ەحوبانىڭ جاناشىرلىعىن ۇلگى تۇتايىق
«ەحوبا، ەحوبا — مەيىرىمدى دە جاناشىر» (مۇسانىڭ 2-جازباسى 34:6).
اندەر: 142، 12
1. ەحوبا مۇساعا ٶزىنىڭ بولمىسىن قالاي اشتى؟ بۇنىڭ ٴبىز ٷشىن قانداي ماڭىزى بار؟
بىردە قۇداي مۇساعا ٶز ەسىمىن، سونداي-اق كەيبىر قاسيەتتەرىن اشىپ، وزىنىڭ قانداي ەكەنىن ٴبىلدىردى. ەحوبا سول كەزدە ٶزىنىڭ كۇشىنە نە دانالىعىنا نازار اۋدارسا بولار ەدى، دەسە دە ول الدىمەن وزىنىڭ مەيىرىمدىلىگى مەن جاناشىرلىعىن اتاپ ٶتتى (مۇسانىڭ 2-جازباسى 34:5—7 وقىڭىز). مۇساعا ەحوبانىڭ ونى قولدايتىنىن ٴبىلۋ قاجەت بولدى. سوندىقتان ەحوبا ٶزىنىڭ قىزمەتشىلەرىنە شىنىمەن كومەكتەسكىسى كەلەتىنىن كورسەتەتىن قاسيەتتەرىنە باسا نازار اۋداردى (مۇسانىڭ 2-جازباسى 33:13). ەحوبانىڭ ٴبىز ٷشىن سونشالىقتى قام جەيتىنىن بىلگەنىمىز بويىمىزعا جىلى سەزىم ۇيالاتادى ەمەس پە؟! بۇل ماقالادا جاناشىرلىققا، ياعني وزگەلەردىڭ قاسىرەتىن سەزىنۋگە ٵرى قول ۇشىن بەرۋگە تالپىندىراتىن قاسيەتكە نازار اۋدارىلادى.
2، 3. ا) جاناشىرلىق ادامدارعا ٴتان ەكەنى نەدەن كورىنەدى؟ ٵ) كيەلى كىتاپتا جاناشىرلىق جايلى ايتىلعاندارعا نەگە كوڭىل ٴبولۋىمىز كەرەك؟
2 ەحوبا — جاناشىر قۇداي، ٵرى ادامدار وعان ۇقساس ەتىپ جاراتىلعان. سوندىقتان ادامدار تابيعاتىنان وزگەلەرگە قامقور بولىپ كەلەدى. ٴتىپتى ەحوبانى تانىمايتىن ادامدار دا ٴجيى جاناشىرلىق تانىتىپ جاتادى (مۇسانىڭ 1-جازباسى 1:27). كيەلى كىتاپتا وسى قاسيەتتى تانىتقان ادامداردىڭ كوپ مىسالى بار. مىسالى، بىردە سۇلەيمەن پاتشاعا الدىنا كەلگەن ەكى ايەلدىڭ قايسىسى ٴسابيدىڭ شىن اناسى ەكەنىن انىقتاۋ قاجەت بولدى. ول الگى ايەلدەردى سىناماق بولىپ، بالانى ەكىگە قاق ٴبولۋدى بۇيىرادى. سوندا شىن اناسى بالاسىنا ەت جۇرەگى ەزىلىپ، ٴسابيدى ەكىنشى ايەلگە بەرە سالۋىن وتىنەدى (پاتشالار 1-جازبا 3:23—27). جاناشىرلىق تانىتۋدىڭ تاعى ٴبىر مىسالى — پەرعاۋىننىڭ قىزى. ول ٴسابي مۇسانى تاۋىپ العاندا، ونىڭ ەۆرەي ەكەنىن، سوندىقتان ٶلتىرىلۋى كەرەكتىگىن ٴبىلدى. الايدا «نارەستەگە جانى اشىپ»، ونى ٶز بالاسىنداي ٶسىردى (مۇسانىڭ 2-جازباسى 2:5، 6).
