جاستار، ىبىلىسكە تويتارىس بەرىڭدەر!
«ٸبىلىستىڭ زىميان ٸس-ارەكەتتەرىنە تويتارىس بەرە الۋلارىڭ ٷشىن، قۇداي بەرگەن ساۋىت-سايمانمەن تۇگەل جابدىقتالىڭدار» (ەفەستىكتەرگە 6:11).
اندەر: 139، 55
1، 2. ا) جاستار نەنىڭ ارقاسىندا شايتانمەن جانە جىندارمەن شايقاستا جەڭىسكە جەتۋدە؟ (ماقالانىڭ باسىنداعى سۋرەتتى قارا.) ٵ) نە جايلى تالقىلايتىن بولامىز؟
ەلشى پاۋىل ماسىحشىلەردى ساربازدارعا تەڭەگەن. ٴبىز سوعىستا ٴجۇرمىز، ٵرى دۇشپاندارىمىز شىنىندا دا بار! ٴبىز ادامدارمەن ەمەس، شايتانمەن جانە جىندارمەن سوعىسامىز. مىڭداعان جىل بويى شايقاستا جۇرگەن ولار وتە مىقتى قارسىلاستار. سوندىقتان وسى سوعىستا بىزگە، اسىرەسە جاس بولساق، جەڭىسكە جەتۋ مۇمكىن ەمەستەي كورىنەتىن شىعار. جاستار وسىنداي كۇشتى جاۋلارمەن سوعىستا جەڭىپ شىعا الا ما؟ ٴيا، جەڭە الادى! ولار جەڭىپ تە ٴجۇر! نەنىڭ ارقاسىندا؟ ەحوبادان العان كۇشتىڭ ارقاسىندا. بۇعان قوسا، ولار جاقسى شىنىققان ساربازدار ىسپەتتى، «قۇداي بەرگەن ساۋىت-سايمانمەن تۇگەل جابدىقتالعان». وسىلايشا شايقاسقا ساقاداي ساي بولا الادى (ەفەستىكتەرگە 6:10—12 وقى).
2 پاۋىل بۇل مىسالدى كەلتىرگەن كەزدە ريمدىك ساربازداردىڭ ساۋىت-سايمانىن ويعا العان بولۋى مۇمكىن (ەلشىلەردىڭ ىستەرى 28:16). وسى ماقالادا سول كەرەمەت مىسالدى تالدايتىن بولامىز. مۇنىمەن قاتار رۋحاني ساۋىت-سايمانىمىزدىڭ ٵربىر بولىگىن كيىپ جۇرۋدىڭ قيىندىقتارى مەن پايداسى تۋرالى جاستار نە دەيتىنىن قاراستىرامىز.
رۋحاني ساۋىت-سايماننىڭ ٵربىر بولىگىن كيىپ جۇرسىڭ بە؟
«شىندىقتى بەلدىك ەتىپ تاعىڭدار»
3، 4. قاي ماعىنادا كيەلى كىتاپتاعى شىندىق ريمدىك ساربازدىڭ بەلدىگىنە ۇقسايدى؟
3 ەفەستىكتەرگە 6:14 وقى. ريمدىك ساربازدىڭ جالپاق مەتالل تاقتايشالارى بار بەلدىگى ونىڭ بەلىن قورعايتىن جانە اۋىر ساۋىتىن ٶز ورنىندا ۇستاپ تۇراتىن. سونداي-اق كەيبىر بەلدىكتەردىڭ سەمسەر مەن قانجاردى ٸلىپ قوياتىن جەرى بولاتىن. بەلدىگى بەكەم بۋىلعان سارباز شايقاسقا سەنىمدىلىكپەن اتتاناتىن.
