«ٵرتۇرلى ادامدارعا» جاناشىرلىق تانىتايىق
يسا شاكىرتتەرىنە قالاي ۋاعىزداۋ كەرەكتىگىن ۇيرەتكەندە، ادامداردىڭ ٴبارى بىردەي تىڭداي بەرمەيتىنىن ەسكەرتكەن (لۇقا 10:3، 5، 6). بۇگىندە دە ادامداردىڭ ٴبارى بىردەي حابارىمىزعا قۇلاق اسا بەرمەيدى. قىزمەتتە كەزىكتىرەتىن كەيبىر ادامدار دورەكىلىك تانىتسا، كەيبىرى ٴتىپتى اشۋعا مىنەدى. وسىنداي كەزدەرى ادامعا جاناشىرلىق تانىتۋ قيىنعا سوعىپ، ۋاعىزداۋعا دەگەن ىقىلاسىمىز سۋ سەپكەندەي باسىلاتىن شىعار.
جاناشىر ادام وزگەلەردىڭ قاجەتتىلىكتەرى مەن قيىندىقتارىن كورە بىلەدى جانە ولاردى اياپ، كومەكتەسكىسى كەلەدى. قىزمەتتە كەزىكتىرەتىن ادامدارعا جاناشىرلىق تانىتپاساق، نە بولادى؟ قۇلشىنىسىمىز جوعالادى، ياعني ۋاعىزداۋعا دەگەن ىقىلاسىمىز باسەڭدەيدى. ٴسۇيتىپ، ادامدارعا كومەكتەسۋدەن قالامىز. بويىمىزداعى قۇلشىنىستى وتپەن تەڭەۋگە بولادى. وت لاۋلاپ جانۋ ٷشىن كوپ وتىن كەرەك. سول سياقتى، قۇلشىنىسىمىزدى جالىنداتۋ ٷشىن جاناشىر بولۋىمىز قاجەت (سالونيكالىقتارعا 1-حات 5:19).
ٴتىپتى قيىن كەزدىڭ وزىندە كوبىرەك جاناشىرلىق تانىتۋدى قالاي ۇيرەنسەك بولادى؟ وسى ورايدا ەحوبا مەن يسادان جانە ەلشى پاۋىلدان ۇلگى الا الامىز.
ەحوبانىڭ جاناشىرلىعىنا ەلىكتەيىك
مىڭداعان جىلدار بويى ادامدار ەحوبا جايلى قىپ-قىزىل وتىرىك ايتىپ كەلەدى. ٴبىراق ەحوبا سوندا دا «العىستى بىلمەيتىندەرگە دە، زۇلىمدارعا دا مەيىرىم كورسەتەدى» (لۇقا 6:35). قالاي؟ ول ٵربىر ادامعا شىداممەن قارايدى. ەحوبا «ٵرتۇرلى ادامدار» قۇتقارىلسا ەكەن دەيدى (تىموتەگە 1-حات 2:3، 4). ەحوبا زۇلىمدىقتى جەك كورسە دە، ادامدار ول ٷشىن باعالى بولىپ قالا بەرەدى، ٵرى ولاردىڭ ەشقايسىسىنىڭ ولگەنىن قالامايدى (پەتىردىڭ 2-حاتى 3:9).
شايتاننىڭ ادامداردى وتىرىككە يلاندىرۋعا قاس شەبەر ەكەنىن ەحوبا جاقسى بىلەدى (قورىنتتىقتارعا 2-حات 4:3، 4). كوپ ادام بالا كۇنىنەن قۇداي جايلى وتىرىك ەستىپ وسكەن. سوندىقتان شىندىقتى قابىلداۋعا ولاردىڭ وي-سەزىمدەرى جول بەرمەيدى. ٴبىراق ەحوبا ولارعا قاتتى كومەكتەسكىسى كەلەدى. مۇنى قايدان بىلەمىز؟
مىسال ٷشىن نينەۆيا قالاسىنداعى ادامدارعا ەحوبانىڭ قالاي قاراعانىن ەسكە تۇسىرەيىك. ولار وتە قاتىگەز حالىق بولسا دا، ەحوبا جۇنىسكە بىلاي دەگەن: «نينەۆيادا... وڭى مەن سولىن ايىرا المايتىن 120 000-نان استام حالىق بار. ەندەشە وسى ۇلى قالانى مەن قالاي ايامايمىن؟!» (ٴجۇنىس 4:11). ٶزى جايلى شىندىقتى بىلمەگەن سول حالىققا ەحوبانىڭ جانى اشىدى. سوندىقتان ولاردى ەسكەرتسىن دەپ ٴجۇنىستى جىبەردى.
