. ال ٴبىز قۇدايدىڭ كەرەمەت ۋادەلەرىن بىلەمىز (ٴزاب. 25:3—5؛ ٴتىم. 1-ح. 6:17). قۇدايعا جاقىن بولعانىمىزدىڭ ارقاسىندا ٴبىز سول ۋادەلەردىڭ جۇزەگە اساتىنىنا كامىل سەنەمىز. ٴبىزدى الدا شەگى جوق باقىتقا تولى ٶمىر كۇتىپ تۇر. ەڭ باستىسى، جۇماقتا ٴبىز قۇدايىمىز ەحوباعا ماڭگى باقي عيبادات ەتەتىن بولامىز (ٴزابۇر 37:29 وقىڭىز).
11. قۇدايعا جاقىن بولعانىمىزدىڭ تاعى ٴبىر يگىلىگى قانداي جانە قۇدايعا جاقىن بولعانىمىز ونىڭ ٶزىن قانداي سەزىمگە بولەيدى؟
11 قۇدايعا جاقىن بولعانىمىزدىڭ ايتپاسقا بولماس تاعى ٴبىر يگىلىگى بار. ەحوبا كۇناسىنا وكىنگەن قىزمەتشىلەرىن كەشىرەدى (يشايا 1:18). سونىڭ ارقاسىندا بۇرىنعى جاساعان كۇنالارىمىز ٷشىن ٶزىمىزدى جەگىدەي جەمەيمىز (ٴزاب. 32:1—5). ەحوباعا جاقىن بولعانىمىز ەحوبانىڭ وزىنە دە قۋانىش سيلايدى (ناق. س. 23:15). ەحوبامەن دوستىعىمىزدىڭ يگىلىكتەرى بۇل عانا ەمەس، ٴسىز ونىڭ باسقا دا كوپتەگەن يگىلىكتەرىن كورىپ جۇرگەنىڭىزدە كۇمان جوق. ال قازىر قۇدايعا ٵرى قاراي دا جاقىنداي بەرۋ ٷشىن نە ىستەۋىمىز كەرەكتىگىن قاراستىرايىق.
قۇدايعا ودان سايىن جاقىنداي ٴتۇسىڭىز
12. قۇدايعا جاقىنداۋ ٷشىن ٴسىز قانداي قادامدار جاسادىڭىز؟
12 ەگەر شومىلدىرۋ راسىمىنەن وتكەن بولساڭىز، دەمەك، ٴسىز قۇدايعا جاقىنداۋ ٷشىن ٴبىراز نارسە ىستەدىڭىز. اتاپ ايتقاندا، ەحوبا قۇداي مەن يسا ٴماسىح جايلى شىندىقتاردى زەرتتەپ ٴبىلدىڭىز، بۇرىن جاساعان كۇنالارىڭىز ٷشىن وكىندىڭىز، قۇدايعا بەرىك سەنىم دامىتتىڭىز جانە ونىڭ ەركىنە ساي ٶمىر ٴسۇرۋدى ۇيرەندىڭىز. ٴبىراق قۇدايعا جاقىنداي ٴتۇسۋ ٷشىن بۇل نارسەلەردى ٵرى قاراي دا ىستەي بەرۋىڭىز قاجەت (قول. 2:6).
13. ەحوباعا جاقىنداي ٴتۇسۋ ٷشىن نە ىستەۋىڭىز كەرەك؟
13 ەحوباعا جاقىنداي ٴتۇسۋ ٷشىن، بىرىنشىدەن، كيەلى كىتاپتى ۇزبەي وقىپ-زەرتتەڭىز. ٴبىراق كيەلى كىتاپتى وقىعاندا، تەك قۇداي جايلى ٴبىلۋىم كەرەك دەپ ويلاماڭىز. وزىڭىزگە قاتىستى تۇستارىن دا بايقاۋعا تىرىسىڭىز. ەحوبانىڭ سىزگە قاتىستى ەركى قانداي، ول ٴسىزدىڭ نە ىستەگەنىڭىزدى قالايدى، قاي ٴپرينسيپتى ومىردە قولدانعانىڭىز دۇرىس — سونى دا كورۋگە تىرىسىڭىز (ەفەس. 5:15—17). ەكىنشىدەن، ەحوبانىڭ وسىعان دەيىن سىزگە قالاي كومەكتەسىپ كەلگەنى جايلى وي جۇگىرتىپ، وعان دەگەن سەنىمىڭىزدى نىعايتا بەرىڭىز. ۇشىنشىدەن، ەحوبا جەك كورەتىن نارسەلەردى جەك كورىڭىز جانە سول نارسەلەردى ىستەيتىن ادامداردان اۋلاق ٴجۇرىڭىز (ٴزاب. 1:1؛ 101:3).