قۇداي سوزىنەن بىلەتىن شىندىقتار ٴبىزدى جالعان ىلىمدەردەن قورعايدى
4 بەلدىك سياقتى، قۇداي سوزىنەن بىلگەن شىندىقتار ٴبىزدى جالعان ىلىمدەردەن قورعايدى (جوحان 8:31، 32؛ جوحاننىڭ 1-حاتى 4:1). كيەلى كىتاپتاعى شىندىقتاردى جاقسى كورە تۇسسەك، بىزگە قۇدايدىڭ ٵدىل پرينسيپتەرى بويىنشا ٶمىر ٴسۇرۋ، ياعني «ساۋىتىمىزدى» كيىپ ٴجۇرۋ وڭاي بولادى (ٴزابۇر 111:7، 8؛ جوحاننىڭ 1-حاتى 5:3). بۇعان قوسا، وسى شىندىقتاردى جاقسىراق تۇسىنگەن سايىن، ولاردى جاۋلارىمىزدان ودان بەتەر جاقسىراق قورعاي الامىز (پەتىردىڭ 1-حاتى 3:15).
5. نەگە ٵرقاشان دا شىندىقتى ايتۋىمىز كەرەك؟
5 قۇداي سوزىندەگى شىندىقتار ٴبىز ٷشىن ماڭىزدى بولعاندىقتان، ونداعى ايتىلعاندارعا مويىنسۇنىپ، ٵردايىم شىندىقتى ايتامىز. وتىرىك — شايتاننىڭ ەڭ ٴتيىمدى قارۋلارىنىڭ ٴبىرى. وتىرىك ادامنىڭ وزىنە دە، وعان سەنگەن ادامعا دا زالالىن تيگىزەدى (جوحان 8:44). سوندىقتان كەمەلسىز پەندە بولساق تا، ەشقاشان وتىرىك ايتپاۋعا بارىنشا تىرىسامىز (ەفەستىكتەرگە 4:25). بۇل وڭاي بولا قويمايتىن شىعار. 18 جاستاعى ابيگەيل بىلاي دەيدى: «كەيدە شىندىقتى ايتۋ ٴتيىمسىز كورىنۋى مۇمكىن. اسىرەسە وتىرىك ايتىپ، قيىن جاعدايدان سىتىلىپ شىعۋعا بولاتىن كەزدەرى». ولاي بولسا، ول نەگە ٵرقاشان دا شىندىقتى ايتۋعا تىرىسادى؟ «شىنشىل بولسام، ەحوبانىڭ الدىندا ار-ۇجدانىم تازا بولادى. اتا-انام مەن دوستارىم دا ماعان سەنىم ارتا الادى»،— دەيدى ول. ال 23 تەگى ۆيكتوريا بولسا بىلاي دەدى: «شىندىقتى ايتىپ، ٶز سەنىمىڭدى قورعاپ سويلەگەن كەزدە باسقالار ساعان جابىلىپ، تيىسە باستاۋى مۇمكىن. ٴبىراق سەن ٵردايىم مۇنىڭ كەرەمەت جەمىسىن كورەسىڭ: ٶز-وزىڭە سەنىمدىلىگىڭ ارتادى، ەحوباعا جاقىنداي تۇسەسىڭ جانە جاقىندارىڭنىڭ قۇرمەتىنە بولەنەسىڭ». ٵردايىم «شىندىقتى بەلدىك ەتىپ تاعىپ» جۇرۋدىڭ نەلىكتەن ماڭىزدى ەكەنىن تۇسىنەسىڭ بە؟
شىندىقتىڭ بەلدىگى (3—5 ابزاستاردى قارا)
«ادىلدىكتى ساۋىت قىلىپ كيىڭدەر»
6، 7. نەگە ادىلدىك ساۋىتقا تەڭەلەدى؟
6 ريمدىك ساربازدىڭ ساۋىتى ٴجيى كولدەنەڭ قيىلعان تەمىر جولاقتاردان جاسالعان. ولار ساربازدىڭ كەۋدەسىن اينالدىرا جاۋىپ تۇراتىنداي ەتىپ مايىستىرىلاتىن. تەمىر جولاقتاردى ٶزارا بىرىكتىرۋ ٷشىن، ولارعا ىلمەكتەر مەن توعالار ارقىلى بىلعارى باۋلار بايلاناتىن. يىعىنداعى تەمىر جولاقتارىن دا وسى بىلعارى بولشەكتەر ۇستاپ تۇراتىن. ساۋىت كيگەن سارباز ەركىن قيمىلداي المايتىن جانە وعان ۇستىندەگى تەمىر جولاقتاردىڭ ٶز ورنىندا تۇرعانىن ٴجيى تەكسەرىپ تۇرۋ كەرەك بولاتىن. ٴبىراق بۇل ساۋىت ونىڭ جۇرەگى مەن باسقا دا مۇشەلەرىن قورعاپ، سەمسەردىڭ ٴجۇزى مەن جەبەنىڭ ۇشىنان قالقالاپ تۇراتىن.
