«ٴبىر-ٴبىرىمىزدى... ٸس جۇزىندە ٵرى شىن جۇرەكتەن سۇيەيىك»
«ٴبىر-ٴبىرىمىزدى ٴسوز جۇزىندە نە اۋىزبەن عانا ەمەس، ٸس جۇزىندە ٵرى شىن جۇرەكتەن سۇيەيىك» (جوحاننىڭ 1-حاتى 3:18).
اندەر: 72، 124
1. سۇيىسپەنشىلىكتىڭ ەڭ اسقاق ٴتۇرى قانداي جانە ٴسىز ونى قالاي سيپاتتار ەدىڭىز؟ (ماقالانىڭ باسىنداعى سۋرەتتى قاراڭىز.)
ەحوبا — سۇيىسپەنشىلىكتىڭ قاينارى (جوحاننىڭ 1-حاتى 4:7). سۇيىسپەنشىلىكتىڭ ەڭ اسقاق ٴتۇرى ٵدىل پرينسيپتەرگە نەگىزدەلگەن. كيەلى كىتاپتا سۇيىسپەنشىلىكتىڭ بۇل ٴتۇرى گرەكشە «اگاپي» دەپ اتالادى. بۇل ٴسوزدىڭ ماعىناسىنا الدەكىمدى جاقىن تارتۋ، وعان دەگەن ىستىق سەزىم دە كىرەدى. ٴبىراق بۇل جاي سەزىممەن عانا شەكتەلمەيدى. ادامنىڭ مۇنداي سۇيىسپەنشىلىگى ٶز پايداسىن كوزدەمەي، وزگەنىڭ يگىلىگى ٷشىن رياسىزدىقپەن ارەكەت ەتكەنىنەن كورىنەدى. وسىنداي سۇيىسپەنشىلىكتىڭ ارقاسىندا ول ادامدارعا جاقسىلىق جاساۋعا تالپىنادى. سۇيىسپەنشىلىكتىڭ بۇل ٴتۇرى ٴبىزدى قۋانىشقا بولەپ، ٶمىرىمىزگە ٴمان بەرەدى.
2، 3. ەحوبا ادامزاتقا رياسىز سۇيىسپەنشىلىگىن قالاي كورسەتتى؟
2 ەحوبا ادام مەن حاۋانى جاراتپاي تۇرىپ-اق، ادامزاتقا سۇيىسپەنشىلىك كورسەتكەن. ول جەردى تىرشىلىككە قاجەتتىنىڭ بارىمەن تولتىرىپ جاراتتى. ٴبىراق ەحوبا جەردى جاي عانا تىرشىلىك ەتەتىن ورىن ەمەس، ٶمىردىڭ راقاتىن كورۋگە مۇمكىندىك بەرەتىن باسپانا ەتتى. ەحوبا بۇنى ٶزى ٷشىن ەمەس، ٴبىز ٷشىن ىستەدى. باسپانامىز دايىن بولعاندا، ول ادام بالاسىن جاراتىپ، وعان جۇماق ورناعان جەردە ماڭگى ٶمىر ٴسۇرۋ مۇمكىندىگىن سىيلادى.
3 كەيىنىرەك ەحوبا ادامزاتقا ەڭ كەرەمەت جولمەن رياسىز سۇيىسپەنشىلىك تانىتتى. ادام مەن حاۋا قارسى شىقسا دا، ەحوبا ولاردىڭ ٷرىم-بۇتاعىنان تارايتىن كەيبىر ادامداردىڭ ٶزىن جاقسى كورەتىنىنە نىق سەنىمدى بولدى. سوندىقتان ولاردى امان الىپ قالۋ ٷشىن ٶز ۇلىن تولەم قۇرباندىعى ەتىپ بەرۋدىڭ قامىن جاسادى (مۇسانىڭ 1-جازباسى 3:15؛ جوحاننىڭ 1-حاتى 4:10). تولەم ۋادە ەتىلگەن ساتتەن باستاپ ەحوبا ونى تولەنىپ قويىلعانداي قاراستىردى. ارادا 4000 جىل وتكەن سوڭ، ول جالعىز ۇلىن ادامزات ٷشىن قيدى (جوحان 3:16). ەحوبانىڭ وسىنداي سۇيىسپەنشىلىگى ٷشىن العىسىمىز شەكسىز!
