13-زەرتتەۋ ماقالاسى
ەحوبا ٴسىزدى قورعايدى
«يەمىز سوزىنە ادال، ول بەرىك تۇرۋلارىڭ ٷشىن كۇش بەرىپ، سەندەردى زۇلىمنان ساقتايدى» (سال. 2-ح. 3:3).
124-ٵن ٵردايىم ادالدىق تانىتايىق
اڭداتپاa
1. يسا نەلىكتەن ەحوبادان شاكىرتتەرىن قورعاۋدى سۇرادى؟
ولەر الدىنداعى ٴتۇنى يسا شاكىرتتەرىنىڭ بولاشاعى تۋرالى ويلادى. جاقسى كورەتىن وسى دوستارىن الدا نە كۇتىپ تۇرعانىن بىلگەندىكتەن، يسا اكەسىنە: «ولاردى... زۇلىمنان قورعاي كور»،— دەپ جالبارىندى (جوح. 17:14، 15). يسا كوككە ورالعاننان كەيىن دە، شايتان ەحوبانىڭ قىزمەتشىلەرىنە شابۋىلداي بەرمەك ەدى. سوندىقتان ولار ەحوبانىڭ قورعاعانىنا مۇقتاج بولدى.
2. ەحوبا دۇعالارىمىزعا جاۋاپ بەرەتىنىنە نەگە سەنىمدىمىز؟
2 ەحوبا ٶز ۇلىن جاقسى كورگەندىكتەن، ونىڭ دۇعاسىنا جاۋاپ بەردى. ەگەر ٴبىز ەحوباعا ۇنامدى بولۋعا بارىنشا ۇمتىلساق، ول ٴبىزدى دە جاقسى كورەتىن بولادى جانە دۇعالارىمىزعا جاۋاپ بەرىپ، قورعايدى. قامقور وتاعاسى رەتىندە ەحوبا ٶز ۇل-قىزدارىنىڭ قامىن ويلايدى. ول ٴسۇيۋشى اكە دەگەن اتىنا كىر كەلۋىنە ەشقاشان جول بەرمەيدى.
3. نەگە ٴبىز ەحوبانىڭ ٴبىزدى قورعاعانىنا مۇقتاجبىز؟
3 ٴبىز اسىرەسە قازىر ەحوبانىڭ ٴبىزدى قورعاعانىنا مۇقتاجبىز. ويتكەنى شايتان كوكتەن جەرگە لاقتىرىلعان ٵرى «قاتتى اشۋلى» (ايان 12:12). ونىڭ جەتەگىندەگى كەيبىر ٴدىندار ادامدار ٴبىزدى قۋدالاپ، وسىلاي «قاسيەتتى قىزمەت اتقارىپ جاتىرمىز» دەپ ويلايدى (جوح. 16:2). ال قۇدايعا سەنبەيتىن ادامدار بولسا ولاردىڭ اعىمىمەن جۇرمەگەنىمىز ٷشىن ٴبىزدى جەك كورىپ، قارسى شىعادى. كىم قانداي سەبەپپەن قۋدالاماسىن، ٴبىز ەش قورىقپايمىز. ويتكەنى كيەلى كىتاپتا: «يەمىز سوزىنە ادال، ول بەرىك تۇرۋلارىڭ ٷشىن كۇش بەرىپ، سەندەردى زۇلىمنان ساقتايدى»،— دەلىنگەن (سال. 2-ح. 3:3). سوندا قۇداي ٴبىزدى قالاي ساقتايدى؟ مۇنىڭ ەكى جولى بار.
ەحوبا ٴبىزدى ساۋىت-سايمانمەن جابدىقتايدى
4. ەحوبا ٴبىزدى قورعاۋ ٷشىن نەمەن جابدىقتادى؟ (ەفەستىكتەرگە 6:13—17)
4 شايتاننىڭ شابۋىلدارىنان قورعانۋىمىز ٷشىن ەحوبا ٴبىزدى ساۋىت-سايمانمەن جابدىقتادى (ەفەستىكتەرگە 6:13—17 وقىڭىز). بۇل رۋحاني ساۋىت-سايماننىڭ ٵرقايسىسى مىقتى ٵرى قىزمەتى وتە باعالى. ٴبىز ولاردى تۇگەلىمەن كيىپ، شەشپەي جۇرسەك قانا امان جۇرەمىز. قازىر بۇل ساۋىت-سايماننىڭ ٵرقايسىسى نەنى بىلدىرەتىنىن قاراستىرايىق.