7 ەحوبانىڭ ٵدىل پرينسيپتەرى، ياعني ورناتقان نورمالارى وسىنداي ساۋىتقا ۇقسايدى. ولار ٴبىزدىڭ «جۇرەگىمىزدى» ياكي ىشكى بولمىسىمىزدى قورعايدى (ناقىل سوزدەر 4:23). سارباز ٶزىنىڭ تەمىر ساۋىتىن السىزدەۋ مەتالدان جاسالعان ساۋىتقا ەشقاشان ايىرباستاماس ەدى. ٴدال سولاي، ٴبىز ەشقاشان دا ەحوبانىڭ دۇرىس پەن بۇرىسقا قاتىستى نورمالارىن ٶزىمىزدىڭ جەكە وي-پىكىرىمىزگە ايىرباستامايمىز. ٶز جۇرەگىمىزدى قورعاۋعا ٴبىزدىڭ اقىل-پاراساتىمىز جەتپەيدى (ناقىل سوزدەر 3:5، 6). سول سەبەپتى «ساۋىتىمىز» جۇرەگىمىزدى قورعاپ تۇرعانىن ٴجيى تەكسەرىپ وتىرۋىمىز قاجەت.
8. ەحوبانىڭ نورمالارىنا نەگە مويىنسۇنۋىمىز كەرەك؟
8 كەيدە ساعان ەحوبانىڭ نورمالارى ەركىندىگىڭدى شەكتەپ، قالاعان نارسەڭدى ىستەۋگە كەدەرگى ەتەتىندەي كورىنە مە؟ 21 جاسار دەنيەل بىلاي دەيدى: «مۇعالىمدەرىم مەن سىنىپتاستارىم كيەلى كىتاپ نورمالارىن ۇستاناتىنىمدى مازاق ەتەتىن. سودان ٶز-وزىمە دەگەن سەنىمدىلىگىم شايقالىپ، ەڭسەم ٴتۇسىپ كەتكەن كەزدەر بولدى». ال قازىر ونىڭ كوزقاراسى قانداي؟ «ٴبىراق تۇبىندە ەحوبانىڭ نورمالارىن ۇستانۋدىڭ قانشالىقتى دۇرىس ەكەنىنە كوزىم جەتتى. قۇرداستارىمنىڭ كەيبىرى ەسىرتكى قابىلداي باستادى، باسقالارى مەكتەپتى تاستاپ كەتتى. وسىنداي كۇيگە جەتكەندەرى وتە وكىنىشتى. ەحوبا ٴبىزدى راسىندا دا قورعاپ جۇرەدى»،— دەيدى دەنيەل. ال مەديسون ەسىمدى 15 جاستاعى قىز: «ماعان ەحوبانىڭ نورمالارىن ۇستانىپ، ٶزىم قاتارلى جاستار كۇشتى، قىزىقتى دەپ سانايتىن نارسەلەردەن باس تارتۋ قيىن»،— دەيدى. وعان نە كومەكتەسەدى؟ «ەحوبانىڭ ەسىمىن الىپ جۇرگەنىمدى ەسىمە سالىپ تۇرامىن، ٵرى ازعىرۋلار شايتاننىڭ ماعان قاراي اتقان جەبەلەرى ەكەنىن ەسىمدە ساقتايمىن. ٵربىر كۇرەستى جەڭىپ شىققان كەزدە ىشتەي وزىمە قاتتى ريزا بولامىن»،— دەيدى ول.