3 نەگە جاناشىرلىق جايلى كوبىرەك ٴبىلۋىمىز كەرەك؟ ويتكەنى ەحوبا ٴبىزدىڭ وزىنە ەلىكتەگەنىمىزدى قالايدى (ەفەستىكتەرگە 5:1). ٴبىز جاناشىرلىق تانىتا الاتىنداي جاراتىلساق تا، كەمەلسىزبىز ٵرى وزىمشىلدىككە بەيىمبىز. كەيدە ٴبىر ادامعا كومەكتەسۋ كەرەك پە، جوق الدە ٶزىمىزدى ويلاۋىمىز قاجەت پە، سونى شەشە الماي جاتامىز. ادامدارعا كوبىرەك كوڭىل بولۋگە بىزگە نە كومەكتەسەدى؟ الدىمەن، ەحوبا جانە باسقالار قالاي جاناشىرلىق تانىتقانىن قاراستىرايىق. سوسىن جاناشىر قۇدايعا قالاي ەلىكتەي الاتىنىمىزدى ٵرى سولاي ەتكەنىمىز نەگە ٶزىمىز ٷشىن پايدالى ەكەنىن كورەيىك.
ەحوبا — جاناشىرلىقتىڭ ۇزدىك ۇلگىسى
4. ا) نەگە ەحوبا سودومعا پەرىشتەلەردى جىبەرگەن؟ ٵ) لۇتتىڭ وتباسىمەن بولعان جاعدايدان نە بىلەمىز؟
4 كيەلى كىتاپتا ەحوبانىڭ جاناشىرلىق تانىتقانى جايلى كوپ ايتىلعان. مىسال ٷشىن، ونىڭ لۇتقا نە ىستەگەنىن ەسكە تۇسىرەيىكشى. لۇت سودوم مەن عوموراداعى ازعىن ادامداردىڭ كەسىرىنەن «قاتتى قينالعان» ٵدىل كىسى بولعان. ونداعى ادامدار قۇدايدان بەزگەن ەدى، سوندىقتان ەحوبا ولاردى ولىمگە كەسۋدى شەشەدى (پەتىردىڭ 2-حاتى 2:7، 8). ەحوبا لۇتقا پەرىشتەلەرىن جىبەرىپ، سودوم مەن عومورانى جوياتىنىن، سوندىقتان قالادان قاشۋى كەرەكتىگىن ايتادى. كيەلى كىتاپتا بىلاي دەلىنگەن: «لۇت كەتپەي ٴجۇرىپ العان سوڭ، ەحوبانىڭ وعان جانى اشىعاندىقتان، ولار لۇتتى، ايەلى مەن ەكى قىزىن قولدارىنان ۇستاپ جەتەلەي جونەلدى دە، قالا سىرتىنا الىپ شىقتى» (مۇسانىڭ 1-جازباسى 19:16). ەحوبا لۇتتىڭ جاعدايىن تۇسىنگەنىندەي، ٴبىزدىڭ دە كەز كەلگەن قيىنشىلىعىمىزدى تۇسىنەتىنىنە كۇماندانباساق بولادى (يشايا 63:7—9؛ جاقىپ 5:11؛ پەتىردىڭ 2-حاتى 2:9).