وڭاي بولماسا دا، سۇيىسپەنشىلىك تانىتىڭىز
4. كەمەلسىز ادامداردىڭ رياسىز سۇيىسپەنشىلىك تانىتا الاتىنىن قايدان بىلەمىز؟
4 كەمەلسىز بولساق تا، ٴبىز رياسىز سۇيىسپەنشىلىك تانىتا الامىز با؟ ٴيا، تانىتا الامىز. ويتكەنى ەحوبا ٴبىزدى وزىنە ۇقساس ەتىپ جاراتتى، ياعني وزىنە ەلىكتەي الاتىنداي قابىلەتپەن جاراتتى. ارينە، كەيدە رياسىز سۇيىسپەنشىلىك تانىتۋ وڭاي بولماسا دا، بۇل قولىمىزدان كەلەدى. مىسالى، ٵبىل وزىندە بار ەڭ جاقسىنى رياسىز كوڭىلمەن قۇدايعا تارتۋ ەتكەندە، ول سۇيىسپەنشىلىك تانىتتى (مۇسانىڭ 1-جازباسى 4:3، 4). نۇحتى ادامدار تىڭداماسا دا، ول قۇداي حابارىن جىلدار بويى تالماي ۋاعىزداۋىمەن رياسىز سۇيىسپەنشىلىك تانىتتى (پەتىردىڭ 2-حاتى 2:5). ىبىرايىم سۇيىكتى بالاسى ىسقاقتى قۇرباندىققا شالۋعا دايىن بولۋىمەن قۇدايعا دەگەن سۇيىسپەنشىلىگى وتە مىقتى ەكەنىن كورسەتتى (جاقىپ 2:21). وسى ادال كىسىلەر ىسپەتتى ٴبىز دە، وڭاي بولماسا دا، سۇيىسپەنشىلىك تانىتقىمىز كەلەدى.
شىنايى سۇيىسپەنشىلىك نەنى بىلدىرەدى؟
5. شىنايى سۇيىسپەنشىلىكتى قالاي تانىتا الامىز؟
5 كيەلى كىتاپتا شىنايى سۇيىسپەنشىلىكتى «ٴسوز جۇزىندە نە اۋىزبەن عانا ەمەس، ٸس جۇزىندە ٵرى شىن جۇرەكتەن» تانىتۋ كەرەكتىگى ايتىلعان (جوحاننىڭ 1-حاتى 3:18). ارينە، سۇيىسپەنشىلىگىمىزدى سوزبەن بىلدىرە الامىز (سالونيكالىقتارعا 1-حات 4:18). ٴبىراق كەيدە «مەن سەنى جاقسى كورەمىن» دەپ ايتا سالۋ جەتكىلىكسىز. ٴبىز سول سوزدەردىڭ راستىعىن ٸس جۇزىندە كورسەتۋىمىز قاجەت. مىسالى، باۋىرلاستارىمىزدىڭ ىشەر اسى مەن كيەر كيىمى بولماي قالسا، ولار ٷشىن قۇر جىلى سوزدەر ازدىق بولادى (جاقىپ 2:15، 16). سونداي-اق ەحوبانى جانە ادامداردى جاقسى كورگەندىكتەن، ٴبىز ۋاعىزدايتىن ادامداردىڭ كوپ بولۋىن سۇراپ دۇعا ەتىپ قانا قويمايمىز، ٶزىمىز دە جان سالا ۋاعىز ىسىنە قاتىناسامىز (ماتاي 9:38).