ادىلدىكتىڭ ساۋىتى (6—8 ابزاستاردى قارا)
«اياق كيىمدەرىڭدى كيىپ، تاتۋلىق تۋرالى ىزگى حاباردى ۋاعىزداۋعا دايىن بولىڭدار»
9—11. ا) ماسىحشىلەر قانداي بەينەلى اياق كيىم كيەدى؟ ٵ) قينالماي ۋاعىزداۋعا بىزگە نە كومەكتەسەدى؟
9 ەفەستىكتەرگە 6:15 وقى. ريمدىك سارباز سوعىسقا اياق كيىمسىز اتتانا المايتىن. تابانى بىرنەشە قابات بىلعارىدان جاسالعان بۇل اياق كيىمدەر وتە مىقتى بولعان، ٵرى وتە ىڭعايلى ەدى. سونىڭ ارقاسىندا سارباز نىق قادام باسىپ، اياقتارى تايعانامايتىن.
10 ريمدىك ساربازدىڭ اياق كيىمى جاقسى شايقاسۋعا كومەكتەسكەن بولسا، ٴبىزدىڭ بەينەلى اياق كيىمىمىز «تاتۋلىق تۋرالى ىزگى حاباردى ۋاعىزداۋعا» كومەكتەسەدى (يشايا 52:7؛ ريمدىكتەرگە 10:15). دەسە دە كەيدە ۋاعىزداۋ ٷشىن زور باتىلدىق قاجەت. جاسى 20 عا كەلگەن بو بىلاي دەيدى: «بۇرىن سىنىپتاستارىما، ۇيالعاندىقتان بولار، ۋاعىزداۋعا قورقاتىنمىن. ٴبىراق سول كەزدە نە ٷشىن ۇيالعانىمدى تۇسىنبەيمىن. قازىر مەن ٶزىم سياقتى جاستارعا قۋانا-قۋانا ۋاعىزدايمىن».
11 كوپتەگەن ٴماسىحشى جاستار الدىن الا دايىندالىپ العاندا، ۋاعىزداۋعا قينالمايتىنىن بايقاعان ەكەن. سەن قالاي دايىندالا الاسىڭ؟ 16 جاستاعى جۋليا بىلاي دەيدى: «مەكتەپكە باراردا سومكەمە ادەبيەتتەر سالىپ الامىن. سىنىپتاستارىمنىڭ وي-پىكىرىن، نە نارسەگە سەنەتىندەرىن مۇقيات تىڭدايمىن. سوسىن ولارعا قالاي كومەكتەسۋگە بولادى دەپ ويلانامىن. وسىلاي دايىن جۇرسەم، ولارعا ناقتى پايداسىن تيگىزەتىن تاقىرىپتا سويلەسە الامىن». 23 جاسار ماككەنزي بىلاي دەيدى: «جىلى شىراي تانىتىپ، وزگەلەردى مۇقيات تىڭدايتىن بولساڭ، قۇرداستارىڭنىڭ قانداي قيىندىقتارعا كەزىگىپ جۇرگەنىن بىلە الاسىڭ. مەن جاستارعا ارناپ شىعارىلعان بارلىق مالىمەتتەرىمىزدى وقىپ وتىرامىن. سوندا كيەلى كىتاپتان نە jw.org تور بەكەتىمىزدەن ولارعا پايدالى بولاتىن مالىمەتتى كورسەتە الامىن». ۋاعىزداۋعا جاقسى دايىندالاتىن بولساڭ، بۇل اياعىڭا شاق كەلەتىن ىڭعايلى «اياق كيىم» كيىپ جۇرگەنمەن بىردەي بولادى.