5. قۇداي ٴسوزى جاناشىرلىق تانىتۋعا قاتىستى نەگە ۇيرەتەدى؟
5 ەحوبا ٶز حالقىنا دا جاناشىرلىق تانىتۋدى ۇيرەتكەن. ماسەلەن، يسرايلدىكتەرگە بەرىلگەن زاڭداردىڭ ٴبىرىن الايىقشى. ەگەر الدەكىم بىرەۋدەن قارىزعا اقشا السا، ول اقشانى قايتاراتىنىنا كەپىلدىك رەتىندە ۇستىندەگى كيىمىن بەرەتىن بولعان (مۇسانىڭ 2-جازباسى 22:26، 27 وقىڭىز). ٴبىراق قارىز بەرۋشى سول كيىمدى كۇن باتقانشا يەسىنە قايتارىپ بەرۋى كەرەك-ٴتىن، ويتكەنى ول ونسىز تۇندە توڭىپ قالۋى مۇمكىن ەدى. جاناشىرلىقتان ادا ادام وسىنداي كەزدە كيىمدى يەسىنە قايتارعىسى كەلمەۋى مۇمكىن. ٴبىراق ەحوبا وسى زاڭدى بەرۋ ارقىلى ٶز حالقىن جاناشىر بولۋعا ۇيرەتتى. وسى زاڭنىڭ استارىنداعى پرينسيپتەن ٴبىز نە نارسەگە ۇيرەنە الامىز؟ باۋىرلاستاردىڭ قاجەتتىلىكتەرىن ٵردايىم ەلەپ-ەسكەرۋىمىز قاجەت. قيىندىق كورىپ جۇرگەن باۋىرلاستارعا، قولىمىزدان كەلىپ تۇرسا، قول ۇشىن بەرۋدەن ايانىپ قالعىمىز كەلمەيدى (قولوستىقتارعا 3:12؛ جاقىپ 2:15، 16؛ جوحاننىڭ 1-حاتى 3:17 وقىڭىز).
6. ەحوبانىڭ كۇناعا باتقان يسرايلدىكتەرگە جانى اشىعانىنان نە نارسەگە ۇيرەنەمىز؟
6 يسرايلدىكتەر وزىنە قارسى كۇنا جاساعان كەزدە دە، ەحوبانىڭ ولارعا جانى اشىعان. كيەلى كىتاپتا بىلاي دەلىنگەن: «اتا-بابالارىنىڭ قۇدايى ەحوبا ولاردى ەسكەرتۋ ٷشىن، قايتا-قايتا حابارشىلارىن جىبەردى. ويتكەنى ونىڭ ٶز حالقىنا جانە ٶز تۇراعىنا جانى اشىدى» (شەجىرەلەر 2-جازبا 36:15). ٴبىز دە ەحوبانى ٵلى تانىمايتىن، ٴبىراق ٵلى دە ىستەرىنە وكىنىپ، ونىڭ دوسى بولا الاتىن ادامدارعا جانىمىز اشۋى كەرەك. الداعى سوت كەزىندە ەحوبا ەشكىمنىڭ جويىلعانىن قالامايدى (پەتىردىڭ 2-حاتى 3:9). ٵلى ۋاقىت باردا ٴبىز ٵربىر مۇمكىندىكتى پايدالانىپ، بارلىق ادامدارعا ەسكەرتۋ حابارىن ايتقىمىز كەلەدى. وسىلايشا ولارعا قۇدايدىڭ جاناشىرلىعىنىڭ يگىلىگىن كورۋگە كومەكتەسەمىز.
7، 8. ٴبىر وتباسى ەحوبانىڭ وزدەرىنە جاناشىرلىق تانىتقانىنا نەگە سەنىمدى بولدى؟
7 ٴبىزدىڭ كۇندەرىمىزدە دە ەحوبانىڭ كوپ قىزمەتشىسى ونىڭ جاناشىرلىعىن سەزىنگەن. مىسالى، 1990-جىلدارى بوسنيادا ۇلتارالىق قاقتىعىس بولىپ، ادامدار ٴبىر-ٴبىرىن ٶلتىرىپ جاتتى. سوندا تۇراتىن ٴبىر وتباسىندا 12 جاسار ميلانa دەگەن بالا بولدى. بىردە ول ٸنىسى، اتا-اناسى جانە باسقا كۋاگەرلەرمەن بىرگە بوسنيادان سەربياعا اۆتوبۋسپەن كونگرەسكە بارا جاتتى. اتا-اناسى سول كونگرەستە شومىلدىرۋ راسىمىنەن وتكەلى جاتقان ەدى. شەگارادا ساربازدار بۇل وتباسىنىڭ باسقا ۇلت وكىلدەرى ەكەنىن كورىپ، اۆتوبۋستان ٴتۇسىرىپ الىپ قالادى. ال اۆتوبۋستاعى قالعان باۋىرلاستاردى شەگارادان وتكىزىپ جىبەرەدى. ٴسويتىپ، الگى وتباسىن ەكى كۇن بويى جىبەرمەي ۇستاپ وتىرادى. اقىرى، وفيتسەر باستىعىن شاقىرتىپ، ولارمەن نە ىستەۋ كەرەكتىگىن سۇرايدى. سول جەردە تۇرعان الگى وتباسى باستىقتارىنىڭ: «ولاردى بىلاي شىعارىپ، اتىپ تاستاي سالىڭدار!»— دەگەنىن ەستىپ قالادى.