5. شىندىقتىڭ بەلدىگى دەگەن نە جانە ونى نە ٷشىن تاعىپ ٴجۇرۋىمىز كەرەك؟
5 شىندىقتىڭ بەلدىگى دەگەن — كيەلى كىتاپتا جازىلعان شىندىق سوزدەر. بۇل بەلدىكتى تاعىپ جۇرگەنىمىز نەگە ماڭىزدى؟ ويتكەنى «وتىرىكتىڭ اكەسى» شايتان سان عاسىرلار بويى نەشە ٴتۇرلى وتىرىگىن تاراتىپ، «بۇكىل جەرجۇزىن اداستىرىپ» كەلەدى (جوح. 8:44؛ ايان 12:9). ٴبىراق كيەلى جازبالارداعى شىندىقتار ونىڭ وتىرىگىنە يلانىپ، الدانىپ قالۋدان ساقتايدى. بۇل بەلدىكتى تاعىپ الۋ ٷشىن نە ىستەۋىمىز كەرەك؟ ەحوبا تۋرالى شىندىقتى ٴبىلۋىمىز كەرەك. وعان «كيەلى رۋحقا جانە شىندىققا» ساي عيبادات ەتۋىمىز قاجەت جانە بارلىق جاعدايدا ادال ٴجۇرىپ-تۇرۋىمىز كەرەك (جوح. 4:24؛ ەفەس. 4:25؛ ەۆر. 13:18).
بەلدىك: قۇداي سوزىندەگى شىندىقتار
6. ادىلدىك ساۋىتى دەگەن نە جانە ونى نە ٷشىن كيىپ ٴجۇرۋىمىز كەرەك؟
6 ادىلدىك ساۋىتى دەگەنىمىز ەحوبانىڭ ٵدىل تالاپتارىن بىلدىرەدى. بۇل ساۋىت ٴبىزدى نەدەن قورعايدى؟ كادىمگى ساۋىت ساربازدىڭ جۇرەگىن وق پەن نايزادان قورعايتىنى ىسپەتتى، ادىلدىك ساۋىتى بەينەلى جۇرەگىمىزدى وسى دۇنيەنىڭ جامان ىقپالىنان قورعايدى (ناق. س. 4:23). ەحوبا ٴبىزدىڭ ونى تۇتاس جۇرەكپەن جاقسى كورىپ، تۇتاس جۇرەكپەن قىزمەت ەتكەنىمىزدى قالايدى (مات. 22:36، 37). ال شايتان ٴبىزدىڭ وسى دۇنيەدەگى ەحوبا جەك كورەتىن نارسەلەردى جاقسى كورىپ، جۇرەگىمىزدىڭ ەكىگە ٴبولىنىپ كەتكەنىن كوكسەيدى (جاق. 4:4؛ جوح. 1-ح. 2:15، 16). ال ەگەر بۇل امالى ىسكە اسپاسا، ول ەحوبانىڭ تالابىن بۇزۋىمىز ٷشىن قورقىتىپ، كۇش كورسەتۋگە تىرىسادى.
ساۋىت: ەحوبانىڭ ٵدىل تالاپتارى
7. ادىلدىك ساۋىتىن كيىپ جۇرگەنىمىزدى نەدەن بىلەمىز؟
7 ەحوبانىڭ دۇرىس پەن بۇرىسقا قاتىستى تالاپتارىنا مويىنسۇنىپ، سولار بويىنشا ٶمىر سۇرسەك، ادىلدىك ساۋىتىن كيىپ جۇرگەنىمىز (ٴزاب. 97:10). كەيبىرەۋلەر ەحوبانىڭ تالاپتارىن تىم قاتال دەپ ويلاۋى مۇمكىن. ٴبىراق كيەلى كىتاپتىڭ پرينسيپتەرى بويىنشا ٶمىر ٴسۇرۋدى دوعارساق، وندا قىزۋ مايداننىڭ قاق ورتاسىندا ٴجۇرىپ، ساۋىتىن تىم اۋىر عوي دەپ شەشىپ تاستاعان ساربازداي بولار ەدىك. بۇلاي ەتۋ ناعىز اقىماقتىق! ٴبىراق ٴبىز ەحوبانى سۇيگەندىكتەن، ونىڭ وسيەتتەرىن ورىنداۋدى قيىن دەپ سانامايمىز، قايتا، ٶمىرىمىزدى ساقتايتىنىن تۇسىنەمىز (جوح. 1-ح. 5:3).