6، 7. ا) «شىنايى سۇيىسپەنشىلىك» دەگەن نە؟ ٵ) جاساندى سۇيىسپەنشىلىكتىڭ كەيبىر مىسالدارى قانداي؟
6 ەلشى جوحاننىڭ سوزدەرىنە ساي، ٴبىز ٴبىر-ٴبىرىمىزدى «ٸس جۇزىندە ٵرى شىن جۇرەكتەن ٴسۇيۋىمىز» كەرەك. سوندىقتان ٴبىزدىڭ سۇيىسپەنشىلىگىمىز «ەكىجۇزدى» ەمەس، «شىنايى» بولۋى ٴتيىس (ريمدىكتەرگە 12:9 سىلتەمە؛ قورىنتتىقتارعا 2-حات 6:6). كەيدە ادام سۇيىسپەنشىلىك تانىتىپ جاتقانداي سىڭاي ٴبىلدىرۋى مۇمكىن. ٴبىراق ونىڭ سۇيىسپەنشىلىگىن شىن جۇرەكتەن شىعىپ جاتىر دەي المايمىز. نيەتى دە كۇماندى. مۇنداي جاساندى سۇيىسپەنشىلىكتىڭ تۇك تە قۇنى جوق. ويتكەنى ەكىجۇزدى سۇيىسپەنشىلىك دەگەن قاسيەت جوق.
7 جاساندى سۇيىسپەنشىلىكتىڭ كەيبىر مىسالدارىن قاراستىرايىقشى. ەدەم باعىندا حاۋامەن سويلەسكەندە، شايتان وعان بار جاقسىنى تىلەيتىندەي بولىپ كورىندى. ٴبىراق شىن مانىندە ول ٶز قارا باسىن ويلاپ، ەكىجۇزدى ارەكەت ەتتى (مۇسانىڭ 1-جازباسى 3:4، 5). ٴداۋىت بيلىك باسىندا وتىرعاندا، احيتوپەل ەسىمدى دوسى بولدى. ٴبىراق ول ٶز پايداسىن ويلاپ، ٴداۋىتتى ساتىپ كەتتى. ونىڭ ٸسى شىنايى دوس بولماعانىن دالەلدەدى (سامۋيلدىڭ 2-جازباسى 15:31). بۇگىندە جولدان تايعاندار مەن قاۋىمعا ىرىتكى سالۋشىلار «مايدا سويلەپ، جاعىمپازدانىپ» جاتادى (ريمدىكتەرگە 16:17، 18). ولار وزگەلەردىڭ قامىن ويلاعانداي سىڭاي تانىتۋى مۇمكىن. ٴبىراق سايىپ كەلگەندە، ولار ٶز قارا باستارىن ويلايدى.
8. قانداي سۇراقتاردى وي ەلەگىنەن وتكىزۋىمىز كەرەك؟
8 جاساندى سۇيىسپەنشىلىك — بارىپ تۇرعان سوراقى نارسە. ويتكەنى مۇنداي سۇيىسپەنشىلىك ادامداردى الداۋ ٷشىن تانىتىلادى. ٴبىز ادامداردى الداي الاتىن شىعارمىز، ٴبىراق ەحوبانى الداۋ مۇمكىن ەمەس. يسا ەكى جۇزدىلىكپەن ارەكەت ەتەتىن ادامداردىڭ «اياۋسىز جازالاناتىنىن» ايتقان (ماتاي 24:51). ەحوبانىڭ قىزمەتشىلەرى رەتىندە ٴبىز ەشقاشان ەكىجۇزدى بولعىمىز كەلمەسى انىق. سوندىقتان كەلەسى سۇراقتاردى وي ەلەگىنەن وتكىزسەك بولادى: «مەنىڭ سۇيىسپەنشىلىگىم شىنايى ما؟ جوق الدە ٶزىمشىل نە الدامپاز بولىپ ٴجۇرمىن بە؟» قازىر ەكىجۇزدى ەمەس، «شىنايى سۇيىسپەنشىلىك» تانىتۋدىڭ توعىز جولىن قاراستىرايىق.