ٴبىز دە ادامدارعا ەحوبا سياقتى قارايمىز. ادامدار وتە باعالى. ٴتىپتى شىندىقتى قابىلدامايتىنداي كورىنسە دە، ەحوباعا ەلىكتەپ، ولارعا قۇداي جايلى بىلۋگە كومەكتەسۋگە دايىنبىز.
يسانىڭ جاناشىرلىعىنا ەلىكتەيىك
اكەسى سياقتى، يسا دا ادامدارعا جانى اشىعان، «ويتكەنى ولار باعۋشىسى جوق قويلارداي ازىپ-توزعان، بەيشارا كۇيدە ەدى» (ماتاي 9:36). يسا ولاردىڭ نەگە ونداي كۇيدە ەكەنىن تۇسىنگەن. ولارعا ٴدىني جەتەكشىلەر جامان قارايتىن، ٵرى جالعان ىلىمگە ۇيرەتەتىن. يسا ٶزىن تىڭداۋعا كەلگەن ادامداردىڭ كوبىسى ٵرتۇرلى سەبەپتەرمەن ٸزباسارى بولمايتىنىن بىلسە دە، ولارعا كوپ ٴتالىم بەردى (مارقا 4:1—9).
الدەكىم العاشىندا تىڭداماسا، كوڭىلىڭىز تۇسپەسىن
جاعدايى وزگەرگەندە ادام شىندىققا باسقاشا قاراۋى مۇمكىن
ادامدار ۋاعىزداپ جۇرگەن حابارىمىزدى قابىلداماعاندا، ولاردىڭ نەلىكتەن بۇلاي ەتەتىنىن تۇسىنۋگە تىرىسۋىمىز كەرەك. ولاردا كيەلى كىتاپ نەمەسە ٴماسىحشىلەر جايلى جامان پىكىر قالىپتاسقان شىعار. بالكىم، ولار ٴماسىحشىمىز دەي تۇرا، جامان ىستەرمەن اينالىساتىن ادامداردى كورگەن بولار. يا بولماسا كەيبىرى ىلىمدەرىمىز جايلى جالعان سوزدەر ەستىگەن شىعار. بىرەۋلەر ٴتىپتى بىزبەن سويلەسكەن جاعدايدا تۋىستارى مەن تانىستارى كەلەكە-مازاق ەتەدى دەپ قورقۋى مۇمكىن.
ٴبىز كەزىكتىرەتىن ادامداردىڭ كەيبىرى قايعىلى جاعدايلاردى باستان كەشكەن بولۋى مۇمكىن. ميسسيونەر بولىپ قىزمەت ەتەتىن كيم باۋىرلاستىڭ ايتۋىنشا، ول قىزمەت ەتەتىن ايماقتا ادامدار سوعىستىڭ كەسىرىنەن بارلارىنان ايىرىلعان. ولاردىڭ بولاشاققا دەگەن ەشقانداي ۇمىتتەرى جوق ەكەن. ابدەن كوڭىلى قالعان ولار ەشكىمگە سەنبەيدى. بۇل ايماقتاعى ادامدار ٴجيى كۋاگەرلەردىڭ ۋاعىز ٸسىن توقتاتۋعا تىرىسادى. ٴتىپتى بىردە ۋاعىزدا جۇرگەندە كيم باۋىرلاسقا قاتتى كۇش كورسەتىلگەن.
وعان ادامداردىڭ قارسىلىق كورسەتكەنىنە قاراماستان، جاناشىرلىق تانىتا بەرۋگە نە كومەكتەسەدى؟ ول ناقىل سوزدەر 19:11-دەگى: «تەرەڭ تۇسىنىك ادامدى اشۋعا باياۋ ەتەر»،— دەگەن سوزدەردى ۇنەمى ەستە ۇستاۋعا تىرىسادى. اۋماعىنداعى ادامداردىڭ قانداي جايتتى باستان كەشكەندەرى جايلى ويلاعانى وعان جاناشىرلىق تانىتۋعا كومەكتەسەدى. ول كەزىكتىرەتىن ادامداردىڭ ٴبارى بىردەي قارسىلىق كورسەتپەيدى. بۇل اۋماقتا ونى جاقسى تىڭدايتىن ادامدار بار.