8. اياقكيىمىمىزدى كيىپ، ىزگى حاباردى ۋاعىزداۋعا دايىن بولۋ دەگەن نەنى بىلدىرەدى؟
8 پاۋىل ٴبىزدى اياقكيىمىمىزدى كيىپ، تاتۋلىق تۋرالى ىزگى حاباردى ۋاعىزداۋعا دايىن بولۋعا شاقىرعان. دەمەك، ٴبىز قۇداي پاتشالىعى تۋرالى ىزگى حاباردى ايتۋعا قاشان دا دايىن تۇرۋىمىز كەرەك. وزگەلەرگە ۋاعىزداعاندا ٶزىمىزدىڭ دە سەنىمىمىز قاتايادى. جەر-جەردەگى ەحوبا كۋاگەرلەرىنىڭ مۇمكىندىكتى قالت جىبەرمەي ىزگى حاباردى ۋاعىزداپ جۇرگەنىن كورگەندە، قاتتى قۋانامىز. ولار جۇمىستا، مەكتەپتە، ىسكەرلىك اۋماقتاردا، ۇيمە-ٷي نە بازارلاپ جۇرگەندە، تۋىستارىنا قوناققا بارعاندا، تانىستارىمەن سويلەسىپ قالعاندا، ٴتىپتى ۇيىنەن شىعا الماعان كەزدە دە كۋالىك بەرۋدى دوعارمايدى. ەگەر قورقىنىشقا بوي الدىرىپ، ۋاعىزداۋدى دوعارساق، سوعىس الاڭىندا اياقكيىمىن شەشىپ تاستاعان ساربازعا ۇقساپ قالامىز. مۇنداي ساربازدىڭ اياعى تەز-اق جارالانىپ، ٶزىن جاۋدان قورعاي الماي قالادى. قولباسشىسىنىڭ دا نۇسقاۋلارىن ورىنداي المايدى.
اياقكيىم: ىزگى حاباردى ۋاعىزداۋعا دايىن بولۋ
9. سەنىمنىڭ ۇلكەن قالقانى بىزگە نە ٷشىن قاجەت؟
9 سەنىمنىڭ ۇلكەن قالقانى ەحوباعا دەگەن سەنىمىمىزدى بىلدىرەدى. ٴبىز ەحوبانىڭ بارلىق ۋادەسىندە تۇراتىنىنا سەنىمدىمىز. وسى سەنىمنىڭ ارقاسىندا «زۇلىمنىڭ وتتى جەبەلەرىنىڭ ٴبارىن ٶشىرىپ تاستاي الامىز». سەنىمنىڭ ۇلكەن قالقانىن ۇنەمى ۇستاپ جۇرەتىن بولساق، جولدان تايعانداردىڭ جالعان ىلىمدەرىنە الدانىپ قالمايمىز جانە وزگەلەردىڭ اشتى مىسقىلدارىنا كوڭىلىمىزدى تۇسىرمەيمىز. مىسالى، مەكتەپتە نە جۇمىستا سەنىمىمىزدە بەرىك تۇرعاندا، وسى قالقانىمىزدىڭ بار ەكەنى كورىنەدى (پەت. 1-ح. 3:15). جالاقىسى جوعارى، ٴبىراق عيباداتىمىزعا كەدەرگى بولاتىن جۇمىستان باس تارتقانىمىز دا وسى سەنىمنىڭ كورىنىسى (ەۆر. 13:5، 6). قارسىلىقتارعا قاراماي، ەحوباعا قىزمەت ەتە بەرگەندە دە وسى قالقاندى مىقتاپ ۇستاپ جۇرگەنىمىزدى كورسەتەمىز (سال. 1-ح. 2:2). ال سەنىمىمىز بولماسا، باسقالار ەحوبانىڭ زاڭ-تالاپتارىنان اتتاي سالۋعا يتەرمەلەگەندە، كونىپ قالامىز.