«ٸس جۇزىندە ٵرى شىن جۇرەكتەن ٴسۇيۋدىڭ» جولدارى
9. شىنايى سۇيىسپەنشىلىك ٴبىزدى نە ىستەۋگە تالپىندىرادى؟
9 جاقسىلىعىڭىزدى ەشكىم بايقاماسا دا، باسقالارعا قۋانا قىزمەت ەتىڭىز. ٴبىز باسقالارعا ەشكىم بىلمەيتىندەي ەتىپ جاقسىلىق جاساۋعا ىقىلاستى بولۋىمىز كەرەك (ماتاي 6:1—4 وقىڭىز). اناني مەن ٴزاپيرا مۇنداي كوزقاراستى ۇستانبادى. ولار جاساعان ساداقاسى جايلى وزگەلەر بىلسە ەكەن دەدى ٵرى قانشا بەرگەندەرى جايلى وتىرىك ايتتى. سونداي ەكى جۇزدىلىكتەرى ٷشىن كەيىن جازالاندى (ەلشىلەردىڭ ىستەرى 5:1—10). ٴبىز باۋىرلاستارىمىزدى شىن جاقسى كورسەك، جۇرتتىڭ كوزىنە ٴتۇسۋدى قالاماستان، ولارعا قۋانا-قۋانا جاقسىلىق جاسايمىز. وسى ورايدا باسقارۋشى كەڭەسكە رۋحاني اس-سۋ دايىنداۋعا كومەكتەسەتىن باۋىرلاستاردان ۇيرەنەرىمىز كوپ. ولار وزگەلەردىڭ نازارىن وزدەرىنە اۋدارمايدى جانە قانداي جوبامەن جۇمىس ىستەگەندەرىن وزگەلەرگە ٴمالىم ەتپەيدى.
10. باسقالارعا قالاي قۇرمەت كورسەتە الامىز؟
10 قۇرمەت كورسەتىڭىز (ريمدىكتەرگە 12:10 وقىڭىز). يسا ەلشىلەرىنىڭ اياعىن جۋۋ ارقىلى قۇرمەت كورسەتۋدىڭ تاماشا ۇلگىسىن قالدىردى (جوحان 13:3—5، 12—15). ٴبىز دە يسا سياقتى كىشىپەيىل بولىپ، وزگەلەرگە قىزمەت ەتۋ ٷشىن ايانباي كۇش سالۋىمىز كەرەك. الگى ارەكەتىمەن يسانىڭ نە ۇيرەتكىسى كەلگەنىن ەلشىلەر بىردەن تۇسىنبەسە دە، كيەلى رۋحقا بولەنگەننەن كەيىن مۇنىڭ ٴمانىن ۇقتى (جوحان 13:7). ٴبىز ٶزىمىزدىڭ ٴبىلىمدى نە داۋلەتتى بولعانىمىزعا، مارتەبەلى تاپسىرمالارىمىزدىڭ بارىنا بولا وزگەلەردەن ارتىقپىز دەپ ويلاماساق، باسقالارعا قۇرمەت كورسەتكەنىمىز (ريمدىكتەرگە 12:3). ال بىرەۋدى كوزىمىزشە ماقتاپ جاتسا، قىزعانبايمىز، قايتا، ىشىمىزدەن سول ماقتاۋعا ٴبىز دە لايىقپىز دەپ ويلاساق تا، ونىڭ قۋانىشىنا ورتاقتاسامىز.
11. نەگە ماقتاۋ سوزدەرىمىز شىن كوڭىلدەن شىعۋى كەرەك؟
11 شىن كوڭىلدەن ماقتاڭىز. وزگەلەردى ماقتاۋدىڭ مۇمكىندىكتەرىن ىزدەڭىز. ماقتاۋ ٴسوز ادامدارعا قانات بىتىرەتىنىن ٴبارىمىز دە جاقسى بىلەمىز (ەفەستىكتەرگە 4:29). ٴبىراق ٴبىز ٴسوزدەرىمىزدىڭ شىن جۇرەكتەن شىققانىن قالايمىز، ٵرى باسقالارعا جاعىمپازدانعىمىز كەلمەيدى. ٴبىز شىن مانىندە ايتقىمىز كەلمەگەن نارسەنى ايتپاۋىمىز كەرەك، يا بولماسا قاجەتتى كەڭەستى بەرۋ جاۋاپكەرشىلىگىنەن قاشقاقتامايمىز (ناقىل سوزدەر 29:5). مىسالى، ەگەر ادامدى ماقتاپ الىپ، ٴبىراق سىرتىنان ونى سىناپ-مىنەيتىن بولساق، بۇل ەكىجۇزدىلىككە جاتادى. ەلشى پاۋىل باۋىرلاستاردى شىن جۇرەكتەن سۇيگەن. قورىنتتاعى ماسىحشىلەرگە حات جازعاندا، ول ولاردىڭ جاقسى جاقتارىن ايتىپ ماقتاعان (قورىنتتىقتارعا 1-حات 11:2). ال قاتاڭ كەڭەس بەرۋ كەرەك بولعاندا، مۇنىڭ سەبەبىن ولارعا مەيىرىمدىلىكپەن ٵرى انىق ەتىپ تۇسىندىرگەن (قورىنتتىقتارعا 1-حات 11:20—22).