14. قورىنتتىقتارعا 1-حات 10:31 گە ساي، ەحوباعا ۇنامدى بولۋ ٷشىن رۋحاني ىستەردەن بولەك تاعى نە ىستەۋىمىز كەرەك؟ (سۋرەتتەردى دە قاراڭىز.)
14 قورىنتتىقتارعا 1-حات 10:31 وقىڭىز. ٴبىزدىڭ ٵربىر ىسىمىزدەن ەحوباعا ۇناعىمىز كەلەتىنى كورىنىپ تۇرۋ كەرەك. بۇل ٷشىن قاۋىمعا، ۋاعىزعا بارىپ جۇرگەنىمىز جەتكىلىكسىز. ٴبىزدىڭ كۇندەلىكتى ىستەرىمىز دە ەحوبانى قۋانتۋ كەرەك. مىسالى، بارلىق ىستە ادال بولعانىمىز جانە قولدا بارىمىزدى وزگەلەرمەن بولىسكەنىمىز ەحوباعا ۇنايدى (قور. 2-ح. 8:21؛ 9:7). ول ٶمىر سيىن قۇرمەتتەگەنىمىزدى دە قالايدى. سوندىقتان تاماققا، ىشىمدىككە كەلگەندە ۇستامدى بولعانىمىز، قولىمىزدان كەلگەنشە دەنساۋلىعىمىزدى كۇتكەنىمىز ماڭىزدى. قاراپايىم بولىپ كورىنگەن ىستەردە دە ەحوبانى قۋانتاتىن بولساق، وعان بارعان سايىن جاقىنداي بەرەمىز (لۇقا 16:10).
ەحوبانى قۋانتۋدىڭ كەيبىر جولدارى: كولىكتى ابايلاپ جۇرگىزۋ، دەنساۋلىقتى كۇتۋ ٷشىن جاتتىعۋ جاساپ، دۇرىس تاماقتانۋ، قوناقجاي بولۋ (14-ابزاستى قاراڭىز)
15. ەحوبا ٴبىزدىڭ وزگەلەرگە قالاي قاراعانىمىزدى قالايدى؟
15 ەحوبا وزىنە قىزمەت ەتەتىندەرگە دە، ەتپەيتىندەرگە دە مەيىرىممەن قارايدى (مات. 5:45). ول ٴبىزدى دە سولاي ەتسە ەكەن دەيدى. سوندىقتان ول ٴبىزدى «ەشكىمدى تىلدەمەي، داۋكەس بولماي، قايتا، بارىنە بىردەي جۇمساقتىق تانىتۋعا» شاقىرادى (تيت. 3:2). وسى سوزدەردى ەستە ۇستاساق، ەحوباعا قىزمەت ەتپەيتىن ادامداردى وزىمىزدەن تومەن سانامايمىز (ٴتىم. 2-ح. 2:23—25). بارلىق ادامعا ەحوبا سياقتى جاقسى قارايتىن بولساق، وعان جاقىن بولا تۇسەمىز.
قاتەلىك جاساپ قويساق تا، قۇدايعا جاقىنداي الامىز
16. قاتە كوزقاراس تانىتقانى ٷشىن ٴزابۇر جىرشىسى قانداي كۇي كەشتى؟
16 قاتەلىك جاساپ قويعان كەزدەرى «ەندى ەحوبانىڭ سۇيىسپەنشىلىگىنە لايىق ەمەسپىن» دەپ ويلاعان كەزىڭىز بولعان با؟ ماقالانىڭ باسىندا ايتىلعان ٴزابۇر جىرشىسى دا وسىلاي ويلاسا كەرەك. ول: «مەن جولدان تايۋعا شاق قالدىم، اياعىم تايىپ كەتە جازدادى»،— دەدى (ٴزاب. 73:2). كەيىن ول ەحوباعا: «مەن سانا مەن تۇسىنىكتەن جۇرداي ەدىم، كوز الدىڭدا تۇيسىكسىز حايۋانعا ۇقسادىم»،— دەدى (ٴزاب. 73:21، 22). وسى سوزدەرىنە قاراعاندا، ول قاتە كوزقاراسى ٷشىن ەحوبانىڭ سۇيىسپەنشىلىگىنەن ايىرىلىپ قالدىم دەپ قورىقسا كەرەك.