بىلاي دەپ ويلانىپ كورسەك بولادى: «ەگەر شىندىقتى بىلمەگەنىمدە، ماعان كەلگەن ەحوبا كۋاگەرلەرىنە قالاي قارار ەدىم؟ كۋاگەرلەر جايلى جالعان اقپارات ەستىگەن بولسام شە؟ بالكىم، مەن دە ولارعا قۇلاق اسپاي، ولاردىڭ جاناشىرلىق تانىتقانىنا مۇقتاج بولار ما ەدىم؟!» يسا باسقالار وزىمىزگە قالاي قاراسىن دەسەك، ٴبىز دە ولارعا سولاي قاراۋىمىز كەرەكتىگىن ايتقان. سوندىقتان ٴتىپتى وڭايعا سوقپاسا دا، وزگەلەردىڭ وي-سەزىمىن تۇسىنۋگە تىرىسىپ، شىدامدى بولۋىمىز قاجەت (ماتاي 7:12).
پاۋىلدىڭ جاناشىرلىعىنا ەلىكتەيىك
ەلشى پاۋىل ۋاعىزداعانى ٷشىن قاتىگەزدىك كورسەتكەن ادامدارعا دا جاناشىرلىق تانىتقان. نە سەبەپتى؟ ويتكەنى كەزىندە وزىنىڭ دە قانداي بولعانىن ەستە تۇتتى. پاۋىل ٶزى جايلى: «بۇرىن قۇدايعا ٴتىل تيگىزۋشى، قۋدالاۋشى، ارسىز بولسام دا،.. ماعان مەيىرىمدىلىك كورسەتىلدى، سەبەبى مەن سەنىمىم بولماعاندىقتان بىلمەستىكپەن وسىلاي ارەكەت ەتتىم»،— دەگەن (تىموتەگە 1-حات 1:13). پاۋىل ەحوبا مەن يسا وزىنە زور مەيىرىمدىلىك تانىتقانىن بىلگەن. ول ۋاعىزعا قارسىلىق كورسەتەتىن ادامداردى تۇسىنگەن. ويتكەنى بۇرىن ٶزى دە سونداي ادامداردىڭ قاتارىنان بولعان.
كەيدە پاۋىل جالعان ىلىمدەردى قاتتى ۇستاناتىن ادامداردى جولىقتىرعان. بۇل وعان قالاي اسەر ەتكەن؟ ەلشىلەردىڭ ىستەرى 17:16-دا پاۋىلدىڭ افينادا بولعاندا، «قالانىڭ پۇتتارعا تولى ەكەنىن كورىپ، قاتتى اشىنعانى» ايتىلعان. ٴبىراق ول ٴدال وسى تاقىرىپتى تىلگە تيەك ەتىپ، ادامدارعا كۋالىك بەرگەن (ەلشىلەردىڭ ىستەرى 17:22، 23). «ەڭ بولماسا، كەيبىرەۋىن قۇتقارۋ ٷشىن قولدان كەلگەننىڭ ٴبارىن ىستەدىم»،— دەگەن ول ۋاعىزداۋ ٵدىسىن وزگەرتىپ، ٵرتۇرلى ورتادان شىققان ادامدارعا ۋاعىزىن بەيىمدەگەن (قورىنتتىقتارعا 1-حات 9:20—23).
حابارىمىزدى تىڭدامايتىن نە جالعان ىلىمدەرگە سەنەتىن ادامدارعا ۋاعىزداعان كەزدە، پاۋىلدان ۇلگى الۋعا بولادى. مۇنداي ادامدار جايلى بىلەتىنىمىزگە سۇيەنە وتىرىپ، ولارعا «جاقسىلىق جونىندە حاباردى» جەتكىزە الامىز (يشايا 52:7). دوروتي ەسىمدى باۋىرلاس بىلاي دەيدى: «ٴبىزدىڭ اۋماعىمىزداعى ادامداردىڭ كوبىسى «قۇداي تاس جۇرەك، ٵرى سوتتاۋعا دايىن تۇرادى» دەپ ويلايدى. مەن مۇنداي ادامداردى قۇدايعا دەگەن بەرىك سەنىمى ٷشىن ماقتاپ، كەيىن ەحوبانىڭ سۇيىسپەنشىلىگى مەن ونىڭ بولاشاققا قاتىستى ۋادەلەرى جايلى كيەلى كىتاپتا نە دەلىنگەنىنە نازار اۋدارامىن».