اياق كيىمدى كيىپ، دايىن بولۋ (9—11 ابزاستاردى قارا)
«سەنىمنىڭ ۇلكەن قالقانى»
12، 13. شايتاننىڭ قانداي «وتتى جەبەلەرى» بار؟
12 ەفەستىكتەرگە 6:16 وقى. ريمدىك ساربازدىڭ ۇلكەن تىك ٴتورتبۇرىش پىشىندەس قالقانى بولعان. ول ونى يىعىنان تىزەسىنە دەيىن جاۋىپ، سەمسەر، نايزا مەن جەبەلەردەن قورعايتىن.
13 شايتان ساعان قانداي «وتتى جەبەلەرىن» اتۋى مۇمكىن؟ بالكىم، ول ساعان ەحوبا تۋرالى وتىرىكتى جاۋدىراتىن شىعار. ول سەنىڭ «ەحوبا مەنى جاقسى كورمەيدى» نەمەسە «مەنىمەن ەشكىمنىڭ شارۋاسى جوق» دەپ ويلاعانىڭدى قالايدى. 19 جاستاعى يدا بىلاي دەيدى: «ەحوبا مەنەن الىس، ول مەنىمەن دوس بولعىسى كەلمەيدى» دەگەن ويلار ساناما ٴجيى كەلەدى». سونداي كەزدە ول نە ىستەيدى؟ ول بىلاي دەپ ٴسوزىن جالعايدى: «قاۋىم كەزدەسۋلەرى سەنىمىمدى قاتتى نىعايتادى. بۇرىن قاۋىمدا وتىرىپ، ەشقانداي تۇسىنىكتەمە بەرمەيتىنمىن. ويتكەنى مەنىڭ نە ايتاتىنىم ەشكىمدى قىزىقتىرمايدى دەپ ويلاۋشى ەدىم. ٴبىراق قازىر كەزدەسۋلەرگە دايىندالىپ بارامىن جانە ەكى-ٷش رەت جاۋاپ بەرۋگە تىرىسامىن. بۇل مەن ٷشىن وڭاي ەمەس، ٴبىراق تۇسىنىكتەمە بەرگەن سوڭ ٶزىمدى الدەقايدا جاقسى سەزىنەمىن. باۋىرلاستار دا مەنى قاتتى جىگەرلەندىرەدى. ٵربىر كەزدەسۋدەن كەيىن ەحوبانىڭ مەنى جاقسى كورەتىنىنە كوز جەتكىزىپ قايتامىن».
14. يدانىڭ جاعدايىنان نە نارسەگە ۇيرەنەمىز؟
14 ساربازدىڭ قالقانىنىڭ كولەمى ەشقاشان وزگەرمەيتىن. الايدا يدانىڭ جاعدايىنان بىلگەنىمىزدەي، سەنىم ونداي ەمەس. سەنىمىمىز مولايا ما، الدە ازايا ما، نىعايا ما، الدە السىرەي مە — بۇل وزىمىزگە بايلانىستى (ماتاي 14:31؛ سالونيكالىقتارعا 2-حات 1:3). «سەنىمىمىزدىڭ قالقانى» ٴبىزدى قورعاۋ ٷشىن، ونى مولايتىپ، نىعايتا بەرۋىمىز كەرەك!
سەنىمنىڭ ۇلكەن قالقانى (12—14 ابزاستاردى قارا)
«قۇتقارىلۋدىڭ دۋلىعاسى»
15، 16. ٷمىتىمىز بەن دۋلىعانىڭ قانداي ۇقساستىعى بار؟
15 ەفەستىكتەرگە 6:17 وقى. ريمدىك ساربازدىڭ دۋلىعاسى ونىڭ باسىن، موينى مەن بەتىن قورعاپ تۇراتىن. كەيبىر دۋلىعالاردىڭ قولدا ۇستاپ جۇرۋگە ارنالعان ۇستاعىشى بولعان.