قالقان: ەحوبا مەن ونىڭ ۋادەلەرىنە دەگەن سەنىم
10. قۇتقارىلۋدىڭ دۋلىعاسى دەگەن نە جانە نەگە ٴبىز ونى كيىپ ٴجۇرۋىمىز كەرەك؟
10 قۇتقارىلۋدىڭ دۋلىعاسى دەگەن — ەحوبا بەرىپ وتىرعان ٷمىت. ياعني ونىڭ ەركىن ورىنداساق، ٴبىزدى جارىلقايتىنىنا جانە جەر قۇشساق، قايتا تىرىلتەتىنىنە دەگەن ٷمىتىمىز (سال. 1-ح. 5:8؛ ٴتىم. 1-ح. 4:10؛ تيت. 1:1، 2). دۋلىعا ساربازدىڭ باسىن قورعايتىنداي، بۇل ٷمىت تە ٴبىزدىڭ وي-سانامىزدى قورعايدى. قالاي؟ قۇتقارىلۋ دۋلىعاسى قيىنشىلىقتارعا كەزىككەندە مويىماي، قۇدايدىڭ ۋادەلەرىن ويدا ۇستاۋعا كومەكتەسەدى. بۇل دۋلىعانى كيىپ جۇرگىمىز كەلسە، كوزقاراسىمىز ٵردايىم قۇدايدىكىندەي بولۋ كەرەك. مىسالى، ٴبىز بۇگىن بار، ەرتەڭ جوق بايلىققا ٷمىت ارتامىز با، الدە قۇدايعا ما؟ (ٴزاب. 26:2؛ 104:34؛ ٴتىم. 1-ح. 6:17).
دۋلىعا: ماڭگىلىك ومىرگە دەگەن ٷمىت
11. رۋحتىڭ سەمسەرى دەگەن نە جانە ونى نە ٷشىن قولدانۋىمىز كەرەك؟
11 رۋحتىڭ سەمسەرى دەگەن — قۇداي ٴسوزى كيەلى كىتاپ. ول كەز كەلگەن وتىرىكتىڭ بەتىن اشادى ٵرى ادامداردى جالعان ىلىمدەردىڭ جانە زياندى ادەتتەردىڭ قۇلدىعىنان بوساتا الادى (قور. 2-ح. 10:4، 5؛ ٴتىم. 2-ح. 3:16، 17؛ ەۆر. 4:12). ٴبىز جەكە زەرتتەگەندە، قۇدايدىڭ ۇيىمى بەرىپ جاتقان ٴتالىمدى العاندا، وسى سەمسەردى قولدانىپ جاتتىعامىز (ٴتىم. 2-ح. 2:15). ەحوبا ٴبىزدى قورعاۋ ٷشىن ساۋىت-سايماننان بولەك تاعى ٴبىر مىقتى كومەك بەرگەن. ول نە؟
سەمسەر: قۇداي ٴسوزى كيەلى كىتاپ
شايقاستا جالعىز ەمەسپىز
12. بىزگە تاعى كىمدەردىڭ كومەگى قاجەت جانە نەگە؟
12 «جالعىز باتىر جاۋعا جوق» دەمەكشى، جالعىز سارباز جاۋدىڭ قالىڭ نوپىرىنە ٴبىر باسىمەن قارسى تۇرا المايدى. وعان وزگە ساربازداردىڭ كومەگى قاجەت. سول سياقتى ٴبىز دە شايتان مەن ونىڭ جاعىنداعىلارعا جالعىز ٶزىمىز توتەپ بەرە المايمىز. بىزگە باۋىرلاستارىمىزدىڭ كومەگى قاجەت. وسى ورايدا ەحوبا بىزگە تىرەك بولاتىن دۇنيەجۇزىلىك «باۋىرلاستىقتى» سيلادى (پەت. 1-ح. 2:17 ٴسىلت.).