8 ساربازدار سويلەسىپ جاتقاندا، بۇل وتباسىنىڭ قاسىنا ەكى بەيتانىس كىسى كەلەدى. ولار وزدەرىنىڭ كۋاگەر ەكەنىن ٵرى اۆتوبۋستاعى باۋىرلاستاردان بولعان جايتتى ەستىگەنىن سىبىرلاپ ايتادى. ساربازدار بالالاردىڭ قۇجاتتارىن تەكسەرىپ جاتپاعاندىقتان، ولار ميلان مەن ىنىسىنە كولىكتەرىنە وتىرىپ، شەگارادان بىرگە ٶتۋدى ۇسىنادى. ال اتا-اناسىنا شەگارا بەكەتىنىڭ ارتقى جاعىنان ٶتىپ كەتۋدى ايتىپ، ارعى بەتتە كەزدەسەيىك دەيدى. ميلان قورقىپ تۇرعاندىقتان، نە جىلارىن، نە كۇلەرىن بىلمەي قالادى. اتا-اناسى بولسا: «ولار ٴبىزدى جاي جىبەرە سالادى دەپ ويلايسىڭدار ما؟»— دەيدى. ٴبىراق ولاردىڭ كەتىپ بارا جاتقانىن ساربازدار ٴتىپتى بايقاماي قالعان كورىنەدى. ٴسويتىپ، ميلان مەن باۋىرى اتا-اناسىمەن كەلىسكەن جەردە كەزدەسىپ، كونگرەسكە بارادى. ولار ەحوبانىڭ دۇعالارىنا جاۋاپ بەرگەنىنە تولىقتاي سەنىمدى بولدى. ٴبىز كيەلى كىتاپتان ەحوبانىڭ ٵردايىم ٶز قىزمەتشىلەرىن وسىلاي تىكەلەي قورعامايتىنىن بىلەمىز (ەلشىلەردىڭ ىستەرى 7:58—60). ٴبىراق بۇل جاعدايدا ميلان: «مەنىڭشە، ول ساربازداردى پەرىشتەلەر سوقىر قىلىپ قويدى، وسىلاي ەحوبا ٴبىزدى قۇتقارىپ قالدى»،— دەپ ايتا الدى (ٴزابۇر 97:10).
9. يسا سوڭىنان ەرگەن جۇرتتى كورگەندە نە سەزىندى؟ (ماقالانىڭ باسىنداعى سۋرەتتى قاراڭىز.)
9 يسا جاناشىرلىقتىڭ كەرەمەت ۇلگىسىن كورسەتتى. ول جينالعان جۇرتتى كورگەندە، ولاردى اياپ كەتتى، ويتكەنى «ولار باعۋشىسى جوق قويلارداي ازىپ-توزعان، بەيشارا كۇيدە» ەكەنىن كوردى. سودان ول نە ىستەدى؟ «ولاردى كوپ نارسەگە ۇيرەتە باستادى» (ماتاي 9:36؛ مارقا 6:34 وقىڭىز). ال پارىزشىلدار بولسا، كەرىسىنشە، جاناشىرلىقتان جۇرداي ەدى جانە حالىققا كومەكتەسكىسى كەلمەيتىن (ماتاي 12:9—14؛ 23:4؛ جوحان 7:49). ال سىزدە يسا سياقتى، ادامدارعا كومەكتەسىپ، ەحوبا جايلى ۇيرەتۋگە دەگەن ىستىق ىقىلاس بار ما؟
10، 11. جاناشىرلىق تانىتۋ ٵرقاشان ورىندى ما؟ ٴتۇسىندىرىڭىز.