16 ساربازدىڭ ميىن قورعايتىن دۋلىعا ىسپەتتى، «قۇتقارىلۋعا دەگەن ٷمىتىمىز» وي-سانامىزدى قورعايدى (سالونيكالىقتارعا 1-حات 5:8؛ ناقىل سوزدەر 3:21). ٷمىت بىزگە نازارىمىزدى قۇدايدىڭ ۋادەلەرىنەن تايدىرماۋعا ٵرى قيىندىقتارىمىزعا بولا ەڭسەمىزدى تۇسىرمەۋگە كومەكتەسەدى (ٴزابۇر 27:1، 14؛ ەلشىلەردىڭ ىستەرى 24:15). الايدا ٷمىتىمىز ٴبىزدى قورعاسىن دەسەك، ول ٴبىز ٷشىن شىنايى بولۋ كەرەك. «دۋلىعامىزدى» قولدا ۇستاپ جۇرمەي، باسىمىزعا كيىپ الۋىمىز قاجەت!
17، 18. ا) شايتان قالاي ٴبىزدى الداپ، دۋلىعامىزدى شەشكىزىپ تاستاۋى مۇمكىن؟ ٵ) شايتانعا الدانبايتىنىمىزدى قالاي كورسەتە الامىز؟
17 شايتان قالاي ٴبىزدى الداپ، دۋلىعامىزدى شەشكىزىپ تاستاۋى مۇمكىن؟ ول يسانى قالاي ازعىرعانىن ەسكە تۇسىرەيىكشى. شايتان يسانىڭ بولاشاقتا ادامزاتقا بيلىك ەتەتىنىن بىلگەن. ٴبىراق الدىمەن يسا ازاپ شەگىپ، ٶلۋ كەرەك ەدى. سوسىن پاتشا بولۋ ٷشىن ەحوبا بەلگىلەگەن ۋاقىتتى كۇتۋ كەرەك بولاتىن. ال شايتان وعان بيلىككە ەرتەرەك قول جەتكىزۋدىڭ جولىن ۇسىندى. ەگەر يسا ٴبىر رەت قانا تابىنسا، شايتان ونى سول مەزەتتە الەمنىڭ بيلەۋشىسى ەتۋگە ۋادە بەردى (لۇقا 4:5—7). شايتان ەحوبانىڭ جاڭا دۇنيەدە ٴبىزدى كەرەمەت باتالارعا كەنەلتۋدى ۋادە ەتكەنىن دە بىلەدى. ٴبىراق بىزگە بۇنىڭ جۇزەگە اسۋىن كۇتۋ كەرەك، ٵرى سول ارالىقتا كوپ قيىندىق كورۋىمىز مۇمكىن. سوندىقتان شايتان بىزگە قازىر-اق تىنىش تا جايلى ٶمىر كەشۋدى ۇسىنادى. ول ٴبىزدىڭ ٴبىرىنشى كەزەكتە ٶز ىڭعايىمىزدى ويلاپ، قۇداي پاتشالىعىن ەكىنشى ورىنعا ىسىرعانىمىزدى قالايدى (ماتاي 6:31—33).
18 شايتانعا الدانبايتىن ٴماسىحشى جاستار كوپتەپ تابىلادى. مىسالى، 20 جاسار كيانا: «بارلىق قيىندىقتارىمىزدى شەشە الاتىن تەك قۇداي پاتشالىعى ەكەنىن بىلەمىن»،— دەيدى. ٷمىتى ونىڭ ويى مەن ٶمىر سالتىنا قالاي اسەر ەتەدى؟ بۇل وعان وسى دۇنيەدەگى نارسەلەردىڭ ٴبارى دە ۋاقىتشا ەكەنىن ەسىنە سالىپ تۇرادى. بار كۇشىن وسى دۇنيەدە ٴمانساپ قۋۋعا سارپ ەتپەي، كيانا ۋاقىتى مەن كۇشىن ەحوباعا قىزمەت ەتۋگە ارناپ ٴجۇر.