17. ا) كوڭىلى قۇلازىپ تۇرسا دا، ٴزابۇر جىرشىسى نە ىستەدى؟ ٵ) ٴبىز وعان قالاي ەلىكتەسەك بولادى؟ (سۋرەتتەردى دە قاراڭىز.)
17 ٴزابۇر جىرشىسى ەحوبانىڭ ىقىلاسىنان ايىرىلىپ قالدىم دەگەن ويعا جول بەرگەن بولسا، وندا ونىڭ بۇل كۇمانى كوپ ۇزاماي سەيىلدى. كوڭىلى قانشا قۇلازىپ تۇرسا دا، ول ەحوباعا جاقىن بولۋدىڭ ماڭىزىن ۇمىتپادى. مۇنى ونىڭ مىنا سوزدەرىنەن كورەمىز: «ال ەندى ۇنەمى وزىڭمەن بىرگەمىن، سەن مەنى وڭ قولىمنان ۇستاپ جەتەلەپ ٴجۇرسىڭ. اقىل-كەڭەسىڭمەن ماعان جول سىلتەيسىڭ، ال اقىرىندا سالتاناتقا جەتكىزەسىڭ» (ٴزاب. 73:23، 24). قاتەلىكتەرىمىز ٷشىن ەڭسەمىز تۇسكەندە، ٴبىز دە ەحوبادان كومەك ىزدەيىك. ويتكەنى ول — «كوڭىلىمىزگە مەدەت بولار جارتاسىمىز» (ٴزاب. 73:26؛ 94:18). ٴتىپتى ۇلكەن قاتەلىك جاساپ، اياعىمىز تۋرا جولدان تايىپ كەتسە دە، ٴبىز ەحوباعا قايتا ورالا الامىز. ويتكەنى ول — «كەشىرۋگە دايىن» قۇداي (ٴزاب. 86:5). ەندەشە، قاتەلىكتەرىمىزدى ويلاپ قينالعاندا، ەحوبادان الىستاماي، قايتا، وعان بۇرىنعىدان بەتەر جاقىنداي تۇسەيىك (ٴزاب. 103:13، 14).
رۋحاني السىرەگەن كەزدە ەحوباعا جاقىنداي ٴتۇسۋ ٷشىن رۋحاني ىستەرمەن كوبىرەك اينالىسقانىمىز دۇرىس (17-ابزاستى قاراڭىز)
ٴبىز قۇدايعا ماڭگى باقي جاقىنداي بەرەمىز
18. نەگە ٴبىز ەحوباعا ماڭگى باقي جاقىنداي بەرەمىز؟
18 ٴبىز ەحوباعا ماڭگى باقي جاقىنداي بەرەمىز، ويتكەنى ٴبىز ونى ەشقاشان تولىقتاي تانىپ-بىلە المايمىز. كيەلى كىتاپتا: «و، نەتكەن زور قۇدايدىڭ باتالارى! نەتكەن مول دانالىعى مەن ٴبىلىمى! شەشىمدەرىنە ادام اقىلى جەتپەس، جولدارىن ونىڭ ەشكىم زەرتتەپ بىتپەس!»— دەپ ٴدال ايتىلعان (ريم. 11:33).
19. ٴزابۇر كىتابىنداعى سوزدەر بىزگە قانداي سەنىمدىلىك بەرەدى؟
19 ٴزابۇر 79:13 تە: «ٴبىز، ٶز حالقىڭ ٵرى جايىلىمىڭداعى وتارىڭ، ساعان ماڭگى العىس ايتامىز، ۇرپاقتان ۇرپاققا داڭقىڭدى جاريالايمىز»،— دەلىنگەن. ٴبىز ەحوباعا ەتەنە جاقىن جۇرسەك، ونىمەن دوستىعىمىزدىڭ يگىلىگىن ماڭگى كورەمىز. ول ٴبىزدىڭ «كوڭىلىمىزگە مەدەت بولار جارتاسىمىز، ماڭگىلىك ۇلەسىمىز» بولادى (ٴزاب. 73:26).
32-ٵن ەحوبانىڭ جاعىنا شىق
a ۇزاق ۋاقىت ۋايىمعا سالىنىپ، مۇڭعا باتىپ جۇرگەن ادامدارعا كاسىبي ماماننىڭ كومەگى قاجەت بولۋىم مۇمكىن. كوبىرەك ٴبىلۋ ٷشىن 2023-جىلعى «كۇزەت مۇناراسىنىڭ» 1-ٴنومىر سانىن قاراڭىز.