«جاماندىقتى ٵردايىم جاقسىلىقپەن جەڭىپشىق!»
وسى زاماننىڭ اقىرى جاقىنداعان سايىن، كەيبىر ادامداردىڭ كوزقاراستارى «بۇرىنعىدان بەتەر» جامان بولا تۇسپەك (تىموتەگە 2-حات 3:1، 13). ٴبىراق ادامداردىڭ ۋاعىزىمىزعا قالاي قارايتىنى ٴبىزدى جاناشىرلىق پەن قۋانىشتان ايىرماۋ كەرەك. ەحوبا بىزگە جاماندىقتى «ٵردايىم جاقسىلىقپەن جەڭىپ شىعۋعا» كۇش بەرەدى (ريمدىكتەرگە 12:21). جەسسيكا ەسىمدى ٸزاشار باۋىرلاس كۋاگەرلەر مەن ىزگى حاباردى مازاق ەتەتىن وركوكىرەك ادامداردى ٴجيى كەزىكتىرەدى ەكەن. ول بىلاي دەيدى: «بۇل كەيدە كوڭىلىمدى تۇسىرەدى. ٴبىراق بىرەۋمەن اڭگىمە باستاعاندا، ىشتەي ەحوباعا دۇعا ايتىپ الىپ، ٶزى سول ادامعا قالاي قاراسا، ماعان دا سولاي قاراۋعا كومەكتەسۋىن سۇرايمىن». وسىنىڭ ارقاسىندا جەسسيكا ٶز سەزىمدەرىنە قادالىپ قالماي، ادامعا قالاي كومەكتەسۋگە بولاتىنىن ويلايدى.
ٴبىز شىندىقتى تاپقىسى كەلەتىندەردى ىزدەۋدەن تالمايمىز
ۋاقىت وتە كەي ادامدار كومەگىمىزدى قابىلداپ، شىندىقتى ٴبىلۋى مۇمكىن
ٴبىز وزىمىزبەن بىرگە ۋاعىزداپ جۇرگەن باۋىرلاستاردى دا جىگەرلەندىرۋگە تىرىسۋىمىز قاجەت. دجەسسيكا باۋىرلاستارمەن قىزمەتتە جۇرگەن كەزدە بىرەۋلەر قارسىلىق كورسەتسە، بۇعان ٴمان بەرمەيتىنىن ايتادى. مۇنىڭ ورنىنا، ول جاقسى نارسەلەر تۋرالى، مىسالى، تىڭداماعان ادامدار بولعانىنا قاراماستان، ۋاعىزدىڭ جاقسى ناتيجەلەرى بولىپ جاتقانى جايلى ايتىپ بەرەدى ەكەن.
كەي كەزدەرى ۋاعىزداۋ بىزگە قيىنعا سوعاتىنىن ەحوبا جاقسى بىلەدى. ٴبىراق ٶزى سياقتى مەيىرىمدىلىك تانىتقانىمىزدى كورگەندە، ول قاتتى قۋانادى! (لۇقا 6:36). ارينە، ەحوبانىڭ بۇل دۇنيەگە تانىتىپ جاتقان جاناشىرلىعى مەن شىدامدىلىعى ماڭگىلىككە جالعاسپايدى. وسى دۇنيەنى قاشان جوياتىنىن ول ناقتى بىلەتىنىنە سەنىمدى بولا الامىز. سول ۋاقىت كەلگەنشە، ٴبىزدىڭ ۋاعىز ٸسىمىز شۇعىل ٸس بولىپ قالا بەرەدى (تىموتەگە 2-حات 4:2). ەندەشە، ٵرى قاراي دا قۇلشىنا ۋاعىزداپ، «ٵرتۇرلى ادامدارعا» شىن جۇرەكتەن جاناشىرلىق تانىتايىق!