قۇتقارىلۋدىڭ دۋلىعاسى (15—18 ابزاستاردى قارا)
«رۋحتىڭ سەمسەرى» — قۇداي ٴسوزى
19، 20. قۇداي ٴسوزىن قولدانۋداعى شەبەرلىگىمىزدى قالاي ارتتىرا الامىز؟
19 ريمدىك ساربازداردىڭ سەمسەرىنىڭ ۇزىندىعى شامامەن 50cm بولاتىن. ولار سەمسەرلەرىن شەبەر قولداناتىن، سەبەبى ونىمەن كۇن سايىن جاتتىعاتىن.
20 ەلشى پاۋىل قۇداي ٴسوزىن سەمسەرگە تەڭەگەن. ونى بىزگە ەحوبا بەرگەن. ٴبىراق نانىمدارىمىزدى قورعاي ٴبىلۋ ٷشىن جانە ٶز وي قالپىمىزدى تۇزەتۋ ٷشىن ونى شەبەر قولدانۋدى ۇيرەنۋىمىز كەرەك (قورىنتتىقتارعا 2-حات 10:4، 5؛ تىموتەگە 2-حات 2:15). سەن شەبەرلىگىڭدى قالاي ارتتىرا الاسىڭ؟ 21 جاستاعى سەباستيان بىلاي دەيدى: «كيەلى كىتاپتان وقىعان ٵر تاراۋدان ٴبىر تارماق جازىپ وتىرامىن. وسىلاي سۇيىكتى تارماقتارىمنىڭ ٴتىزىمىن جاساپ ٴجۇرمىن». بۇلاي ىستەگەنى وعان ەحوبانىڭ وي قالپىن جاقسىراق تۇسىنۋگە كومەكتەسۋدە. دەنيەل بولسا بىلاي دەپ قوستى: «كيەلى كىتاپتى وقىعاندا، مەن قىزمەتتە ادامدارعا پايدالى بولاتىن تارماقتاردى ىزدەيمىن. بايقاعانىم، ادامدار كيەلى كىتاپ جايلى شابىتتانا سويلەگەنىڭدى جانە ولارعا كومەكتەسۋ ٷشىن بارىڭدى سالىپ تۇرعانىڭدى كورسە، سەنى جاقسى تىڭدايدى».
رۋحتىڭ سەمسەرى (19، 20-ابزاستاردى قارا)
21. شايتان مەن جىن-پەرىلەردەن نەگە قورىقپاۋىمىز كەرەك؟
21 وسى ماقالاداعى جاستاردىڭ مىسالىنان كورگەنىمىزدەي، شايتان مەن جىن-پەرىلەردەن قورقۋدىڭ ەش قاجەتى جوق. ولاردىڭ كۇشى زور ەكەنى راس، ٴبىراق ەحوبادان كۇشتى ەمەس. بۇعان قوسا، ولار ماڭگىلىك بويى تىرشىلىك ەتپەيدى. بولاشاقتا تۇڭعيىققا قامالىپ، ٴماسىحتىڭ مىڭجىلدىق پاتشالىعى كەزىندە ەشبىر جانعا زيان كەلتىرە المايدى. ال سودان سوڭ جويىلادى (ايان 20:1—3، 7—10). ٴبىز جاۋىمىزدى، ونىڭ ايلا-امالدارى مەن كوزدەگەن ماقساتىن بىلەمىز. ەحوبانىڭ كومەگىمەن، ٴبىز وعان تويتارىس بەرە الامىز!