13. ەۆرەيلەرگە 10:24، 25 تەن كورىنەتىندەي، قاۋىم كەزدەسۋلەرىنىڭ پايداسى قانداي؟
13 ٴبىز باۋىرلاستىعىمىزدىڭ كومەگىن قاۋىم كەزدەسۋلەرىندە كورەمىز (ەۆرەيلەرگە 10:24، 25 وقىڭىز). بارلىعىمىزدىڭ دا جىگەرىمىز جاسيتىن كەزدەر بولادى. وسىنداي كەزدەرى قاۋىم كەزدەسۋىنە بارعاندا ٴبىر مارقايىپ قالامىز. شىن جۇرەكتەن ايتىلعان تۇسىنىكتەمەلەردى، كيەلى كىتاپقا نەگىزدەلگەن باياندامالاردى تىڭداعاندا جانە تاپسىرمالاردى كورگەندە قاتتى جىگەرلەنىپ، ەحوباعا ٵرى قاراي دا قىزمەت ەتكىمىز كەلىپ كەتەدى. قاۋىمعا دەيىن جانە كەيىن باۋىرلاستارمەن ارالاسقان كەزدە دە ٴبىر قاناتتانىپ قالامىز (سال. 1-ح. 5:14). سونداي-اق قاۋىمداعى باۋىرلاستارعا جاقسىلىق جاساپ، ٶزىمىز سودان قۋانىش الامىز (ەل. ٸس. 20:35؛ ريم. 1:11، 12). كەزدەسۋلەرىمىزدىڭ كومەگى بۇل عانا ەمەس. قاۋىمدا ٴبىز جاقسى ۋاعىزداۋدى، جاقسى تالىمگەر بولۋدى ۇيرەنەمىز. مىسالى، «ٴتالىم بەرۋ قۇرالدارىن» قولدانىپ جاتتىعامىز. ەندەشە، قاۋىم كەزدەسۋلەرىنە الدىن الا جاقسىلاپ دايىندالىڭىز. كەزدەسۋدە باعدارلامانى مۇقيات تىڭداڭىز. ال قاۋىمنان كەيىن بىلگەن-تۇيگەندەرىڭىزدى قولدانىڭىز. سوندا ٴسىز قارۋ-جاراعى سايما-ساي، ٴماسىحتىڭ ابدەن شىنىققان «جاقسى ساربازى» بولاسىز (ٴتىم. 2-ح. 2:3).
14. ٴبىزدىڭ جاعىمىزدا تاعى كىمدەر بار؟
14 ٴبىزدىڭ جاعىمىزدا كۇش-قۋاتى وراسان زور ميلليونداعان پەرىشتە بار ەكەنىن دە ۇمىتپايىق. ٴبىر پەرىشتەنىڭ ٶزى قانداي كۇشكە يە ەكەنىن ويلاپ كورىڭىزشى! (يشايا 37:36). ال ەندى پەرىشتەلەردىڭ قالىڭ اسكەرى نە ىستەي الاتىنىن ويلاپ كورىڭىز. ەحوبانىڭ بۇل قۋاتتى اسكەرىنە ادام بالاسى تۇگىلى جىن-پەرىلەر دە قارسى تۇرا المايدى. «قاسىڭدا ەحوبا باردا، جىعا الماس ەڭ كۇشتى جاۋ دا» دەگەن ٴسوز راس-اق! (بي. 6:16). سوندىقتان ارىپتەسىڭىز، سىنىپتاسىڭىز نە سەنبەيتىن تۋىسىڭىز رۋحىڭىزدى كۇيرەتەتىن ٴبىر نارسە ايتسا نە ىستەسە، وسى سوزدەردى ەستە ۇستاڭىز. بۇل شايقاستا جالعىز ەمەس ەكەنىڭىزدى ۇمىتپاڭىز. ەحوبانىڭ نۇسقاۋىمەن جۇرگەندىكتەن، جەڭىپ شىعاتىنىڭىزعا سەنىمدى بولىڭىز!