كومەككە ٴزارۋ كەزدە باۋىرلاستارعا قول ۇشىن بەرۋىمىزبەن سۇيىسپەنشىلىك پەن جومارتتىق كورسەتەمىز (12-ابزاستى قاراڭىز)
12. قوناقجاي بولعاندا شىنايى سۇيىسپەنشىلىكتى قالاي كورسەتە الامىز؟
12 قوناقجاي بولىڭىز. ەحوبا بىزدەن باۋىرلاستارعا جومارت بولۋدى تالاپ ەتەدى (جوحاننىڭ 1-حاتى 3:17 وقىڭىز). ٴبىراق قوناقجاي بولعاندا دا نيەتىمىز دۇرىس بولۋ كەرەك. ٶزىمىزدى بىلاي دەپ تەكسەرىپ كورسەك بولادى: «ۇيىمە تەك جاقىن دوستارىمدى نە قاۋىمدا ٶزىم بەدەلدى دەپ سانايتىن ادامداردى عانا شاقىرامىن با؟ جاقسىلىعىمدى قايتارادى-اۋ دەگەن ادامداردى عانا شاقىرامىن با؟ الدە جاقسى تانىمايتىن نە ەسەسىنە ەشتەڭە قايتارا المايتىن باۋىرلاستارعا قولىم اشىق پا؟» (لۇقا 14:12—14). ال ەگەر باۋىرلاسىمىز اقىلسىز شەشىم قابىلداعاننىڭ سالدارىنان كومەككە مۇقتاج بولىپ قالسا، نە ىستەيمىز؟ يا بولماسا شاقىرعان قوناعىمىز بىزگە ەشقاشان العىس ايتپايتىن بولسا شە؟ مۇنداي كەزدەرى ەحوبا بىزگە بىلاي دەيدى: «ٴبىر-بىرىڭە نارازىلىقسىز قوناقجايلىلىق كورسەتىڭدەر» (پەتىردىڭ 1-حاتى 4:9). قولدا بارىمىزدى تازا نيەتپەن بەرەر بولساق، بۇل وزىمىزگە قۋانىش سىيلايدى (ەلشىلەردىڭ ىستەرى 20:35).
13. ا) قاي كەزدە بىزگە كوبىرەك شىدامدىلىق قاجەت؟ ٵ) السىزدەرگە كومەكتەسۋ ٷشىن نە ىستەي الامىز؟
13 السىزدەردى قولداپ-دەمەڭىز. كيەلى كىتاپتىڭ: «السىزدەردى قولداڭدار، بارلىق ادامدارعا ٴتوزىمدى بولىڭدار»،— دەگەن تالابى ارقىلى سۇيىسپەنشىلىگىمىزدىڭ شىنايىلىعى سىنالادى (سالونيكالىقتارعا 1-حات 5:14). ٴبىر كەزدەرى ٵلسىز بولعان باۋىرلاستار كەيىن سەنىمدەرىندە نىق تۇرعان. كەيبىرەۋلەرى بولسا ٴبىزدىڭ ٴتوزىمدى بولىپ، سۇيىسپەنشىلىكپەن كومەكتەسكەنىمىزگە مۇقتاج. ولارعا قالاي قول ۇشىن بەرسەك بولادى؟ كيەلى كىتاپتى قولدانىپ ولاردى جىگەرلەندىرە الامىز، ۋاعىزعا شاقىرا الامىز نە ولاردى جاي قۇلاق سالىپ تىڭداي الامىز. سونداي-اق باۋىرلاستاردى «كۇشتى» نە «ٵلسىز» دەپ بولە سالماۋىمىز كەرەك. قايتا، ٵرقايسىسىمىزدىڭ دا كۇشتى دە، ٵلسىز دە جاقتارىمىز بار ەكەنىن مويىنداۋىمىز قاجەت. ٴتىپتى ەلشى پاۋىل دا السىزدىكتەرى بار ەكەنىن مويىنداعان (قورىنتتىقتارعا 2-حات 12:9، 10). بارلىعىمىز دا ٶزارا كومەككە، جىگەرگە ٴزارۋمىز.