10 ٴبىراق بۇل جاناشىرلىق تانىتۋ ٵرقاشان ورىندى بولادى دەگەندى بىلدىرمەيدى. مىسالى، ساۋل پاتشا قۇداي حالقىنىڭ جاۋى بولعان امالەكتىڭ پاتشاسى اگاگتى ولتىرمەۋىمەن جاناشىرلىق تانىتتىم دەپ ويلاعان بولۋى كەرەك. سونداي-اق ول امالەكتىكتەردىڭ بار مالىن جويمادى. الايدا ەحوبا وعان امالەكتىكتەردىڭ ٴبارىن مالدارىمەن قوسا تۇگەل جويىپ جىبەر دەگەن بولاتىن. ساۋلدىڭ تىلازارلىعىنىڭ كەسىرىنەن ەحوبا ودان پاتشا رەتىندە باس تارتتى (سامۋيلدىڭ 1-جازباسى 15:3، 9، 15). ەحوبا — ٵدىل تورەشى. ول ادامنىڭ جۇرەگىندە نە بارىن كورە الادى، سوندىقتان قاي كەزدە جاناشىرلىق تانىتپاۋ كەرەكتىگىن بىلەدى (ەرەميانىڭ زارى 2:17؛ ەزەكيەل 5:11). جاقىن ارادا ول وزىنە مويىنسۇنۋدان باس تارتاتىنداردى سوتتايتىن بولادى (سالونيكالىقتارعا 2-حات 1:6—10). بۇل ەحوبا ٷشىن زۇلىمدارعا جاناشىرلىق تانىتاتىن ۋاقىت بولمايدى. ٴبىراق زۇلىمداردى جويىپ، ٵدىل ادامداردى قۇتقارىپ قالۋىمەن ول ادىلدەرگە جاناشىرلىق تانىتادى.
11 ادامداردىڭ قايسىسى ٶمىر ٴسۇرۋى نە جويىلۋى كەرەكتىگىن ايتىپ سوتتاۋ ٴبىزدىڭ قۇزىرىمىزدا ەمەس. قايتا، ٴبىز ادامدارعا كومەكتەسۋ ٷشىن قولدان كەلگەننىڭ ٴبارىن ىستەيمىز. ولاي بولسا، باسقالارعا جاناشىرلىقتى ٸس جۇزىندە قالاي تانىتا الامىز؟ قازىر مۇنىڭ بىرنەشە جولىن قاراستىرايىق.
جاناشىرلىق تانىتۋدىڭ جولدارى
12. باسقالارمەن قارىم-قاتىناسىمىزدا قالاي جاناشىرلىق تانىتا الامىز؟
12 كۇندەلىكتى ومىردە كومەكتەسۋگە دايىن بولىڭىز. ەحوبا ماسىحشىلەردەن باسقا ادامدارعا جانە باۋىرلاستارعا جاناشىرلىق تانىتۋدى تالاپ ەتەدى (جوحان 13:34، 35؛ پەتىردىڭ 1-حاتى 3:8). جاناشىرلىق ٴسوزىنىڭ ٴبىر ماعىناسى «بىرگە قايعىرۋ» دەگەندى بىلدىرەدى. دەمەك، جاناشىر ادام قينالىپ جۇرگەن ادامداردىڭ جۇگىن جەڭىلدەتۋگە تىرىسادى. سول سەبەپتى باسقالارعا كومەك قولىن ۇسىنۋدىڭ مۇمكىندىگىن ىزدەۋىمىز كەرەك. بالكىم، وزگەلەرگە ٷي شارۋالارىنا كومەكتەسۋدى نە قاجەتتى جەرگە بارىپ-كەلۋدى ۇسىناتىن شىعارمىز (ماتاي 7:12).