ەحوبا ٴسىزدى الداعى ۋاقىتتا دا قورعاماق
15. يشايا 54:15، 17 دەگى سوزدەردى ەسكەرسەك، نەگە ۋاعىز ٸسىن ەشكىم توقتاتا المايدى؟
15 شايتان بيلەگەن مىنا دۇنيەنىڭ ٴبىزدى جەك كورۋىنە سەبەپتەرى كوپ. ويتكەنى ساياساتقا ارالاسپايمىز، قولىمىزعا قارۋ المايمىز، قۇدايدىڭ ەسىمىن جاريالايمىز، ادامزاتقا بەيبىتشىلىكتى تەك قۇداي پاتشالىعى اكەلەدى دەيمىز. سونداي-اق قۇدايدىڭ ٵدىل تالاپتارىنا ساي ٶمىر سۇرەمىز جانە وسى دۇنيەنىڭ بيلەۋشىسى ارسىز وتىرىكشى، قانىشەر ەكەنىن اشكەرەلەيمىز (جوح. 8:44). بۇل دۇنيە تۇبىندە جويىلاتىنىن دا ايتامىز. ٴبىراق شايتان دا، ونىڭ جاقتاستارى دا ەشقاشان اۋزىمىزدى بۋىپ، بايلاپ تاستاي المايدى. ٴبىز كەز كەلگەن مۇمكىندىكتى پايدالانىپ، ەحوبا قۇدايىمىزدى ماداقتاي بەرەمىز. شايتان قانشالىقتى كۇشتى بولسا دا ۋاعىز ٸسىنىڭ كەڭ تارالۋىن ەش توقتاتا المادى. ويتكەنى بۇل ٸستىڭ ارتىندا تۇرعان — ەحوبا (يشايا 54:15، 17 وقىڭىز).
16. زور الاپاتتا ەحوبا حالقىن قالاي قۇتقارادى؟
16 الدا كەلە جاتقان زور الاپاتتا ەحوبا ٴبىزدى ەكى مارتە قۇتقارىپ قالادى. بىرىنشىدەن، جەرجۇزىنىڭ پاتشالارى ۇلى بابىلدى، ياعني جالعان دىندەر يمپەرياسىن جويعاندا، ول ادال قىزمەتشىلەرىن ساقتاپ قالادى (ايان 17:16—18؛ 18:2، 4). ەكىنشىدەن، شايتاننىڭ دۇنيەسىنىڭ قالعان بولىگىن ەحوبا ارماگەددوندا تاس تالقان ەتكەندە، ٶزىنىڭ حالقىن تاعى ٴبىر رەت قورعاپ قالادى (ايان 7:9، 10؛ 16:14، 16).
17. ەحوبامەن بىرگە جۇرگەنىمىز نەگە ماڭىزدى؟
17 ەحوبامەن بىرگە بولساق، شايتان بىزگە وڭالماستاي سوققى بەرە المايدى. كەرىسىنشە، وڭالماستاي سوققى الاتىن — سول شايتاننىڭ ٶزى (ريم. 16:20). ەندەشە، ساۋىت-سايمانىڭىزدى تۇگەلىمەن كيىپ الىڭىز، ونى ەشقاشان شەشپەڭىز! شايقاسقا جالعىز شىقپاڭىز. باۋىرلاستارىڭىزعا كومەكتەسىڭىز. ەحوبانىڭ نۇسقاۋلارىنا قۇلاق اسىڭىز. سوندا كوكتەگى ٴسۇيۋشى اكەڭىز سىزگە كۇش-قۋات بەرىپ، مىندەتتى تۇردە قورعايدى! (يشايا 41:10).
149-ٵن جەڭىس ٵنى
a ەحوبا بىزگە كۇش بەرىپ نىعايتاتىنىن، ونىمەن قارىم-قاتىناسىمىزعا زيان تيگىزەتىن كەز كەلگەن نارسەدەن قورعايتىنىن ۋادە ەتەدى. سوندا ول ٴبىزدى نەدەن قورعايدى جانە قالاي قورعايدى؟ ول ٴبىزدى قورعاۋ ٷشىن ٴبىز نە ىستەۋىمىز كەرەك؟ بۇل سۇراقتاردىڭ جاۋابىن وسى ماقالادان بىلەمىز.