14. باۋىرلاستارمەن تاتۋ بولۋ ٷشىن نە ىستەۋگە دايار بولۋىمىز كەرەك؟
14 تاتۋ بولىڭىز. باۋىرلاستار اراسىنداعى تاتۋلىق وتە باعالى. ەگەر بىرەۋ ٴبىزدى دۇرىس تۇسىنبەي قالسا نە بولماسا ٴبىزدى رەنجىتىپ قويسا، تاتۋلىق ساقتاۋ ٷشىن بارىمىزدى سالۋىمىز كەرەك (ريمدىكتەرگە 12:17، 18 وقىڭىز). بىرەۋدى رەنجىتىپ قويساق، كەشىرىم سۇراي سالعانىمىز جەتكىلىكتى شىعار. ٴبىراق كەشىرىمدى شىن جۇرەكتەن سۇراۋىمىز قاجەت. مىسالى، «رەنجىمەيسىڭ عوي» دەگەننەن گورى ٶز قاتەمىزدى مويىنداپ، «سەنى سوزىممەن رەنجىتىپ قويعانىم ٷشىن كەشىرشى» دەگەنىمىز ٴجون بولار ەدى. نەكەدە تاتۋلىق ساقتاۋ اسىرەسە ماڭىزدى. كۇيەۋ مەن ايەلى باسقالاردىڭ الدىندا ٴبىر-ٴبىرىن سۇيەتىندەي سىڭاي تانىتىپ، ٴبىراق وڭاشادا ٴبىر-بىرىمەن سويلەسپەي، اۋىر سوزدەر ايتىپ نە ٴتىپتى قول كوتەرگەندەرى دۇرىس ەمەس.
15. شىن جۇرەكتەن كەشىرگەنىمىزدى قالاي كورسەتەمىز؟
15 كەڭپەيىلمەن كەشىرىڭىز. بىرەۋ ٴبىزدىڭ كوڭىلىمىزگە تيسە، ٴبىز ونى كەشىرىپ، رەنىش ساقتامايمىز. ادام ٴبىزدى رەنجىتكەنىن بىلمەسە دە، وسىلاي ەتكەنىمىز ٴجون. «سۇيىسپەنشىلىكپەن ٴبىر-بىرىڭە توزىمدىلىك تانىتىڭدار، ٶزارا تاتۋ بولىپ، كيەلى رۋح ارقىلى يەمدەنگەن بىرلىكتەرىڭدى ساقتاپ قالۋعا بارىنشا ۇمتىلىڭدار»،— دەگەن كەڭەسكە قۇلاق اسساق، وزگەلەردى كەڭپەيىلمەن كەشىرەمىز (ەفەستىكتەرگە 4:2، 3). ادامعا شىن جۇرەكتەن كەشىرىم ەتۋ ٷشىن، ونىڭ جاساعان ارەكەتىن ۇمىتۋىمىز قاجەت. سەبەبى سۇيىسپەنشىلىك «كەك ساقتامايدى» (قورىنتتىقتارعا 1-حات 13:4، 5). ال ەگەر كوڭىلىمىزدىڭ تۇبىندە رەنىش ساقتاپ جۇرسەك، باۋىرلاسپەن عانا ەمەس، ەحوبامەن دە قارىم-قاتىناسىمىزعا قاۋىپ تونەدى (ماتاي 6:14، 15). ٴبىزدى رەنجىتكەن ادام ٷشىن دۇعا ەتسەك، ونى شىن پەيىلمەن كەشىرگەنىمىزدى دالەلدەيمىز (لۇقا 6:27، 28).