وزگەلەرگە ٸس جۇزىندە كومەكتەسۋ ارقىلى جاناشىرلىق كورسەتىڭىز (12-ابزاستى قاراڭىز)
13. قۇداي حالقى تابيعي اپاتتان كەيىن نە ىستەيدى؟
13 تابيعي اپاتتان زارداپ شەككەندەرگە كومەكتەسىڭىز. تابيعي اپاتتان قينالىپ جۇرگەن ادامداردى كورگەندە، ولارعا جاناشىرلىق تانىتقىمىز كەلەدى. ەحوبانىڭ حالقى وسىنداي كەزدەرى كومەككە كەلۋلەرىمەن ەرەكشە تانىمال (پەتىردىڭ 1-حاتى 2:17). مىسالعا، ٴبىر ايەل باۋىرلاس جاپونياداعى 2011-جىلعى جەرسىلكىنىسى مەن تەڭىز شايقالۋىنان زارداپ شەككەن ايماقتا تۇرعان. ول جاپونيانىڭ ٵر جەرىنەن جانە باسقا ەلدەردەن ۇيلەر مەن پاتشالىق سارايلارىن جوندەۋگە كەلگەن ەرىكتى قىزمەتشىلەردى كورگەندە، «قاتتى جىگەرلەنىپ، جۇبانىپ قالعانىن» ايتتى. سونداي-اق ول بىلاي دەدى: «بۇل جاعدايدان كەيىن مەن ەحوبانىڭ ٴبىزدىڭ قامىمىزدى ويلايتىنىن كوردىم. كۋاگەرلەر ٴبىر-ٴبىرى ٷشىن قام جەيدى. دۇنيەنىڭ ٴتورت بۇرىشىنداعى كوپ باۋىرلاستار ٴبىز ٷشىن دۇعا ەتۋدە».
14. ناۋقاستار مەن قاريالارعا قالاي كومەكتەسە الاسىز؟
14 ناۋقاس جانە قاريا ادامدارعا جاردەمدەسىڭىز. ادامداردىڭ اۋرۋ مەن قارتتىقتىڭ كەسىرىنەن قاسىرەت شەگىپ جاتقانىن كورگەندە، جانىمىز اشىماي قويمايدى. بۇل قيىندىقتاردىڭ جوق بولعانىن اسىعا كۇتكەندىكتەن، قۇداي پاتشالىعى كەلسىن دەپ دۇعا ەتەمىز. سول ۋاقىت كەلگەنشە، قارت ٵرى ناۋقاس كىسىلەرگە جاردەم بەرۋ ٷشىن قولدان كەلگەننىڭ ٴبارىن جاسايمىز. ٴبىر جازۋشى السگەيمەر دەرتىمەن اۋىراتىن قارت اناسىمەن بولعان وقيعانى جازدى. ٴبىر كۇنى ونىڭ اناسى كيىمىن بىلعاپ قويادى. ٶزىن رەتكە كەلتىرەمىن دەپ قينالىپ جاتقاندا، ەسىكتىڭ قوڭىراۋى شالىنادى. بۇل وعان ادەتتە كەلىپ تۇراتىن ەكى ەحوبا كۋاگەرى ەكەن. ايەل باۋىرلاستار ٶز كومەگىن ۇسىنادى. سوندا ول كىسى: «ىڭعايسىزدانىپ تۇرمىن، ٴبىراق كومەكتەرىڭ قاجەت-اق»،— دەيدى. ايەل باۋىرلاستار وعان كيىمىن جۋىپ-تازالاۋعا كومەكتەسەدى. كەيىن شاي قويىپ، ٴبارى وتىرىپ اڭگىمە-دۇكەن قۇرادى. سول ايەلدىڭ ۇلى بۇعان قاتتى ريزا بولىپ، كۋاگەرلەردىڭ «ىستەرى سوزدەرىنە ساي» ەكەنىن ايتتى. ٴسىزدىڭ دە ناۋقاستار مەن قارتتارعا دەگەن جاناشىرلىعىڭىز ولارعا قولىڭىزدان كەلگەنشە كومەكتەسۋگە تالپىندىرا ما؟ (فىلىپىلىكتەرگە 2:3، 4).
15. ۋاعىزداۋ ٸسىمىز وزگەلەرگە قاي جاعىنان كومەك بولىپ تابىلادى؟
15 ادامدارعا ەحوبانى تانىپ-بىلۋگە كومەكتەسىڭىز. ادامدارعا كومەكتەسۋدىڭ ەڭ جاقسى جولى — ولارعا قۇداي مەن ونىڭ پاتشالىعى جايلى ٴتالىم بەرۋ. تاعى ٴبىر جولى — ولاردىڭ ەحوبانىڭ نورمالارىنا مويىنسۇنعانى نەلىكتەن وزدەرىنە پايدالى ەكەنىن تۇسىنۋگە كومەكتەسۋ (يشايا 48:17، 18). ٴيا، ۋاعىزداۋ قىزمەتى — ەحوبانى ماداقتاۋدىڭ جانە وزگەلەرگە جاناشىرلىق كورسەتۋدىڭ كەرەمەت جولى. ٴسىز قىزمەتكە كوبىرەك اتسالىسا الاسىز با؟ (تىموتەگە 1-حات 2:3، 4).
جاناشىرلىقتىڭ وزىڭىزگە دە پايداسى بار!
16. جاناشىر بولعاننىڭ قانداي پايداسىن كورەمىز؟
16 پسيحيكالىق دەنساۋلىق سالاسىنىڭ ماماندارىنىڭ ايتۋىنشا، جاناشىرلىق كورسەتكەنى ادامنىڭ دەنساۋلىعىنا جانە اينالاسىنداعىلارمەن قارىم-قاتىناسىنا يگى اسەر ەتەدى. قينالعان جاندارعا كومەكتەسكەندە ٶزىڭىزدى باقىتتىراق سەزىنەسىز، وڭ كوزقاراس ساقتايسىز، جالعىزسىرامايسىز جانە جامان سەزىمدەرگە بەرىلە بەرمەيسىز. ٴيا، جاناشىرلىقتىڭ وزىڭىزگە تيگىزەر پايداسى كوپ (ەفەستىكتەرگە 4:31، 32). وزگەلەرگە سۇيىسپەنشىلىكپەن قول ۇشىن بەرۋگە تالپىنعاندا، ار-ۇجدانىمىز دا تازا بولادى، سەبەبى ەحوبا قالايتىن نارسەنى ىستەپ جاتقانىمىزدى بىلەمىز. جاناشىرلىق بىزگە جاقسى اتا-انا، جاقسى جۇباي جانە جاقسى دوس بولۋعا كومەكتەسەدى. وعان قوسا، جاناشىر ادامعا، ادەتتە، باسقالار دا قاجەت كەزدە كومەكتەسۋگە دايىن تۇرادى (ماتاي 5:7؛ لۇقا 6:38 وقىڭىز).
17. ٴسىز نەلىكتەن جاناشىر بولعىڭىز كەلەدى؟
17 جاناشىرلىق وزىمىزگە پايدالى بولعانمەن، جاناشىر بولۋىمىزدىڭ باستى سەبەبى — ٴبىز ەحوباعا ۇقساعىمىز كەلەدى جانە ونى داڭقتاۋدى قالايمىز. قۇداي — جاناشىرلىق پەن سۇيىسپەنشىلىكتىڭ قاينار كوزى (ناقىل سوزدەر 14:31). ول بىزگە ەڭ كەرەمەت ۇلگى كورسەتەدى. ەندەشە، جاناشىر بولۋ ارقىلى قۇدايعا بارىنشا ەلىكتەيىك. سوندا اياۋلى باۋىرلاستارىمىزعا جاقىنداي تۇسەمىز جانە اينالامىزداعى ادامدارمەن دە اراقاتىناسىمىز اناعۇرلىم جاقسى بولادى (عالاتتىقتارعا 6:10؛ جوحاننىڭ 1-حاتى 4:16).
a ەسىمى وزگەرتىلگەن.