16. ەحوباعا دەگەن قىزمەتىمىزدەگى مارتەبەلى جاۋاپكەرشىلىكتەرگە قالاي قاراعانىمىز دۇرىس؟
16 ٶز پايداڭىزدى قۇربان ەتىڭىز. ەگەر ۇيىمدا ارنايى قىزمەتكە تاعايىندالساق، «ٶزىمىزدىڭ ەمەس، وزگەنىڭ يگىلىگىن ويلاۋ» ارقىلى شىنايى سۇيىسپەنشىلىك كورسەتەمىز (قورىنتتىقتارعا 1-حات 10:24). مىسالى، قىزمەت كورسەتۋشىلەر كونگرەسس وتەتىن جەرگە بارىنەن ەرتە كەلەتىندىكتەن، وزدەرىنە نە وتباسىنا ەڭ جاقسى ورىنداردى الىپ قويعىسى كەلەتىن شىعار. الايدا سونداي باۋىرلاستاردىڭ كوبىسى وزدەرىنىڭ قاراۋىنا تاپسىرىلعان بولىكتەردەگى ىڭعايسىزداۋ ورىنداردى الادى. وسىلايشا ولار رياسىز سۇيىسپەنشىلىكتەرىن كورسەتەدى. ولاردى قالاي ۇلگى تۇتا الامىن دەپ ويلايسىز؟
17. باۋىرلاس اۋىر كۇنا جاساعان جاعدايدا، شىنايى سۇيىسپەنشىلىك ونى نە ىستەۋگە تالپىندىرادى؟
17 جاسىرىن كۇنانى مويىنداپ، ودان ارىلۋ. اۋىر كۇنا جاساعان كەيبىر باۋىرلاستار ونى جاسىرۋعا تىرىسقان. ولار ۇيالعاندىقتان نە باسقالاردىڭ كوڭىلىنە قاياۋ تۇسىرگىسى كەلمەگەندىكتەن وسىلاي ەتكەن بولار (ناقىل سوزدەر 28:13). ٴبىراق كۇنانى جاسىرۋ سۇيىسپەنشىلىككە جاتپايدى، ويتكەنى وزىنە دە، باسقالارعا دا زيانىن تيگىزەدى. قالايشا؟ ەحوبا قاۋىمعا كيەلى رۋحىن توكپەي قويۋى مۇمكىن، ال بۇنىڭ ناتيجەسىندە قاۋىمنىڭ تىنىشتىعى بۇزىلادى (ەفەستىكتەرگە 4:30). ەندەشە، اۋىر كۇنا جاساعان بولسا، ٴماسىحشىنىڭ شىنايى سۇيىسپەنشىلىگى ونى اقساقالدارعا بارىپ، قاجەتتى كومەكتى قابىلداۋىنا قوزعاۋ سالادى (جاقىپ 5:14، 15).
18. شىنايى سۇيىسپەنشىلىك قانشالىقتى ماڭىزدى؟
18 سۇيىسپەنشىلىك — بارلىق قاسيەتتەردىڭ ەڭ باستىسى (قورىنتتىقتارعا 1-حات 13:13). سونىڭ ارقاسىندا ادامدار كىمدەردىڭ يسانىڭ ناعىز ٸزباسارى بولىپ، سۇيىسپەنشىلىكتىڭ قاينارى ەحوباعا شىنىمەن ەلىكتەيتىنىن كورە الادى (ەفەستىكتەرگە 5:1، 2). پاۋىل سۇيىسپەنشىلىگى بولماسا، وزىنەن ەش پايدا جوقتىعىن ايتقان (قورىنتتىقتارعا 1-حات 13:2). ولاي بولسا، ٴبارىمىز ٴبىر-ٴبىرىمىزدى «اۋىزبەن عانا ەمەس، ٸس جۇزىندە ٵرى شىن جۇرەكتەن سۇيەيىك»!